Makapagtitiwala daw Kamo sa Saindong Konsensia?

SA NORMAL na mga kamugtakan, mapagtitiwalaan na aparato an kompas. An dagom kaiyan, na ipinoposisyon kan magnetikong puersa kan daga, pirmeng nagtotokdo paamihanan. Sa siring, an mga nagbibiahe makapananarig sa kompas para sa direksion kun mayo nin mga tinatandaanan na magiya sa sainda. Alagad ano an nangyayari kun ibinubugtak sa harani kan kompas an sarong bagay na may batubalani? An dagom mabirik paatubang sa batubalani imbes na magtokdo paamihanan. Iyan bako nang masasarigan na giya.

Puede man na mangyari an kaagid kaiyan sa konsensia nin tawo. Itinanom sa sato kan Kaglalang an kakayahan na ini tanganing magserbing masasarigan na giya. Mantang kita ginibo sa ladawan nin Dios, an konsensia maninigo na pirmeng magtokdo sa sato sa tamang direksion kun kita kaipuhan na magdesisyon. Iyan maninigong magpahiro sa sato na ipabanaag an moral na mga pamantayan nin Dios. (Genesis 1:​27) Sa kadaklan, iyo. Halimbawa, isinurat kan Kristianong apostol na si Pablo na dawa an nagkapira na mayo kan ihinayag na ley nin Dios “minagibo sa saindang naturalesa nin mga bagay kan ley.” Taano? Huli ta “an saindang konsensia nagpapatotoo sa kaibanan ninda.”​—Roma 2:​14, 15.

Minsan siring, an konsensia dai pirmeng nagtataram sa panahon na iyan maninigong magtaram. Huli sa pagkabakong sangkap nin tawo, may tendensia kita na gumibo nin mga bagay na aram niatong sala. “Tunay na ako naoogma sa ley nin Dios oyon sa sakong pagkatawo sa laog,” an pag-admitir ni Pablo, “alagad nakaheheling ako sa mga kabtang kan sakong hawak nin saro pang ley na nakikilaban sa ley kan sakong isip asin dinadara akong bihag kan ley nin kasalan na yaon sa mga kabtang kan sakong hawak.” (Roma 7:​22, 23) Kun kita parateng mapadara sa salang mga inklinasyon, an satong konsensia tibaad luway-luway na magin mangurol asin sa kahurihurihi pumondo na sa pagsabi sa sato na sala an siring na gawe-gawe.

Minsan siring, sa ibong nin pagkabakong sangkap, puede niatong ikomprontar an satong konsensia sa mga pamantayan nin Dios. Sa katunayan, mahalagang marhay na gibohon niato iyan. An malinig, tama an pagkapatood na konsensia bako sanang nagbubunga nin mamomoton, personal na relasyon sa Dios kundi kaipuhan man sa satong kaligtasan. (Hebreo 10:22; 1 Pedro 1:​15, 16) Apuera kaini, an marahay na konsensia matabang sa sato na gumibo nin madodonong na desisyon sa buhay, na magbubunga kan satong katoninongan asin kaogmahan. An salmista nagsabi manongod sa sarong tawo na may siring na konsensia: “An ley kan saiyang Dios yaon sa saiyang puso; an saiyang mga lakad dai mag-uurong-sulong.”​—Salmo 37:31.

Pagpatood sa Konsensia

An kalabot sa pagpatood sa konsensia bako sanang pagtuom nin sarong listahan nin mga ley dangan talagang pagsusog dian. Iyan an ginibo kan mga Fariseo kan kaaldawan ni Jesus. An mga namomoon na ini sa relihion aram an Ley asin nagmukna nin detalyadong tradisyon, na sa pagtabang daa sa mga tawo na malikayan an paglapas sa Ley. Sa siring, marikas sindang nagprotesta kan an mga disipulo ni Jesus guminutos nin tipasi sa aldaw nin Sabbath asin kinakan iyan. Asin kinustion ninda si Jesus kan paomayan nia an alang na kamot nin sarong lalaki sa aldaw nin Sabbath. (Mateo 12:​1, 2, 9, 10) An duwang ginibong ini, oyon sa tradisyon kan mga Fariseo, pagbalga sa ikaapat na togon.​—Exodo 20:​8-​11.

