“Dai Kamo Makipagsakal na Bakong Timbang”
AN DUWANG baka na nasa retrato digdi igwa nin pambihirang kosog, na nagpapangyari sa sainda na pasil na maguyod an magabat na mga karga. Alagad ipamugtak na an saro sa mga baka sinalidahan nin sarong asno. Mantang an asno mas sadit asin mas maluya sa baka, posibleng magtutumang iyan paagi sa pagsipa sa patuloy na nagpopogol sa saiya sa bakong timbang na sakal na ini. May marahay na dahelan, kun siring, na an pagboot nin Dios sa Israel nagsabi: “Dai ka mag-arado paagi sa pinag-ibang baka asin asno.”—Deuteronomio 22:10.
Si apostol Pablo may kaagid na isinurat mapadapit sa mga tawo. Sia nagsabi: “Dai kamo makipagsakal na bakong timbang sa mga dai nagtutubod.” (2 Corinto 6:14) Ini nangorognang maninigong isaisip kun nagpipili nin aagomon. An pag-agoman sarong permanenteng pag-ibanan, ta si Jesu-Cristo nagsabi: “An pinagsaro nin Dios dai puedeng pagsuwayon nin siisay man.” (Mateo 19:6) Grabeng kolog sa puso an ibinubunga kun an mag-agom bakong magkapareho an mga paniniwala, prinsipyo, asin pasohan. Rasonable sana kun siring na sunodon an sadol kan Biblia na mag-agom ‘sana sa Kagurangnan.’ (1 Corinto 7:39) Mas dakula pa ngani an magigin problema sa pag-agom sa saro na bako nindong kapareho an pagtubod kisa sa pagsakal sa baka kaiba nin asno.
An pagkakalaen sa relihiosong paniniwala saro sanang dahelan na puedeng magin bakong timbang an sakal nin mag-agom. An mga may planong magpakasal—dawa magkapagtubod—marahay na maghapot, ‘Pareho daw an samong mga pasohan? Saen kami maistar? Siisay an makapot kan badyet? Pareho daw kaming magtatrabaho? Maaki daw kami? An kabootan asin konsiderasyon daw an mangingibabaw sa relasyon?’
An paagi nin pag-oolay sa mga isyung iyan puedeng magparisa nin kadikit kun baga an sakal magigin timbang o bako. Siempre, mayong duwang tawo na biyong magkabagay. Minsan siring, sa pankagabsan, kun kayang magkadamay na atubangon asin resolberan nin magkailusyon an mga problema asin kaya nindang papagdanayon na bukas an saindang komunikasyon, posible na sinda dai magkakasakal nin bakong timbang.