Tinotokdoan ni Jehova Sagkod sa Aldaw na Ini
“[Si] Jehova mismo nagtao sa sako kan dila kan mga tinokdoan.”—ISAIAS 50:4.
1, 2. (a) Para sa ano inandam ni Jehova an saiyang paboritong estudyante, asin ano an resulta? (b) Paano minidbid ni Jesus an Gikanan kan saiyang mga katokdoan?
SI Jehova Dios dati nang Paratokdo poon pa kan sia magin Ama. Sa dai masabing panahon pakatapos na magrebelde an nagkapira sa saiyang mga aki, inandam nia an saiyang paboritong estudyante, an saiyang Panganay na Aki, para sa ministeryo digdi sa daga. (Talinhaga 8:30) An Isaias kapitulo 50 makahulang ipinamimidbid an estudyanteng ini na an sabi: “An Soberanong Kagurangnan na Jehova mismo nagtao sa sako kan dila kan mga tinokdoan, tanganing tatao ako kun paano sisimbagon nin sarong tataramon an napapagal.” (Isaias 50:4) Bilang resulta kan pag-aplikar kan katokdoan kan saiyang Ama mantang yaon digdi sa daga, si Jesus sarong burabod nin kaginhawahan sa gabos na “napapagal asin nagagabatan.”—Mateo 11:28-30.
2 Dakol na ngangalasan an ginibo ni Jesus durante kan enot na siglo. Pinamuklat nia an mga mata kan mga buta asin nagbuhay pa ngani sia nin mga gadan, pero sa pangenot midbid sia kan saiyang mga katemporanyo bilang sarong paratokdo. Iyan an apod sa saiya kan saiyang mga parasunod saka kan mga nagtutumang sa saiya. (Mateo 8:19; 9:11; 12:38; 19:16; Juan 3:2) Si Jesus nungkang nagkua nin kredito sa saiyang itinotokdo kundi mapakumbabang nag-ako: “An sakong itinotokdo bako ko, kundi kaidtong nagsugo sa sako.” “Siring sa pagkatokdo sa sako kan Ama itinataram ko an mga bagay na ini.”—Juan 7:16; 8:28; 12:49.
Marahayon na Relasyon nin Paratokdo Asin Estudyante
3. Paano ipinaririsa kan hula ni Isaias an interes ni Jehova sa mga tinotokdoan nia?
3 An sarong ekselenteng paratokdo igwa nin personal, maingat, asin mamomoton na interes sa saiyang mga estudyante. Ihinahayag kan Isaias kapitulo 50 na si Jehova Dios igwa kan siring na klase nin interes sa mga tinotokdoan nia. “Sia nagmamata kada aga,” sabi kan hula, “pinupukaw nia an sakong talinga na makadangog siring kan mga tinokdoan.” (Isaias 50:4) An pagkataram digdi nagpaparisa nin sarong instruktor na pinupukaw an saiyang mga estudyante sa amay na aga tanganing tokdoan sinda. Sa pagkomento dapit sa aplikasyon kan hula, an sarong iskolar sa Biblia nagkomento: “An ideya, na an Parabalukat magigin . . . saro na kaidto, sabi ngani, nasa paadalan nin Dios; asin na magigin kualipikadong magtokdo sa iba. . . . An Mesiyas magigin lubos na kualipikado, paagi sa pagtotokdo nin Dios, na magin instruktor nin katawohan.”
4. Ano an reaksion ni Jesus sa pagtotokdo kan saiyang Ama?
4 Marahay kun an mga estudyante naghihimate sa pagtotokdo kan saindang instruktor. Ano an reaksion ni Jesus sa pagtotokdo kan saiyang Ama? An saiyang reaksion kaoyon sa satong mababasa sa Isaias 50:5: “An Soberanong Kagurangnan na Jehova mismo iyo an nagbukas kan sakong talinga, asin ako man dai nagin masumbikal. Dai ako suminalingoy sa ibong.” Iyo, gustong-gusto ni Jesus na makanood. Sia atentibong marhay. Labi pa kaiyan, andam sia sa paggibo kan ano man na ipagibo sa saiya kan saiyang Ama. Bako siang masumbikal; imbes, sia nagsabi: “Mangyari logod, bakong an boot ko, kundi an boot mo.”—Lucas 22:42.
