Libro kan Biblia Numero 63—2 Juan

Kagsurat: Apostol Juan

Kun Saen Isinurat: Efeso, o sa harani

Natapos an Pagsurat: Mga 98 C.E.

AN IKADUWANG surat ni Juan halipot​—⁠puede iyan na ikasurat sa sarong pidaso nin papiro​—⁠alagad iyan pano nin kahulogan. Ipinanongod iyan sa “piniling babae asin sa saiyang mga aki.” Huling an “Kyria” (terminong Griego para sa “babae” ) talagang ginagamit kan panahon na idto bilang personal na ngaran, naniniwala an nagkapirang nag-espesyalisar sa Biblia na an pinapanongdan kan surat sarong indibiduwal na igwa kan ngaran na iyan. Sa ibong na lado, iniisip nin nagkapira na an sinuratan ni Juan sarong Kristianong kongregasyon, na inapod iyan na “piniling babae.” Tibaad ginibo ini tanganing ribarawon an mga nagpepersegir. Sa kamugtakan na iyan, an pangungumusta kan “mga aki kan saimong tugang na babae” na sinambit sa huring bersikulo naggikan sa mga miembro nin ibang kongregasyon. Kaya an ikaduwang surat bakong arog kan enot na surat na para sa dakol, huli ta iyan minalataw na isinurat magsalang para sa sarong indibiduwal o sarong partikular na kongregasyon.​—⁠2 Juan Ber. 1.

² Mayong dahelan na magduda na si Juan an naggibo kan surat na ini. Inapod kan kagsurat an saiyang sadiri na “magurang na lalaki.” Angay nanggad ini ki Juan bako sanang huli sa saiyang pagigin gurang kundi huli man ta, bilang saro sa ‘mga harigi’ (Gal. 2:⁠9) asin an ultimong nabubuhay na apostol, sia totoong “magurang na lalaki” sa Kristianong kongregasyon. Sia midbid na marhay, kaya dai na kaipuhan na sia orog pang ipamidbid sa mga nagbabasa kan saiyang surat. Maririsa man na sia an kagsurat kaiyan huli sa pagkakaagid kaiyan sa estilo kan enot na surat asin kan Ebanghelyo ni Juan. Arog kan enot na surat, an ikaduwang surat minalataw na ginibo sa Efeso o harani dian, kaidtong mga 98 C.E. Mapadapit sa Ikaduwa asin Ikatolong Juan, an Cyclopedia ni McClintock asin Strong nagkomento: “Basado sa pangkagabsan na pagkakaagid kaiyan, puede niatong ipamugtak na an duwang surat ginibo dai nahaloy pagkatapos kan Enot na Surat hale sa Efeso. Pareho iyan aplikado sa indibiduwal na mga kaso nin paggawe, na an mga prinsipyo kaiyan itinao na nin kompleto sa Enot na Surat.”a Bilang pagsuportar sa pagigin totoo kaiyan, an surat na iyan kinotar ni Ireneo, kan ikaduwang siglo, asin inako ni Clemente na taga Alejandria, kan panahon man na idto.b Siring man, an mga surat ni Juan nakalista sa Muratorian Fragment.

³ Siring kan Enot na Juan, ginibo an surat na ini huli ta an Kristianong pagtubod sinasalakay nin falsong mga paratokdo. Gustong patanidan ni Juan an mga nagbabasa kan saiyang surat tumang sa falsong mga paratokdo tanganing mamidbid asin malikayan ninda an mga iyan, mantang sinda padagos na naglalakaw sa katotoohan asin pagkaminorootmootan.

KUN TAANO TA KAPAKIPAKINABANG

⁵ Minalataw na kan panahon ni Juan, siring sa presenteng mga panahon, may nagkapira na bakong kontento na magdanay sa malinaw asin simpleng mga katokdoan ni Cristo. Orog pa dian an gusto ninda, sarong bagay na makakapagirok sa saindang amor propio, sarong bagay na mapamuraway sa sainda asin magibo sa sainda na magin kapantay kan kinabanon na mga pilosopo, asin gusto nindang atian an Kristianong kongregasyon saka magkabaranga iyan tanganing makamit an saindang maimot na mga katuyohan. Pinahalagahan ni Juan an pagkaoroyon kan kongregasyon na basado sa pagkamoot asin tamang katokdoan na kasaro kan Ama asin kan Aki. Maninigo na arog man kaiyan an satong pagpahalaga sa pagkasararo kan kongregasyon ngonyan, na dai ngani kita makiibaiba o magtaratara sa mga nag-apostata pasiring sa ibang katokdoan na lihis sa itinotokdo kan ipinasabong na Kasuratan. Paagi sa padagos na paglakaw oyon sa mga togon nin Dios, asin sa lubos na kagayagayahan na yaon sa tunay na Kristianong kasararoan, makakasierto kita na “mapapasato an dai na kutana maninigong kabootan, pagkaherak asin katoninongan hale sa Dios na Ama asin hale ki Jesu-Cristo na Aki kan Ama, kaiba an katotoohan asin pagkamoot.” (Ber. 3) Tunay nanggad na idinodoon kan ikaduwang surat ni Juan an pagigin binendisyonan nin siring na Kristianong pagkasararo.

[Mga Nota sa Ibaba]