Haen an mga Gadan?

“AN DAGA sarong sadan; an langit satong erokan,” an sarabihon kan mga Yoruba sa Solnopan na Aprika. Inoorootro an ideyang ini sa dakol na relihiyon. Ipinapaabot kaiyan an ideya na an daga siring sa sarong sadan na dinadalaw niato sa halipot na panahon dangan minahale. Sono sa paniniwalang ini, pagkagadan minaduman kita sa langit, an satong tunay na ontokan.

Talagang itinotokdo kan Biblia na an nagkapira minaduman sa langit. Sinabihan ni Jesu-Cristo an maimbod niang mga apostol: “Sa harong kan sakong Ama kadakol kan ontokan. . . . Ako maduman tanganing mag-andam nin lugar para sa saindo. Siring man, kun ako magduman asin mag-andam nin lugar para sa saindo, ako madigdi liwat asin ipag-iiba ko kamo, tanganing kun saen ako duman man kamo.”​—Juan 14:​2, 3.

An mga tataramon ni Jesus dai nangangahulogan na an gabos na marahay na tawo maduman sa langit o na an langit erokan nin katawohan. An nagkapira dinadara sa langit may koneksion sa pamamahala sa daga. Aram ni Jehova Dios na an mga gobyerno nin tawo nungkang mapangganang mapamahalaan an gibo-gibo digdi sa daga. Kaya, nag-areglo sia nin sarong langitnon na gobyerno, o Kahadean, na sa katapustapusi mamamahala sa daga asin liliwaton iyan na magin Paraiso na sa orihinal katuyohan niang magin siring kaiyan. (Mateo 6:​9, 10) Si Jesus an magigin Hade sa Kahadean nin Dios. (Daniel 7:​13, 14) An iba pipilion gikan sa tahaw nin katawohan tanganing mamahala kaiba nia. Ihinula kan Biblia na an mga dadarahon sa langit magigin “kahadean asin mga saserdote kan satuyang Dios” asin “magsasakop bilang hade sa daga.”​—Kapahayagan 5:10.

Siisay an Maduman sa Langit?

Kun kokonsideraron an magigin dakulang paninimbagan kan langitnon na mga namamahalang ini, bakong makangangalas na kaipuhan nindang aboton an estriktong mga kahagadan. An mga paduman sa langit dapat na magkaigwa nin tamang kaaraman manongod ki Jehova asin dapat na kuyogon sia. (Juan 17:3; Roma 6:​17, 18) Hinahagad sainda na gumibo nin pagtubod sa pantubos na atang ni Jesu-Cristo. (Juan 3:16) Alagad, dakol pa an kalabot. Kaipuhan sindang apodon asin pilion nin Dios paagi sa saiyang Aki. (2 Timoteo 1:​9, 10; 1 Pedro 2:9) Saro pa, kaipuhan na sinda bautisadong mga Kristiano na “namundag giraray,” ipinaniaki kan banal na espiritu nin Dios. (Juan 1:​12, 13; 3:​3-6) Kaipuhan man nindang papagdanayon an integridad sa Dios sagkod sa kagadanan.​—2 Timoteo 2:​11-13; Kapahayagan 2:10.

An dai mabilang na minilyon katawo na nabuhay asin nagadan dai nakaabot sa mga kahagadan na ini. Dakol an nagkaigwa nin kakadikit na oportunidad na makanood dapit sa tunay na Dios. An iba nungkang nabasa an Biblia asin kakadikit o mayong aram manongod ki Jesu-Cristo. Maski sa tahaw kan tunay na mga Kristiano digdi sa daga ngonyan, pipira an pinili nin Dios para sa langitnon na buhay.

Bilang resulta, an bilang kan mga maduman sa langit kadikit nanggad. Inapod ni Jesus an mga iyan na “sadit na aripompon.” (Lucas 12:32) Kan huri, ihinayag ki apostol Juan na an mga “binakal hale sa daga” tanganing maghade sa langit kaiba ni Cristo may bilang na 144,000 sana. (Kapahayagan 14:1, 3; 20:6) Kun ikokomparar sa binilyon katawo na nabuhay digdi sa daga, iyan dikit na bilang nanggad.

An mga Dai Maduman sa Langit

Ano an mangyayari sa mga dai maduman sa langit? Sinda daw nagsasakit sa lugar nin daing sagkod na pagpasakit, siring kan itinotokdo nin ibang relihiyon? Siyempre dai, huli ta si Jehova Dios nin pagkamoot. An mamomoton na mga magurang dai iinaapon sa kalayo an saindang mga aki, asin si Jehova dai pinapasakitan an mga tawo sa siring na paagi.​—1 Juan 4:8.

