“Siring Kaini an Pagkamoot sa Sato nin Dios”

“Kun siring kaini an pagkamoot sa sato nin Dios, kun siring kita mismo nasa irarom nin obligasyon na magkaminorootmootan.”​—1 JUAN 4:11.

1. Sa Marso 23 pagkasolnop kan saldang, taano an minilyon na tawo ta magtitiripon sa mga Kingdom Hall asin iba pang tiriponan sa bilog na globo?

SA Domingo, Marso 23, 1997, pagkasolnop kan saldang, daing duwa-duwa na magkakaigwa nin labi sa 13,000,000 katawo sa bilog na kinaban na magtitiripon sa mga Kingdom Hall asin iba pang tiriponan na ginagamit nin Mga Saksi ni Jehova. Taano? Huli ta an saindang puso napahiro kan nakalalabi sa gabos na kapahayagan nin Dios nin pagkamoot sa katawohan. Isinentro ni Jesu-Cristo an atension sa kahangahangang ebidensiang iyan kan pagkamoot nin Dios, na sinasabi: “An Dios namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.”​—Juan 3:16.

2. Anong mga hapot an kapakipakinabang na ihapot niato gabos sa satong sadiri mapadapit sa satong reaksion sa pagkamoot nin Dios?

² Mantang pinepensar niato an pagkamoot na ipinaheling nin Dios, marahay na ihapot niato sa satong sadiri, ‘Talaga daw na inaapresyar ko an ginibo nin Dios? An paggamit ko daw sa sakong buhay nagtatao nin ebidensia kan pag-apresyar na iyan?’

“An Dios Pagkamoot”

3. (a) Taano ta bakong pambihira para sa Dios an pagpaheling nin pagkamoot? (b) Paano nahahayag an kapangyarihan asin kadonongan sa saiyang mga linalang?

³ An pagpaheling mismo nin pagkamoot bakong ekstraordinaryo sa parte nin Dios huli ta “an Dios pagkamoot.” (1 Juan 4:8) An pagkamoot iyo an saiyang nangingibabaw na karakteristiko. Kan inaandam nia an daga para sa pag-istar nin tawo, an saiyang pagpalangkaw kan mga bukid asin pagtipon nin tubig sa mga danaw asin dagat nakapaoontok sa paghangos na pagpaheling nin kapangyarihan. (Genesis 1:​9, 10) Kan papangyarihon nin Dios na magpunsionar an siklo nin tubig asin an siklo nin oksiheno, kan disenyohon nia an daing kabilangan na mga mikroorganismo asin an laen-laen na pananom na liwaton an kemikal na mga elemento kan daga na magin nasa porma na kayang tunawon nin mga tawo tanganing masuportaran an saindang buhay, kan ikomprontar nia an satong katambay na relo sa lawig nin mga aldaw asin nin mga bulan digdi sa planetang Daga, ini nagpaheling nin dakulang kadonongan. (Salmo 104:​24; Jeremias 10:12) Pero, mas lataw pa sa pisikal na mga linalang an ebidensia kan pagkamoot nin Dios.

4. Sa pisikal na mga linalang, anong ebidensia kan pagkamoot nin Dios an maninigong maheling asin apresyaron niato gabos?

⁴ An satong ngaragngag nagsasabi sa sato kan manongod sa pagkamoot nin Dios kun kinakagat niato an matagok, hinog na prutas na malinaw na ginibo bako sanang tanganing buhayon kita kundi tangani man na tawan kita nin kasiraman. Naheheling kan satong mga mata an dai mamamaluan na ebidensia kaiyan sa nakapaoontok sa paghangos na mga pagsolnop nin saldang, mabitoon na kalangitan sa maaliwalas na banggi, laen-laen na porma asin nakasisilaw na mga kolor nin mga burak, makangingising mga hiro nin ogbon na mga hayop, asin mainit na mga huyom nin mga katood. Ipinaririsa iyan sa sato kan satong dongo kun pinaparong niato an hamot nin mga burak kun tigsoli. Naririsa iyan kan satong mga talinga mantang hinihinanyog niato an ragubrob nin sarong busay, an awit nin mga gamgam, asin an boses nin mga namomotan. Namamatean niato iyan kun kita mainit na kinukugos nin sarong namomotan. May mga hayop na tinawan kan mga abilidad na maheling, madangog, o maparong an mga bagay na dai kaya nin mga tawo. Alagad an katawohan, na ginibo sa ladawan nin Dios, may kapasidad na mamatean an pagkamoot nin Dios sa paagi na dai kaya nin hayop.​—Genesis 1:27.

