Midbidon si Jehova Paagi sa Saiyang Tataramon
“Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.”—JUAN 17:3.
1, 2. (a) Ano an kahulogan nin “midbid” asin “kaaraman” siring sa pagkagamit sa Kasuratan? (b) Anong mga halimbawa an nagpapaklaro sa kahulogan na ini?
AN PAKAMIDBID sa saro bilang kamidbid sana o an pagkaigwa nin kaaraman manongod sa sarong bagay sa pan-ibabaw sana nagkukulang sa kahulogan kan mga terminong “midbid” asin “kaaraman” siring sa pagkagamit sa Kasuratan. Sa Biblia ini “akto nin pakamidbid paagi sa eksperyensia,” kaaraman na nagpapahayag nin “relasyon na may tiwala sa pag-oltanan nin mga persona.” (The New International Dictionary of New Testament Theology) Kaiba dian an pakamidbid ki Jehova paagi sa pag-aram sa espisipikong mga akto nia, arog kan dakol na pangyayari sa libro ni Ezequiel na hinokoman nin Dios an mga parakasala, na sinasabi: ‘Asin makaaaram kamo na ako si Jehova.’—Ezequiel 38:23.
2 An laen-laen na paagi na an “midbid” asin “kaaraman” puwedeng gamiton makaklaro paagi sa pirang halimbawa. Sa dakol na naghihingakong naghiro sa ngaran nia, sinabi ni Jesus, “Dai ko kamo noarin man namidbid”; an boot niang sabihon nungka na sia nagkaigwa nin labot sa sainda. (Mateo 7:23) An Ikaduwang Corinto 5:21 nagsasabi na si Cristo “dai nakamimidbid nin kasalan.” Iyan dai nangangahulogan na dai siang pakaaram sa kasalan kundi, imbes, na sia daing personal na pakikilabot dian. Kaagid kaiyan, kan si Jesus magsabi: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo,” an kalabot dian bako sanang pakaaram manongod sa Dios asin ki Cristo.—Ikomparar an Mateo 7:21.
3. Ano an nagpapatunay na si Jehova nagpapaheling nin nagpapamidbid na tanda kan tunay na Dios?
3 An dakol na atributo ni Jehova puwedeng maaraman paagi sa saiyang Tataramon, an Biblia. An saro dian iyo an saiyang kakayahan na maghula nin tama. Ini tanda kan tunay na Dios: “Luwasan asin sabihan sa samo an mga mangyayari. An enot na mga bagay—kun ano iyan—sabiha nindo, tanganing ikadusay niamo an samong puso asin maaraman an ngapit kaiyan. O ipadangog nindo sa samo minsan an mga bagay na maabot. Sabiha nindo an mga bagay na madatong ngapit, tanganing maaraman mi na kamo mga dios.” (Isaias 41:22, 23) Sa saiyang Tataramon, isinasabi ni Jehova an enot na mga bagay mapadapit sa paglalang sa daga asin sa buhay na yaon dian. Isinabi nia nin enot pang marhay an mga mangyayari ngapit asin talagang nangyari. Asin minsan ngonyan talagang saiyang ‘ipinadadangog sa sato minsan an mga bagay na maabot,’ nangorogna an mga mangyayari sa “huring mga aldaw” na ini.—2 Timoteo 3:1-5, 13; Genesis 1:1-30; Isaias 53:1-12; Daniel 8:3-12, 20-25; Mateo 24:3-21; Kapahayagan 6:1-8; 11:18.