5. (a) Ano an nagpaparisa na patienot nang aram ni Jesus an mga kasakitan na saiyang aagihan digdi sa daga? (b) Paano naotob an hula sa Isaias 50:6?
5 An hula nagpaparisa na an Aki nakaiisi kan mga puedeng ibunga kan paggibo nia kan kabotan nin Dios. Ipinaheheling ini kan sinasabi kan tinokdoan: “An sakong likod itinao ko sa mga parahampak, asin an sakong mga pisngi sa mga nagrarabnot nin buhok. An sakong lalauogon dai ko itinago sa makasosopog na mga bagay asin sa lutab.” (Isaias 50:6) Siring sa sinasabi kan hula, si Jesus maringis na trinato digdi sa daga: “Pinagrulutaban ninda an saiyang lalauogon,” an isinurat ni apostol Mateo. “An iba tinaplong sia.” (Mateo 26:67) Nangyari ini sa kamot nin mga namomoon sa relihion kan banggi nin Paskua kan 33 C.E. Kan suminunod na aldaw itinao ni Jesus an saiyang likod sa mga parahampak, kan sia daing herak na latigohon kan Romanong mga soldados bago sia bitayon sa sarong harigi tanganing magadan.—Juan 19:1-3, 16-23.
6. Ano an nagpapaheling na si Jesus nungkang nawaran nin kompiansa sa saiyang Paratokdo, asin paano binalosan an saiyang kompiansa?
6 An Aki, na patienot nang natokdoan na marhay, nungkang nawaran nin kompiansa sa saiyang Paratokdo. Ipinaheheling ini kan saiyang sunod na sinasabi oyon sa hula: “An Soberanong Kagurangnan na Jehova mismo tatabangan ako. Kaya ngani dai ako mapapasopog.” (Isaias 50:7) An pagkompiar ni Jesus sa tabang kan saiyang Paratokdo binalosan na marhay. Pinamuraway sia kan saiyang Ama, na binendisyonan sia nin mas halangkaw na katongdan kisa sa gabos na iba pang lingkod nin Dios. (Filipos 2:5-11) Naghahalat man sa sato an dakulang mga bendisyon kun makinuyog kitang masunod sa pagtotokdo ni Jehova asin dai ‘masalingoy.’ Helingon niato kun paano itinatao an pagtotokdong iyan sagkod sa satong aldaw.
Sarong Pinahiwas na Programa nin Pagtotokdo
7. Paano ginibo ni Jehova an saiyang pagtotokdo digdi sa daga?
7 Siring kan nasabi sa enotan, ginamit ni Jehova an saiyang Representante digdi sa daga, si Jesu-Cristo, na iyo an gumibo kan pagtotokdo nin Dios durante kan enot na siglo. (Juan 16:27, 28) Danay na idinodoon ni Jesus na an Tataramon nin Dios an autoridad sa saiyang pagtotokdo, na nagtatao kan halimbawa para sa mga tinotokdoan nia. (Mateo 4:4, 7, 10; 21:13; 26:24, 31) Pakatapos kaiyan, an pagtotokdo ni Jehova ginibo digdi sa daga paagi sa ministeryo kan mga tinokdoan na iyan. Girumdoma na pinagbotan sinda ni Jesus: “Kaya paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.” (Mateo 28:19, 20) Kun may nagigibong mga disipulo, an mga ini nagigin kabtang kan “harong nin Dios, . . . an kongregasyon kan nabubuhay na Dios.” (1 Timoteo 3:15) Inorganisar man sinda sa indibiduwal na mga kongregasyon na dian sinda tinokdoan ni Jehova. (Gibo 14:23; 15:41; 16:5; 1 Corinto 11:16) An pagtotokdo daw nin Dios sa paaging iyan nagpapadagos pa sagkod sa satong aldaw?
