Mapagtitiwalaan Asin Nakakapakusog sa Pagtubod na mga Bareta

Nagmamalasakit na marhay an mga Saksi ni Jehova sa mga kapagtubod ninda. (1 Pedro 2:17) Namamatian kan dakul sa sato an kapareho kan namatian ni Tannis, na sarong sister sa Kenya. Sinabi niya, “Gustong-gusto kong maaraman an mga nangyayari sa namumutan kong mga tugang sa bilog na kinaban.” Paano naaaraman ni Tannis saka kan minilyon na iba pang mga Saksi an mga nangyayari sa mga kapagtubod ninda? Puon kan 2013, naaaraman ta na iyan paagi sa seksiyon na Newsroom kan satong website na jw.org/bcl.

Mababasa sa Newsroom an mapagtitiwalaan na mga bareta manungod sa mga Saksi ni Jehova. Mababasa diyan an mga pag-release nin Bibliya, gibuhon na pag-ayuda, mga proyekto sa pagtugdok, asin iba pang mahahalagang pangyayari. Naaaraman ta diyan an manungod sa satong mga tugang na iprineso dahil sa saindang pagtubod. Mababasa man sa Newsroom an nakakapakusog sa pagtubod na mga eksperyensiya may koneksiyon sa mga kampanya nin paghuhulit asin pagselebrar nin Memoryal. Siisay an nagre-research kan mga baretang ini, asin paano ini pinepreparar?

Paghanap Asin Pagpreparar nin mga Bareta

An Office of Public Information (OPI) an nag-aasikaso kan Newsroom. An departamentong ini yaon sa world headquarters asin nasa irarom kan paggiya kan Coordinators’ Committee kan Namamahalang Grupo. An OPI kompuwesto nin labing 100 na mga tugang—an kadaklan sa sainda mga remote volunteer—kaiba na an mga parasurat, researcher, visual artist, saka mga paratradusir. Kaiba sa trabaho kan iba an pakikikomunikar sa mga opisyal kan gobyerno, mga propesor, saka mga nasa media. Tinatabangan an OPI kan labing 80 Public Information Desks (PID) na nasa mga sangay sa bilog na kinaban.

Sa pagpreparar nin bareta, nakikipagtabangan na marhay an OPI sa mga PID. Pag may naaraman an satong mga tugang na potensiyal na istorya, nagre-research sinda manungod diyan asin nagtitipon nin mapagtitiwalaan na mga impormasyon. Kaiba digdi an pag-interbiyu asin pakikipag-ulay sa mga eksperto. Pag natipon na ninda an mga impormasyon, isinusurat na an bareta, ini-edit, pino-proofread, linalagan nin mga ritrato, asin ipinapadara sa Coordinators’ Committee para aprubaran.

Mga Pasasalamat

Ano an sabuot kan satong mga kapagtubod manungod sa Newsroom? Si Cheryl, na sarong sister sa Pilipinas, nagsabi, “Gustong-gusto ko talagang pinupunan an aldaw ko paagi sa pagbasa nin mga bareta manungod sa organisasyon ni Jehova saka sa saiyang mga lingkod.”

Dakul na parabasa an nagsasabi na ibang-iba an jw.org Newsroom sa iba pang news media. Si Tatiana, sa Kazakhstan, nagsabi: “Nagpapasalamat akong marhay ta mapagtitiwalaan an mga bareta sa jw.org. Masasarigan iyan asin tama an mga impormasyon.” Si Alma, na sarong sister sa Mexico, nagsabi: “Nakakapurisaw an mga bareta sa mga news media ngunyan, pero an mga bareta sa Newsroom talagang nakakapakusog.”

An Newsroom bako lang mapagtitiwalaan; nakakapakusog man iyan sa pagtubod. Si Bernard, sa Kenya, nagsabi: “Natabangan ako kan Newsroom na ibilang na pamilya ko an mga tugang sa bilog na kinaban, sain man sinda nakaistar. Dahil diyan, nasasambit ko sa mga pamibi ko an mga pangaran ninda saka an espesipikong mga kamugtakan ninda.” An sister na si Bybron, na taga Kenya man, nagsabi: “Ugmahon ako pirmi pag nakakabasa ako nin artikulo manungod sa pag-release nin Bibliya sa ibang lengguwahe! Naipapagirumdom sako kan mga artikulong ini na si Jehova mayong pinapalain.”

Dawa an mga bareta manungod sa mga tugang na pinepersegir puwedeng magkaigwa nin positibong epekto. “An paghurop-hurop sa kusog nin buot na ipinapahiling ninda talagang nakapakusog kan pagtubod ko,” an sabi ni Jackline, na taga Kenya. “Pirmi kong gustong maaraman kun ano an nakatabang sainda na makatagal. Naaraman ko kun paanong an ‘simpleng’ mga bagay—arog kan pagpamibi, pagbasa nin Bibliya, asin pagkanta pa ngani—mahalagang marhay para magdanay na makusog an satong mga tugang.”

Pinapahalagahan na marhay kan sister sa Costa Rica na si Beatriz an mga bareta manungod sa natural na mga kalamidad. Sinabi niya: “Dahil sa Newsroom, nahiling ko kun paano itinatao kan satong organisasyon an mga pangangaipo kan satong mga tugang sa marikas, episiyente, asin mamumuton na paagi. Nakakakumbinsir iyan sa sako na talagang ini an organisasyon ni Jehova.”

Nagpapasalamat nanggad kita na makaresibi nin pinakabagong mga bareta manungod sa satong mga tugang sa bilog na kinaban! Dai ini magigin posible kun mayo an saindong mga donasyon sa pambilog na kinaban na gibuhon, na an dakul diyan itinao paagi sa donate.jw.org. Salamat sa saindong bukas-palad na mga donasyon.