4. Paano ginamit ni Jehova an saiyang atributong kapangyarihan, asin paano pa nia gagamiton iyan?
4 An saro pang atributo ni Jehova iyo an kapangyarihan. Iyan maririsa sa kalangitan na duman an mga bitoon na nagigin darakulang horno para sa pagsasaro nin mga elemento na nagbubunga nin makosogon na enerhiya nagpapaluwas nin liwanag asin init. Kun inaangat nin rebeldeng mga tawo o anghel an soberaniya ni Jehova, ginagamit nia an saiyang kapangyarihan bilang “lalaking parapakilaban,” na dinidepensahan an saiyang marahay na ngaran asin matanos na mga pamantayan. Sa siring na mga okasyon dai sia nag-aalangan na butasan an kapangyarihan na mapanlaglag, arog sa Baha kan kaaldawan ni Noe, sa paglaglag sa Sodoma asin Gomorra, asin sa pagliligtas kan Israel sa Dagat na Pula. (Exodo 15:3-7; Genesis 7:11, 12, 24; 19:24, 25) Sa dai na mahahaloy, gagamiton nin Dios an saiyang kapangyarihan sa ‘pagronot ki Satanas sa irarom kan saindong mga bitis.’—Roma 16:20.
5. Kaiba kan saiyang kapangyarihan, anong kuwalidad an yaon man ki Jehova?
5 Pero, sa ibong kan daing sagkod na kapangyarihan na ini, may kapakumbabaan. An Salmo 18:35, 36 nagsasabi: “An saimong kapakumbabaan mapadakula sa sako. Magibo ka nin lugar na igo para sa sakuyang mga lakad sa irarom ko.” An kapakumbabaan nin Dios minatogot saiya na “nagpapakumbaba na helingon an langit asin daga, na binabangon an hababa sa kabokabo; ilinalangkaw nia an dukha hale mismo sa aponan nin abo.”—Salmo 113:6, 7.
6. Anong kuwalidad ni Jehova an nagliligtas-buhay?
6 Nagliligtas-buhay an pagkaherak ni Jehova sa pagtratar sa tawo. Kanigoan na pagkaherak an ipinaheling ki Manases kan sia patawadon, dawa grabeng kabikoan an ginibo nia! Si Jehova nagsasabi: “Kun sabihan ko an maraot: ‘Ika magagadan,’ asin tumalikod nanggad sia sa saiyang kasalan asin gumibo nin hustisya asin katanosan, mayo sa saiyang mga kasalan na saiyang ipinagkasala an gigirumdomon tumang sa saiya. An hustisya asin katanosan iyo na an saiyang ginibo. Sia nanggad magpapadagos na mabuhay.” (Ezequiel 33:14, 16; 2 Cronica 33:1-6, 10-13) Ipinaheheling ni Jesus an mga kuwalidad ni Jehova kan isadol nia an pagpapatawad nin 77 beses, 7 beses pa ngani sa sarong aldaw!—Salmo 103:8-14; Mateo 18:21, 22; Lucas 17:4.
Sarong Dios na May Pagmate
7. Paano napapalaen si Jehova sa mga dios kan mga Griego, asin anong mahalagang marhay na pribilehiyo an bukas sa sato?
7 An mga pilosopong Griego, arog kan mga Epicureano, nagtubod sa mga dios pero an pagheling ninda sa sainda harayoon sa daga tanganing magkaigwa nin ano man na interes sa tawo o maapektaran kan saiyang mga saboot. Laen na marhay an relasyon ni Jehova asin kan saiyang maimbod na mga Saksi! “Si Jehova nakakukua nin kaogmahan sa saiyang banwaan.” (Salmo 149:4) An mga maraot bago kan Baha pinapagbasol sia asin “nakolgan an saiyang puso.” An Israel nagtao nin kakologan asin kamondoan ki Jehova huli sa dai pagmaimbod kaiyan. An mga Kristiano puwedeng magpamondo sa espiritu ni Jehova paagi sa saindang pagmasumbikal; pero paagi sa saindang kaimbodan, sinda makatatao sa saiya nin kagayagayahan. Kanigoan kamakangangalas na isipon na an maluyang tawo digdi sa daga puwedeng makakolog o makapagayagaya sa Kaglalang kan uniberso! Huli sa gabos na ginigibo nia para sa sato, kanigoan kamakangangalas na kita igwa kan mahalagang marhay na pribilehiyo na tawan sia nin kaogmahan!—Genesis 6:6; Salmo 78:40, 41; Talinhaga 27:11; Isaias 63:10; Efeso 4:30.