8. Paano an isinabi ni Jesus na pagpalakaw sa paghuhulit digdi sa daga bago dumatong an katapusan?
8 Iyo nanggad! Tolong aldaw bago kan saiyang kagadanan, ihinula ni Jesus na bago kan katapusan kan palakaw na ini nin mga bagay, magkakaigwa nin dakulang gibohon na paghuhulit. “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon,” sabi nia, “dangan madatong an katapusan.” Dangan isinabi ni Jesus an instrumento na gagamiton sa pagpalakaw sa pambilog na kinaban na programang ini nin paghuhulit asin pagtotokdo. Nagtaram sia dapit sa “maimbod asin madonong na oripon” na magseserbing paagihan o instrumento, sa pagtao nin espirituwal na kakanon sa Saiyang mga lingkod. (Mateo 24:14, 45-47) Ginagamit ni Jehova Dios an “oripon” na ini na iyo an mangataman sa intereses kan Kahadean sa bilog na daga.
9. Sairisay an minakompuesto sa maimbod asin madonong na oripon?
9 Ngonyan, an maimbod asin madonong na oripon kompuesto kan natatada sa mga paramana kan Kahadean. An mga ini linahidan na mga Kristiano, an mga nawawalat kan 144,000 digdi sa daga, na “rogaring ni Cristo” asin kabtang kan “banhi ni Abraham.” (Galacia 3:16, 29; Kapahayagan 14:1-3) Paano nindo mamimidbid an maimbod asin madonong na oripon? Partikularmente paagi sa ginigibo ninda asin sa saindang maingat na pagsunod sa Tataramon nin Dios, an Biblia.
10. Anong mga instrumento an ginagamit kan grupong oripon sa pagpalakop kan mga katokdoan ni Jehova?
10 Ginagamit ni Jehova an “oripon” na ini bilang saiyang instrumento sa pagtotokdo sa mga tawo ngonyan. An mga kabilang sa grupong oripon inako an ngaran na Mga Saksi ni Jehova kan 1931. Poon kaidto minilyon an nakiasosyar sa sainda asin nag-ako kan ngaran na iyan patin uminiba sa pagbalangibog kan Kahadean nin Dios. An magasin na ini, An Torrengbantayan Nagpapahayag kan Kahadean ni Jehova, iyo an pangenot na instrumentong ginagamit kan “oripon” sa gibohon na pagtotokdo. Minsan siring, may ginagamit man na iba pang publikasyon, kabale na an mga libro, pulyeto, brochure, tract, asin an magasin na Awake!
11. Anong mga paadalan an inisponsor kan “oripon,” asin sa anong katuyohan nagseserbi an kada saro sa mga paadalan na ini?
11 Dugang pa, an “oripon” nag-iisponsor nin laen-laen na paadalan. Kabale digdi an Paadalan sa Biblia kan Watchtower sa Gilead, na limang bulan na kurso na inaandam an hoben na mga ministro para sa paglilingkod bilang misyonero sa ibang nasyon, asin an duwang bulan na kurso sa Paadalan sa Ministeryal na Pagsasanay, na nagsasanay sa daing agom na kamagurangan asin ministeryal na mga lingkod para sa espesyal na teokratikong mga asignasyon. Yaon man an Pankahadean na Paadalan sa Pagmiministro, na dian an Kristianong kamagurangan asin ministeryal na mga lingkod tinotokdoan sa panapanahon sa saindang pankongregasyon na mga paninimbagan, asin an Paadalan sa Paglilingkod Bilang Payunir, na sinasangkapan an pambilog na panahon na mga paraebanghelyo na magin mas epektibo sa saindang aktibidad na paghuhulit.
12. Ano an sarong semanal na kabtang kan programa nin pagtotokdo?
12 An saro pang kabtang kan programa nin pagtotokdo iyo an limang semanal na pagtiripon na ginigibo sa labing 75,500 na kongregasyon kan banwaan ni Jehova sa bilog na kinaban. Lubos daw kamong nakikinabang sa mga pagtiripon na ini? Paagi sa saindong pag-atento sa itinataong pagtotokdo, ipinaheheling daw nindo na kamo talagang nagtutubod na kamo garo man sana nasa paadalan nin Dios? An saindo daw na pagtalubo sa espirituwal nagpaparisa sa iba na kamo igwa “kan dila kan mga tinokdoan”?—Isaias 50:4; 1 Timoteo 4:15, 16.
