Paano Mo Maipapahiling na Nagpapasalamat Ka Huli sa Pantubos?

1-2. Pinapahiro kita kan atang na pantubos ni Jesus na gibuhon an ano, asin taano? (2 Corinto 5:​14, 15) (Hilingon man an ritrato.)

KUN nalaom ka sa sarong nagabang building dangan may nagsalbar sa saimo, bako daw na makakamati ka nin dakulang utang na buot sa nagligtas kan buhay mo? Dawa kun may iba pa siyang mga isinalbar, posibleng marhay na gusto mong ipahayag sa saiya an saimong personal na pasasalamat, tanganing ipahiling na dai mo binabaliwala an pagsalbar niya sa saimo.

² Arog kan ipinaliwanag sa sinusundan na artikulo, dai ta kayang isalbar an sadiri ta sa mga epekto kan minanang kasalan. Alagad, an atang na pantubos ni Jesus maisasalbar kita paagi sa (1) pagpagin posible na mapatawad an satong mga kasalan, (2) pagtao sa sato nin paglaom na lubos na maumayan sa satong makasalan na kamugtakan, asin (3) pagpagin posible na makipag-ulian kita sa Diyos. Bilang resulta, igwa kita kan paglaom na mabuhay sagkod pa man sa bagong kinaban ni Jehova. Tunay nanggad na idinuduon kan pantubos an pagkamuot ni Jesus sa sato, na haloy niya nang namamatian bago pa man siya mamundag bilang perpektong tawo. (Tal. 8:​30, 31) Isinurat ni apostol Pablo na “an nagpapahiro sa [sato] iyo an pagkamuot kan Cristo.” (Basahon an 2 Corinto 5:​14, 15.) Nangangahulugan ini na dapat na mapahiro kita kan pagkamuot ni Jesus na magpahayag nin pasasalamat sa saiya, para ipahiling na dai ta binabaliwala an saiyang atang na pantubos.

3. Taano ta an kada saro sa sato tibaad magkakalain nin paagi sa pagpahiling nin pasasalamat sa pantubos?

³ Sa anong paagi ka pinapahiro kan mamumuton na probisyon na pantubos? Tibaad an simbag mo diyan lain man sa simbag kan iba. Taano? Para iilustrar, may tulo ngayang tawong mabiyahe pasiring sa saro sanang destinasyon, pero an kada saro sa sainda mapuon sa magkakalain na siyudad. Kaya magkakalain an magigin ruta ninda. Sa kaagid na paagi, an “ruta” pasiring sa saimong destinasyon, o pasuhan na magpahiling nin pasasalamat sa pantubos, nakadepende sa kun ano an kamugtakan ngunyan kan relasyon mo ki Jehova. Sa artikulong ini pag-uulayan ta kun paano makakapahiling nin pasasalamat an tulong grupo nin mga tawo: (1) mga tinutukduan sa Bibliya, (2) bawtisadong mga Kristiyano, asin (3) mga karnerong napasuway sa aripumpon.

MGA TINUTUKDUAN SA BIBLIYA

4. Sa anong paagi naririsa ni Jehova an mga tinutukduan sa Bibliya?

⁴ Kun saro kang tinutukduan sa Bibliya, pag-isipan ini: Dahil inako mo an maugmang bareta, ipinaparisa kaiyan na saro ka sa mga irinarani ni Jehova sa saiya para magin amigo niya. (Juan 6:44; Gibo 13:48) “Si Jehova an parasiyasat nin mga puso.” Nangangahulugan ini na naririsa niya an saimong mga paghihinguwa na makanuod manungod sa saiya, asin nauugma siyang mahiling kang nag-uuswag sa pagmamaigot mong iuyon an saimong buhay sa saiyang mga pamantayan. (Tal. 17:3; 27:11) Pinapagin posible kan pantubos na magkaigwa ka nin dayupot na relasyon ki Jehova. (Roma 5:​10, 11) Nungkang pagbaliwalaon iyan.

5. Paano maiaaplikar kan mga tinutukduan sa Bibliya an sadol na nasa Filipos 3:16?

⁵ Bilang sarong tinutukduan sa Bibliya, paano mo maipapahiling na nagpapasalamat ka sa pantubos? An sarong paagi iyo an pag-aplikar sa sadol ni apostol Pablo sa mga taga Filipos: “Ano man an pag-uswag na nagibo na niyato, ipagpadagos ta an paglakaw nin husay sa dalan na iyan.” (Fil. 3:16) Kauyon kan sadol na iyan, dai pagtugutan an ano man na makaulang sa paglakaw mo sa dalan na pasiring sa buhay.​—Mat. 7:14; Luc. 9:62.