8. Paano ginamit ni Abraham ki Jehova an saiyang katalingkasan sa pagtaram?
8 Ipinaheheling kan Tataramon nin Dios na an pagkamoot ni Jehova nagtatao sato nin dakulang “katalingkasan sa pagtaram.” (1 Juan 4:17) Mangnoha an nangyari ki Abraham kan si Jehova dumatong sa paglaglag sa Sodoma. Si Abraham nagsabi ki Jehova: “Ano talagang paparaon mo an matanos kadamay kan maraot? Halimbawa igwa nin limang polong matanos sa tahaw kan siudad. Kun siring, paparaon mo daw sinda asin dai mo patatawadon an banwaan huli sa limang polong matanos na nasa laog kaiyan? . . . Iyan dai ko man lamang pinaghona dapit sa saimo. Dai daw magibo kan tama an Hokom sa bilog na daga?” Pambihirang mga tataramon na sinabi sa Dios! Pero uminoyon si Jehova na iligtas an Sodoma kun igwa duman nin 50 matanos. Nagpadagos si Abraham asin ikinapababa an bilang poon 50 sagkod 20. Nahandal sia na tibaad sobra an pag-insister nia. Sia nagsabi: “Tabi dai man logod maanggot si Jehova, kundi togotan akong magtaram nin saro na sana: Halimbawa may sampulong makua duman.” Nagtogot giraray si Jehova: “Dai ko iyan tutunawon huli sa sampulo.”—Genesis 18:23-33.
9. Taano ta tinogotan ni Jehova si Abraham na magtaram nin arog kaidto, asin ano an manonodan niato digdi?
9 Taano ta tinogotan ni Jehova si Abraham nin siring na katalingkasan sa pagtaram, tanganing makataram sa paaging ini? Primero, aram ni Jehova an kasakitan sa boot ni Abraham. Aram nia na an sobrino ni Abraham na si Lot nag-iistar sa Sodoma, asin nahahadit si Abraham dapit sa saiyang kaligtasan. Saro pa, si Abraham katood nin Dios. (Santiago 2:23) Kun may magtaram sato nin maisog, hinihingoa daw niatong mansayon an saboot sa likod kan saiyang mga tataramon asin nagpapasensia, nangorogna kun sia katood na may emosyonal na problema? Bako daw nakararangang maheling na sasaboton ni Jehova an satong paggamit sa katalingkasan sa pagtaram, arog kan ginibo nia ki Abraham?
10. Paano kita tinatabangan nin katalingkasan sa pagtaram sa pamibi?
10 Nangorogna kun kita minadolok sa saiya bilang satong “Paradangog nin pamibi” na minamawot niato nin makuri an katalingkasan na ini sa pagtaram tanganing ikaluwas niato sa saiya an nasa kairairaromi kan satong boot, kun kita nasa makuring kasakitan asin nariribok an satong boot. (Salmo 51:17; 65:2, 3) Dawa sa mga panahon na dai na kita makataram, “an espiritu mismo nakikimaherak para sa sato paagi sa mga pag-agrangay na dai masabi,” asin si Jehova naghihinanyog. Kaya niang aramon an nasa isip niato: “Sinabot mo an sakong pag-isip hale sa harayo. Huli ta mayo ni sarong tataramon sa sakong dila, alagad, uya! O Jehova, iyan aram mo na gabos.” Pero kita maninigo pa man giraray na padagos na humagad, humanap, tumoktok.—Roma 8:26; Salmo 139:2, 4; Mateo 7:7, 8.
