Sarong Mas Maingat na Pagsiyasat sa Nagkapirang Eroestorya Manongod sa Kagadanan

SA BILOG na kasaysayan, an tawo nariribaraw asin nahahandal huli sa mamondong posibilidad na magadan. Dugang pa, an pagkatakot sa kagadanan ginagatongan pa nin sinaralak na falsong mga ideya sa relihion, popular na mga kaugalean, asin masakit nang bagohon na personal na mga paniniwala. An problema sa pagkatakot sa kagadanan iyo na puede kaiyan na haleon an kakayahan nin saro na ikaogma an buhay asin luway-luway na raoton an kompiansa nin saro na igwa nin kahulogan an buhay.

An pangenot na relihion an nangorognang kulpable sa pagpalakop nin kadakol na popular na eroestorya mapadapit sa kagadanan. Paagi sa pagsiyasat sa nagkapira sana kaini basado sa liwanag kan katotoohan sa Biblia, helingon kun an saindong personal na pakasabot manongod sa kagadanan puedeng klaripikaron.

Eroestorya 1: An kagadanan an natural nang katapusan nin buhay.

“An kagadanan . . . mahalagang kabtang kan satong buhay,” an sabi kan librong Death​​—The Final Stage of Growth. An mga komentong arog kaini naghahayag kan paniniwala na an kagadanan normal, an natural nang katapusan kan gabos na nabubuhay na organismo. Bilang resulta, an siring na paniniwala nagpatalubo nin pilosopiyang nihilistiko asin mapan-aprobetsar na gawe-gawe sa dakol.

Alagad an kagadanan daw an talagang natural nang katapusan kan buhay? Bakong gabos na parasiyasat nagtutubod nin siring. Halimbawa si Calvin Harley, sarong biologo na pinag-aadalan an paggurang nin tawo, nagsabi sa sarong interbio na dai sia nagtutubod na an mga tawo “iprinogram na magadan.” An inmunologo na si William Clark nagkomento: “An kagadanan bakong konektado sa pakahulogan kan buhay.” Asin si Seymour Benzer, kan Institusyon nin Teknolohiya sa California, nag-iisip-isip na nagsabi na “an paggurang mas angay na ikalaladawan bakong bilang sarong relo kundi bilang sarong senaryo, na puede niatong bagohon.”

Kan inadalan nin mga sientista an pagkadisenyo sa mga tawo, sinda naribong. Nadiskobre ninda na kita tinawan nin rekurso asin kakayahan na linalampasan na marhay an mga pangangaipo kan lawig kan satong buhay na 70 sagkod 80 taon. Halimbawa, nadiskobre kan mga sientista na an hotok nin tawo igwa nin grabe kadakulang kapasidad sa memorya. Kinakalkulo nin sarong parasiyasat na an satong hotok puedeng makatipon nin impormasyon na “makakapano sa mga beinte milyones na tomo nin libro, na arog kadakol kan yaon sa pinakadakulang mga libreriya sa kinaban.” Nagtutubod an nagkapirang neurosientista na durante nin promedyong lawig nin buhay, an sarong tawo naggagamit sana nin 1/100 kan 1 porsiento (.0001) kan potensial na kapasidad kan saiyang hotok. Angay sanang maghapot, ‘Taano ta igwa kita nin hotok na arog kaiyan kadakula an kapasidad kun an nagagamit sana niato saditon na parte kaiyan sa promedyong lawig nin buhay?’

Estudyare man an bako nanggad na natural na reaksion kan tawo sa pagkagadan! Para sa mayoriya, an pagkagadan nin agom na babae, agom na lalaki, o aki puedeng iyo an pinakamakolog sa boot na eksperyensia sa bilog na buhay. An enterong emosyon nin mga tawo parateng napupurisaw sa laog nin halawig na panahon pagkagadan nin sarong namomotan na marhay. Dawa an mga naghihingako na an kagadanan natural na sa mga tawo nasasakitan na akoon an ideya na an sainda mismong kagadanan mangangahulogan kan katapusan kan gabos na bagay. An British Medical Journal nagsasabi manongod sa “lakop na ekspertong suposisyon na an gabos gustong mabuhay sagkod na mapupuede.”

