Pagkawara kan Tiwala kan mga Tawo sa mga Pulitiko—Ano an Sinasabi kan Bibliya?

Sa taon 2024, magkakaigwa nin mas dakul na eleksiyon na mangyayari sa laog sana nin sarong taon sa bilog na kinaban. Pero, dakul na tawo an nawawaran na nin tiwala sa mga pulitiko.

• Sa sarong surbey, mayoriya kan mga Amerikano an nagsabi na “kadaklan sa mga pulitiko pinapahiro nin makasadiring mga dahilan” imbes na an kagustuhan na maglingkod sa mga tawo.a—Pew Research Center, Setyembre 19, 2023.

Kadaklan man sa mga hoben an mayo nang tiwala sa mga pulitiko.

• “May pakiaram man an mga tin-edyer sa mga isyung nangyayari ngunyan, pero sigun sa mga surbey, sinasabi ninda na dai kayang solusyunan kan mga pulitiko an mga importanteng problema ninda.”—The New York Times, Enero 29, 2024.

• “An mga hoben mas nagtitiwala pa sa mga YouTuber kisa sa mga pulitiko, an sabi kan sarong survey.”—The Korea Times, Enero 22, 2024.

Makakapagtiwala daw kita sa mga pulitiko para sa mas marahay na puturo? Siisay an puwede tang pagtiwalaan?

Mag-ingat kun siisay an pagtitiwalaan mo

Tama lang na magin maingat an mga tawo kun siisay an pagtitiwalaan ninda. Sinasabi kan Bibliya na “an tawong inosente sa buhay pinapaniwalaan an lambang tataramon, pero an saro na alisto an isip pinag-iisipan an lambang lakad.”—Talinhaga 14:15.

• Para matabangan ka kun baga tama o sala an mga impormasyon na nakukua mo, basahon an artikulong “Mag-ingat sa Salang Impormasyon.”

Saro pa, dawa an pinakaonesto saka may marahay man na intensiyon na mga pulitiko, limitado sana an magigibo. Iyan an dahilan kaya nagpapatanid an Bibliya:

• “Dai kamo magtiwala sa mga respetadong tawo; ni sa aki nin tawo, na dai makakapagligtas.”—Salmo 146:3, nota sa ibaba.

Sarong lider na mapagtitiwalaan mo

Sinasabi kan Bibliya na nagtalaga an Diyos nin sarong pinaka may kakayahan asin pinakamapagtitiwalaan na lider: Si Jesu-Cristo. (Lucas 1:32, 33) Si Jesus an Hadi kan Kahadian nin Diyos, na sarong gobyerno na namamahala sa langit.—Mateo 6:10.

• Aramon kun taano ta makakapagtiwala ka ki Jesus asin kun ano an gigibuhon niya para solusyunan an mga problemang inaatubang ta. Basahon an mga artikulong “Siisay an Hadi sa Kahadian nin Diyos?” asin “Ano an Gigibuhon kan Kahadian nin Diyos?”