“Sarong Tanda Hale sa Langit”
AN SARONG daan na tigsik nagsasabi: “Mapulang langit kun banggi, mag-ogma an mga marinero,/Mapulang langit kun aga, magmaan an mga marinero.” Ngonyan, an mga satelayt, mga pagsiyasat sa temperatura na pinakarhay nin komputer, Doppler radar, asin iba pang sientipikong paagi ginagamit sa paghula kan panahon. An mga prediksion parateng nakaooyon sa bago pa sanang kotaron na tigsik.
An relihiyosong mga kaiwal ni Jesu-Cristo sarong beses naghagad saiya nin “sarong tanda hale sa langit,” sarong pambihirang eksibisyon tanganing patunayan na sia an Mesiyas. “Kun banggi na,” sabi nia, “pinagkatodan na nindong sabihon, ‘Magkakaigwa nin marahay na panahon, ta an langit mapula’; asin kun aga, ‘Ngonyan magkakaigwa nin malipot, maoran na panahon, ta an langit mapula, alagad madampog.’ Tatao kamong magsabot kan itsura kan langit, alagad dai kamo nakasasabot sa mga tanda kan mga panahon. An maraot asin parasambay na kapag-arakian nagpaparahanap nin tanda, alagad ta dai iyan tatawan nin tanda kundi an tanda ni Jonas.”—Mateo 16:1-4.
An mga kaiwal ni Jesus nasasabi an maabot na panahon pero dai nakasasabot sa espirituwal na mga bagay. Halimbawa, ano an “tanda ni Jonas”? Pakapagtolong aldaw sa tulak nin dakulang sira, an propeta nin Dios na si Jonas naghulit sa Ninive asin sa siring nagin tanda sa kabeserang siudad na idto nin Asiria. An kapag-arakian ni Jesus nagkaigwa kan “tanda ni Jonas” kan si Cristo haros nagtolong aldaw sa lolobngan dangan binuhay liwat. Ibinalangibog kan saiyang mga disipulo an ebidensia kan pangyayaring iyan, asin kun siring si Jesus nagin tanda sa kapag-arakian na idto.—Mateo 12:39-41.
Sa saro pang okasyon, an mga disipulo ni Jesus naghagad saiya kan “tanda” kan saiyang maabot na “presensia” na may kapangyarihan sa Kahadean. Sa pagsimbag, nagtao sia nin tanda na kompuwesto nin laen-laen na kabtang, kaiba an daing kaagid na mga guerra, makokosog na linog, mga kakulangan sa pagkakan, asin lakop sa dagang paghuhulit manongod sa napatindog nang langitnon na Kahadean nin Dios.—Mateo 24:3-14.
Namimidbid daw nindo an tanda kan presensia ni Cristo bilang dai naheheling na langitnon na Hade? An mga kabtang kaiyan naootob sa kapag-arakian na ini. (Mateo 24:34) Asin kumusta man an ngapit? Bako sanang sinasabi kan Biblia na haranihon na an katapusan kan palakaw na ini nin mga bagay kundi ihinuhula man an ipinanugang bagong aldaw nin Dios na madali nang sumirang na maliwanag sa katawohan.—2 Pedro 3:13.