Mga Hapot Hale sa mga Parabasa

Sinasabi kan Efeso 3:​14, 15 na an Dios “pinagkakautangan nin ngaran kan lambang pamilya sa langit asin sa daga.” Igwa daw nin mga pamilya sa langit, asin inako daw kan kada pamilya nin tawo an ngaran kaiyan hale ki Jehova?

Mayo nin mga pamilya sa langit na arog kan nasa daga, na may ama, ina, asin mga aki​—na gabos may relasyon sa lambang saro sa laman. (Lucas 24:39; 1 Corinto 15:50) Malinaw na ipinaheling ni Jesus na an mga anghel dai nag-aaragom, asin mayo nin nagsusuherir na sinda nangangaki.​—Mateo 22:30.

Minsan siring, an Biblia nagtataram sa piguratibong paagi dapit ki Jehova Dios bilang agom kan saiyang langitnon na organisasyon; sia may agom sa espirituwal na sentido. (Isaias 54:5) An langitnon na organisasyon na iyan nagpapaluwas nin mga aki, siring kan mga anghel. (Job 1:6; 2:1; 38:​4-7) Kun siring, sa sentidong ini, igwa nin sarong makangangalas na espirituwal na pamilya sa langit.

Dugang pa, sarong bagong piguratibong pamilya an nabibilog sa langit, na kompuesto ni Jesu-Cristo asin kan saiyang kongregasyonal na nobya na 144,000. (2 Corinto 11:2) Kadaklan sa mga linahidan na ini nagkagaradan na, na may tinatanaw na langitnon na buhay. An iba buhay pa sa daga. An gabos galagang nagtatanaw sa enotan sa langitnon na “kasal kan Kordero.” Ikinokonektar kan Biblia an kasal na iyan sa panahon kan nagdadangadang na dakulang kahorasaan​—an kalaglagan kan Dakulang Babilonya, dangan an pagpara sa natatada pa kan palakaw ni Satanas.​—Kapahayagan 18:​2-5; 19:​2, 7, 11-21; Mateo 24:21.

Manongod sa daganon na mga pamilya, dai ipinaheheling ni apostol Pablo sa Efeso 3:15 na lambang indibiduwal na grupo nin pamilya direktang minaako kan ngaran kaiyan hale ki Jehova. Imbes, malinaw na nasa isip ni Pablo an mga linahe nin pamilyang ekstendido na nagpreserbar nin sarong ngaran. An Josue 7:​16-19 nagtatao nin halimbawa. Ibinubuyagyag dian ni Jehova an kasalan ni Acan. Enot, an pagkakulpable isinentro sa o linimitaran sa tribo nin Juda. Dangan iyan pinahayakpit sa pamilya kan mga Zerahita. Katapustapusi, an harong ni Acan nabuyagyag. Si Acan kaiba an saiyang agom na babae asin mga aki minansay, o sinasabi, na kabtang kan harong (o, pamilya) ni Zabdi, an apoon ni Acan. An pamilya man na iyan iyo an ekstendidong grupo na nagpreserbar kan ngaran kan saindang apoon na si Zera.

Sa mga Hebreo, an siring na mga linahe nin pamilya mahalagang marhay, na an dakol nakalista sa Biblia. Sinuportaran nin Dios an pagpreserbar kaiyan paagi sa pagtao nin probisyon, kun kaipuhan, na an mga paramana padagos na gamiton an ngaran kan pamilya paagi sa pag-agom na Levirate, o kan bayaw.​—Genesis 38:​8, 9; Deuteronomio 25:​5, 6.

Bilang saro pang halimbawa kan siring na mga pamilyang mas dakula o ekstendido, konsiderara si Jesus bilang an aki ni David. Malinaw na bako siang direktang aki ni Hadeng David, na namundag mga siglo pakalihis nang magadan si David. Pero, an sarong midbidan kan Mesiyas iyo na sia hale sa pamilya ni David, siring sa pakaaram kan mga Judio sa pankagabsan. (Mateo 22:42) Si Jesus nasa linahe ni David kapwa paagi sa saiyang ina asin sa saiyang ama-amahan.​—Mateo 1:1; Lucas 2:4.

Alagad paano kinua kan siring na mga pamilya an saindang ngaran hale ki Jehova? An katunayan iyo na pipira sana an pangyayari​—na siring sa kaso ni Abraham asin Isaac—​na literal na nginaranan ni Jehova an sarong payo kan pamilya. (Genesis 17:​5, 19) Idto mga ipinuera. Sa kadaklan, si Jehova dai nagtatao sa kada indibiduwal na pamilya kan ngaran na gagamiton kan mga aki kaiyan.

Pero, si Jehova an nagtugdas kan pamilya nin tawo kan pinagbotan nia si Adan asin si Eva na “pangagbunga asin pangagdakol kamo asin panoa nindo an daga.” (Genesis 1:28) Asin tinogotan ni Jehova an bakong sangkap na si Adan asin si Eva na magkaaki, sa siring ibinubugtak an basihan para sa gabos na pamilya nin tawo. (Genesis 5:3) Kaya bako sana sa sarong sentido, an Dios puedeng apodon na Kagtugdas kan mga ngaran nin pamilya.

Dakol na kultura ngonyan an dai na nakamamate kan pangangaipong preserbaron an ngaran nin pamilya sa laog nin mga kapag-arakian. Minsan siring, sa gabos na kadagaan pinasasalamatan nin mga Kristiano si Jehova huli sa areglo nin pamilya asin tinatawan sia nin onra paagi sa pagmamaigot na gibohon na mapanggana an saindang pamilya.