5. Paano si Jehova nagpaheling nin abundang pagkamoot ki Adan asin Eva?

⁵ Kan lalangon ni Jehova Dios an enot na mga tawo, si Adan asin si Eva, pinalibotan nia sinda nin ebidensia kan saiyang pagkamoot. Nagtanom sia nin sarong tatamnan, sarong paraiso, asin pinatubo dian an gabos na klase nin kahoy. Nagtagama sia nin sarong salog na mabaribi dian asin pinano iyan nin kawiliwiling mga gamgam asin hayop. Itinao nia ini gabos ki Adan asin Eva bilang saindang istaran. (Genesis 2:​8-​10, 19) Sinda trinatar ni Jehova bilang saiyang mga aki, kabtang kan saiyang unibersal na pamilya. (Lucas 3:38) Mantang itinao an Eden bilang modelo, an langitnon na Ama kaining enot na mag-agom na tawo nagtao sa sainda kan nakakokontentong asignasyon na pahiwason an Paraiso tanganing makalakop sa bilog na globo. An bilog na daga iistaran kan saindang mga gikan.​—Genesis 1:28.

6. (a) Ano an saboot nindo manongod sa rebeldeng gawe ni Adan asin Eva? (b) Ano an tibaad magparisa na kita nagkaleksion sa nangyari sa Eden asin na nakinabang kita sa pakaaram kaiyan?

⁶ Minsan siring, dai nahaloy, si Adan asin Eva napaatubang sa pagbalo sa pagkuyog, pagbalo sa kaimbodan. Primero an saro dangan an saro pa dai nakapaheling nin pag-apresyar sa pagkamoot na itinao sa sainda. Nakabibigla an saindang ginibo. Idto dai mapatatawad! Bilang resulta, sinda nawaran kan saindang relasyon sa Dios, pinahale sa saiyang pamilya, asin pinalayas sa Eden. Sagkod ngonyan namamatean niato an mga epekto kan saindang kasalan. (Genesis 2:​16, 17; 3:​1-6, 16-​19, 24; Roma 5:12) Alagad nagkaleksion daw kita sa nangyari? Ano an reaksion niato sa pagkamoot nin Dios? Ipinaheheling daw kan mga desisyon na ginigibo niato aroaldaw na inaapresyar niato an saiyang pagkamoot?​—1 Juan 5:3.

7. Sa ibong kan ginibo ni Adan asin Eva, paano nagpaheling nin pagkamoot si Jehova para sa mga gikan ninda?

⁷ Minsan an risang marhay na kadaihan nin pag-apresyar na ipinaheling kan enot niatong mga magurang para sa gabos na ginibo nin Dios para sa sainda dai nakapogol sa sadiring pagkamoot nin Dios. Huli sa pakikidamay sa mga tawo na dai pa namumundag kaidto​—pati kita na nabubuhay ngonyan—​itinogot nin Dios na si Adan asin Eva magpamilya bago sinda magadan. (Genesis 5:​1-5; Mateo 5:​44, 45) Kun iyan dai nia ginibo, mayo kutana sa sato na namundag. Paagi sa progresibong pagpapahayag kan saiyang kabotan, nagtao man si Jehova nin pasisikadan sa paglaom para sa gabos na gikan ni Adan na magibo nin pagtubod. (Genesis 3:​15; 22:​18; Isaias 9:​6, 7) Kaiba sa areglo nia an paagi na an mga tawo hale sa gabos na nasyon puedeng mabawi an iwinara ni Adan, arin na baga, sangkap na buhay bilang aprobadong mga miembro kan unibersal na pamilya nin Dios. Ginibo nia ini paagi sa pagtagama nin pantubos.