Tinotokdoan sa Kristianong mga Pagtiripon
13. (a) Ano an sarong mahalagang paagi na tinotokdoan ni Jehova an saiyang banwaan ngonyan? (b) Paano niato ikapaheheling an satong pagpahalaga sa An Torrengbantayan?
13 Partikularmenteng tinotokdoan ni Jehova an saiyang banwaan paagi sa semanal na pag-adal sa Biblia, na ginagamit an Torrengbantayan bilang pantabang sa pagtotokdo. Minamansay daw nindo an pagtiripon na ini bilang sarong lugar na kun saen puede kamong tokdoan ni Jehova? Minsan ngani an Isaias 50:4 pangenot na minaaplikar ki Jesus, puede man ining umaplikar sa gabos na nag-aaprobetsar sa mga probisyon nin Dios tanganing mag-ako “kan dila kan mga tinokdoan.” An sarong paagi na ikapaheheling nindo na saindong pinahahalagahan an Torrengbantayan iyo an pagbasa kan kada luwas sa pinakaamay na mahihimo pakaresibi nindo kaiyan. Dangan, kun an Torrengbantayan pinag-aadalan sa kongregasyon, ikapaheheling nindo an saindong apresasyon ki Jehova paagi sa pagigin presente asin paagi man sa pagigin andam na ipahayag sa publiko an saindong paglaom.—Hebreo 10:23.
14. (a) Taano an pagkomento sa mga pagtiripon ta mahalagang marhay na pribilehio? (b) Anong klaseng mga komento kan mga aki an nakapakokosog na gayo?
14 Nasasabotan daw nindo na paagi sa saindong mga komento sa mga pagtiripon, puede kamong magkaigwa nin kabtang sa dakulang programa nin pagtotokdo ni Jehova? Sierto nanggad, an pagkomento sa mga pagtiripon sarong mahalagang paagi na madadagka niato an lambang saro “sa pagkamoot asin sa marahay na mga gibo.” (Hebreo 10:24, 25) Puede daw na an mga aki magkaigwa man nin kabtang sa programang ini nin pagtotokdo? Puede. An odok sa pusong mga komento nin mga aki parateng nakapakokosog sa mga gurang. Kun minsan, an mga bagohan sa satong mga pagtiripon namotibar kan mga komento nin mga aki na magkaigwa nin mas odok na interes sa katotoohan kan Biblia. Nagigin ugale nin ibang mga aki na basahon an saindang mga komento nin direkta hale sa parapo o sundan an ihinihinghing sa sainda nin sarong adulto. Minsan siring, nakapakokosog nanggad kun an saindang mga komento inandam na marhay. An siring na pagkomento tunay na nagtatao nin onra sa satong Kaharohalangkaweng Paratokdo asin sa saiyang halangkaw na klase nin programa nin pagtotokdo.—Isaias 30:20, 21.
15. Ano an magigibo nin mga magurang tanganing matabangan an mga aki na magkomento nin mas epektibo?
15 Sarong kagayagayahan na makaheling nin mga aki na gustong makikabtang sa pag-omaw sa satong Dios. Pinahalagahan ni Jesus an mga kapahayagan nin pag-omaw nin mga aki. (Mateo 21:15, 16) An sarong Kristianong magurang sa kongregasyon nagkomento: “Kan ako aki pa, gusto kong magkomento sa Pag-adal sa Torrengbantayan. Pakatapos na tabangan akong mag-andam nin komento, kisuerra pitong beses na ipinapaensayo sako kan sakong ama an komento.” Posible na durante kan saindong pampamilyang pag-adal sa Biblia, kamo mga magurang matatabangan nindo an saindong mga aki na mag-andam nin mga komento sa saindang sadiring mga tataramon sa piling mga parapo sa An Torrengbantayan. Tabangan sindang pahalagahan an saindang dakulang pribilehio na pakikikabtang sa programa nin pagtotokdo ni Jehova.