Malinaw nanggad, pinag-adalan kan mga Fariseo an Ley. Alagad komprontado daw sa mga pamantayan nin Dios an saindang konsensia? Dai nanggad! Tara, pakapagparapanatsar pa sana manongod sa hinohona nindang labi-labi karaot na paglapas sa reglamento manongod sa Sabbath, an mga Fariseo nagkonsulta sa lambang saro tumang ki Jesus “tangani na sia magadan ninda.” (Mateo 12:14) Hamak mo iyan​—an nagpapakangmatanos na mga namomoon na ini sa relihion nag-init sa ideya na magkakan nin tipasi na bagong gutoson asin magpaomay sa aldaw nin Sabbath; alagad dai sinda nakonsensia manongod sa pagpakana kan paggadan ki Jesus!

An mga poon na saserdote nagpaheling nin kaagid na biribid na kaisipan. An marigsok na mga tawong ini dai man lamang nakamate nin kasalan kan alokon ninda si Judas nin 30 pidasong pirak hale sa kaha nin kayamanan kan templo tanganing pasaloiban si Jesus. Alagad kan sa dai linalaoman isulit ni Judas an kuarta, na ibinaribad iyan sa templo, an konsensia kan mga poon na saserdote napaatubang sa legal na problema. “Bakong sono sa ley,” sabi ninda, “na iholog iyan [an mga sinsilyo] sa sagradong kaha nin kayamanan, huli ta iyan bayad sa dugo.” (Mateo 27:​3-6) Malinaw na nahahadit an mga poon na saserdote na an kuarta ni Judas maati na ngonyan. (Ikomparar an Deuteronomio 23:18.) Pero, an grupo man sanang ini nin mga tawo mayo nin naheling na sala sa paggasto nin kuarta sa pagbayad sa pagpasaloib kan Aki nin Dios!

Pagigin Kaoyon kan Kaisipan nin Dios

An nasambitan na mga halimbawa nagpapaheling na an kaipuhan sa pagpatood kan konsensia bako sanang pagpano kan isip nin sarong listahan nin mga reglamento. Totoo, an kaaraman sa mga ley nin Dios mahalagang marhay, asin an pagkuyog dian kaipuhan para sa kaligtasan. (Salmo 19:​7-​11) Minsan siring, apuera sa pakanood kan mga ley nin Dios, dapat na pataluboon niato an sarong puso na kaoyon kan kaisipan nin Dios. Kun siring maeeksperyensiahan niato an pagkaotob kan hula ni Jehova paagi ki Isaias, na nagsasabi: “An saimong mga mata maninigong mga mata na nakakaheling sa saimong Kaharohalangkaweng Paratokdo. Asin an saimong mga talinga makadadangog nin tataramon sa likod mo na nagsasabi: ‘Iyo ini an dalan. Maglakaw kamo dian, banwaan,’ enkaso kamo banwaan pumatoo o enkaso kamo pumawala.”​—Isaias 30:​20, 21; 48:17.

Siempre, ini dai nangangahulogan na kun kita napapaatubang sa magabat na pagdedesisyon, may literal na boses na masabi sa sato kan dapat niatong gibohon. Minsan siring, kun an satong kaisipan kaoyon kan kaisipan nin Dios sa mga bagay, an satong konsensia mas andam na tumabang sa sato na gumibo nin mga desisyon na makapaoogma sa saiya.​—Talinhaga 27:11.

