Mga Badil—Sarong Kinaban na Mayo Kaiyan

POON sa kapinonan kan kasaysayan nin tawo, an tawo nagin madahas sa saiyang pagtratar sa saiyang kapwa. Naglataw an paggadan sa enot na pamilya kan gadanon ni Cain an tugang niang si Abel. An garadanan nagpadagos poon kaidto—sa laog nin mga pamilya, sa laog nin mga tribo, asin sa pag-oltanan nin mga nasyon. Mantang nagigin mas makosog an mga armas, nagin mas dakol man an mga biktima. An mga gapo asin pamukpuk nasalidahan nin mga budyak asin pana, na nasalidahan man nin mga badil asin bomba. An paggadan sa ginatos nagin rinibo; ngonyan an rinibo nagin minilyon. Asin bako sanang sa ralaban kundi pati sa panahon nin katoninongan. Bako sanang nin mga soldados kundi siring man nin pribadong mga siudadano. Bako sanang nin mga may edad na kundi siring man nin mga aki. Matatapos pa daw an paggrabe nin kadahasan? Kun iyan depende sa mga tawo, madiklom an paglaom.—2 Timoteo 3:1-5, 13.

Ihinula ni Cristo Jesus na ini magigin panahon na an mga nasyon matindog tumang sa ibang nasyon sa makatatakot na mga guerra, na pinuputol an buhay nin minilyon. Dakol an mabibiktima nin mga peste asin linog sa dakol na lugar. Aatian nin tawo an daga sagkod na an kakayahan kaiyan na magsustenir sa buhay mamemeligro—dakol na sientista an nagpapahayag na ngonyan nin pagkatakot dian. Pero an pagkamoot nin tawo sa pirak nagtutulod sa sainda sa pag-ati, asin iyan matatapos sana kun si Jehova Dios mismo an makilabot “tanganing laglagon idtong mga naglalaglag kan daga.”—Kapahayagan 11:18.

Dakol an nag-oolog-olog sa siring na mga patanid asin sa siring inootob an saro pang kabtang kan ihinulang tanda kan huring mga aldaw: “Aram nguna nindo ini, na sa huring mga aldaw an mga paraolog-olog madatong na may pag-olog-olog, na maglalakaw sono sa saindang mga horot asin magsasarabi: ‘Haen man ining ipinanugang presensia nia? Tara, poon kan aldaw na an satong mga kag-anak magtorog sa kagadanan, an gabos na bagay pareho man sana kan kapinonan nin paglalang.’”—2 Pedro 3:3, 4.

Pero an madiklom na panganoron na ini sa ibabaw nin katawohan maliwanag sa ibong. Ihinula ni Jesus na sa saiyang presensia, magkakaigwa “sa daga [nin] kahandalan nin mga nasyon, na dai naaaraman an gigibohon huli sa hagobohob kan dagat asin kan mga alon, mantang an mga tawo nalulunosan huli sa takot asin paghalat sa mga bagay na maabot sa ineerokan na daga.” Pero sinabi man nia na iyan magigin panahon na ‘tumindog kamo nin tanos asin tingagan an saindong mga payo, huli ta an saindong kaligtasan naghaharani na.’—Lucas 21:25-28.

An mga nasyon nahahandal, an mga masa riribok, asin an mga indibiduwal natatakot sa mga bagay na maabot sa daga, pero iyan panahon nin kaligtasan para sa mga naghahalat sa nagdadangadang na Kahadean nin Dios asin sa Sangribong Taon na Paghade ni Cristo Jesus. Iyan an panahon na maootob an panuga ni Jehova Dios na ‘bagong kalangitan asin sarong bagong daga na dian an katanosan an magdadanay.’—2 Pedro 3:13.

Asin mayo na nin mga badil! Mayo na nin kakaipuhanon para sa guerra. “Pinaoontok nia an mga ralaban sagkod sa kaporoporohi kan daga. An arko saiyang binabari asin pinagpuputolputol an garod; an mga karro [mga karuwahe sa pakikilaban, Rotherham] saiyang sinosolo sa kalayo.”—Salmo 46:9.

Mayo na nin kakaipuhanon para sa personal na proteksion. “Sinda magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda; huli ta an mismong ngoso ni Jehova nin mga hukbo iyo an nagtaram kaiyan.”—Miqueas 4:4.

An mga matanos sana, mayong maraot, an yaon duman. “An mga matanos iyo an mag-eerok sa daga, asin an mga daing kanawayan iyo an matatada dian. Kun manongod sa mga maraot, sinda popohoon sa daga; asin kun manongod sa mga madaya, sinda hahaleon dian.” (Talinhaga 2:21, 22) Dangan “an mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.”—Salmo 37:11.

Sa mga mata nin Dios an kadahasan nakararaot sa daga. Kan aldaw ni Noe “an daga nagin laglag sa pagheling kan tunay na Dios asin an daga napano nin kadahasan.” (Genesis 6:11-13) Kaya, tinapos ni Jehova an kinaban na idto paagi sa panglobong Baha. Ibinaing ni Jesus an katapusan kan presenteng madahas na kinaban na ini sa saiyang presensia sa katapusan kan suanoy na kinaban na idto: “Huli ta kun paano sinda kan mga aldaw na idto bago kan baha, nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na magdatong an baha asin iinanod sinda gabos; magigin siring man kaiyan an presensia kan Aki nin tawo.”—Mateo 24:38, 39.

Sa bagong kinaban nin Dios an gabos na nabubuhay maotob sa Marcos 12:31: “Mamotan mo an saimong kataed siring sa saimo man sana.” Asin sa Isaias 11:9: “Dai sinda magibo nin maraot o manraraot sa bilog na sakuyang banal na bukid; huli ta an daga mapapano kan kaaraman dapit ki Jehova kun paanong an tubig nakakatahob sa mismong kadagatan.” Asin maootob man sa bagong kinaban na iyan nin katanosan an mamuraway na mga kamugtakan na sinasabi sa Kapahayagan 21:1, 4: “Naheling ko an bagong langit asin bagong daga; huli ta nakalihis na an dating langit asin an dating daga, asin an dagat mayo na. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” Tunay nanggad, sa panahon na iyan mayo na nin mga sosyedad nin tawo na pano nin mga badil!

Mayo sa darakulang pagkaliwat na ini para sa pagbendisyon sa tawo an papangyayarihon nin mga rebolusyonaryo na may nag-aasong badil sa panrapido sa saindang mga kaiwal. Imbes, iyan papangyayarihon ni Jehova Dios paagi sa saiyang Kahadean sa pamamahala ni Cristo Jesus. Kaya an Isaias 9:6, 7 nagsasabi: “Namundag sa sato an sarong aki, may itinao sa satong sarong aking lalaki; asin an makaprinsipeng pamamahala mamumugtak sa saiyang abaga. Asin an saiyang ngaran aapodon na Makangangalas na Parahatol, Makosog na Dios, Amang Daing Katapusan, Prinsipe nin Katoninongan. An kadakolan kan sa-prinsipeng pamamahala asin katoninongan magigin daing kasagkodan, sa trono ni David asin sa saiyang kahadean tanganing iyan marigon na patindogon asin tanganing papagdanayon iyan paagi sa hustisya asin paagi sa katanosan, poon ngonyan asin sagkod sa panahon na daing katapusan. An mismong kaigotan ni Jehova nin mga hukbo iyo an magibo kaini.”