An “Aldaw kan Kagurangnan”

“PAAGI sa pasabong ako napasa aldaw kan Kagurangnan.” (Kapahayagan 1:10) Iyan an isinabi kan gurang nang si apostol Juan, na ipinaheheling sa itaas, sa enot na kapitulo kan libro sa Biblia na Kapahayagan. An saiyang mga tataramon nakatatabang sato na maaraman an panahon kan kaotoban kan makangangalas na mga bisyon na saiyang ilinadawan.

Alagad bakong gabos oyon sa pagkatradusir na ini kan Kapahayagan 1:10. Halimbawa, an Aleman na paratradusir sa Biblia na si Jörg Zink arog kaini an pagkatradusir: “Napano ako nin banal na espiritu—Domingo kaidto.” Pero an kadaklan na bersion sa Biblia tinatradusir an frase sa Griego na teiʹ ky·ri·a·keiʹ he·meʹrai na “aldaw kan Kagurangnan.” Pero sa nota sa ibaba dakol an nagsasabi na iyan Domingo. Tama daw ini?

An Aleman na Herders Bibelkommentar, sarong Katolikong reperensia, ipinaliliwanag an pangangatanosan sa likod kan kaisipan na ini sa pagsabi kaiyan: “An boot sabihon digdi [sa Kapahayagan 1:10] bakong Aldaw nin Ultimong Paghokom, na inaapod man na ‘Aldaw kan Kagurangnan’, kundi sarong espisipikong aldaw kan semana. An enot na mga Kristiano pinonan na selebraron an enot na aldaw kan semana bilang aldaw kan saindang mayor na mga serbisyo sa simbahan kaidto pang kabangaan kan enot na siglo. (Gibo 20:7; 1 Cor. 16:2)” Minsan siring, an duwang tekstong sinitar kan reperensiang iyan dai man nagpapatunay na ibinilang kan mga Kristiano kan enot na siglo an enot na aldaw kan semana na “aldaw kan saindang mayor na mga serbisyo sa simbahan.”

An enot na teksto, Gibo 20:7, nagsasabi sana na si Pablo, an saiyang mga kairiba sa pagbiyahe, asin an mga Kristiano hale sa Troas nagtiripon sa enot na aldaw kan semana sa pagkakan. Mantang si Pablo pahale kan masunod na aldaw asin haloy-haloy na dai nia sinda maheheling, inaprobetsaran nia an okasyon na kaolayon sinda nin harohalawig.

An ikaduwang teksto, 1 Corinto 16:2, nagsadol sa mga Kristiano sa Corinto na magtagama nin kuwarta “kada enot na aldaw nin semana” tanganing may ikadonar sa mga nangangaipo sa Judea. An iskolar na si Adolf Deissmann nagsusuherir na an aldaw na ini tibaad aldaw nin suweldo. Minsan paano, an suhestion ni Pablo praktikal, ta puwedeng maubos an kuwarta sa laog kan semana.

Mayo nin sinasabi sa Biblia na ibinilang kan mga Kristiano kan panahon nin mga apostol an enot na aldaw kan semana, na ngonyan inaapod na Domingo, na sarong klase nin Kristianong sabbath, aldaw na natatagama para sana sa saindang regular na mga pagtiripon para sa pagsamba. Pagkagadan na sana kan mga apostol na an Domingo ibinilang nin siring asin inapod na “aldaw kan Kagurangnan.” Ini kabtang kan apostasiya na ihinula ni Jesus asin kan mga apostol mismo.—Mateo 13:36-43; Gibo 20:29, 30; 1 Juan 2:18.

Kun siring, ano an “aldaw kan Kagurangnan”? An nakapalibot na teksto sa Kapahayagan 1:10 nagtotokdo ki Jesus bilang an Kagurangnan na sa saiya an aldaw na iyan. An Tataramon nin Dios nagpapamidbid na an mga tataramon na arog kan “aldaw kan satong Kagurangnan na si Jesu-Cristo” panahon nin paghokom para sa katawohan asin pagbabalik kan Paraiso.—1 Corinto 1:8; 15:24-26; Filipos 1:6, 10; 2:16.

Kun siring, si Hans Bruns, sa saiyang traduksion na may komentaryo, Das Neue Testament (The New Testament), tama kan sia magsabi: “An iba nagsasabi na sia [si Juan] nagtataram digdi manongod sa Domingo, pero mas posible na an boot niang sabihon an bantog na Aldaw kan Kagurangnan, na dian man talaga nanonongod an gabos na suminunod niang paglaladawan.” Si W. E. Vine nagsasabi: “An ‘Aldaw kan Kagurangnan’ . . . iyo an Aldaw kan Saiyang hayag na paghokom sa kinaban.” An Lexikon zur Bibel (Leksiko kan Biblia) ni Friz Rienecker nagsasabi na an “aldaw kan Kagurangnan” malinaw na nangangahulogan nin “aldaw nin paghokom.”

An tamang pakasabot sa mga tataramon na “aldaw kan Kagurangnan” nakatatabang sato na masabotan an bilog na libro nin Kapahayagan. Dugang pa, ipinaheheling kan ebidensia na nagpoon na an aldaw na iyan. Kaya napakahalaga na satuyang ‘dangogon an mga tataramon kan hula sa Kapahayagan asin kuyogon an mga bagay na nasusurat dian’!—Kapahayagan 1:3, 19.

[Ritrato sa pahina 31]

An klaro asin napapanahon na paliwanag sa kada bersikulo sa librong Kapahayagan itinatao sa “Revelation—Its Grand Climax At Hand!” An nakawiwiling pantabang na ini sa pag-adal sa Biblia makukua sa mga Saksi ni Jehova