11. Paano napatutunayan na si Jehova talagang nagmamakolog sa sato?
11 Si Jehova may pagmakolog. Sia nagtatagama para sa buhay na saiyang linalang. “Sa saimo an mata nin gabos naghahalat na may paglaom, asin itinatao mo sa sainda an saindang kakanon sa kapanahonan kaiyan. Binibiklad mo an saimong kamot asin pinaninigoan an mawot nin lambang bagay na may buhay.” (Salmo 145:15, 16) Inaagda kitang helingon kun paano nia pinatutuka an mga gamgam sa kadlagan. Helinga an mga liryo sa kaomahan, kun gurano kagayon an gubing na itinao nia sa mga iyan. Idinugang ni Jesus na gigibohon nin Dios para sa sato an arog kaiyan asin an labi pa sa ginigibo nia sa mga iyan. Kaya taano ta mahahadit kita? (Deuteronomio 32:10; Mateo 6:26-32; 10:29-31) Inaagda kamo kan Enot na Pedro 5:7 na ‘ibugtak nindo an gabos nindong kahaditan sa saiya, huli ta sia may pagmakolog sa saindo.’
“An Eksaktong Representasyon kan Saiya Mismong Naturalesa”
12, 13. Apuwera sa pakaheling ki Jehova paagi sa saiyang mga linalang asin sa saiyang mga ginibo na nasusurat sa Biblia, paano pa niato sia naheheling asin nadadangog?
12 Maheheling niato si Jehova Dios paagi sa saiyang mga linalang; maheheling niato sia paagi sa pagbasa kan saiyang mga ginibo sa Biblia; maheheling man niato sia paagi sa mga tataramon asin gibo na isinurat manongod ki Jesu-Cristo. Iyan sinabi mismo ni Jesus, sa Juan 12:45: “An nakaheheling sa sako nakaheheling man saiya na nagsugo sako.” Liwat, sa Juan 14:9: “An nakaheling sa sako nakaheling man sa Ama.” An Colosas 1:15 nagsasabi: “[Si Jesus] an ladawan kan Dios na dai naheheling.” An Hebreo 1:3 nagpapahayag: “[Si Jesus] an ladawan kan . . . kamurawayan [nin Dios] asin an eksaktong representasyon kan saiya mismong naturalesa.”
13 Isinugo ni Jehova an saiyang Aki bako sanang sa pagtao nin pantubos kundi siring man sa pagtao nin halimbawang aarogon, kapwa sa tataramon asin sa gibo. Itinaram ni Jesus an mga tataramon nin Dios. Sinabi nia sa Juan 12:50: “An gabos na sinasabi ko, sono sa pagkasabi sako kan Ama, siring man an itinataram ko.” Dai nia ginibo an kagustohan nia, kundi ginibo nia an ipinagibo saiya nin Dios. Sa Juan 5:30 sia nagsabi: “Dai ako makagigibo ni sarong bagay sa sadiri kong boot.”—Juan 6:38.
14. (a) Anong mga naheling an nagpahiro ki Jesus na may pagkaherak? (b) Taano an paagi nin pagtaram ni Jesus ta nagpangyari na an mga tawo magburunyog sa pagdangog sa saiya?
14 Naheling ni Jesus an mga tawong daoton, baldado, bongog, buta, asin linaog nin demonyo patin an mga tinatangisan an saindang gadan. Huli sa pagkaherak, saiyang pinaomayan an naghehelang asin binuhay liwat an gadan. Naheling nia an mga kadaklan na maniwang asin nagkakaralagalag sa espirituwal, asin pinonan niang tokdoan sinda nin dakol na bagay. Tinokdoan nia sinda bako sanang paagi sa tamang mga tataramon kundi paagi sa kawiliwiling mga tataramon gikan sa saiyang puso na diretso sa puso nin iba, na nakadagka sainda na rumani sa saiya, na nagdara sainda na maamay sa templo sa pagdangog sa saiya, na nagpahiro sainda na magsunodsunod sa saiya, maghinanyog sa saiya na may kaogmahan. Burunyog sindang nagdangog sa saiya, na sinasabi na “dai pa nin tawong nagtaram nin arog kaini.” Sinda nagngalas sa saiyang paagi nin pagtotokdo. (Juan 7:46; Mateo 7:28, 29; Marcos 11:18; 12:37; Lucas 4:22; 19:48; 21:38) Asin kan probaran kan saiyang mga kaiwal na siodon sia nin mga hapot, binaliktad nia an kamugtakan, na pinatoninong sinda.—Mateo 22:41-46; Marcos 12:34; Lucas 20:40.
