An Amay Magmata
SA MGA kahoy na namumunga sa Mediterraneo, an almendras saro sa pinakanakaaapod nin atension. Sa paghinanapos nin Enero o Pebrero—enot na marhay sa kadaklan na kahoy—iyan nagmamata sa pagkatorog kaiyan sa tiglipot. Asin magayonon nanggad na pagmata! An bilog na kahoy napapatos nin saradit na burak na rosa o puti, na an ikaduwa nakaaagid sa uban kan mga gurang.—Ikomparar an Eclesiastes 12:5.
Inapod kan suanoy na mga Hebreo an kahoy nin almendras na “nagmamata,” na nananabihan an amay na pamumurak kaiyan. An kuwalidad na ini ginamit ni Jehova sa pag-ilustrar nin mahalagang mensahe. Sa kapinonan kan saiyang ministeryo, ipinaheling ki Jeremias sa bisyon an saringsing nin almendras. Ano an kahulogan kaiyan? Ipinaliwanag ni Jehova: “Ako nagpupuka mapadapit sa sakuyang tataramon tanganing otobon iyan.”—Jeremias 1:12.
Kun paanong an kahoy nin almendras amay na ‘nagmamata,’ si Jehova man “nagmamata nin amay” sa piguratibong paagi tanganing isugo an saiyang mga propeta sa pagpatanid sa saiyang banwaan manongod sa mga resulta nin pagmasumbikal. (Jeremias 7:25) Asin dai sia mapahingalo—sia ‘magpupuka’—sagkod na maotob an saiyang hula. Kaya nangyari na kan 607 B.C.E., sa itinalaan na panahon, an paghokom ni Jehova nagdatong sa apostatang nasyon nin Juda.
Ihinuhula kan Tataramon nin Dios na maabot man an kaagid na paghokom tumang sa maraot na palakaw na nabubuhayan niato. (Salmo 37:9, 10; 2 Pedro 3:10-13) Sa pagtaram manongod sa paghokom na iyan, sinisierto sato ni propeta Habacuc: “Huli ta an bisyon para sa itinalaan na panahon pa . . . Padagos iyan na halaton; huli ta sierto nanggad na iyan maootob. Dai iyan mahuhuri.” (Habacuc 2:3) An magayon na burak nin almendras nagpapagirumdom sato na si Jehova magpupuka mapadapit sa saiyang tataramon tanganing otobon iyan.
[Picture Credit Line sa pahina 32]
Pictorial Archive (Near Eastern History) Est.