Kun Magtagboan an Sirangan Asin Solnopan
“O, AN Sirangan Sirangan, asin an Solnopan Solnopan, asin nungka na an duwa magtatagboan.” An mga tataramon na ini kan poetang taga-Britania na si Rudyard Kipling nagpapagirumdom sa sato kan hararom na mga pagkakalaen sa kultura na nakakapabanga sa katawohan, na nakakokontribuwir sa pagkaongis huli sa tribo, rasa, asin nasyon na nagpaparibok sa gabos na palibot niato ngonyan. Dakol an naghahapot, Mayo daw nin magigibo an Dios manongod sa situwasyon na ini? Iyo, may magigibo sia! Asin minsan ngonyan igwa na sia nin ginigibo! An sunod na linya kan berso ni Kipling nakasambit digdi. Gurano kahaloy na mababanga an Sirangan asin Solnopan? Nagsabi an poeta: “Sagkod na an Daga asin Langit tumindog sa dai na mahahaloy sa dakulang Trono nin Paghokom nin Dios.”
Itinao nin Dios an paninimbagan na paghokom sa saiyang Aki, si Jesu-Cristo. (Juan 5:22-24, 30) Alagad kasuarin nagpoon an panahon na iyan nin paghokom? Sairisay an hinohokoman, asin may anong resulta? Si Jesus an nagladawan sa hula kan pankinaban na mga guerra asin kaibang mga kasakitan na nagpoon na magpasakit sa katawohan kan taon 1914. Sinabi nia na an mga ini an “tanda” kan saiyang dai naheheling na “presensia asin kan pagtatapos kan palakaw nin mga bagay.”—Mateo 24:3-8.
Sa kulminasyon kan dakulang hulang ini, ipinamimidbid ni Jesus an satong presenteng panahon bilang panahon nin paghokom, na sinasabi dapit sa saiyang sadiri: “Kun an Aki nin tawo dumatong na sa saiyang kamurawayan, asin an gabos na anghel kaibanan nia, dangan sia matukaw sa saiyang mamurawayon na trono. Asin an gabos na nasyon titiponon sa atubangan nia, asin pagbubulagbulagon nia an mga tawo, kun paanong ibinubulag nin pastor an karnero hale sa mga kanding. Asin ibubugtak nia an mga karnero sa saiyang too, alagad an mga kanding sa saiyang wala.” Sa piguratibong pagtaram, an gabos na nasyon sa daga tinitipon na ngonyan sa atubangan kan Hokom asin maninimbag sa paagi kan paghimate ninda sa saiyang mensahe nin kaligtasan. Kun maghokom na sa dai na mahahaloy sa dakulang kahorasaan, an masumbikal na arog-kanding na mga tawo “maduman sa pagkaparang daing katapusan, alagad an mga matanos [an makinuyog na mga arog-karnero] sa buhay na daing katapusan.”—Mateo 25:31-33, 46; Kapahayagan 16:14-16.
‘Hale sa Sirangan Asin Hale sa Solnopan’
An paghokom sa kinaban na ini sa aktuwal nagpoon durante kan maribok na mga taon nin Guerra Mundial I. Kan panahon na iyan, an klero nin Kakristianohan nagtao nin bilog na pusong pagsuportar sa nagraralaban na mga grupo. Ipinamidbid sinda kaini bilang kabtang nin maraot na kinaban na angay sa “kaanggotan nin Dios.” (Juan 3:36) Pero kumusta man an mamomoton sa katoninongan na mga Kristiano na naggibo nin pagtubod sa Dios? Poon kan taon nin 1919, an mga ini pinonan na tiponon sa lado kan Hade, si Cristo Jesus.
Hale sinda sa gabos na parte kan daga, enot an mga natatada kan 144,000 na linahidan, na pinili sa gabos na siglo kan panahon Kristiano. An mga ini magigin “kapwa mga paramana ni Cristo” sa saiyang langitnon na Kahadean. (Roma 8:17) Sa mga ini nagsabi an propeta nin Dios: “Dai ka matakot, huli ta kaibanan mo ako. Hale sa sirangan dadarahon ko an saimong banhi, asin hale sa solnopan titiponon taka. Sasabihan ko an amihanan, ‘Itao mo!’ asin an timog, ‘Dai ka magpogol. Daraha an sakuyang mga aking lalaki hale sa harayo, asin an sakuyang mga aking babae hale sa poro kan daga, an gabos na inaapod sa ngaran ko asin na linalang ko para sa sakong sadiring kamurawayan, na sakong hinaman, iyo, na sakong ginibo.’”—Isaias 43:5-7.
Alagad bako pa iyan! Partikularmente poon kan mga taon nin 1930, an dakulang kadaklan, na ngonyan minaabot na sa minilyon, pinonan nang tiponon. Ini an mga “karnero” na sinabi ni Jesus sa Mateo 25:31-46. Arog kan linahidan na natatada na naenot sa sainda, an mga ini ‘nagtubod’ sa Saro na nagpapahayag: ‘Kamo an sakong mga saksi, asin ako an Dios.’ (Isaias 43:10-12) An pagtipon sa dakulang kadaklan na ini nagpapadagos man ‘hale sa sirangan asin solnopan, hale sa amihanan asin timog, asin hale sa mga poro kan daga.’
An mamomoton sa katoninongan na mga karnerong ini pinag-iiriba na magin sarong internasyonal na asosasyon nin magturugang. Nagtataram sinda nin kadakol na manlaenlaen na lenguahe kan 231 nasyon na ineerokan ninda. Alagad sararo sinda sa espirituwal sa pag-adal kan “dalisay na tataramon” kan mensahe nin Kahadean sa Biblia, “tanganing sinda gabos mag-apod sa ngaran ni Jehova, tanganing daramay na maglingkod sa saiya.” (Sofonias 3:9) An saindang pagkasararo sa paniniwala, katuyohan, asin paghiro nagtatao nin makangangalas na patotoo na an Sirangan asin Solnopan talagang nagtagboan na, asin an mga nasyon hale sa gabos na iba pang direksion, sa paglilingkod asin ikaoomaw kan Soberanong Kagurangnan na Jehova.
Sa ibang kadagaan nangyayari an pagtipon na ini sa irarom nin pinakapambihirang mga kamugtakan, arog kan ipaheheling kan minasunod na mga report.