16. Ano an nagigin pakinabang sa Teokratikong Paadalan sa Pagmiministro, asin siisay an puedeng magpalista sa paadalan?
16 An pagtotokdo sa iba pang Kristianong mga pagtiripon maninigo man na tawan nin odok na paghorophorop, kapwa kan mga may pribilehiong magtao kan impormasyon asin kan mga naghihinanyog sa iinaatubang na pagtotokdo. Sa laog nin labing 50 taon na ngonyan, ginagamit ni Jehova an semanal na Teokratikong Paadalan sa Pagmiministro sa pagsasanay sa minilyon na lalaki asin babae na ikaatubang nin mas epektibo an mensahe kan Kahadean. An mga aktibong nakikiasosyar sa kongregasyon puedeng magpalista, kabale an mga tawo na bago pa sanang mag-atender sa mga pagtiripon, basta sinda namumuhay na kaoyon sa Kristianong mga prinsipyo.
17. (a) Para sa anong katuyohan partikularmenteng pinonan an Pagtiripon-Publiko? (b) Anong mga bagay an maninigong girumdomon kan pampublikong mga espiker?
17 An saro pa na haloy nang kabtang kan programa nin pagtotokdo iyo an Pagtiripon-Publiko. Siring sa ipinaririsa kan ngaran, pinonan an pagtiripon na ini partikularmente tanganing manodan kan mga bakong Saksi an pundamental na mga katokdoan sa Biblia. Sa siring, kaipuhan na an impormasyon iatubang kan nagpapahayag sa paagi na masasabotan kan mga ngonyan pa sana nakakadangog kan mensahe. Nangangahulogan ini nin pagpaliwanag kan mga termino na arog kan “ibang karnero,” “mga tugang,” asin “natatada,” mga termino na tibaad dai nasasabotan nin mga bakong Saksi. Mantang an mga tawo na nag-aatender sa Pagtiripon-Publiko tibaad igwa nin mga paniniwala o estilo nin pamumuhay na kontra nanggad sa Kasuratan—minsan ngani puede sa presenteng sosyedad—an espiker maninigo na magin perming mataktika asin nungkang pag-olog-ologon an siring na mga paniniwala asin estilo nin pamumuhay.—Ikomparar an 1 Corinto 9:19-23.
18. Ano an iba pang semanal na mga pagtiripon sa kongregasyon, asin sa anong mga katuyohan iyan nagseserbi?
18 An Pag-adal sa Libro kan Kongregasyon sarong pagtiripon na dian an mga publikasyon na inandam sa pagdirehir kan maimbod asin madonong na oripon pinag-aadalan kada semana kaiba an Biblia. An librong Revelation—Its Grand Climax At Hand! iyo an presenteng pinag-aadalan sa dakol na kadagaan. An Pagtiripon sa Paglilingkod sinadya tanganing sangkapan an banwaan ni Jehova na magkaigwa nin lubos na pakikikabtang sa paghuhulit kan maogmang bareta kan Kahadean asin paggibo nin mga disipulo.—Mateo 28:19, 20; Marcos 13:10.
Tinotokdoan sa Mas Darakulang Pagtiripon
19. Anong mas darakulang pagtiripon an iinaareglo kan “oripon” kada taon?
19 Sa laog nin labi nang sanggatos na taon, an ‘maimbod na oripon’ nag-aareglo nin mga kombension asin asamblea para sa pagtotokdo asin espesyal na pagpakosog sa tunay na mga Kristiano. An tolo sa siring na mas darakulang pagtiripon ginigibo ngonyan kada taon. Yaon an sarong aldaw na asamblea na inaatenderan nin sarong grupo nin mga kongregasyon sa sarong sirkito. Durante kan taon, an kada sirkito igwa man nin duwang aldaw na pagtiripon na inaapod na pansirkitong asamblea. Dugang pa, yaon man an pagtiripon na inaapod na pandistritong kombension, na inaatenderan nin nagkapirang sirkito. Sa ibang mga taon puedeng igwa nin internasyonal na mga kombension. An darakulang pagtiripon na ini na may bisitang mga Saksi hale sa dakol na nasyon tunay na nakapakokosog sa pagtubod para sa banwaan ni Jehova!—Ikomparar an Deuteronomio 16:16.