6. Ano an puwedeng gibuhon kan mga tinutukduan sa Bibliya kun nasasakitan sindang gumibo nin mga pagbabago? (Deuteronomio 30:​11-14) (Hilingon man an ritrato.)

⁶ Paano kun nasasakitan kang akuon an sarong katukduan sa Bibliya na nanudan mo dai pa sana nahahaloy? Mag-research asin mamibi ki Jehova para mas masabutan mo iyan. (Sal. 86:11) Kun nasasakitan ka pa man giraray na masabutan an katukduan, bayaan nguna iyan—pero dai magpundo sa pag-adal nin Bibliya. Paano kun nadidipisilan kang ipundo an sarong gibo na kinokondenar kan Bibliya? Girumdumon na nungkang mahagad si Jehova nin imposible sa bakong perpektong mga tawo. Magigibo mong mamuhay kauyon kan saiyang mga pamantayan. (Basahon an Deuteronomio 30:​11-14.) Asin nanunuga si Jehova na tatabangan ka niya. (Isa. 41:​10, 13; 1 Cor. 10:13) Kaya dai magsuko. Imbes na magparapokus sa napapaatubang sa saimong kadipisilan, isip-isipon an dakulang pasasalamat mo sa gabos na itinao ni Jehova sa saimo—kaiba na an areglong pantubos. Mantang nagkukusog an pagkamuot mo ki Jehova, mahihiling mong “an saiyang mga tugon bakong pagabat.”​—1 Juan 5:3.a

7. Ano an puwedeng hurop-hurupon kan mga hoben na pinapadakula sa katotoohan?

⁷ Kumusta kamo mga hoben na pinapadakula sa katotoohan? Mga tinutukduan man kamo sa Bibliya. Sa katunayan, kamo an pinakaimportanteng mga tinutukduan sa Bibliya kan saindong mga magurang. Sinasabi kan Bibliya: “Rumani kamo sa Diyos, asin marani siya sa saindo.” (Sant. 4:8; 1 Cron. 28:9) Pag naggigibo ka nin inisyatiba na rumani sa Diyos, hihinguwahon niya man na rumani sa saimo. An paghiling sa saimo ni Jehova bako lang basta parte nin sarong grupo. Irinarani niya sa saiya an lambang indibidwal—kaiba na an lambang indibidwal na pinapadakula sa katotoohan. Ano an nagpagin posible na magkaigwa ka nin personal na pakikiamigo ki Jehova? An pantubos—na sarong bagay na dapat na nungka mong pagbaliwalaon. (Roma 5:​1, 2) Kaya bago ka mag-atender sa Memoryal sa taon na ini, taano ta dai hurop-hurupon kun ano an kahulugan para sa saimo kan kagadanan ni Jesus? Tugutan na pahiruon ka kaiyan na abuton an sunod mong espirituwal na pasuhan—maski ano man iyan—tanganing ipahiling na nagpapasalamat ka sa pantubos na itinao ni Jehova paagi kan saiyang Aki.b

BAWTISADONG MGA KRISTIYANO

8. Sa anong mga paagi naipahiling na kan bawtisadong mga Kristiyano na nagtutubod sinda sa pantubos?

⁸ Kun saro kang bawtisadong Kristiyano, naipahiling mo na sa dakul na paagi na nagtutubod ka sa pantubos. Halimbawa, iinuyon mo an saimong buhay sa mga pamantayan ni Jehova tanganing magin dayupot ka sa saiya. Sinunod mo an pagbuot ni Jesus na gumibo nin mga disipulo paagi sa paghiras kan katotoohan sa iba. Idinusay mo an saimong sadiri ki Jehova asin nagpabawtismo. Napaatubang ka daw sa pagkontra dahil nanindugan ka para sa tunay na pagsamba? (2 Tim. 3:12) An saimong maimbod na pakatagal nagpapahiling na namumutan mo si Jehova asin nagpapasalamat ka sa pantubos na itinao niya paagi kan saiyang Aki.​—Heb. 12:​2, 3.

9. Anong peligro an dapat na aram kan bawtisadong mga Kristiyano?

⁹ Bilang bawtisadong mga Kristiyano, kaipuhan na aram ta an sarong peligro. Sa paglihis nin panahon, puwedeng magin baliwala na sana sa sato an pantubos. Paano iyan puwedeng mangyari? Pag-isipan an mga Kristiyano kan inot na siglo sa Efeso. Kinomendaran sinda kan binuhay liwat na si Jesus dahil sa saindang pakatagal. Alagad, sinabi niya sa sainda: “May sarong bagay ako laban sa saimo, an pagbaya mo sa pagkamuot na yaon sa saimo kan primero.” (Kap. 2:​3, 4) Arog kan ipinaparisa kan mga tataramon ni Jesus, an pagsamba nin sarong Kristiyano puwedeng luway-luway na magin rutina na sana. Tibaad nagpapamibi man siya, nag-aatender sa mga pagtiripon, asin nakikikabtang sa ministeryo pero ginigibo niya na lang iyan dahil kinatudan niya. Bako nang pagkamuot an nagpapahiro sa saiya na gibuhon iyan. Ano an puwede mong gibuhon kun namamatian mong bako nang arog kakusog kan dati an pagkamuot mo ki Jehova?

