Abena Roma
10 Bamunyinane, ukufwaya kwa mutima wandi no kupapaata uko mpapaatilako abena Israele kuli Lesa, cine cine, kwa kuti bakapusuke.+ 2 Pantu nababela inte nati ukupimpa+ kwa kubombela Lesa kwena balikwata; lelo te kupimpa ukwalingana no kwishiba kwine kwine;+ 3 pantu, pa kukanaishiba ubulungami bwa kwa Lesa+ lelo ukufwaya ukukosha ubulungami bwabo abene,+ tabanakiile ku bulungami bwa kwa Lesa.+ 4 Pantu Kristu e mpela ya Mafunde,+ pa kuti onse uwatetekela alungamikwe.+
5 Pantu Mose alembele ukuti umuntu uwasangwa umulungami pa kukonka Amafunde akaba no mweo.+ 6 Lelo calembwa pa bulungami ubufuma mu kutetekela ati: “Witila mu mutima+ obe, ‘Nani akanina ukuya mu muulu?’+ pa kuti ekishe Kristu;+ 7 nelyo ati, ‘Nani akengila mu cilindi icabula impela?’+ pa kuti afumye Kristu ku bafwa.”+ 8 Lelo bushe Amalembo yatila shani? “Icebo ici cili mupepi na imwe, cili mu kanwa kenu na mu mitima yenu”;+ ici, e “cebo”+ ca kutetekela, ico tulebila.+ 9 Pantu ukapusuka+ nga waisosela pa cintubwingi ici ‘cebo ku kanwa+ kobe,’ auti Yesu e Shikulu,+ kabili watetekela mu mutima obe ukuti Lesa amwimishe ku bafwa.+ 10 Pantu ku mutima+ e ko umuntu atetekela no kulungamikwa, lelo ku kanwa e ko aisosela+ umwine no kupusuka.
11 Pantu Ilembo lyatila: “Onse uumutetekela+ takalengwe insoni.”+ 12 Pantu Lesa taba na kapaatulula ka kuti uyu muYuda, uyu muGriki,+ pantu kwaba fye Shikulu umo kuli bonse, uwacindama+ kuli bonse abalilila kuli ena. 13 Pantu “onse uwalilila kwi shina lya kwa Yehova akapusuka.”+ 14 Lelo, bakalilila shani ku o bashatetekela?+ Nga bakatetekela shani uo bashaumfwa? Nga bakomfwa shani apabula uwa kubila?+ 15 Nga bakabila shani nga tabatuminwe?+ Filya calembwa ati: “Ifyo yayemba amakasa ya babila imbila nsuma iya fisuma!”+
16 Lelo, tabanakiile bonse ku mbila nsuma.+ Pantu Esaya atile: “Mwe Yehova, nani atetekele ico baumfwile kuli ifwe?”+ 17 Kanshi umuntu atetekela ilyo aumfwa+ amashiwi. Na ya mashiwi yomfwika ilyo umuntu alanda pali Kristu.+ 18 Awe ndeipusha nati, Bushe ukumfwa kwena tabaumfwile? Kwena balyumfwile, pantu calembwa ati, “ishiwi lyabo lyafikile mwi sonde lyonse,+ na mashiwi yabo yafikile ku bantu bonse ku mpela sha pano isonde.”+ 19 Awe ndeipusha nati, Bushe kwena Israele alifililwe ukwishiba?+ Intanshi Mose atile: “Nkalenga imwe ukuba no bufuba ku cishaba luko; nkamukalifya nga nshi ku luko lwa bantu abawelewele.”+ 20 Lelo Esaya ashipa nga nshi no kutila: “Abashalemfwaya balinsangile;+ naishilemoneka ku bashalenjipusha.”+ 21 Lelo pali Israele atila: “Akasuba konse natambulwila amaboko yandi ku bantu abashumfwa+ kabili abapilika.”+