Ginibo Ninda an Kabotan ni Jehova

Irinukyaw si Jesus Bilang Mesiyas Asin Hade!

AN MARIBOK na kadaklan na nagraralaog sa Jerusalem kan Nisan 9, 33 C.E., ikinabigla kan dakol na taga-Judea. Minsan ngani bako man na pambihira na makaheling nin mga tawong nagpapasiring sa siudad bago an Paskua, napapalaen an mga bisitang ini. An pangenot na tawo na kabilang sa sainda sarong lalaki na nakasakay sa ogbon nin asno. An tawo iyo si Jesu-Cristo, asin an mga tawo nagbibiriklad nin mga gubing asin sanga nin palma sa atubangan nia mantang sinda nagkukurahaw: “Ligtasan, ipinakikimaherak niamo, an Aki ni David! Omawon sia na minadatong sa ngaran ni Jehova! Ligtasan sia, ipinakikimaherak niamo, sa kaitaasan!” Kan maheling an kadaklan, an dakol na yaon na duman sa Jerusalem napahirong umiba sa prosisyon.​—Mateo 21:​7-9; Juan 12:​12, 13.

Minsan ngani irinurukyaw sia ngonyan, aram ni Jesus na naghahalat sa saiya an mga pagbalo. Tara, limang aldaw na sana, gagadanon na sia sa siudad man sanang ini! Iyo, aram ni Jesus na an Jerusalem bakong makikatood na teritoryo, asin iinareglo nia an saiyang risa-risang paglaog sa siudad na iyan mismo an nasa isip.

Sarong Suanoy na Hula na Naotob

Kan 518 B.C.E., ihinula ni Zacarias an paglaog ni Jesus sa Jerusalem para sa kapangganahan. Sia nagsurat: “Kumurahaw ka sa kapangganahan, O aking babae nin Jerusalem. Uya! An saimong hade mismo minadolok sa saimo. Sia matanos, iyo, ligtas; mapakumbaba, asin nangangabayo sa sarong asno, sa dakula nang hayop na ogbon nin sarong babaeng asno. . . . Asin sia magtataram nin katoninongan sa mga nasyon; asin an saiyang pamamahala magigin paghale sa dagat sagkod sa dagat asin paghale sa Salog sagkod sa mga kasagkodan kan daga.”​—Zacarias 9:​9, 10.

Kaya inotob kan paglaog ni Jesus sa Jerusalem kan Nisan 9 an hula sa Biblia. Bako iyan na pagkanorongod sanang pangyayari kundi maingat na plinano. Bago kaini, mantang yaon sa luwas nin Jerusalem, pinagbotan ni Jesus an duwa sa saiyang mga disipulo: “Paduman kamo sa baryo na natatanaw nindo, asin tolos na manonompongan nindo an sarong asna na nagagakod, asin may ogbon siang kaiba; hubadan nindo sinda asin darahon nindo sa sako. Asin kun may magsabi nin ano man sa saindo, magsabi kamo, ‘Kaipuhan sinda kan Kagurangnan.’ Asin sa siring ipadadara nia tolos sinda.” (Mateo 21:​1-3) Alagad taano ta boot ni Jesus na sumakay sa sarong asno palaog sa Jerusalem, asin ano an kahulogan kan reaksion kan kadaklan?

Sarong Mensahe Mapadapit sa Pagigin Hade

An naheheling na paglaladawan sa parate mas mapuersa kisa sa pagtaram. Sa siring, kun beses pinangyayari ni Jehova na isaaksion kan saiyang mga propeta an saindang mensahe tanganing orog pang idoon an saindang makahulang mensahe. (1 Hade 11:​29-32; Jeremias 27:​1-6; Ezequiel 4:1-17) An naheheling na marhay na paaging ini nin pagkomunikar nagwalat nin dai mapaparang impresyon sa isip kan minsan pinakamatagas an pusong nagmamasid. Sa kaagid na paagi, isinaaksion ni Jesus an sarong mapuersang mensahe paagi sa pagsakay sa sarong asno palaog sa siudad nin Jerusalem. Paano?

Kaidtong mga panahon kan Biblia an asno ginagamit para sa nobleng mga katuyohan. Halimbawa, si Salomon nagsakay kan sia lahidan bilang hade sa “babaeng mula” kan saiyang ama, na mestisong ogbon nin asno.a (1 Hade 1:​33-40) Kaya an pagsakay ni Jesus sa asno palaog sa Jerusalem mangangahulogan na ipinepresentar nia an saiyang sadiri bilang hade. An hiro-hiro kan kadaklan orog pang nagdoon sa mensaheng ini. An grupo, na daing duwa-duwa na kadaklan mga taga-Galilea, nagbiklad kan saindang mga gubing sa atubangan ni Jesus​—sarong aksion na nagpapagirumdom sa pagpaisi sa publiko kan pagigin hade ni Jehu. (2 Hade 9:13) An pag-apod ninda ki Jesus bilang “an Aki ni David” nagdoon kan saiyang legal na diretsong mamahala. (Lucas 1:​31-33) Asin an paggamit ninda nin mga sanga nin palma malinaw na nagpaheling kan saindang pagpasakop sa saiyang autoridad bilang hade.​—Ikomparar an Kapahayagan 7:​9, 10.

Kaya an prosisyon na naglaog sa Jerusalem kan Nisan 9 nagtao kan malinaw na mensahe na si Jesus an Mesiyas asin Hade na ninombrahan nin Dios. Siempre, bakong gabos naogma na maheling si Jesus na iprenesentar sa paaging ini. Inisip nangorogna kan mga Fariseo na biyong bakong angay na si Jesus tawan nin siring na sa-hadeng onra. “Paratokdo,” an kahagadan ninda, na daing duwa-duwa na anggot an saindang tingog, “sawaya an saimong mga disipulo.” Si Jesus nagsimbag: “Sinasabi ko sa saindo, Kun an mga ini dai maggirong, an mga gapo makururahaw.” (Lucas 19:​39, 40) Iyo, an Kahadean nin Dios an tema kan paghuhulit ni Jesus. May kapusoan na ibabalangibog nia an mensaheng ini baga man akoon iyan o dai kan mga tawo.

Leksion Para sa Sato

Dakulang kapusoan an kinaipuhan ni Jesus sa paglaog sa Jerusalem sono sa paaging ihinula ni propeta Zacarias. Aram nia na sa paggibo kaiyan ikaoongis siang marhay kan saiyang mga kaiwal. Bago sia nagsakat sa langit, isinugo ni Jesus an saiyang mga parasunod na ihulit an maogmang bareta kan Kahadean nin Dios asin ‘gumibo nin mga disipulo sa mga tawo kan gabos na nasyon.’ (Mateo 24:14; 28:​19, 20) Nangangaipo man nin kapusoan an paghaman kan gibohon na ini. Bakong gabos naoogmang madangog an mensahe. An nagkapira indiperente dian, mantang an iba kinokontra iyan. An nagkapirang gobyerno naglaag nin mga restriksion sa paghuhulit o direktang ibinawal iyan.

Pero, narerealisar kan Mga Saksi ni Jehova na dapat na ihulit an maogmang bareta kan tinindog nang Kahadean nin Dios, baga man an mga tawo maghinanyog o habong maghinanyog. (Ezequiel 2:7) Mantang ipinagpapadagos ninda an nagliligtas-buhay na gibohon na ini, ginagarantiyahan sinda kan panuga ni Jesus: “Uya! ako danay na nasa saindo sagkod sa pagtatapos kan palakaw nin mga bagay.”​—Mateo 28:20.

[Nota sa Ibaba]