Huli sa pankagabsan na reaksion nin tawo sa kagadanan, an saiyang makangangalas na potensial na makagirumdom asin makanood, asin an saiyang panlaog na paghidaw para sa panahon na daing sagkod, bako daw na heling-heling na sia ginibo tanganing mabuhay? Tunay nanggad, linalang nin Dios an mga tawo, bako na pagkagadan an natural nang kaaabtan, kundi may esperansang mabuhay na daing talaan. Mangnohon kun ano an ibinugtak nin Dios sa atubangan kan enot na mag-agom na tawo bilang saindang ngapit: “Pangagbunga asin pangagdakol kamo asin panoa nindo an daga patin sakopa nindo iyan, asin sakopon nindo an mga sira sa dagat asin an mga gamgam sa kalangitan patin an lambang nabubuhay na hayop na naghihiro sa ibabaw kan daga.” (Genesis 1:28) Iyan marahayon, nagdadanay nanggad na ngapit!

Eroestorya 2: Kinukua nin Dios an mga tawo sa kagadanan tanganing makaibanan nia.

An sarong 27 anyos na ina na magagadanon na asin may mababayaan na tolong aki nagsabi sa sarong Katolikong madre: “Dai ka magdigdi asin magsabi sako na ini an kagustohan kan Dios para sa sako. . . . Nauuyam akong marhay kun may ibang nagsasabi kaini sa sako.” Pero, ini an itinotokdo kan dakol na relihion manongod sa kagadanan​​—na kinukua nin Dios an mga tawo tanganing makaibanan nia.

An Kaglalang daw talagang maringison na daing herak na pangyayarihon na kita magadanan, na nakaaaram na ini makologon sa satong boot? Dai, dai magibo kaiyan an Dios kan Biblia. Segun sa 1 Juan 4:​8, “an Dios pagkamoot.” Mangnoha na dai kaiyan sinasabi na an Dios igwa nin pagkamoot o na an Dios mamomoton, kundi nagsasabi iyan na an Dios pagkamoot. Makosog na marhay, dalisay na marhay, sangkap na marhay an pagkamoot nin Dios, iyan lubos na marhay na nakaiimpluwensia sa saiyang personalidad asin mga paghiro kaya sia angay sanang apodon na an pinakapersonipikasyon nin pagkamoot. Bako ini an Dios na nagkukua nin mga tawo sa kagadanan tanganing makaibanan nia.

An falsong relihion an dahelan kaya dakol an nariribaraw manongod sa namumugtakan asin kamugtakan kan mga gadan. Langit, impierno, purgatoryo, Limbo​​—ini asin an manlaenlaen na iba pang padudumanan magpoon sa pagigin dai masabotan sagkod sa pagigin talagang nakasisindak. An Biblia, sa ibong na lado, nagsasabi sa sato na an mga gadan daing pag-aram; sinda yaon sa kamugtakan na kaparehong marhay sa nagtotorog. (Eclesiastes 9:​5, 10; Juan 11:11-14) Sa siring, dai kita kaipuhan na maghadit kun ano an nangyayari sa sato pagkagadan niato, kun paanong dai kita naghahadit kun nakakaheling kita nin saro na nanok na nagtotorog. Si Jesus nagtataram manongod sa sarong panahon na “an gabos na nasa mga lolobngan na girumdoman” “maruluwas” sa ibinalik na buhay sa sarong paraisong daga.​—Juan 5:​28, 29; Lucas 23:43.

Eroestorya 3: Kinukua nin Dios an saradit na aki tanganing magin mga anghel.