15. Ano an pinakatema kan paghuhulit ni Jesus, asin gurano nia ilinabot an iba sa pagpalakop kaiyan?
15 Ibinalangibog nia na “an kahadean kan kalangitan harani na” asin sinadol an mga nagdadangog na “padagos na hanapon nguna an kahadean.” Isinugo nia an iba na maghulit na “an kahadean kan kalangitan naghaharani na,” ‘gumibo nin mga disipulo sa mga tawo kan gabos na nasyon,’ magin mga saksi ni Cristo “sagkod sa kaporoporohi nin daga.” Ngonyan haros apat may kabangang milyon na Saksi ni Jehova an naglalakaw sa saiyang mga lakad, na ginigibo an mga bagay na iyan.—Mateo 4:17; 6:33; 10:7; 28:19; Gibo 1:8.
16. Paano namugtak sa makuring pagbalo an atributo ni Jehova na pagkamoot, pero ano an nagibo kaiyan para sa katawohan?
16 “An Dios pagkamoot,” an sabi sato sa 1 Juan 4:8. An pambihirang atributo niang ini namugtak sa makologon na pagbalo kan isugo nia an saiyang bugtong na Aki sa daga tanganing magadan. An sakit na tinios kan namomotan na Aking ini asin an mga pakimaherak nia sa saiyang langitnon na Ama seguradong nagtao nin makuring kolog asin kamondoan ki Jehova, dawa ngani pinatunayan ni Jesus na putik an angat ni Satanas na dai kaya ni Jehova na magkaigwa nin mga tawo sa daga na mangangapot sa saindang integridad sa Saiya sa irarom nin masakit na pagbalo. Maninigo man niatong apresyaron an kadakulaan kan sakripisyo ni Jesus, huli ta isinugo sia digdi nin Dios tanganing magadan para sa sato. (Juan 3:16) Ini bakong pasil, madaling kagadanan. Tanganing maapresyar kun gurano an kolog para sa Dios asin ki Jesus asin sa siring marealisar an kadakulaan kan saindang sakripisyo para sa sato, siyasaton niato an tala kan Biblia manongod sa pangyayari.
17-19. Paano ilinadawan ni Jesus an sakit na naghahalat sa saiya?
17 Kisuerra apat na beses na isinabi ni Jesus sa saiyang mga apostol an mangyayari. Mga pirang aldaw na sana bago iyan mangyari, sia nagsabi: “Uya kita, nagtutukad pa Jerusalem, asin an Aki nin tawo itatao sa mga poon nin mga saserdote asin sa mga eskriba, asin sisilotan sia ninda na gadanon patin itatao sia sa mga tawo kan mga nasyon, asin pag-oolog-ologon sia ninda asin lulutaban sia asin hahampakon sia patin gagadanon sia.”—Marcos 10:33, 34.
18 Namatean ni Jesus an gabat kan sakit na inaatubang nia, mantang nasasabotan nia kun gurano kakolog kan paghampak nin mga Romano. An haralabang pidaso nin anit kan latigo na ginagamit sa paghampak may nakatadom na mga pirupidasong metal asin tolang nin karnero; kaya sa pagpapadagos kan paghampak, an likod asin mga tabay nalulugad asin nagdudugo. Mga bulan bago kaini, ipinarisa ni Jesus an itinatao sa saiyang tension sa boot kan nagdadangadang na sakit, na sinasabi, arog kan mababasa niato sa Lucas 12:50: “Sa katotoohan, may sarong bautismo na ibabautismo sa sako, asin kanigoan an sakong kahaditan sagkod na iyan matapos!”