An paglaom para sa dakolon na nagadan iyo an pagkabuhay liwat pasiring sa paraiso sa daga. Nagsasabi an Biblia na linalang ni Jehova an daga “tanganing pag-istaran.” (Isaias 45:18) Ipinahayag kan salmista: “Kun manongod sa kalangitan, an kalangitan rogaring ni Jehova, alagad an daga itinao nia sa mga aki nin mga tawo.” (Salmo 115:16) An daga, bakong an langit, an magigin permanenteng erokan kan katawohan.

Ihinula ni Jesus: “An oras maabot na an gabos na nasa mga lolobngan nin girumdoman makadadangog kan saiyang tingog [ni Jesus, an “Aki nin tawo”] asin maruluwas.” (Juan 5:​27-29) Pinatunayan kan Kristianong si apostol Pablo: “May paglaom ako sa Dios . . . na magkakaigwa nin pagkabuhay liwat an mga matanos asin an mga bakong matanos.” (Gibo 24:15) Sa hariging pasakitan, pinanugaan ni Jesus nin buhay an sarong nagsolsol na parakasala paagi sa pagkabuhay liwat pasiring sa paraisong daga.​—Lucas 23:43.

Pero, ano an presenteng kamugtakan kan mga gadan na bubuhayon liwat sa buhay digdi sa daga? An sarong pangyayari sa ministeryo ni Jesus nakakatabang na masimbag an hapot na ini. Nagadan an saiyang katood na si Lazaro. Bago sia binuhay liwat ni Jesus, sinabihan Nia an Saiyang mga disipulo: “Si Lazaro na katood niato nagpahingalo, alagad ako maduman tanganing pukawon ko sia sa pagtorog.” (Juan 11:11) Kun siring ikinomparar ni Jesus an kagadanan sa pagtorog, nanok na pagtorog na mayo nin mga pangatorogan.

Natotorog sa Kagadanan

An ibang teksto kaoyon kan ideyang ini na natotorog sa kagadanan. An mga iyan dai nagtotokdo na an mga tawo igwa nin dai nagagadan na kalag na minaduman sa rona nin mga espiritu pagkagadan. Imbes, nagsasabi an Biblia: An “mga gadan mayo man lamang sinda nin pakaaram . . . An saindang pagkamoot asin an saindang pagkaongis patin an saindang pangimon nawara na . . . Mayo nin gigibohon ni pagplano ni kaaraman ni kadonongan sa Sheol [an lolobngan], an lugar na saimong padudumanan.” (Eclesiastes 9:​5, 6, 10) Saro pa, ipinahayag kan salmista na an tawo ‘minabalik sa saiyang daga; sa aldaw na iyan an saiyang mga pag-isip napapara.’​—Salmo 146:4.

Liniliwanag kan mga tekstong ini na an mga natotorog sa kagadanan dai kita naheheling o nadadangog. Sinda dai nakatatao nin arin man sa bendisyon o kalamidad. Mayo sinda sa langit, ni na nag-eerok sinda sa sarong komunidad nin mga apoon. Mayo sinda nin buhay, dai nag-eeksister.

Sa itinalaan na panahon nin Dios, an mga natotorog ngonyan sa kagadanan asin na nasa saiyang girumdoman pupukawon sa buhay sa sarong paraisong daga. Iyan magigin daga na lininigan sa polusyon, mga kariribokan, asin problema na naeeksperyensiahan ngonyan kan katawohan. Kanigoan kagayagayang panahon iyan! Sa Paraisong iyan magkakaigwa sinda kan paglaom na mabuhay sagkod lamang, huli ta inaasegurar kita kan Salmo 37:29: “An mga matanos mismo magmamana kan daga, asin sinda mag-eerok dian sagkod lamang.”

[Kahon sa pahina 6, 7]

NAG-ONTOK AKO SA PAGSAMBA SA MGA GADAN

“Kan ako aki pa, tinatabangan ko an sakuyang ama durante kan saiyang regular na mga pag-atang para sa saiyang gadan nang ama. Sa sarong okasyon kan magrahay an sakong ama sa grabeng helang, an lalaking parasantiguwar sinabihan sia na bilang pag-apresyar sa saiyang pagrahay maninigo siang magdolot nin atang na sarong kanding, mga ubi, mga kola nut, asin arak para sa saiyang gadan nang ama. Sinadol man an sakong ama na mangapodan sa saiyang gadan nang mga apoon na olangon an dakol pang helang asin kalamidad.

“Buminakal an sakong ina kan kinakaipuhan para sa pag-atang, na gigibohon sa linubongan kan sakong lolo. An lolobngan kataed sana kan samong harong, kaoyon sa lokal na kaugalean.

