An mga Balos sa Pagkadesidido

SARO siang babaeng taga-Grecia na nag-iistar sa Fenicia kan taon 32 C.E. Grabe an kamatean kan saiyang aking babae, asin desesperado na an babae na makakua nin bolong. Kan mabaretaan an dapit sa sarong estranyo na nagsosongko sa saiyang rehion​—sarong tagaibang banwaan na sinasabing igwa nin mga kapangyarihan sa pagpaomay sa mga may helang—​determinado sia na maheling an tawong ini asin makimaherak para sa saiyang tabang.

Kan maheling sia, an babae huminuruhod, na nakikiolay: “Maherak ka sa sako, Kagurangnan, Aki ni David. An sakong aking babae makuring sinasaniban nin demonyo.” Sa paaging iyan, an babaeng taga-Grecia nakimaherak ki Jesus na paomayan an saiyang aking babae.

Maiimahinar daw nindo an kapusoan asin kapakumbabaan na kinaipuhan nia tanganing magibo ini? Si Jesus sarong autoridad na igwa nin kapangyarihan asin dangog, asin bago kaini ipinaaram nia na habo niang may makaaram kun haen sia. Dinara nia an saiyang mga apostol sa Fenicia tanganing makapahingalo nin husto, bakong tanganing magtrabaho sa tahaw kan mga Hentil na daing pagtubod. Saro pa, si Jesus Judio asin an babae Hentil, asin daing duwa-duwa na aram kan babae an manongod sa paglikay kan mga Judio na makiasosyar sa ikinaoongis na mga tawo kan mga nasyon. Minsan siring, marigon sia sa saiyang desisyon na makakua nin bolong para sa saiyang aki.

Prinobaran ni Jesus asin kan saiyang mga apostol na padesganaron an babae sa paghagad nin tabang sa oras na idto. Sa primero, si Jesus dai naggirong sa saiya. Dangan, huli sa saiyang paorootro, desididong mga kurahaw, an mga apostol may pagkauyam na nagsabi ki Jesus: “Sobolan sia; huli ta sia padagos na nagkukurahaw sa hudian niato.”

Alagad habo siang pumondo sagkod na dai sia simbagon sa saiyang pakiolay. Imbes, huminuruhod sia sa pamitisan ni Jesus, na nagsasabi: “Kagurangnan, tabangi ako!”

Idinodoon an saiyang pangenot na paninimbagan sa mga aki ni Israel asin, kadungan kaiyan, sa pagbalo sa saiyang pagtubod asin determinasyon, si Jesus madinamayon na nagpaliwanag sa saiya: “Bakong maninigo na kuanon an tinapay kan mga aki [nin Israel] asin iapon iyan sa mga ido [mga Hentil].”

Imbes na ikaanggot an negatibong pagpasentido sa saiyang rasa, sia mapakumbabang nagpadagos sa saiyang katuyohan paagi sa pagsimbag: “Iyo, Kagurangnan; alagad an totoo an mga ido nagkakakan kan mga rakdag na nahoholog sa lamesa kan saindang mga kagurangnan.”

Binalosan ni Jesus an pagkadesidido kan babaeng taga-Grecia paagi sa pagtao nin komendasyon sa saiyang pagtubod asin paghimate sa saiyang mga pagngayongayo. Imahinara an saiyang kagayagayahan kan magpuli sia na biyo nang naomayan an saiyang aking babae!​—Mateo 15:​21-28; Marcos 7:​24-30.

Arog kan babaeng idto kan enot na siglo, kaipuhan kitang magin desidido sa satong mga paghihingoa na paogmahon si Jehova asin kamtan an saiyang pag-oyon. Siring sa kamugtakan kan babaeng taga-Grecia, inaasegurar kita kan Biblia na an satong pagkadesidido “sa paggibo nin karahayan” babalosan na gayo.​—Galacia 6:9.

Ano an pagkadesidido? Taano ta kaipuhan iyan? Anong mga bagay an tibaad magpangyari sato na mawaran kan kualidad na ini, na pumondo o sumuko? Anong mga balos an malalaoman niatong akoon kun kita desidido ngonyan sa paglilingkod sa satong Kaglalang asin Ama, si Jehova?

An sarong diksionaryo tinatawan nin kahulogan an berbong “magin desidido” na “mangapot nin marigon asin posog sa sarong katuyohan, kamugtakan, o gibohon, sa ibong nin mga kaolangan, patanid, o balakid. . . . magpadagos sa pag-eksister; magtagal.”