19 Nag-oorog an tension mantang nagrarani an oras. Iyan isinabi nia sa saiyang langitnon na Ama: “Ngonyan napupurisaw an sakong kalag, asin ano an sasabihon ko? Ama, iligtas mo ako sa oras na ini. Minsan siring, dahel kaini ako napadigdi sa oras na ini.” (Juan 12:27) Seguradong apektadong marhay si Jehova kan pakimaherak na ini kan saiyang bugtong na Aki! Sa Getsemani, mga pirang oras na sana bago sia magadan, napurisaw na marhay si Jesus asin nagsabi ki Pedro, Santiago, asin Juan: “An sakong kalag mamondong gayo, sagkod sa kagadanan.” Pakalihis nin pirang minuto ipinahayag nia ki Jehova an ultimo niang pamibi dapit dian: “‘Ama, kun boot mo, halea an kopang ini sa sako. Minsan siring, mangyari logod, bakong an boot ko, kundi an boot mo.’ Alagad huling nasa makuring kamondoan namibi sia nin odok pa logod; asin an saiyang ganot nagin siring sa mga toro nin dugo na nagdadalahay sagkod sa daga.” (Mateo 26:38; Lucas 22:42, 44) Posible na ini an inaapod sa medisina na hematidrosis. Iyan bihira pero puwedeng mangyari sa emosyonal na marhay na mga kamugtakan.
20. Ano an nakatabang ki Jesus na matagalan an saiyang sakit?
20 Manongod sa oras na ini sa Getsemani, an Hebreo 5:7 nagsasabi: “Sa mga aldaw kan saiyang laman si Cristo nagdolot nin mga pagngayongayo patin nin mga kahagadan sa Saro na makapagliligtas sa saiya hale sa kagadanan, na may makosog na mga pagtangis asin luha, asin sia dinangog na may pabor huli sa saiyang diosnon na takot.” Mantang dai sia ilinigtas sa kagadanan kan “Saro na makapagliligtas sa saiya hale sa kagadanan,” sa anong sentido na an saiyang pamibi dinangog na may pabor? An Lucas 22:43 minasimbag: “An sarong anghel hale sa langit tuminunga sa saiya asin nagpakosog sa saiya.” Sinimbag an pamibi ta an anghel na isinugo nin Dios pinakosog nanggad si Jesus na tagalan an kasakitan.
21. (a) Ano an nagpapaheling na mapangganang naagihan ni Jesus an sakit? (b) Kun naggagrabe an mga pagbalo sa sato, boot niato na makasabi nin ano?
21 Narisa ini sa resulta. Kan matapos an kasakitan nia sa boot, nagbuhat si Jesus, nagbuwelta ki Pedro, Santiago, asin Juan, asin nagsabi: “Buhat kamo, paduman na kita.” (Marcos 14:42) Garo man sana sinasabi nia, ‘Padumana ako tanganing pasaloiban paagi sa sarong hadok, arestaron nin magsururog, bistahon nin ilegal, kondenaron nin sala. Padumana ako tanganing olog-ologon, lutaban, hampakon, asin ipako sa hariging pasakitan.’ Sa laog nin anom na oras sia nakapako duman, sa makuring kolog, na nagtatagal sagkod sa katapusan. Kan sia magagadan na, sia mapangganang nagkurahaw: “Tapos na!” (Juan 19:30) Sia nagdanay na marigon asin pinatunayan an saiyang integridad sa pagsuportar sa soberaniya ni Jehova. Natapos nia an gabos na isinugo sa saiya ni Jehova digdi sa daga. Kun kita magadan o sa pag-abot kan Armagedon, masasabi man daw niato mapadapit sa pagboot sato na hale ki Jehova: “Tapos na”?
22. Ano an nagpapaheling kan hiwas kan paglakop kan kaaraman dapit ki Jehova?
22 Ano man an mangyari, makasisierto kita na sa itinalaan na panahon ni Jehova na marikas na nagdadangadang, an bilog na “daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.”—Isaias 11:9.
Nagigirumdoman daw Nindo?
◻ Ano an boot sabihon kan pakamidbid asin pagkaigwa nin kaaraman?
◻ Paano ipinaheling sato an pagkaherak asin kapatawadan ni Jehova sa saiyang Tataramon?
◻ Paano ginamit ni Abraham ki Jehova an katalingkasan sa pagtaram?
◻ Taano ta puwede niatong helingon si Jesus asin maheling sa saiya an mga kuwalidad ni Jehova?