Ibuuku lya Bubili Ilya kwa Samwele
9 Lyena Davidi alandile ati: “Bushe pali balupwa lwa kwa Shauli paliba uwashalapo uo ningalanga ukutemwa ukushipwa pa mulandu wa kwa Yonatani?”+ 2 Nomba kwali umubomfi wa lupwa lwa kwa Shauli. Ishina lyakwe ali ni Siba.+ E ico balimwitile kuli Davidi, kabili imfumu yamwipwishe aiti: “Bushe niwe Siba?” Na o ayaswike ati: “E mukwai, nine wine ne mubomfi wenu.” 3 Imfumu yakonkenyepo aiti: “Bushe pali balupwa lwa kwa Shauli paliba uwashalapo uo ningalanga ukutemwa kwa kwa Lesa ukushipwa?” Siba ayaswike imfumu ati: “Palishala umwana wa kwa Yonatani uwalemana amakasa.”+ 4 Imfumu yamwipwishe aiti: “Ekala kwi?” Siba ayaswike imfumu ati: “Ekala mu ng’anda ya kwa Makiri+ umwana wa kwa Amiele mu Lo-debari.”
5 Ilyo line fye Imfumu Davidi yatumine bamo aba kuyamusenda ku ng’anda ya kwa Makiri umwana wa kwa Amiele mu Lo-debari. 6 Ilyo Mefiboshete umwana wa kwa Yonatani umwana wa kwa Shauli afikile kuli Davidi, ilyo line awile ubukupeme. Lyena Davidi amwitile ati: “Mefiboshete!” na o ayaswike ati: “Mukwai.” 7 E lyo Davidi amwebele ati: “Witiina, pantu nalakulanga ukutemwa ukushipwa+ pa mulandu wa kwa Yonatani wiso, kabili nalakubwesesha impanga yonse iya kwa Shauli sokulu, kabili lyonse wakulalya* na ine pe tebulo lyandi.”+
8 Alitootele e lyo alanda ati: “Nine nani ne mubomfi wenu, pa kuti mumbikeko amano, ne mbwa iyafwa?”+ 9 Nomba imfumu yaitile Siba umubomfi wa kwa Shauli, kabili yamwebele aiti: “Fyonse ifyali fya kwa Shauli ne fya balupwa lwakwe bonse napeela umwishikulu wa kwa sokulu.+ 10 Iwe na bana bobe abaume na babomfi bobe mukalemulimina kabili mukalesombola ifya kulya ifyo balupwa lwa mwishikulu wa kwa sokulu bonse bakulalya. Lelo Mefiboshete, umwishikulu wa kwa sokulu, ena nakulalya nankwe lyonse pe tebulo.”+
Nomba Siba aali na bana abaume 15 na babomfi 20.+ 11 Lyena Siba aebele imfumu ati: “Umubomfi wenu akulacita fyonse ifyo shikulu mwe mfumu mwamweba.” E ico Mefiboshete alelya na Davidi pe tebulo limo kwati na o mwana wa mfumu umwaume. 12 Nomba Mefiboshete alikwete umwana umwaume umwaice. Ishina lyakwe ali ni Mika;+ kabili bonse abaleikala mu ng’anda ya kwa Siba baishileba ababomfi ba kwa Mefiboshete. 13 Mefiboshete aleikala mu Yerusalemu, pantu lyonse alelya ne mfumu pe tebulo limo;+ kabili alilemeene amakasa.+