10. Paano mo ‘huhurop-hurupon’ asin ‘tatawan nin lubos na atensiyon’ an Kristiyanong mga aktibidad? (1 Timoteo 4:​13, 15)

¹⁰ Sinabi ni apostol Pablo ki Timoteo na “hurop-hurupon” asin ‘tawan nin lubos na atensiyon’ an Kristiyanong mga aktibidad. (Basahon an 1 Timoteo 4:​13, 15.) Kauyon kan sadol na iyan, mag-isip nin mga paagi na magigibo mong magin mas makahulugan an saimong pagsamba tanganing magdanay kang “malaad paagi sa espiritu.” (Roma 12:11; hilingon an study note na “Maging masigasig kayo dahil sa banal na espiritu.”) Halimbawa, tanganing magin mas atentibo ka sa mga pagtiripon, puwede ka daw na mas mag-andam pa para diyan? O tanganing magin mas kapaki-pakinabang an saimong personal na pag-adal, puwede ka daw maghanap nin lugar na diyan makakapagsolo ka tanganing mahurop-hurop mo an mga napag-adalan mo? Kun paanong kaipuhan mong gatungan an kalayo tanganing padagos na maglaad, puwede mong padagos na gibuhon an mga bagay na iyan tanganing magdanay kang mapagpasalamat sa gabos na itinao sa saimo ni Jehova, kaiba na an pantubos. Apuwera kaiyan, taano ta dai gamiton an mga semana bago an Memoryal para hurop-hurupon an mga bendisyon na kita lang na Mga Saksi ni Jehova an nakakaeksperyensiya? Daing duda na makakatabang iyan na urog ka pang magin mapagpasalamat sa pantubos—an basehan kan relasyon mo ki Jehova.

11-12. Mayo na daw sa saimo an espiritu nin Diyos huling temporaryong nabawasan an kaigutan mo? Ipaliwanag. (Hilingon man an ritrato.)

¹¹ Kun may panahon na namamatian mong bako nang arog kan dati an kaigutan mo sa tunay na pagsamba, dai madisganar o magkongklusyon na mayo na sa saimo an espiritu ni Jehova. Girumdumon an isinurat ni Pablo para sa mga Kristiyano manungod sa saiyang ministeryo: “Dawa kun ginigibo ko iyan na magabat sa buot, igwa pa man giraray ako nin responsabilidad na ipinagkatiwala sa sako.” (1 Cor. 9:17) Ano an buot niyang sabihon?

¹² May mga tendensiya man si Pablo na kun minsan nagpapaluya kan pagmawot niyang maghulit. Pero, determinado siyang padagos na maghulit sa ibong kan namamatian niya kan panahon na iyan. Puwede mo man siyang arugon. Magin determinado na gibuhon an tama dawa kun nagluluya an motibasyon mong gibuhon iyan. Kaya ipamibi na magkaigwa ka kan “pagmawot saka kan kakayahan na gumibo.” (Fil. 2:13) Padagos na magin aktibo sa saimong espirituwal na rutina. Makakapagtiwala ka na sa paglihis nin panahon mababago kan mga ginigibo mo an saimong namamatian asin maglaad giraray an pagkamuot na yaon pa sa puso mo.

13. Paano niyato padagos na mababalo kun baga “nasa pagtubod” kita?

¹³ Marahay na siyasaton ta sa pana-panahon an satong sadiri kauyon kan paggiya na nasa 2 Corinto 13:5: “Padagos na baluon kun baga kamo nasa pagtubod; padagos na patunayan kun ano man nanggad kamo.” Puwede mong gibuhon iyan paagi sa paghapot sa saimong sadiri: ‘Iniinot ko daw sa buhay ko an intereses kan Kahadian?’ (Mat. 6:33) ‘An mga pinipili ko daw na libangan nagpapahiling na ikinakaungis ko an maraot?’ (Sal. 97:10) ‘Nagtatabang daw ako na mapagdanay an katuninungan asin pagkasararo sa kongregasyon?’ (Efe. 4:​2, 3) An Memoryal sarong okasyon na diyan partikular nang hinuhurop-hurop niyato an probisyon ni Jehova na pantubos, kaya magkakaigwa kita nin oportunidad na siyasaton an satong sadiri asin masigurado na namumuhay kita para ki Cristo asin bako para sa satong sadiri.c

