Bilang halimbawa, probaring horophoropon an mga tataramon ni apostol Pablo na yaon sa 2 Corinto 7:1: “Kun siring, mantang igwa kita kan mga panugang ini, mga namomotan, magpakalinig kita sa lambang ramog nin laman asin espiritu, na sinasangkap an kabanalan sa pagkatakot sa Dios.” Saboton nindo an mga tataramon na ini. Ihapot sa saindong sadiri, ‘Ano man nanggad an “mga panugang ini” na sinambit ni Pablo?’ Paagi sa pagbasa kan konteksto, maririsa nindo na an naenot na mga bersikulo nagsasabi: “‘“Humale kamo sa tanga ninda, asin sumiblag kamo,” an sabi ni Jehova, “asin dai na kamo dumotdot sa maating bagay”’; ‘“asin aakoon ko kamo.”’ ‘“Asin ako manini saindong ama, asin kamo manini sakong mga aking lalaki asin aking babae,” sabi ni Jehova na Makakamhan sa gabos.’”​—2 Corinto 6:​17, 18.

An pagboot ni Pablo na ‘magpakalinig kita sa ramog’ nadugangan an puersa ngonyan! Bilang mapuersang pan-enganyar na gibohon iyan, an Dios nanunugang ‘akoon kita,’ an boot sabihon, ibugtak kita sa irarom kan saiyang mapagprotehir na pag-ataman. ‘Magkakaigwa daw ako nin dayupot na relasyon sa saiya​—arog sa relasyon nin aking lalaki o babae sa sarong ama?’ an tibaad ihapot nindo sa saindong sadiri. Bako daw na nakaaakit na marhay an ideya na ‘akoon’ o kamotan nin madonong, mamomoton na Dios? Kun an ideyang iyan garo baga daing kahulogan para sa saindo, masdan nindo kun paano an mamomoton na mga ama nagpapahayag nin pagkamoot asin kapadangatan sa saindang mga aki. Ngonyan isip-isipa an bogkos na iyan sa pag-oltanan nindo ni Jehova! Mientras na orog na pinaghohorophorop nindo iyan, orog man na nagtatalubo an pagmawot sa siring na relasyon.

Alagad mangnohon: An kadayupotan sa Dios posible sana kun “dai na kamo dumotdot sa maating bagay.” Ihapot sa saindong sadiri: ‘Bako daw na an pagkaadikto sa tabako kabale sa “maating mga bagay” na kinokondenar nin Dios? An paggamit daw kaiyan “ramog nin laman,” na ginigibo an sakong sadiri na madaling tamaan nin gabos na klase nin peligro sa salud? Mantang si Jehova malinig, o “banal,” na Dios, ooyonan daw nia an tuyong pagramog ko kan sakong sadiri sa paaging ini?’ (1 Pedro 1:​15, 16) Mangnoha na si Pablo nagpapatanid man tumang sa ‘ramog nin espiritu,’ o inklinasyon nin isip. Ihapot sa saindong sadiri: ‘Nangingibabaw daw sa sakong pag-iisip an pagkaadiktong ini? Gigibohon ko daw an gabos na medyos tanganing mapanigoan an sakong paghimuyawot, na tibaad isinasapeligro an sakong salud, an sakong pamilya, o pati an sakong kamugtakan sa atubangan nin Dios? Sagkod saen ko tinogotan an sakong pagkaadikto sa tabako na danyaran an sakong buhay?’ An pag-atubang sa makolog sa boot na mga hapot na ini tibaad magtao nanggad sa saindo kan kapusoan na pumondo!

Antes manodan an katotoohan, an mag-agom na Lin nakatanom na nin 1,300 na poon nin bunga sa saindang daga. Minsan ngani aaboton nin limang taon bago mapakinabangan an mga kahoy, kun an mga iyan magin biyo nang produktibo, puedeng laoman kan mag-agom na Lin na makaganansia nin $77,000 kada taon. Mantang nagrarani an panahon kan primerong pag-ani, an mag-agom na Lin kaipuhan na gumibo nin mahalagang desisyon. Naaraman ninda paagi sa saindang pag-adal kan Biblia na kaipuhan na linigan kan mga Kristiano an saindang sadiri “sa lambang ramog nin laman asin espiritu” paagi sa paglikay sa paggamit, o pagpalakop, kan maating mga bisyo na siring sa pagtabako, pagdodroga, asin pagmama. (2 Corinto 7:1) Ano daw an gigibohon ninda?

Mantang nasasakitan huli sa purisaw na konsensia, nagdesisyon si Mr. Lin na pumondo sa pag-adal. Mientras tanto, si Mrs. Lin nagpabakal kan mga bunga hale sa saindang mas gurang na mga poon asin nakaganansia nin labing $3,000. Panamit sana ini kan makukua sa dai mahahaloy kun papagdanayon ninda an saindang mga kahoy. Minsan siring, padagos na nakonsensia si Mr. Lin.

Nakipagtusayan sia sa isyu sagkod na sarong aldaw hinagad nia sa lokal na mga Saksi na palodon an saiyang mga poon nin bunga para sa saiya. Ipinaliwanag kan mga Saksi na iyan desisyon na dapat niang gibohon; kun siring, kaipuhan niang ‘pasanon an saiyang sadiring pasan’ asin palodon nia mismo an mga kahoy. (Galacia 6:​4, 5) Pinarigon ninda an saiyang boot na girumdomon an panuga sa 1 Corinto 10:​13, na nagsasabi: “Mayong sugot na uminabot sa saindo kundi idto sanang komun sa mga tawo. Alagad fiel an Dios, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.” Nakipangatanosan man sa saiya an mga Saksi, na nagsasabi: “Kun palodon niamo an saimong mga kahoy para sa saimo, tibaad panganugnan mo iyan asin ibasol mo sa samo an kapierdihan.” Paghaloyhaloy, napagmata si Mrs. Lin sa tanog nin lagadi na karokadena an tarom. Pinapalod kan saiyang agom asin mga aki an mga poon nin bunga!

Napatunayan ni Mr. Lin na inootob ni Jehova an Saiyang panuga. Nakakua sia nin trabaho na nagtogot sa saiya na magkaigwa nin malinig na konsensia, na nagpangyari sa saiya na magin paraomaw ki Jehova. Sia nabautismohan sa sarong pansirkitong asamblea kan Mga Saksi ni Jehova kan Abril 1996.