Si Elisabeth Kübler-Ross, na pinag-adalan an mga indibiduwal na may helang na ikagagadan, nagtaram manongod sa saro pang lakop na ideya sa tahaw nin relihiosong mga tawo. Isinasaysay an sarong tunay na pangyayari, sinabi nia na “bakong madonong na sabihon sa sadit na aki na nagadanan nin tugang na namomotan na marhay nin Dios an saradit na aking lalaki kaya dinara nia si nonoy Johnny sa langit.” An mga tataramon na iyan nagtatao nin maraot na impresyon sa Dios asin dai ipinababanaag an saiyang personalidad asin paghiro. Si Dr. Kübler-Ross nagpadagos: “Kan nagin maygurang na an aking babaeng ini nungka niang naresolberan an saiyang kaanggotan sa Dios, na nagresulta sa sarong psychotic depression kan magadan an sadiri niang aking lalaki pakalihis nin tolong dekada.”

Taano ta aagawon nin Dios an sarong aki tanganing makakua nin saro pang anghel​​—na garo baga mas kaipuhan nin Dios an aki kisa pangangaipo sa aki kan magurang kaiyan? Kun totoo man na kinukua nin Dios an mga aki, bako daw na gigibohon sia kaiyan na bakong mamomoton, maimot na Kaglalang? Al kontraryo sa siring na ideya, an Biblia nagsasabi: “An pagkamoot gikan sa Dios.” (1 Juan 4:7) An saro daw na Dios nin pagkamoot mapangyari nin kawaran na dawa an mga tawo na igwa nin maski paano sarong sokol nin moralidad dai aakoon iyan bilang rasonable?

Kaya taano ta nagagadan an mga aki? An sarong kabtang kan simbag kan Biblia nakarekord sa Eclesiastes 9:11: “An panahon asin pagkanorongod nangyayari sa sainda gabos.” Asin sinasabi sa sato kan Salmo 51:5 na kita gabos bakong sangkap, makasalan, poon pa sa pangingidam sa sato, asin an kaaabtan kan gabos na tawo ngonyan iyo an kagadanan huli sa dakol na laen-laen na dahelan. Kun beses an kagadanan minatira bago an pagkamundag, na minaresulta sa pagluwas nin gadan nang feto. Sa iba pang kaso, an mga aki nagagadan huli sa makamomondong mga pangyayari o naaaksidente asin nagagadan. Bakong responsable an Dios sa arog kaiyan na mga naaabtan.

Eroestorya 4: An nagkapirang tawo pinapasakitan pagkagadan.

Dakol na relihion an nagtotokdo na an mga maraot mapasiring sa nagkakalayong impierno asin pasasakitan sagkod lamang. Makatanosan daw asin sono sa Kasuratan an katokdoan na ini? An lawig nin buhay nin tawo limitado sa 70 o 80 taon. Dawa pa ngani an saro nagkasala nin labi-labing karatan sa bilog niang buhay, an daing katapusan daw na pagpasakit rasonableng padusa? Dai. Grabeng pagkabakong makatanosan na pasakitan an sarong tawo sagkod lamang dahel sa mga kasalan na nakomiter nia sa halipot sanang panahon na sia nabuhay.

An Dios sana an puedeng maghayag kun ano an nangyayari pagkagadan nin mga tawo, asin ihinayag nia iyan sa saiyang nasusurat na Tataramon, an Biblia. Ini an sinasabi kan Biblia: “Kun paano nagagadan an [hayop], siring man an pagkagadan kan [tawo]; asin sinda gabos sasaro sana an espiritu . . . An gabos pasiring sa sarong lugar. Sinda gabos gikan sa kabokabo, asin sinda gabos mabalik sa kabokabo.” (Eclesiastes 3:​19, 20) Daing nasambitan digdi na sarong nagkakalayong impierno. An mga tawo minabalik sa kabokabo​—sa dai pag-eksister​—kun sinda magadan.

Tanganing mapasakitan, an saro kaipuhan na may pag-aram. An mga gadan daw may pag-aram? Sa giraray, an Biblia nagtatao nin simbag: “An mga buhay nakaaaram na sinda magagadan; alagad kun dapit sa mga gadan, mayo man lamang sinda nin pakaaram, ni may bayad pa man sinda, huli ta an pakagirumdom sa sainda nalingawan na.” (Eclesiastes 9:5) Imposible na an mga gadan, na ‘mayo man lamang nin pakaaram,’ makaeksperyensia nin labi-labing kasakitan saen man na lugar.