Paorootrong sinasadol kan Biblia an mga lingkod ni Jehova na magin desidido sa paggibo kan saiyang kabotan. Halimbawa, sinasabihan kitang “padagos na hanapon nguna an kahadean,” “mangapot sa marahay,” ‘magmaigot sa pamibi,’ asin dai “mapagal” sa paggibo nin karahayan.​—Mateo 6:33; 1 Tesalonica 5:​21; Roma 12:12; Galacia 6:9.

Sa pan-aroaldaw na buhay, an pagkadesidido sarong kualidad na dapat na yaon sa sato gabos asin pataluboon niato tanganing makatagal sa buhay. Kun mayo kaiyan dai kitang magigibong ano man na may tunay, nagdadanay na halaga. Horophoropa an halimbawa nin sarong omboy na naghihingoang tumindog asin makalakad nin paripaydipay sa kaenot-enote. Bihira an omboy na nakakanood tolos na tumindog asin lumakaw sa sarong aldaw. Bilang mga omboy, posible na kita gabos dakol na beses na naghingoa asin nabigo bago kita nakalakaw sa katapustapusi. Ano daw kutana an nangyari kun pagkatumba sa primero, nagdesisyon na kitang pumondo sa paghihingoa? Tibaad sagkod ngonyan nagkakamang pa kita! Mahalaga an pagkadesidido sa pag-aabot sa kapakipakinabang na mga pasohan asin pagkamit nin katimbang na mga pag-oswag sa kakayahan asin paggalang sa sadiri. Arog kan sabi nin sarong popular na kasabihan, “An mga nanggagana nungkang minasuko, asin an mga minasuko nungkang nanggagana.”

Narerealisar kan haloy nang mga payunir na an kapangganahan dai iginagarantiya nin espesyal na mga abilidad o kakayahan. Iyan nangangaipo nin kaigotan, nin determinasyon na lubos na gibohon an kabotan ni Jehova, asin nin kapusoan sa atubangan nin temporaryong mga kaolangan, patin depresyon. An pasohan na daing sagkod na makikabtang sa mga bendisyon nin Dios dapat na girumdomon nin malinaw.

Iyo, kita gabos na naghihingoang magkamit kan pag-oyon ni Jehova asin naghihingoang manggana sa paorumbasan para sa buhay nangangaipo nin pagkadesidido, kaigotan, asin pakatagal. Kun mayo kan mga kualidad na ini, tibaad mawara niato an pag-oyon ni Jehova asin an balos na tunay na buhay.​—Salmo 18:20; Mateo 24:13; 1 Timoteo 6:​18, 19.

Parateng mas depisil para sa sarong Kristiano na magin desidido sa saiyang espirituwal na mga aktibidad kisa sa iba pang obligasyon nia. An saro tibaad padagos na naghihigos sa sarong sekular na trabaho tanganing maasikaso an pisikal na mga pangangaipo kan saiyang pamilya, alagad tibaad sia ‘pagalon’ na tanganing magkondukta nin regular na pag-adal sa Biblia kaiba an saiyang agom asin mga aki. Ano an mga dahelan ta an pagkadesidido sa Kristianong mga gibohon nagigin depisil para sa dakol?

An sarong dahelan iyo an panluluya nin boot, na gikan sa sato mismong indibiduwal na mga pagkukulang asin kaluyahan. Kun pagparaisipon ta na sana an satong mga sala, puedeng madesesperar asin sumuko kita, na naghohona na si Jehova nungka na kitang mapatatawad sa gabos niatong kasalan.

An saro pang dahelan iyo an kinabanon na atmospera nin inmoralidad, karatan, asin pagkaongis. (1 Juan 2:​15, 16) An saro sa “marahay na mga ugale” na puedeng raoton o danyaran kan kinabanon na impluwensia iyo an Kristianong pagkadesidido.​—1 Corinto 15:33.

An satong pagkadesidido sa paghuhulit puedeng paluyahon kan pagtumang o pagkaindiperente kan publiko sa satong banal na paglilingkod. Huli sa pagkadisganar, tibaad magkonklusyon kita na an mga tawo sa satong teritoryo talagang habo sa katotoohan. Ini puedeng magpangyari sa sato na maghapot, ‘Para ano pa?’ asin bayaan an satong espesyal na pribilehio nin paglilingkod sa ministeryo.