“An mga katood, paryentes, asin kataraed inimbitaran na magmasid sa pag-atang. An sakong ama, na nakagubing nin magayonon na angay sa okasyon, nakatukaw sa sarong silya na nakaatubang sa altar kun saen nakalinya an nagkapirang bungo nin kanding na ginamit kan nakaaging mga pag-atang. An sakong gibohon iyo na ipalis sa sarong sadit na baso an arak na nasa bote, na itinao ko sa sakong ama. Dangan, iinuula nia iyan sa daga bilang atang. Inaapod nin tolong beses kan sakong ama an ngaran kan saiyang ama asin namimibi sa saiya para sa pagkaligtas sa umaaboton na kalamidad.

“An mga kola nut idinodolot, asin sarong lalaking karnero an binubuno, ginagaga, asin kinakakan kan gabos na presente. Nakikakan ako asin nakibayle sa pag-awit asin pagtubtob nin mga bombo. Magayonon asin sigidong nagbayle an sakong ama, dawa ngani maririsang gurang na sia. Sa pagsarosaliot namimibi sia sa saiyang mga apoon na bendisyonan an gabos na presente, mientras na an mga tawo, kabale na ako, nagsisimbag nin Ise, na nangangahulogan ‘Mangyari logod iyan.’ Minasdan ko an sakong ama na may hararom na interes asin paghanga saka naghidaw sa aldaw na ako gurang na tanganing gumibo nin mga pag-atang sa gadan nang mga apoon.

“Sa ibong kan dakol na idinolot na atang, mayo pang katoninongan sa pamilya. Mantang igwa nin tolong buhay pang aking lalaki an sakong ina, mayo sa tolong aking babae na namundag saiya an nabuhay nin haloyon; an gabos nagadan na aki pa. Kan magbados liwat an sakong ina, naggibo an sakong ama nin magarbong mga pag-atang tanganing ligtas na mamundag an aki.

“Nangaki si Nanay nin saro pang babae. Makalihis an duwang taon naghelang asin nagadan an aki. Kuminonsulta an sakong ama sa parasantiguwar, na nagsabing responsable sa pagkagadan an sarong kaiwal. Nagsabi an parasantiguwar na tanganing makabalos an ‘kalag’ kan aki, kaipuhan an nagkakalayong tabla, sarong boteng arak, asin sarong ido para sa pag-atang. An nagkakalayong tabla ibubugtak sa ibabaw kan lolobngan, an arak iwiwirik sa ibabaw kan lolobngan, asin an ido ilulubong na buhay harani sa lolobngan. Ini pinaghohonang pinupukaw an kalag kan gadan na aking babae tanganing ipamalos an saiyang pagkagadan.

“Dinara ko an bote nin arak asin an nagkakalayong tabla pasiring sa lolobngan, asin dara kan sakong ama an ido, na saiyang ilinubong sono sa mga instruksion kan parasantiguwar. Kami gabos naniniwala na sa laog nin pitong aldaw an kalag kan gadan na aki lalaglagon an tawo na nagcausa kan saiyang amay na kagadanan. Nakalihis an duwang bulan, asin mayo nin ibinaretang gadan sa kataraed. Nadisganar ako.

“Desiotso anyos ako kan panahon na idto. Dai nahaloy pakalihis kaiyan nanompongan ko an mga Saksi ni Jehova, na ipinaheling sa sako gikan sa Kasuratan na an mga gadan dai puwedeng makagibo nin marahay ni maraot sa mga buhay. Mantang an kaaraman sa Tataramon nin Dios nakakagamot sa sakong puso, sinabihan ko an sakong ama na dai ko na sia iibahan sa paggibo nin mga pag-atang para sa mga gadan. Kan primero naanggot sia sako huli sa pagbaya saiya, siring kan pagkapahayag nia kaiyan. Alagad kan mamasdan nia na habo kong isuko an sakong bagong manompongan na pagtubod, dai nia tinumang an sakong pagsamba ki Jehova.

“Kan Abril 18, 1948, sinimbolisaran ko an sakong pagdusay paagi sa bautismo sa tubig. Poon kaidto, nagpadagos akong maglingkod ki Jehova na igwa nin dakol na paggayagaya asin satispaksion, na tinatabangan an iba na makatalingkas sa pagsamba sa gadan nang mga apoon, na dai puwedeng makatabang ni makakolog sa sato.”​—Isinaysay ni J. B. Omiegbe, Siudad nin Benin, Nigeria.

[Ritrato sa pahina 7]

Magkakaigwa nin dakulang kagayagayahan kun buhayon na liwat an mga gadan sa sarong paraiso digdi sa daga