20. Ano an danay na idinodoon sa mas darakulang pagtiripon kan Mga Saksi ni Jehova?
20 Kaidtong 1922, kan an mga 10,000 magtiripon sa Cedar Point, Ohio, E.U.A., an mga delegado namotibar kan pampakosog na itinao kan espiker: “Ini an aldaw kan gabos na aldaw. Uya, an Hade naghahade na! Kamo an saiyang mga ahente sa pagpaisi. Kun siring, ipaisi, ipaisi, ipaisi, an Hade asin an saiyang kahadean.” An siring na darakulang kombension danay na nagdodoon sa gibohon na paghuhulit. Halimbawa, sa internasyonal na kombension sa Siudad nin Nueva York kan 1953, ipinaisi an pagpoon nin programa sa pagsasanay sa harong-harong sa gabos na kongregasyon. An pag-implementar kaiyan nagkaigwa nin marahay na gayong epekto sa paghuhulit kan Kahadean sa dakol na kadagaan.
Tinotokdoan nin Dios na Magtokdo
21. Anong pribilehio an boot niatong akoon, na dai linilingawan an katuyohan kaiyan?
21 Sierto nanggad, si Jehova igwa nin kahangahangang programa nin pagtotokdo digdi sa daga ngonyan! An gabos na nag-aaprobetsar kaiyan matotokdoan nin Dios, iyo, puedeng makabilang sa mga tinawan “kan dila kan mga tinokdoan.” Kanigoan na pribilehio na garo man sana mapasa paadalan nin Dios! Pero, kun inaako an pribilehiong ini, dai niato maninigong paglingawan an katuyohan kaiyan. Tinokdoan ni Jehova si Jesus tanganing makapagtokdo sia sa iba, asin tinokdoan ni Jesus an saiyang mga disipulo tanganing magibo ninda an gibohon na kapareho kan saiyang ginigibo alagad sa mas dakulang sokol. Kaagid kaiyan, sinasanay kita sa dakulang programa nin pagtotokdo ni Jehova sa katuyohan na makapagtokdo sa iba.—Juan 6:45; 14:12; 2 Corinto 5:20, 21; 6:1; 2 Timoteo 2:2.
22. (a) Ano an problema ni Moises asin Jeremias, alagad paano iyan naresolberan? (b) Puede kitang magkaigwa nin anong pag-asegurar na sisiertohon nin Dios na magibo an paghuhulit kan Kahadean?
22 Nagsasabi daw kamo, arog ki Moises, “Bako akong matibay magtaram,” o arog kan sabi ni Jeremias, “Dai nanggad ako tataong magtaram”? Tatabangan kamo ni Jehova arog kan pagtabang nia sa sainda. “Ako mismo mapapasa saimong ngoso,” an sabi nia ki Moises. Asin nagsabi sia ki Jeremias: “Dai ka matakot . . . ako nasa saimo.” (Exodo 4:10-12; Jeremias 1:6-8) Kan an mga namomoon sa relihion gustong pasilensiohon an saiyang mga disipulo, si Jesus nagsabi: “Kun an mga ini dai maggirong, an mga gapo makururahaw.” (Lucas 19:40) Alagad an mga gapo dai kinaipuhan na magkurahaw kan panahon na idto, asin dai ninda kaipuhan na gibohon iyan ngonyan huli ta ginagamit ni Jehova an dila kan mga tinokdoan nia na magpaabot kan mensahe kan saiyang Kahadean.
Masisimbag daw Nindo?
◻ Anong marahayon na relasyon nin Paratokdo asin estudyante an itinatampok sa Isaias kapitulo 50?
◻ Paano ginigibo ni Jehova an mahiwas na programa nin pagtotokdo?
◻ Ano an nagkapirang kabtang kan programa nin pagtotokdo ni Jehova?
◻ Taano ta sarong dakulang pribilehio na makikabtang sa programa nin pagtotokdo ni Jehova?
[Retrato sa pahina 16]
An odok sa pusong mga komento nin mga aki parateng nakapakokosog sa mga gurang