Taano ta Kaipuhan an Pantubos?

8. Taano ta dai puede na ipinagboot na sana nin Dios na minsan ngani dapat na magadan si Adan asin Eva, mayo sa saindang makinuyog na mga gikan an kaipuhan na magadan?

⁸ Talaga daw na kaipuhan na ibayad an sarong halagang pantubos sa porma nin sarong buhay nin tawo? Dai daw puede na ipinagboot na sana nin Dios na minsan ngani si Adan asin Eva dapat na magadan huli sa saindang pagrebelde, an gabos nindang gikan na makuyog sa Dios puedeng mabuhay sagkod lamang? Sa halipot an pananaw na punto de vista nin tawo, iyan tibaad garo rasonable. Minsan siring, si Jehova “mamomoton sa katanosan asin hustisya.” (Salmo 33:5) Si Adan asin Eva nagkaaki sana pakatapos nang sinda nagkasala; kaya mayo sa mga aking idto na namundag na sangkap. (Salmo 51:5) Sinda gabos nagmana nin kasalan, asin an penalidad sa kasalan kagadanan. Kun ini dai inintindi ni Jehova, anong klaseng halimbawa an itatao kaiyan para sa mga miembro kan saiyang unibersal na pamilya? Dai puedeng dai nia intindihon an sadiri niang matanos na mga pamantayan. Iginalang nia an mga kahagadan nin hustisya. Mayo nin makatatatsar noarin man sa ginibong aksion nin Dios mapadapit sa mga isyung napapalabot.​—Roma 3:​21-23.

9. Sono sa pamantayan nin hustisya nin Dios, anong klaseng pantubos an kaipuhan?

⁹ Kun siring, paano ikatatao an sarong angay na basehan para sa pagliligtas sa mga gikan ni Adan na mapaheling nin mamomoton na pagkuyog ki Jehova? Kun may sarong sangkap na tawo na magadan bilang atang, ikatotogot nin hustisya na an halaga kan sangkap na buhay na iyan makatakop sa mga kasalan kaidtong mga maako sa pantubos na may pagtubod. Mantang an kasalan nin sarong tawo, si Adan, iyo an responsable sa pagpangyari na magin mga parakasala an bilog na pamilya nin tawo, an pinabolos na dugo nin saro pang sangkap na tawo, mantang may katimbang na halaga, puedeng balansehon an timbangan nin hustisya. (1 Timoteo 2:​5, 6) Alagad ta saen manonompongan an siring na persona?

Gurano Kadakula kan Pagsasakripisyo?

10. Taano ta dai ikinatao kan mga gikan ni Adan an kaipuhan na pantubos?

¹⁰ Sa mga gikan kan parakasalang si Adan, mayo ni saro na makatatao kan kaipuhan tangani na mabalukat an mga oportunidad sa buhay na ipinatunod ni Adan. “Mayo ni saro sa sainda na sa ano man na paagi makababalukat minsan sa tugang, ni makatatao sa Dios nin pantubos para sa saiya; (asin an halagang pambalukat sa saindang kalag mahalon na marhay kaya iyan nag-ontok na sagkod sa panahon na daing sagkod) tanganing sia mabuhay pa sagkod lamang asin dai makaheling kan kotkot.” (Salmo 49:​7-9) Imbes na pabayaan an katawohan na mayo nin paglaom, si Jehova mismo maheherakon na nagtao nin probisyon.

