Yaon daw Kamo Duman?
1 An sarong haloy nang Saksi nagsabi kaidto: “Kun malipasan nindo an enot na aldaw kan kombension, tara, dakol nanggad kamong nalipasan!” Taano ta siring kaiyan an saiyang paniniwala? Huli ta an enot na aldaw an kapinonan nin sarong nagsosopay na espirituwal na bangkete na iinandam para sa sato kan organisasyon ni Jehova. (Isa. 25:6) An satong pagigin yaon duman sa pagpoon pa sana nagpapaheling na kita minaoyon sa saboot kan salmista: “Ako naogma kan sinda nagsasabi sa sako: ‘Sa harong ni Jehova magduruman kita.’”—Sal. 122:1.
2 Minsan siring, kan nakaaging taon sa nagkapirang “Makahulang Tataramon nin Dios” na Pandistritong Kombension, an kabilangan nin mga nag-atender kan Biernes kadikit nanggad kisa kan Sabado asin Domingo. Ini nangangahulogan na dakulang porsentahe kan satong mga tugang an dai nakadangog kan mga kabtang sa kombension na nagpresentar nin mahalagang marhay na impormasyon dapit sa makahulang tataramon. Nalipasan man ninda an nakaoogmang marhay na pakikiasosyar sa mga kapagtubod.
3 Dai Pagtogotan an Sekular na Trabaho na Makaolang: An paghadit na mameligro an empleyo nin saro tibaad iyo an dahelan kun taano an nagkapira ta dai nag-atender kan Biernes. Minsan siring, nanompongan nin dakol na Saksi na an saindang mga among andam na makikooperar sa sainda sa bagay na ini kun sinda amay pang marhay na humagad nin bakasyon. An sarong among naghangang marhay sa marigon na determinasyon nin sarong tugang na babaeng payunir na umatender sa gabos na pagtiripon kan kongregasyon asin asamblea kaya sia nag-atender nin bilog na aldaw sa kombension na inatenderan kan tugang.
4 Dai nindo maninigong ipamugtak na dai kamo tatawan nin bakasyon kan saindong among, ni na maninigo kamong magkonklusyon na an pagpalipas nin sarong aldaw kan kombension bakong importante. Paagi sa odok sa pusong kombiksion, mag-andam na ipaheling sa among nindo sa mataktikang paagi basado sa Kasuratan kun taano an pag-atender sa kombension ta mahalagang kabtang kan saindong pagsamba. (Heb. 10:24, 25) Dangan lubos kamong magkompiar sa mga panuga ni Jehova, na rinerekonoser na ano man na hagadon nindo sa materyal na paagi itatao kun padagos na eenoton nindo an espirituwal na mga pangangaipo sa saindong buhay.—Mat. 6:33; Heb. 13:5, 6.
5 An nagdedeterminar na bagay iyo an pag-apresyar sa “orog na mahalagang mga bagay.” (Fil. 1:10, 11; Sal. 27:4) Pinahihiro kita kaini na gumibo nin mga plano tangani na makinabang nin lubos sa mahalagang marhay na probisyon hale ki Jehova. Pumoon na kamong gumibo nin depinidong mga plano ngonyan, asin magin determinado na yaon kamo duman sa bilog na tolong aldaw!