2 Timote

4 Ndekukonkomesha pa menso ya kwa Lesa na ya kwa Kristu Yesu, uukapingula+ aba mweo na bafwa,+ ukupitila mu kumoneka+ kwakwe na mu bufumu bwakwe,+ nati, 2 bila icebo,+ cincila mu nshita iiweme,+ na mu nshita iishiweme,+ ulelungika,+ ulekalipila, ulekoselesha, mu kushishimisha+ konse no kusambilisha bwino. 3 Pantu ikesa inshita ilyo bakaleka ukukonka isambilisho+ ilituntulu, lelo bakailonganikila bakasambilisha aba kubeba ifyo abene balefwaya ukumfwa,+ ukulingana ne fya lunkumbwa fyabo abene; 4 kabili bakaleka ukukutika ku cine, lelo bakalakutika ku malyashi ya bufi.+ 5 Lelo iwe ube uwatekanya+ mu fintu fyonse, cula ku bubi,+ bomba umulimo wa kwa kabila wa mbila nsuma,*+ bombesha umulimo obe onse.+

6 Pantu ine nomba balenjitulula kwati mutuulo uwa mwangashi,+ kabili inshita yandi iya kulubuka+ naipalama. 7 Nindwa ubulwi ubusuma,+ nimbutuka ulubilo ukufika na ku mpela,+ ninsunga icitetekelo.+ 8 Ukufuma nomba ukuya ku ntanshi balinsungila icilambu ca bulungami,+ ico Shikulu, kapingula uwalungama,+ akampeela ku kuba icilambu+ muli bulya bushiku,+ awe te ine neka akapeela, lelo akapeela na bonse abapembela ukuti akamoneke.

9 Esha na maka ukwisa bwangu kuno.+ 10 Pantu Dema+ alinsha pa mulandu wa kutemwa ifya muli cino calo,+ kabili aliya ku Tesalonika; Kreske aya ku Galatia,+ Tito aya ku Dalmatia. 11 Luka eka e uli na ine. Ukese na Marko, pantu kuti alengafwako.+ 12 Lelo nalituma Tukiki+ ku Efese. 13 Pa kwisa ukalete ica kufwala ico nashile mu Troa+ kuli Karpi, na mabuuku ayapombwa, maka maka impapa sha kulembapo.

14 Alekisanda+ kafula wa mukuba alincitile ifyabipa ifingi—Yehova akamupeela ukulingana ne milimo yakwe+— 15 na iwe ukacenjele kuli uyu muntu, pantu alikoselepo nga nshi ukukaanya ifyo twalesambilisha.

16 Ilyo nalelubulula umuku wa kubalilapo tapali uwali kuli ine, lelo bonse balinshile+—bekapeelelwapo umulandu pali ici+— 17 lelo Shikulu aiminine kuli ine+ no kumpeela amaka,+ ukuti mbile nga nshi imbila nsuma* na bena fyalo bonse bomfwe;+ kabili balimpokolwele ku kanwa ka nkalamo.+ 18 Shikulu akampokolola ku mulimo+ onse uubi kabili akampususha, nkaye na mu bufumu+ bwakwe ubwa mu muulu. Kuli ena kube umucinshi pe na pe. Ameni.

19 Umposesheko Priska*+ na Akula na ba mu ng’anda ya kwa Onesifore.+

20 Erasti+ ashele mu Korinti,+ lelo nashile Trofimu+ nalwala mu Milete.+ 21 Weshe na maka yobe yonse ukwisa ilyo inshita ya mpepo tailaisa.

Yubuli akuposha, na Pudense na Lini na Klaudia na ba bwananyina bonse.

22 Shikulu abe na iwe pa mulandu wa mibele yobe.+ Icikuuku ca kwa Lesa cibe na imwe.