Ipinakilaban Nia an Saiyang Pagtubod
TOLONG taon na an nakaagi si Caridad Bazán Listán, saro sa mga Saksi ni Jehova sa Cadiz, España, kaipuhan na maoperaran tolos-tolos. Kinakalintura na sia asin nahihilo na an saiyang dugo huli sa bato sa butog. Kan ilinaog sia sa lokal na ospital, ipinaliwanag nia an saiyang basado sa Bibliang paninindogan sa pagsayumang ineksionan nin dugo. Nag-oyon an mga doktor na mag-operar na mayong dugo. Alagad, bago sia dinara sa sala de operasyon, pinapipirma sia kan mga doktor sa sarong dokumento. Ipinaheheling kaiyan na andam nindang igalang an saiyang desisyon manongod sa dugo pero kun magkaemerhensia, gusto nindang hagadon an saiyang pagtogot na bolongon sia sa ano man na paagi na ipinamumugtak nindang talagang kinakaipuhan.
An sarong magurang sa kongregasyon na presente duman sa ospital asin an aking lalaki ni Caridad, na saro man na Saksi, ipinaliwanag ki Caridad an mga implikasyon sa pagpirma nia sa siring na dokumento. An saiyang pirma mag-aautorisar sa mga doktor na mag-ineksion nin dugo kun magkaemerhensia. Kan an tawohan sa ospital umabot tanganing darahon sia sa sala de operasyon, ipinaliwanag nia na dai nia pipirmahan an papeles. Dinara tolos sia sa saiyang kuwarto asin ginipit nin grabe tanganing liwaton an saiyang isip.
Pakapag-orolay nin makapira nagdesisyon sindang apodon an huwes na nagkakapot nin medikal na mga kaso tanganing ini an magkombensir saiya, pero mayong nangyari. Ipinaliwanag ni Caridad na magkakasala sia sa Dios kun totogotan nia sinda na ineksionan sia nin dugo. Sinabi nia na sa Mosaikong Pagboot, kun an sarong babae linugos, dai sia ibinibilang na nagkasala kun nagtumang sia paagi sa pagkurahaw para sa tabang. (Deuteronomio 22:23-27) “Iniignoro kan mga doktor an sakong kagustohan asin pinoprobaran na balgahon an sakong konsensia,” an sabi nia, “kaya kaipuhan kong magtumang na garo ninda ako linulugos.”
Nag-agi an nagkapirang oras, asin sa katapustapusi nag-oyon an mga doktor na operaran sia na mayong dugo. Sa sala de operasyon, hinagad ni Caridad na togotan siang mamibi ki Jehova. Ini an ginibo nia, asin an operasyon nagin mapanggana.
Alagad, an kamugtakan ni Caridad naggrabe pakatapos, asin an mga doktor nagdesisyon na dai na intindihon an saiyang kagustohan asin nagpirit na ineksionan sia nin dugo. Kaya, an sarong doktor asin nars nag-andam na ineksionan sia nin dugo. Dawa maluya an saiyang pagmate, si Caridad nagtumang sa bilog niang kosog. Nakagat pa ngani nia an tubo na pabobolosan kan dugo. Sa katapustapusi, napasopog an doktor sa ginigibo ninda kaya nagpondo sia. “Dai ko ikakapadagos ini. Suko na ako!” an sabi nia.
Nakaligtas si Caridad sa krisis asin naomayan na mayo nin ano pa man na mga komplikasyon. Kapwa an mga doktor asin an nars naghanga na marhay sa saiyang pagtubod asin kapusoan. An gabos na ini nangyari kan si Caridad 94 anyos.