Puede man kitang maimpluwensiahan kan espiritu kan kinaban na pagpagusto sa sadiri. Taano ta magpaparasakit asin magpaparasakripisyo pa kita mantang an iba nag-oorogma o nagpapasiramsiram sana?​—Ikomparar an Mateo 16:​23, 24.

Tanganing magin desidido sa paggibo kan kabotan ni Jehova, kaipuhan niatong isulog an Kristianong pagkatawo asin mamuhay sono sa espiritu, bakong sa laman. (Roma 8:4-8; Colosas 3:​10, 12, 14) An pagkaigwa kan pagmansay ni Jehova dapit sa bagay magpapangyari sa sato na magpadagos sa satong mahalagang espirituwal na mga aktibidad.​—1 Corinto 16:13.

Mga Halimbawa sa Pagkadesidido

Tinatawan kita ni Jehova nin dakol na nakaiinspirar na halimbawa nin mga lingkod na nagdanay na fiel asin maimbod sa saiya sa ibong nin dakol na makuring pagbalo. Paagi sa paghorophorop sa sainda, naheheling niato kun paano kita makapatatalubo asin makagigibo nin Kristianong pagkadesidido asin kun taano iyan ta mahalagang marhay.

An pinakadakulang halimbawa iyo si Jesus, na nagsakit na marhay tanganing pamurawayon an ngaran ni Jehova. Dinadagka kita kan Biblia na odok na pag-adalan an saiyang mga gibo nin desididong debosyon: “Kaya, huli ta napalilibotan kita nin dakulang panganoron nin mga saksi, pabayaan ta man an gabos na kagabatan asin an kasalan na pasil sanang nakagagapos sa sato, asin dumalagan kita na may pakatagal sa paorumbasan na nasa atubangan ta, mantang kita nagheheling nin maingat sa Pangenot na Ahente asin Parasangkap kan satong pagtubod, si Jesus. Huli kan kagayagayahan na ibinugtak sa atubangan nia tinios nia an pasakitan na kahoy, hinamak an kasopganan, asin nagtukaw sa too kan trono nin Dios. Sa katotoohan, horophoropa nindo nin marhay an saro na nagtios nin siring na panlilibak nin mga parakasala tumang sa saindang sadiring ikararahay, tanganing dai kamo mapagal asin manluya sa saindong kalag.”​—Hebreo 12:​1-3.

Halawig an paorumbasan para sa buhay, bakong halipot na pareha. Iyan an dahelan na kaipuhan niato an arog-Cristong pagkadesidido. An pasohan, an sagkodan, tibaad dai natatanaw sa kadaklan na kabtang kan paorumbasan. An pasohan dapat na malinaw sa mata kan satong isip tanganing sa gabos na oras pag-aaboton niato iyan sa satong isip sa bilog, masakit na dalan. Si Jesus igwa kan siring na ladawan sa isip sa atubangan nia, arin na baga, an “kagayagayahan na ibinugtak sa atubangan nia.”

Ano an kabale sa kagayagayahan na ini para sa mga Kristiano ngonyan? Enot, iyan an balos na inmortal na buhay sa langit para sa nagkapira asin buhay na daing katapusan digdi sa daga para sa dakol. Siring man, iyan an pakamate nin satispaksion na minagikan sa pakaaram na an saro nakatao nin kaogmahan sa puso ni Jehova asin nagkaigwa nin kabtang sa pagpakangbanal sa ngaran nin Dios.​—Talinhaga 27:​11; Juan 17:4.

Kabale sa kagayagayahan na ini an dayupot, nakaoogmang relasyon ki Jehova. (Salmo 40:8; Juan 4:34) An siring na relasyon nakapakokosog sa salud asin nagsusustenir sa buhay, na tinatawan an saro kan kosog na makadalagan sa paorumbasan na may pakatagal asin na dai sumuko. Saro pa, binebendisyonan ni Jehova an relasyon na iyan paagi sa pagbubo kan saiyang banal na espiritu sa saiyang mga lingkod, na nagbubunga nin orog na kagayagayahan asin magayagayang aktibidad.​—Roma 12:11; Galacia 5:22.