11. Paagi sa ano na itinao ni Jehova an sangkap na buhay nin tawo na kaipuhan para sa angay na pantubos?

¹¹ Si Jehova dai nagsugo nin sarong anghel digdi sa daga tanganing magsagin nagadan paagi sa pagsakripisyo nin sarong hawak na nagpakangtawo mantang sia padagos na nabubuhay bilang sarong espiritu. Imbes, paagi sa paggibo nin milagro na solamente an Dios, an Kaglalang, an makagigibo, ibinalyo nia an puersa nin buhay asin personalidad nin sarong langitnon na aki pasiring sa matris nin sarong babae, si Maria na aking babae ni Eli, kan tribo ni Juda. An puersa aktiba nin Dios, an saiyang banal na espiritu, prinotehiran an pagdakula kan aki sa matris kan ina kaiyan, asin iyan namundag na sangkap na tawo. (Lucas 1:​35; 1 Pedro 2:22) Kun siring, an sarong ini igwa kan halagang kaipuhan tanganing ikatao an pantubos na biyong makaootob sa mga kahagadan kan hustisya nin Dios.​—Hebreo 10:5.

12. (a) Sa anong sentido na si Jesus an “Aking bugtong” nin Dios? (b) Paano an pagsugo nin Dios sa sarong ini na tumao kan pantubos nagdodoon kan Saiyang pagkamoot para sa sato?

¹² Kiisay sa manampulong ribo na langitnon na aki nia itinao ni Jehova an asignasyon na ini? Sa saro na inaapod sa Kasuratan na saiyang “Aking bugtong.” (1 Juan 4:9) An mga tataramon na ini ginagamit sa pagladawan, bakong sa nagin kamugtakan nia kan sia mamundag bilang tawo, kundi sa kamugtakan nia bago kaiyan duman sa kalangitan. Sia an solamenteng linalang ni Jehova nin direkta na mayo kan tabang nin siisay man. Sia iyo an Panganay sa gabos na linalang. Sia an saro na ginamit nin Dios sa paglalang sa gabos na iba pang linalang. An mga anghel aki nin Dios, kun paanong si Adan aki nin Dios. Alagad si Jesus ilinaladawan na igwa nin “kamurawayan na arog kan yaon sa aking bugtong gikan sa ama.” Sinasabi na sia nag-eerok “sa daghan kan Ama.” (Juan 1:​14, 18) An saiyang relasyon sa Ama dayupot, may pagkompiar, mapagpadangat. Kapareho sia kan saiyang Ama na namomoot sa katawohan. Ipinahahayag kan Talinhaga 8:​30, 31 an saboot kan saiyang Ama manongod sa Aki na ini asin an saboot kan Aki manongod sa katawohan: “Ako an nangongorog niang [ni Jehova] kinaoogmahan sa aroaldaw, mantang ako maogma sa atubangan nia sa gabos na panahon, . . . asin an mga bagay na sakong [ni Jesus, an Pangenot na Trabahador ni Jehova, an ladawan nin kadonongan] kinaoogmahan iyaon sa mga aki nin mga tawo.” An pinakamamahal na Aking ini iyo an isinugo nin Dios digdi sa daga tanganing tumao kan pantubos. Kun siring, abaa kamakahulogan kan isinabi ni Jesus: “An Dios namoot na gayo sa kinaban na itinao nia an saiyang Aking bugtong”!​—Juan 3:16.

13, 14. An rekord sa Biblia manongod sa pagprobar ni Abraham na idolot si Isaac maninigong makatabang sa sato na apresyaron an ano manongod sa ginibo ni Jehova? (1 Juan 4:10)

¹³ Tanganing matabangan kita na masabotan nin kadikit kun ano an kahulogan kaiyan, haloy pa bago napadigdi sa daga si Jesus, pinagbotan nin Dios si Abraham, mga 3,890 taon na an nakaagi: “Daraha, tabi, an saimong aki, an bugtong mong aki na namomotan mong gayo, si Isaac, asin paduman ka sa daga nin Moria asin duman idolot mo sia bilang dolot na tinotong sa saro sa mga bukid na sasabihon ko sa saimo.” (Genesis 22:​1, 2) Huli sa pagtubod, nagkuyog si Abraham. Bugtakan an saindong sadiri sa kamugtakan ni Abraham. Ano kun aki nindo idto, an bugtong nindong aki na namomotan nindong marhay? Ano an magigin pagmate nindo mantang sinisilak nindo an songo para sa dolot na tinotong, nagbabaklay kamo nin pirang aldaw pasiring sa daga nin Moria, asin ibinubugtak nindo an saindong aki sa ibabaw kan altar?

