Pagbugtak kan Pagboot nin Dios ‘Sa Kairaroman kan Satong Sadiri’
1 Ihinula na pangangapotan ni Jesus an katogonan ni Jehova ‘sa kairaroman kan saiyang sadiri.’ (Sal. 40:8) Ini nagin totoo, asin iyan nakatabang saiya na isagibo an kabotan kan saiyang Ama.
2 An saiyang linahidan na mga disipulo siring man ibinugtak an katogonan ni Jehova ‘sa saindang isip, asin sa saindang puso isinurat iyan.’ (Heb. 8:10) Ini nagpakosog saindang papagdanayon an marahay na gawe asin isagibo an saindang ministeryo. Paano masisigurado niato gabos na an katogonan ni Jehova yaon sa satong mga isip asin nasusurat sa satong mga puso?—Tal. 3:3.
PERSONAL NA PAG-AADAL ASIN PAGSISIYASAT
3 An personal na pag-adal kan Tataramon nin Dios makakatabang sato na masadirihan niato an katotoohan. Imbuwelto sa pag-adal an pagsisiyasat asin paghorophorop. Iyan sarong makatuyohan na konsentrasyon na may maingat na atension sa mga detalye. Dapat disiplinahon an satong sadiri tanganing magkaigwa nin regular na programa nin pag-adal na mag-aandam sato sa gabos na semanal na pagtiripon.
4 An marahay na ugale sa pag-adal nagpapakosog kan satong paglaom. Iyo, kita “nagtatalubo sa kaligtasan.” (1 Ped. 2:2) Kun nakakanood kita nin interesanteng mga bagay hale sa Kasuratan, boot niatong ipakipag-olay iyan sa satong kataraed. An satong kaigotan sa pagtaram “kan tataramon nin kahadean” napapakosog paagi sa pag-apresyar sa espirituwal na mga bagay na nakamtan paagi sa marahay na ugale sa pag-adal.—Mat. 13:19.
MGA PANTABANG SA PAG-ADAL
5 An organisasyon ni Jehova nag-andam kan kaipuhan niato tanganing kamtan an ekselenteng kaaraman kan katotoohan. Ginagamit daw nindo nin marhay an 1930-1985 Index? Sa tabang kaining marhay na instrumento asin kan manlaen-laen na publikasyon na makukua ngonyan, kanigoan kita kayaman sa tamang kaaraman! Dai niato kalingawan an mga librong Insight asin Revelation. Epektibong ginagamit daw nindo an mga ini?
6 An pagkamit nin lubos sa personal na pag-adal madepende sa kun gurano kaigot an paghihingoa niato dian. Aramon kun noarin asin saen kamo makakasompong nin matoninong asin daing-estorbong lugar para sa paghorophorop. Siguradohon na mamibi para sa tabang ni Jehova bago magpoon an pag-adal. Tanganing may kadonongan na humiro sa kritikal na panahon na ini, kaipuhan hararom na ikaukit sa satong puso asin isip an katotoohan kan Tataramon nin Dios. (Tal. 7:1-3; Jos. 1:8) Ginagamit ni Jehova an saiyang espiritu tanganing iukit an saiyang togon asin mga pagirumdom sa satong puso. (Juan 14:26; 1 Cor. 2:10) Dai nia paliliman-limanan an sinserong paghagad nin tabang tanganing masumpongan asin masabotan an mga kayamanan kan saiyang Tataramon.—Tal. 2:1-6.
7 Dapat magin kitang regular asin dayaday sa satong programa nin pag-adal tanganing ikabugtak an togon nin Dios ‘sa kairaroman kan satong sadiri.’ Kaya pataluboon niato an orog na espirituwalidad, kamtan an orog na pakasabot kan katotoohan, pauswagon an kakayahan sa pagtabang sa iba na manodan an katotoohan, asin papagdanayon an orog kasolidong pundasyon sa “dalan nin buhay.”—Sal. 16:11; Col. 2:7.