Ulwimbo lwa kwa Davidi, ulwa kulenga ukwibukisha.
38 Mwe Yehova, mwinungika ilyo mufulilwe,+
Nelyo ukunungika ilyo mukalipe.+
2 Pantu imifwi yenu naingila mu kati ka mubili wandi,+
Kabili ukuboko kwenu kwantitikisha.+
3 Takuli apashele apatuntulu mu mubili wandi pa mulandu wa bupingushi bwenu.+
Tamuli umutende mu mafupa yandi pa mulandu wa lubembu lwandi.+
4 Pantu imembu shandi shapita pa muulu wa mutwe wandi;+
Shamfinina nge cisendo cafina.+
5 Ifilonda fyandi fyanunka pipi, fyabola,
Pa mulandu wa kutumpa kwandi.+
6 Nafulungana, nakontama icibi;+
Akasuba konse naendauka fye uwa bulanda.+
7 Pantu umusana wandi waisulamo ukupya,
Kabili tamuli umuweme mu mubili wandi.+
8 Naleka ukumfwa ubukali kabili nashonaulwa icibi;
Nashikitika pa mulandu wa kuteta kwa mutima wandi.+
9 Mwe Yehova, ukufwaya kwandi konse mwalikwishiba,
Kabili ukuteta kwandi takwafiswa kuli imwe.+
10 Umutima wandi wakulunkunta nga nshi, amaka nayafuma muli ine,
Kabili ulubuuto lwa menso yandi na lo taluli na ine.+
11 Kumfwa abantemwa na banandi, beminina akatalamukila ukutaluka ku bulwele bwandi,+
Kabili abakaya bandi beminina ukutali.+
12 Lelo abafwaya umweo wandi bateya ifiteyo,+
Na bampangila balanda pa fya kundetela amacushi,+
Kabili ifya bucenjeshi e fyo batepeleshanya akasuba konse.+
13 Lelo ine, nshakomfwe nga filya nkomamatwi ashumfwa;+
Kabili nshakaasamune akanwa kandi nga filya cibulu afilwa ukusosa.+
14 Kabili nali ngo muntu uushumfwa,
Na mu kanwa kandi tamwali ifya kwasuka.
15 Pantu nalolelele imwe mwe Yehova;+
Na imwe mwalyaswike, mwe Yehova Lesa wandi.+
16 Pantu natile: “Ninshi bakasekelela pali ine;+
Ilyo inkasa shandi shikatelententa,+ bakaituumika pali ine.”+
17 Pantu nali-iteyenye ukusunta,+
No kukalipwa kwandi kwali kuli ine pe.+
18 Pantu nasokolwele ulubembu lwandi;+
Ulubembu lwandi lwalinsakamike.+
19 Kabili abalwani bandi abali aba mweo balikosele,+
Na bampata apabula umulandu balifulile.+
20 Kabili balebwesesha icibi pa cisuma kuli ine;+
Balendwisha lyonse pa mulandu wa kukonkelela icisuma.+
21 Mwinsha mwe Yehova.
Mwe Lesa wandi, mwitaluka kuli ine.+
22 Angufyanyeni ukungafwa,+
Mwe Yehova ipusukilo lyandi.+