Estudyare si Jose, na nabuhay kaidtong ika-18 siglo B.C.E. Kan sadolon sia kan agom ni Potifar na makisambay sa saiya, si Jose nagsayuma, na sinasabi: “Paano ko magigibo an dakulang karatan na ini asin aktuwal na magkasala tumang sa Dios?” (Genesis 39:9) Kan kaaldawan ni Jose, mayo nin nasusurat na ley hale sa Dios na nagkokondenar sa pagsambay. Apuera kaini, si Jose nag-iistar sa Egipto, na harayo sa disiplina kan pamilya o mga reglamento kan mga patriarka. Kun siring, ano an nagpangyari ki Jose na labanan an sugot? Sa simpleng pagtaram, idto an napatood na konsensia nia. Inarog ni Jose an punto de vista nin Dios na an mag-agom dapat na magin “sarong laman.” (Genesis 2:24) Nasabotan nia na sala kun siring na kuanon an agom nin iba. An kaisipan ni Jose kaoyon kan kaisipan nin Dios sa bagay na iyan. An pagsambay naglalapas sa saiyang sentido moral.

Ngonyan, pipira an tawo na kapareho ni Jose. Lakop an seksuwal na inmoralidad, asin dakol an dai nakamamate nin paninimbagan sa saindang Kaglalang, sa saindang sadiri, o dawa sa saindang agom na magdanay na malinig sa moral. An situwasyon kaparehong-kapareho kan ilinaladawan sa librong Jeremias: “Mayo ni sarong tawo na nagsosolsol sa saiyang karatan, na nagsasabi, ‘Ano an ginibo ko?’ An balang saro minabalik sa dalan nin kadaklan, siring sa sarong kabayo na nagdadalagan pasiring sa ralaban.” (Jeremias 8:6) Sa siring, mas dakula kisa kasuarin pa man an pangangaipo na kita makaoyon sa kaisipan nin Dios. Igwa kita nin marahayon na probisyon na matabang sa sato na magibo iyan.

Sarong Tabang sa Pagpatood sa Konsensia

An ipinasabong na Kasuratan “kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, andam nanggad para sa lambang marahay na gibo.” (2 Timoteo 3:​16, 17) An pag-adal sa Biblia matabang sa sato na patoodon an inaapod kan Biblia na satong “kakayahan nin pagmansay,” tanganing mamidbid an kalaenan kan tama sa sala. (Hebreo 5:14) Papangyayarihon kita kaiyan na pataluboon an pagkamoot sa mga bagay na namomotan nin Dios asin an makuring panrimarima sa mga bagay na saiyang ikinaoongis.​—Salmo 97:10; 139:21.

Kun siring, an pasohan sa pag-adal sa Biblia makua an tunay na kahulogan asin praktikal na halaga kan katotoohan imbes na an mga detalye sana kaiyan. An Torrengbantayan, sa luwas kaiyan na Marso 1, 1977 (Setyembre 1, 1976 sa Ingles), nagsabi: “Sa pag-adal niato kan Kasuratan maninigo na hingoahon niato na makua an tamang pakasabot sa hustisya, pagkamoot asin katanosan nin Dios asin itanom ini nin hararom sa satong puso tanganing iyan magin kabtang niato arog kan pagkakan asin paghangos. Maninigong pagmaigotan niato na orog na mapukaw an pakamate nin moral na paninimbagan paagi sa pagpatalubo nin malinaw na pakaaram sa kun ano an tama asin kun ano an sala. Orog pa kaini, ipamateng gayo niato sa satong konsensia an paninimbagan kaiyan sa sangkap na Paratao nin Ley asin Hokom. (Isa. 33:22) Kaya mantang nakakanood nin mga bagay manongod sa Dios, maninigo na pinagmamaigotan man niatong arogon sia sa lambang aspekto nin buhay.”

Pagkaigwa kan “Kaisipan ni Cristo”

An pag-adal sa Biblia makatatabang man sa sato na magkaigwa kan “kaisipan ni Cristo,” an hilig kan isip sa pagkuyog asin kapakumbabaan na ipinaheling ni Jesus. (1 Corinto 2:16) An paggibo kan kabotan kan saiyang Ama sarong kagayagayahan, bako sanang sarong pinagkatodan na automatikong sinusunod, na dai iniisip. An saiyang aktitud makahulang ilinadawan kan salmistang si David, na nagsurat: “An paggibo kan boot mo, O Dios ko, iyo an naoogmahan ko, asin an saimong ley nasa kairaroman kan sakong sadiri.”a​—Salmo 40:8.

