Ibuuku lya Bubili Ilya Ishamfumu
20 Muli shilya nshiku, Hisekia alilwele ica kuti ali fye mu kufwa.+ E ico kasesema Esaya umwana wa kwa Amose aile kuli ena, e lyo amweba ati, “Yehova atila: ‘Eba aba mu ng’anda yobe ifya kucita, pantu tawakapole, uli no kufwa.’”+ 2 Na o apilibukile ku cibumba, alapepa kuli Yehova ati: 3 “Napaapaata, mwe Yehova, ibukisheni ifyo naba ne cishinka kuli imwe no mutima wandi onse, kabili ndacita ifisuma mu menso yenu.”+ Lyena Hisekia alililile nga nshi.
4 Ilyo Esaya ashilafika ku lubansa lwa pa kati, Yehova amwebele ati:+ 5 “Bwelelamo, kebe Hisekia intungulushi ya bantu bandi auti, ‘Yehova Lesa wa kwa Davidi icikolwe cobe atila: “Ning’umfwa ipepo lyobe. Nimona ifilamba fyobe.+ Mona, nalakundapa.+ Ukaya ku ng’anda ya kwa Yehova+ pa bushiku bwalenga shitatu. 6 Nkakulundilako imyaka 15, kabili nkakupokolola, nkapokolole na uno musumba ku mfumu ya Asiria.+ Nkacingilila uno musumba pa mulandu we shina lyandi na pa mulandu wa kwa Davidi umubomfi wandi.”’”+
7 Lyena Esaya abebele ati: “Leteni keke ya makunyu ayauma.” E ico baliletele kabili baibikile pa cipute. Lyena mu kupita kwa nshita alipolele.+
8 Hisekia aipwishe Esaya ati: “Cinshi nalaishibilako+ ukuti Yehova akang’undapa kabili ico nalaishibilako no kuti nkaya ku ng’anda ya kwa Yehova pa bushiku bwalenga shitatu?” 9 Esaya amwaswike ati: “Icishibilo ca kwa Yehova ica kukulanga ukuti Yehova ali no kucita ifyo alandile ni ci: Bushe ulefwaya ukuti icinshingwa icili pa matabo ciselele ku ntanshi amatabo* 10 nelyo cibwelele ku numa amatabo 10?”+ 10 Hisekia amwaswike ati: “Calyangukapo icinshingwa ukuya ku ntanshi amatabo 10, ukucila icinshingwa ukubwelela ku numa amatabo 10.” 11 Lyena kasesema Esaya aliliile kuli Yehova. E ico alengele icinshingwa ca pa matabo ya kwa Ahasi cabwelela ku numa amatabo 10.+
12 Pali ilya nshita Berodaki-baladani imfumu ya Babiloni, umwana wa kwa Baladani atumine aba kutwalila Hisekia amakalata no bupe, pantu alyumfwile ukuti Hisekia alilwele.+ 13 Hisekia alibapokelele* kabili alibalangile ing’anda umo asungiile icuma,+ e kutila silfere, golde, amafuta ya balsamu na mafuta yambi ayasuma. Alibalangile no mo alesungila ifyanso fyakwe na fyonse ifyali mu fipao. Takwali nangu cimo ico Hisekia ashabalangile mu ng’anda* yakwe na mu bufumu bwakwe bonse.
14 Pa numa, kasesema Esaya aishile ku Mfumu Hisekia, e lyo ayipusha ati: “Finshi aba baume balandile, kabili bafumine kwi?” E ico Hisekia amwaswike ati: “Bafumine ku calo ca kutali, ku Babiloni.”+ 15 Na kabili amwipwishe ati: “Finshi bacimona mu ng’anda* yobe?” Hisekia amwaswike ati: “Bacimona fyonse ifyaba mu ng’anda* yandi. Takuli nangu cimo pa fyuma fyandi ico nshacibalanga.”
16 Nomba Esaya aebele Hisekia ati: “Umfwa ifyo Yehova alanda,+ 17 ‘Mona! Inshiku shileisa, kabili fyonse ifyaba mu ng’anda* yobe na fyonse ifyo ifikolwe fyobe fyalonganika ukufika na pali buno bushiku, bakafisenda ku Babiloni.+ Tabakashepo nangu cimo,’ e fyo Yehova alanda. 18 ‘Kabili bamo pa bakatuntuka muli iwe, bakabasenda+ kabili bakayaba bacilolo mwi sano lya mfumu ya Babiloni.’”+
19 E lyo Hisekia aebele Esaya ati: “Ifi mwanjeba ifyo Yehova alandile fili fye bwino.”+ Alandile no kuti: “Kuti cawama nga ca kuti mu calo mukaba umutende no mutelelwe* ilyo ncili no mweo.”*+
20 Amalyashi yambi aya kwa Hisekia, imilimo yonse iyo abombele ne fyo apangile icishiba+ no mufoolo uukalamba uwaleleta amenshi mu musumba,+ bushe tabafilemba mwi buuku lya malyashi ya mfumu sha mu Yuda? 21 Lyena Hisekia alifwile nge fyafwile ifikolwe fyakwe.+ Manase+ umwana wakwe e wamupyene pa bufumu.+