¹⁴ Taano ta igwa nin siring na mga pagmate an sarong madinamayon na magurang? Sinasabi kan Genesis 1:​27 na an tawo linalang nin Dios sa ladawan Nia. An satong mga pagmate na pagkamoot asin pakikidamay ipinababanaag sa limitadong marhay na paagi an pagkamoot asin pakikidamay ni Jehova. Sa kaso ni Abraham, nag-interbenir an Dios, kaya dai aktuwal na iinatang si Isaac. (Genesis 22:​12, 13; Hebreo 11:​17-​19) Minsan siring, sa sadiri niang kaso, si Jehova dai puminondo sa ultimo ora sa pagtao kan pantubos, minsan ngani idto ginibo na dakula an pagsasakripisyo kapwa nia asin kan saiyang Aki. An ginibo, bakong huli sa ano man na obligasyon nin Dios, kundi, imbes, bilang kapahayagan nin ekstraordinaryong dai na kutana maninigong kabootan. Iyan daw lubos niatong inaapresyar?​—Hebreo 2:9.

Kun Ano an Pinapangyayari Kaiyan

15. Paano nakaapektar sa mga buhay an pantubos minsan sa presenteng palakaw na ini nin mga bagay?

¹⁵ An mamomoton na probisyon na iyan nin Dios may hararom na epekto sa buhay kan mga nag-aako kaiyan na may pagtubod. Sinda kaidto siblag sa Dios bilang resulta nin kasalan. Sinda, arog kan sabi kan saiyang Tataramon, ‘mga kaiwal huli ta an saindang isip nasa mga gibong maraot.’ (Colosas 1:​21-23) Alagad ta sinda “nakapakipag-uli sa Dios paagi sa kagadanan kan saiyang Aki.” (Roma 5:​8-10) Mantang binakle na an saindang pamumuhay asin mantang inako na an kapatawadan na pinapangyayari nin Dios sa mga nagtutubod sa atang ni Cristo, sinda tinawan nin malinig na konsensia.​—Hebreo 9:​14; 1 Pedro 3:21.

16. Anong mga bendisyon an itinatao sa sadangoton na aripompon huli sa saindang pagtubod sa pantubos?

¹⁶ Itinao ni Jehova sa limitadong kabilangan kan mga ini, na sarong “sadangoton na aripompon,” an dai na kutana maninigong pabor na makaibanan kan saiyang Aki sa langitnon na Kahadean, na an katuyohan otobon an orihinal na katuyohan nin Dios para sa daga. (Lucas 12:32) An mga ini kinua “hale sa lambang tribo asin tataramon asin banwaan patin nasyon . . . na mani kahadean asin mga saserdote kan satuyang Dios, asin sinda mamamahala bilang mga hade sa daga.” (Kapahayagan 5:​9, 10) Sa mga ini, si apostol Pablo nagsurat: “Kamo nag-ako nin espiritu nin pag-ampon bilang mga aki, na paagi kan espiritung ini kita nagkukurahaw: ‘Abba, Ama!’ An espiritu man sana nagpapatotoo kaiba kan satong espiritu na kita mga aki nin Dios. Kun siring, kun kita mga aki, kita man mga paramana: mga paramana nanggad nin Dios, alagad kapwa mga paramana ni Cristo.” (Roma 8:​15-17) Sa pagkaampon sa sainda nin Dios bilang saiyang mga aki, itinatao sa sainda an minamahal na relasyon na iwinara ni Adan; alagad an mga aking ini tatawan kan dugang pang mga pribilehio nin langitnon na paglilingkod​—bagay na nungkang nakamtan ni Adan. Bakong makangangalas na nagsabi si apostol Juan: “Helinga nindo kun anong klaseng pagkamoot an itinao kan Ama sa sato, tangani na kita maapod na mga aki nin Dios”! (1 Juan 3:1) Sa mga siring an Dios nagpapahayag bako sanang nin may prinsipyong pagkamoot (a·gaʹpe) kundi pati nin mamomoton na kapadangatan (phi·liʹa), na nagpapamidbid kan bogkos sa pag-oltanan nin tunay na magkakatood.​—Juan 16:27.