An pagkaigwa kan “kaisipan ni Cristo” mahalagang marhay sa pagpatood kan konsensia. Kaidtong yaon digdi sa daga bilang sangkap na tawo, ipinabanaag ni Jesus an mga kualidad asin an personalidad kan saiyang Ama sa pinakalubos na mahihimo nia sono sa mga limitasyon nin tawo. Sa siring, nasabi nia: “Sia na nakaheling sa sako nakaheling man sa Ama.” (Juan 14:9) Sa lambang situwasyon na inatubang nia digdi sa daga, ginibo ni Jesus an talagang gusto kan saiyang Ama na gibohon nia. Kun siring, kun pinag-aadalan niato an buhay ni Jesus, nalilinawan niato kun ano an personalidad ni Jehova Dios.

Nababasa niato na si Jehova “maheherakon asin maugayon, maluway sa pagkaanggot asin mayaman sa mamomoton na kabootan.” (Exodo 34:6) Dakol na beses, ipinaheling ni Jesus an mga kualidad na ini sa pagtratar sa saiyang mga apostol. Kan sinda paorootrong nag-argumento dapit sa kun siisay an mas dakula, sinda mapasensiang tinokdoan ni Jesus paagi sa tataramon asin halimbawa na “an siisay man na boot na magin dakula sa saindo kaipuhan na iyo an mani paralingkod sa saindo, asin an siisay man na boot mangenot sa saindo kaipuhan na iyo an mani oripon nindo.” (Mateo 20:​26, 27) Ini saro sanang halimbawa tanganing ipaheling na kita puedeng makaoyon kan kaisipan nin Dios paagi sa pag-estudyar sa buhay ni Jesus.

Mientras na mas dakol an nanonodan niato manongod ki Jesus, mas magigin andam man kita na arogon an satong langitnon na Ama, si Jehova. (Efeso 5:​1, 2) An konsensia na kaoyon kan kaisipan nin Dios gigiyahan kita sa tamang direksion. Pinanunugaan ni Jehova an mga nagtitiwala sa saiya: “Papangyayarihon ko na ika magkaigwa nin pakarorop asin totokdoan taka sa dalan na saimong lalakawan. Magtatao ako nin sadol na nakatorohok sa saimo.”​—Salmo 32:8.

Pagkinabang sa Napatood na Konsensia

Sa pakaaram kan pagkasumbikalan nin mga tawong bakong sangkap, pinatanidan ni Moises an mga Israelita: “Idusay nindo an saindong puso sa gabos na tataramon na itinataram ko sa pagpatanid sa saindo ngonyan, tanganing mapagbotan nindo an saindong mga aki na mag-ingat na otobon an gabos na tataramon kan ley na ini.” (Deuteronomio 32:46) Dapat na isurat man niato an ley nin Dios sa satong puso. Kun gigibohon niato iyan, an konsensia niato mas posibleng marhay na giyahan an satong mga lakad asin tabangan kita na gumibo nin tamang mga desisyon.

Siempre, dapat na mag-ingat kita. An talinhaga sa Biblia nagsasabi: “Igwa nin dalan na tanos sa pagheling nin tawo, alagad ta mga dalan nin kagadanan an kasagkodan kaiyan.” (Talinhaga 14:12) Taano ta siring kaini sa parate? Huli ta, arog kan sabi kan Biblia: “Madaya an puso nin labi sa ano pa man na bagay asin desesperado. Siisay an makamimidbid kaiyan?” (Jeremias 17:9) Kun siring, kaipuhan na kuyogon niato gabos an konseho kan Talinhaga 3:​5, 6: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.”

[Nota sa Ibaba]

[Retrato sa pahina 7]

Siring sa kompas, an konsensia na napatood sa Biblia ikatotokdo kita sa tamang direksion

[Pasasalamat para sa pinagkuanan]

Kompas: Sa karahayan nin boot kan Essex Museum, Salem, Mass.