Kapakipakinabang an paghorophorop sa halimbawa nin desididong pagtubod ni Job. Sia bakong sangkap asin kulang an kaaraman dapit sa saiyang situwasyon. Kaya paminsanminsan, nahuhulog sia sa pagpakangmatanos sa sadiri asin pagkadesesperar. Minsan siring, danay siang nagpaheling nin marigon na determinasyon na papagdanayon an saiyang integridad ki Jehova asin nungkang bayaan Sia. (Job 1:​20-22; 2:​9, 10; 27:​2-6) Binalosan ni Jehova si Job huli sa saiyang desididong debosyon, na tinawan sia nin espirituwal asin materyal na mga bendisyon asin kan paglaom na buhay na daing katapusan. (Job 42:​10-17; Santiago 5:​10, 11) Arog ki Job, puedeng makaeksperyensia kita nin grabeng pagsakit asin kawaran durante kan satong buhay sa ngonyan, alagad makaseseguro man kita na bebendisyonan ni Jehova an satong maimbod na pakatagal.​—Hebreo 6:​10-12.

Sa modernong mga panahon, an Mga Saksi ni Jehova sa kabilogan nagpapaheling nin Kristianong pagkadesidido sa paggibo kan kabotan ni Jehova. Halimbawa, huli sa saindang desididong paghaharongharong asin iba pang paghuhulit sa publiko sinda asin an saindang mensahe namangno sa bilog na kinaban. Dakol na beses nang nasasambitan kan media an saindang kaigotan asin determinasyon na ihulit an maogmang bareta sa ibong nin pagtumang asin mga pagbalo. An saro sa mga ini nagtampok pa ngani kan pantapos na mga tataramon na “Daing siisay man na nakadudulag sa Mga Saksi ni Jehova!”​—Mateo 5:16.

Binebendisyonan ni Jehova nin dugang pang bunga sa ministeryo an desididong mga paghihingoa kan saiyang mga Saksi. Mangnoha an eksperyensia kan nagkapirang mapamaaging Saksi sa Italya kan mga taon nin 1960 kaidtong mga 10,000 na Saksi an naghuhulit sa sarong nasyon na may labing 53,000,000 katawo. Sa sarong banwaan na may 6,000 na habitante, mayo nin mga Saksi. Nagin maringis an reaksion sa ministeryo kan nagsosongkong mga tugang.

Sa kada pagduman kan mga tugang tanganing maghulit, an dakol na babae, pati mga lalaki, sa banwaan tinitiripon an mga aking lalaki, na dinadagka sindang sundan an mga Saksi asin taghoyan sinda patin magparariribok. Pakalihis nin nagkapirang minuto kaini, an mga tugang napipiritan na maghale asin magduman sa ibang banwaan. Sa paghihingoang makatao nin kisuerra sarong lubos na patotoo sa gabos na habitante kan banwaan na ini, an mga tugang nagdesisyon na maghulit duman sa mga aldaw sanang makosog an oran, sa paglaom na dai sinda iistorbohon kan mga aki. Narisa ninda na an mga tawo sa banwaan habong mabasa tangani sanang istorbohon an mga parahayag. Sa paaging ini ikinatao an marahay na patotoo. Nanompongan an interesadong mga tawo. Naponan an bagong mga pag-adal sa Biblia. Bilang resulta, bako sanang natindog an sarong nag-ooswag na kongregasyon sa sadit na banwaan na idto kundi nagpoon man na gibohon an paghuhulit dawa sa mga aldaw na mainit. Padagos na binebendisyonan ni Jehova an pagkadesidido kan saiyang mga Saksi sa lugar na iyan asin sa bilog na Italya. Igwa na ngonyan nin labing 200,000 na Saksi ni Jehova sa nasyon na iyan.

Dakula an mga balos sa pagkadesidido sa paggibo kan tama. Paagi sa kapangyarihan kan espiritu nin Dios, an Mga Saksi ni Jehova nakahaman nin sarong gibo na dai pang kaagid sa kasaysayan nin tawo, an paghuhulit kan maogmang bareta kan Kahadean, sa mga harong asin sa iba pa, sa minilyon na tawo. (Zacarias 4:6) May kagayagayahan nindang naheling an hula sa Biblia na naotob sa makangangalas na pagtalubo asin kakosogan kan daganon na organisasyon ni Jehova. (Isaias 54:2; 60:22) Igwa sinda nin malinig na konsensia sa atubangan nin Dios, asin nag-oogma sinda sa paglaom na buhay na daing katapusan. Orog sa gabos, nagkakamit sinda nin dayupot na relasyon sa Kaglalang, si Jehova Dios.​—Salmo 11:7.

[Mga retrato sa pahina 20]

Binalosan ni Jesus an mapakumbabang pagkadesidido kaining babaeng taga-Grecia

[Retrato sa pahina 21]

Kabale an buhay sa Paraiso sa kagayagayahan na ibinugtak sa atubangan kan mga Kristiano ngonyan