17. (a) Sa gabos na nagtutubod sa pantubos, anong oportunidad an itinatao? (b) Ano an magigin kahulogan para sa sainda kan “mamuraway na katalingkasan kan mga aki nin Dios”?

¹⁷ Sa iba man​—sa gabos na nagtutubod sa buka an palad na probisyon nin Dios para sa buhay paagi ki Jesu-Cristo—​binubukasan ni Jehova an oportunidad na kamtan an mahalagang marhay na relasyon na iwinara ni Adan. Nagpaliwanag si apostol Pablo: “An odok na paglaom kan mga linalang [an linalang na mga tawo na guminikan ki Adan] naghahalat sa paghahayag kan mga aki nin Dios [an boot sabihon, hinahalat ninda an panahon na malinaw nang hayag na an mga aki nin Dios na mga paramana kan langitnon na Kahadean kaiba ni Cristo naggigibo na nin positibong aksion para sa katawohan]. Huli ta an mga linalang ipinasakop sa kasayangan [sinda namundag sa kasalan na an kaaabtan kagadanan, asin mayo nin paagi na makalda ninda an saindang sadiri], bakong sa sadiring boot kaiyan kundi paagi sa saiya na nagpasakop kaiyan, basado sa paglaom [na tao nin Dios] na an mga linalang mismo bubutasan man hale sa kaoripnan sa kalapaan asin magkakaigwa kan mamuraway na katalingkasan kan mga aki nin Dios.” (Roma 8:​19-21) Ano an magigin kahulogan kan katalingkasan na iyan? Na sinda kinalda sa kaoripnan sa kasalan asin kagadanan. Kakamtan ninda an pagkasangkap nin isip asin hawak, an Paraiso bilang saindang harong, asin an buhay na daing sagkod na dian ikaoogma ninda an saindang pagkasangkap asin ipahahayag an saindang pag-apresyar ki Jehova, an solamenteng tunay na Dios. Asin paano pinapangyari an gabos na ini? Paagi sa pantubos na atang kan Aking bugtong nin Dios.

18. Sa Marso 23 pagkasolnop kan saldang, ano an gigibohon niato, asin taano?

¹⁸ Kan Nisan 14, 33 C.E., sa sarong kuarto sa itaas duman sa Jerusalem, iinintrodusir ni Jesus an Memorial kan saiyang kagadanan. An taonan na pagselebrar kan saiyang kagadanan nagin mahalagang okasyon sa buhay nin gabos na tunay na Kristiano. Si Jesus mismo nagboot: “Padagos na gibohon nindo ini sa paggirumdom sa sako.” (Lucas 22:19) Ngonyan na 1997 an Memorial gigibohon pagkasolnop kan saldang sa Marso 23 (na iyo an kapinonan kan Nisan 14). Sa aldaw na iyan, mayo nin mas mahalaga pa kisa sa pagigin presente sa okasyon nin Memorial na ini.

Ano an Isisimbag Nindo?

◻ Sa anong mga paagi na an Dios nagpaheling nin abundang pagkamoot sa katawohan?

◻ Taano ta kinaipuhan an sangkap na buhay nin tawo sa pagtubos sa mga gikan ni Adan?

◻ Sa anong dakulang pagsasakripisyo itinao ni Jehova an pantubos?

◻ Ano an pinapangyayari kan pantubos?

[Retrato sa pahina 10]

Itinao nin Dios an saiyang bugtong na Aki