Gurano Kadakul an mga Saksi ni Jehova sa Bilog na Kinaban?

Paano nindo binibilang an saindong mga miyembro?

An mga naghuhulit sana kan maugmang bareta kan Kahadian nin Diyos an binibilang mi na mga Saksi ni Jehova. (Mateo 24:14) Kaiba digdi an mga bawtisadong Saksi asin idtong mga kuwalipikado nang maghulit dawa dai pa sinda bawtisado.

Kaipuhan daw na magtao nin donasyon para maibilang na Saksi?

Dai. Dai kaipuhan an donasyon para magin Saksi ni Jehova an saro o matawan nin partikular na asignasyon o pribilehiyo sa organisasyon. (Gibo 8:18-20) Sa katunayan, dakul sa nagtatao nin donasyon an dai nagpapabisto. Itinatao kan lambang Saksi an saindang panahon, kusog, asin kuwarta para sa samong pambilog na kinaban na gibuhon depende sa saindang kakayahan asin kamugtakan.​—2 Corinto 9:7.

Paano nindo naaaraman kun pira an aktibong naghuhulit?

Kada bulan, nagrereport an mga Saksi kan saindang nagibong paghuhulit sa saindang lokal na kongregasyon. Gikan sa buot na ginigibo an report na ini.

Pinag-iiriba an mga report kan bilog na kongregasyon, asin an total kaiyan ipinapadara sa sangang opisina. Ipinapadara man kan sangang opisina sa samuyang world headquarters an total na mga report kan kada nasyon o teritoryo.

Sa katapusan kan kada taon nin paglilingkod,a naaaraman an pinakahalangkaw na bilang kan mga Saksi sa kada nasyon sa taon na idto. Pinag-iiriba an mga ini para maaraman an bilang kan mga Saksi sa bilog na kinaban. An detalyadong report kan kada nasyon mahihiling sa samuyang website sa seksiyon na “Bilog na Kinaban.” Napapakusog kami kan mga report na ini, kun paanong napakusog man kan arog kaining mga report an inot na mga Kristiyano.​—Gibo 2:41; 4:4; 15:3.

Kaiba daw sa bilang idtong mga nakikiasosyar sa saindong organisasyon pero dai naghuhulit?

Maski ngani dai mi sinda iiniiba sa bilang, inaako mi sinda sa samong mga kongregasyon. An dakul sa sainda nag-aatender sa taunan na pagselebrar kan Memoryal kan kagadanan ni Cristo, asin naaaraman kun pira sinda paagi sa pagbawas kan aktuwal na bilang kan mga Saksi sa kabilugan na bilang nin nag-atender sa pagtiripon na idto. Kan 2024, an nag-atender sa Memoryal may bilang na 21,119,442.

Dakul sa dai nag-aatender sa samong pagtiripon an nakikinabang sa samong libreng programa nin pag-adal sa Bibliya. Kan 2024, an average kan ginigibong pag-adal sa Bibliya kada bulan igwa nin kabilangan na 7,480,146. An pira diyan igwa nin duwa o dakul pang indibidwal sa kada sesyon.

Taano ta mas dakul an bilang kan mga Saksi sigun sa sensus kan gobyerno kisa sa bilang na sinasabi nindo?

An ahensiya kan gobyerno para sa sensus sa parati naghahapot sa mga tawo kun ano an saindang relihiyon. Halimbawa, sinabi kan U.S. Census Bureau na an katuyuhan kan saindang surbey iyo na “aramon kun ibinibilang kan mga tawong hinahapot ninda na miyembro sinda nin sarong relihiyon,” asin sinabi pa na an bilang na nakukua ninda nakadepende sa personal na opinyon kan hinaputan ninda, bako sa kun ano an totoo. Sa kabaliktaran, an mga naghuhulit sana sa iba asin nagrereport kan saindang paglilingkod an iiniiba mi sa bilang kan mga Saksi ni Jehova, bako an mga nagsasabing Saksi sinda.