Andamon an mga Bagohan na Atubangon an Pagtumang
1 Kun an mga indibiduwal nagpopoon nang mag-adal sa Biblia asin “nagmamawot na mamuhay na may diosnon na debosyon,” sinda nagigin espesyal na punteriya ni Satanas. (2 Tim. 3:12) An pagtumang puedeng maggikan sa mga katrabaho, kaeskuela, o kataed. Nangorognang nagigin depisil iyan kun an mga bagohan tinutumang nin mga paryenteng may marahay na intension.—Mat. 10:21; Mar. 3:21.
2 Ihinula an Pagtumang: Kaipuhan na masabotan nin mga bagohan na an persekusyon dapat na laoman na mangyayari asin na iyan nagpaparisa na tunay sindang mga disipulo ni Cristo. (Juan 15:20) Kun beses, an pagtumang nin iba tibaad huli sa salang mga paghona manongod sa Mga Saksi ni Jehova. Girumdomon na igwa nin dakulang kagayagayahan sa pagtios nin kasusupgan huli sa pagigin parasunod ni Jesus asin huli sa pagkuyog sa Dios. (Gibo 5:27-29, 40, 41) Aseguraron an mga bagohan dapit sa mamomoton na suporta ni Jehova. (Sal. 27:10; Mar. 10:29, 30) Paagi sa pagpapadanay ninda kan saindang integridad, sinda nagigin nasa kampi ni Jehova sa isyu dapit sa unibersal na soberaniya.—Tal. 27:11.
3 An Papel nin Tamang Kaaraman: Idoon sa saindong mga inaadalan sa Biblia an kahalagahan nin padagos na pagkua nin tamang kaaraman sa ibong kan mga pagbalo na tibaad inaatubang ninda. Paagi sa pagtumang, pinagmamaigotan ni Satanas na olangon na makagamot sa saindang piguratibong puso an mga nanonodan ninda. (Tal. 4:23; Luc. 8:13) Dapat na padagos sindang magkua nin tamang kaaraman sa Tataramon nin Dios tanganing sinda magin masarig na nakagamot sa pagtubod.—Sal. 1:2, 3; Col. 2:6, 7.
4 Kaipuhan an Pakatagal: Sa ano man na depisilon na situwasyon, an pakatagal mahalagang marhay asin puedeng magbunga nin marahay na mga resulta. (Luc. 21:16-19) Kun tinatagalan nin mga bagohan an pagtumang, nagtatao ini nin pakinabang sa sainda mismo asin sa iba. Naeeksperyensiahan ninda an kakayahan ni Jehova na bendisyonan nin abunda an mga maimbod na nagtatagal.—Sant. 1:12.
5 Naggayagaya si apostol Pablo sa espirituwal na pag-oswag kan saiyang mga tugang sa Tesalonica. Pinasalamatan nia an Dios huli sa sainda, na an dakol sa sainda natabangan nia na manodan an katotoohan. (2 Tes. 1:3-5) Maeeksperyensiahan man niato an arog kaiyan na kagayagayahan asin pagkakontento kun aandamon niato an satong mga inaadalan sa Biblia na atubangon an pagtumang asin na makatagal.