Eroestorya 5: An kagadanan nangangahulogan kan permanenteng katapusan kan satong pag-eksister.

Kita dai na maeksister kun kita magadan, alagad dai ini nangangahulogan na an gabos na bagay talagang tapos na. Aram kan fiel na tawong si Job na sia mapasiring sa lolobngan, sa Sheol, kun sia magadan. Alagad dangoga an saiyang pamibi sa Dios: “O marahay pang ako tagoon mo sa Sheol, na ako hilomon mo sagkod na umontok an saimong kaanggotan, na tawan mo ako nin talaan na panahon asin girumdomon mo ako! Kun an pusog na lalaki magadan puede pa daw siang mabuhay giraray? . . . Ika maapod, asin ako mismo masimbag sa saimo.”​—Job 14:13-15.

Nagtubod si Job na kun sia fiel sagkod sa kagadanan, sia gigirumdomon nin Dios asin bubuhayon liwat pag-abot nin panahon. Ini an pagtubod kan gabos na lingkod nin Dios kan suanoy na mga panahon. Sinegurado mismo ni Jesus an paglaom na ini asin ipinaheling na gagamiton sia nin Dios sa pagbuhay sa mga gadan. An mga tataramon mismo ni Cristo an nagtatao sa sato kan garantiyang ini: “An oras maabot na an gabos na nasa mga lolobngan na girumdoman makadadangog kan . . . tingog [ni Jesus] asin maruluwas, idtong naggiribo nin marahay sa pagkabuhay liwat sa buhay, idtong naggiribo nin maraot sa pagkabuhay liwat sa paghokom.”​—Juan 5:​28, 29.

Sa dai na nanggad mahahaloy hahaleon nin Dios an gabos na karatan asin eestablisaron an sarong bagong kinaban sakop kan langitnon na pamamahala. (Salmo 37:​10, 11; Daniel 2:44; Kapahayagan 16:​14, 16) An magigin resulta sarong paraiso sa bilog na daga, na iistaran nin mga tawong naglilingkod sa Dios. Mababasa niato sa Biblia: “Nakadangog ako nin makosog na tingog hale sa trono na nagsabi: ‘Uya! An tolda nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.’”​—Kapahayagan 21:​3, 4.

Talingkas sa Takot

An kaaraman manongod sa paglaom na pagkabuhay liwat kaiba kan kaaraman manongod sa Saro na iyo an gikanan kan probisyon na iyan puedeng makaranga sa saindo. Si Jesus nanuga: “Mamimidbid nindo an katotoohan, asin an katotoohan mapatalingkas sa saindo.” (Juan 8:32) Kaiba dian an pagpatalingkas sa sato sa pagkatakot sa kagadanan. Si Jehova sana an talagang makababago sa proseso nin paggurang asin kagadanan saka makatatao sa sato nin buhay na daing sagkod. Puede mo daw na tubodon an mga panuga nin Dios? Iyo, huli ta an Tataramon nin Dios pirmeng nagkakatotoo. (Isaias 55:11) Sinasadol niamo kamo na makanood nin orog pa manongod sa mga katuyohan nin Dios para sa katawohan. An Mga Saksi ni Jehova maoogmang marhay na tabangan kamo.

[Blurb sa pahina 6]

An problema sa pagkatakot sa kagadanan iyo na puede kaiyan na haleon an kakayahan nin saro na ikaogma an buhay

[Tsart sa pahina 7]

NAGKAPIRANG KOMUN NA EROESTORYA ANO AN SINASABI KAN KASURATAN?

MANONGOD SA KAGADANAN

pag-eksister

[Ritrato sa pahina 8]

Pinatatalingkas kita sa takot kan pakaaram sa katotoohan manongod sa kagadanan

[Picture Credit Line sa pahina 5]

Barrators—Giampolo/The Doré Illustrations For Dante’s Divine Comedy/Dover Publications Inc.