NAPARAYONG MGA KARNERO

14. Ano an mga puwedeng magin dahilan na maparayo sa aripumpon an mga Kristiyano?

¹⁴ May mga Kristiyano na nagpundo na sa pakikiasosyar sa kongregasyon pagkatapos nin nagkapirang bulan o mga taon pa ngani nin maimbod na paglilingkod. Taano? Huling napangibabawan sinda kan “mga kahaditan sa buhay.” (Luc. 21:34) An iba nasingkog sa sinabi o ginibo kan sarong kapagtubod. (Sant. 3:2) An iba man nakagibo nin magabat na kasalan asin nag-aalangan na maghagad nin tabang. Ano man an dahilan, ano an puwede mong gibuhon kun naparayo ka sa aripumpon? Papahiruon ka kan mamumuton na probisyon na pantubos na gibuhon an ano?

15. Paano ipinapahiling ni Jehova na nagmamakulog siya sa mga naparayong karnero? (Ezekiel 34:​11, 12, 16)

¹⁵ Hurop-hurupon an namamatian ni Jehova para sa mga naparayo. Dai niya sinda isinisikwal. Imbes, hinahanap niya an mga nawawarang karnero. Pinapakakan niya sinda asin tinatabangan na bumalik sa saiya. (Basahon an Ezekiel 34:​11, 12, 16.) Posible daw na iyan man an ginigibo ni Jehova para sa saimo? Iyo! Dahil binabasa mo an artikulong ini, indikasyon iyan na gusto kan puso mo na gibuhon an matanos. Kun paanong nahiling kaidto ni Jehova an kamugtakan kan saimong puso dangan dinara ka pasiring sa katotoohan, posible daw na ibinabalik ka na niya ngunyan sa saiyang pamilya?

16. Ano an makakatabang sa nawawarang mga karnero na bumalik ki Jehova? (Hilingon man an ritrato.)

¹⁶ Mababasa niyato sa brosyur na Bumalik Ka ki Jehova an mga tataramon na ini: “Makakasiguro ka na aalalayan ka ni Jehova sa pagbalik mo sa saiya. Tatabangan ka niya na makayanan an mga kahaditan, mahali an kulog nin buot, asin magkaigwa nin katuninungan nin isip asin puso huli sa pagkaigwa nin malinig na konsiyensiya. Mapapahiro ka kaiyan na maglingkod giraray ki Jehova kaiba kan mga kapagtubod.” Tandaan man na gustong-gusto kan mga elder na tabangan ka. Magigin sindang “siring sa sarong lugar na pahiplian sa duros, sarong lugar na taguan sa makusugon na uran.” (Isa. 32:2) Bilang apresasyon sa pantubos, haputon an sadiri: ‘Ano an mga puwede kong gibuhon ngunyan tanganing “husayon . . . an mga bagay-bagay” sa pag-ultanan ko asin ni Jehova?’ (Isa. 1:18; 1 Ped. 2:25) Halimbawa, puwede ka daw mag-atender sa pagtiripon sa Kingdom Hall? Puwede ka daw magdulok sa saro sa mga elder para maghagad nin espirituwal na tabang, na tibaad kaiba diyan an regular na pagpa-Bible study sa sarong peryodo nin panahon? Makakasigurado kang bebendisyunan ni Jehova an saimong mga paghihinguwa na ipahiling an pasasalamat mo sa pantubos.

ANO AN GIGIBUHON MO?

17-18. Paano ta magagamit sa madunong na paagi an satong panahon bago an Memoryal sa taon na ini?

¹⁷ Sinabi ni Jesus na itinao an pantubos “tanganing an lambang nagtutubod sa saiya dai malaglag kundi magkaigwa nin buhay na daing katapusan.” (Juan 3:16) An pantubos an ginagamit ni Jehova tanganing isalbar kita sa mga epekto kan kasalan asin kagadanan. Kaya dai iyan dapat na pagbaliwalaon kan siisay man sa sato. (Roma 3:​23, 24; 2 Cor. 6:1) An mga aldaw bago an Memoryal nagtatao sa sato nin oportunidad na hurop-hurupon an pagkamuot na ipinahiling ni Jehova asin ni Jesus, asin dapat kitang mapahiro kan pagkamuot na ini na ipahiling an pasasalamat niyato sa pantubos.

¹⁸ Papahiruon ka kan pantubos na gibuhon an ano? An simbag mo diyan tibaad lain man sa simbag kan iba. Pero makakasigurado ka na bebendisyunan ni Jehova an saimong mga paghihinguwa mantang nakikisumaro ka sa minilyon na iba pang mga parasamba na “nabubuhay . . . bako nang para sa saindang sadiri, kundi para sa saiya na nagadan alang-alang sa sainda.”​—2 Cor. 5:15.