Yeremia

32 Yehova alandile na Yeremia mu mwaka walenga 10 ukutula apo Imfumu Sidekia iya mu Yuda yatendekeele ukuteka, e kutila mu mwaka walenga 18 ukutula apo Nebukadnesari*+ atendekeele ukuteka. 2 Pali ilya nshita ibumba lya bashilika ba mfumu ya ku Babiloni lyalishingile Yerusalemu, kabili kasesema Yeremia balimwisaliile mu Lubansa lwa Balelonda+ ulwaba mu ng’anda ya mfumu* ya mu Yuda. 3 Pantu Imfumu Sidekia iya mu Yuda yalimwisaliile,+ kabili yalemweba ati, “Cinshi ulesesemena ifi? Ulelanda auti, ‘Yehova alanda ati: “Ndepeela uno musumba mu minwe ya mfumu ya ku Babiloni, kabili ikaucimfya,+ 4 kabili Imfumu Sidekia iya mu Yuda tayakafulumuke abena Kaldi, pantu bakaipeela mu minwe ya mfumu ya ku Babiloni kabili ikalanda nayo icinso ne cinso.”’+ 5 ‘Ikatwala Sidekia ku Babiloni, kabili e ko akekala mpaka nkamubikeko amano,’ e fyo Yehova alanda. ‘Nangu mwatwalilila ukulwa na bena Kaldi tamwakabacimfye.’”+

6 Yeremia alandile ati: “Yehova nalanda na ine, anjebele ati, 7 ‘Mona, Hanamele umwana wa kwa Shalumu wiso* alaisakweba ati: “Shita impanga yandi mu Anatote,+ pantu niwe wakwata insambu sha kuishita.”’”+

8 Hanamele umwana wa batata alishile uko nali, nga filya fine Yehova alandile. Alishile mu Lubansa lwa Balelonda, kabili anjebele ati: “Shita impanga yandi mu Anatote, mu calo ca kwa Benjamini, pantu niwe ukwete insambu sha kuipyana no kuishita. Ishite pa kuti ibe impanga yobe.” Lyena nailwike ukuti e filya Yehova acinjeba.

9 E ico nalishitile impanga mu Anatote kuli Hanamele umwana wa batata. Kabili namupimiine indalama+ amashekele* 7 ne sha silfere 10. 10 Lyena nalilembele icipepala ca kuti ninshita impanga.+ Nalikambatikepo ica kukambatikilako, nalitile bakambone+ kabili nalipimine indalama pali sekelo. 11 Lyena ukulingana na mafunde ne fipope, nabuulile icipepala nashitiilepo impanga ico nakambatikepo ica kukambatikilako, nabuulile ne cipepala ico nashitiilepo impanga ico nshakambatikepo ica kukambatikilako. 12 Lyena napeele Baruki+ umwana wa kwa Neria,+ umwana wa kwa Maaseya icipepala nashitiilepo impanga ninshi Hanamele umwana wa batata, bakambone abalembele pali ici icipepala na baYuda bonse abaikele mu Lubansa lwa Balelonda+ balemonako.

13 Kabili naebele Baruki ninshi bonse baleumfwako nati: 14 “Yehova wa mabumba, Lesa wa kwa Israele alanda ati, ‘Buula ifi ifipepala nshitiilepo impanga, icipepala ico nkambatikepo ica kukambatikilako, e lyo ne co nshikambatikepo, ufibike mu cipe ce bumba pa kuti fikekale inshiku ishingi.’ 15 Pantu Yehova wa mabumba, Lesa wa kwa Israele alanda ati, ‘Amayanda, impanga na mabala ya myangashi bakafishita na kabili muli cino calo.’”+

16 Ilyo napeele Baruki umwana wa kwa Neria icipepala ca kushitilapo impanga, napepele kuli Yehova nati: 17 “Iye mwe Shikulu Mulopwe Yehova! Moneni! Nimwe mwapangile umuulu ne sonde ku maka yenu ayakalamba+ na ku kuboko kwenu ukwatambalikwa. Takuli nangu cimo icingamupesha amano, 18 mwe balanga abantu abengi nga nshi ukutemwa ukushipwa, lelo mwe bakanda abana pa filubo fya bashibo,+ mwe Lesa wa cine, umukulu, uwa maka, mwe bakwata ishina lya kuti Yehova wa mabumba. 19 Ukufwaya kwenu kusuma nga nshi, mulalanga ukuti muli ba maka mu fyo mucita,+ amenso yenu yalamona fyonse ifyo abantu bacita,+ mulalambula umuntu onse ukulingana ne mibele yakwe ne fyo acita.+ 20 Mwalicitile ifishibilo ne fipesha amano mu calo ca Egupti, ifyo abantu baishiba ukufika na lelo kabili ici calilenga mwaipangila ishina mu bena Israele na mu nko shimbi,+ nge fi fine caba na buno bushiku. 21 Kabili pa kufumya abantu benu abena Israele mu calo ca Egupti, mwabomfeshe ifishibilo, ifipesha amano, ukuboko ukwa maka, ukuboko ukwatambalikwa ne fya kutiinya.+

22 “Mu kupita kwa nshita mwabapeele cino calo ico mwalapile ukuti mukapeela ifikolwe fyabo,+ icalo umwaba umukaka no buci.+ 23 Kabili balishile no kutendeka ukwikala muli ici calo, lelo tabaleumfwa ifyo mwalebeba, kabili tabalekonka amafunde yenu. Fyonse ifyo mwabebele ukucita tabaficitile, ica kuti mwalengele ubucushi bonse ubu bwaisa pali bena.+ 24 Moneni! Abantu nabesa, nabatuulika iloba ukushinguluka umusumba+ pa kuti bausanse, kabili pa mulandu wa lupanga,+ icipowe ne cikuko,*+ abena Kaldi abalelwisha umusumba bakaucimfya; fyonse ifyo mwalandile fyalicitika nga fintu mulemona. 25 Lelo imwe mwe Shikulu Mulopwe Yehova munjebele amuti, ‘Shita impanga, wite na bakambone,’ nangu ca kuti abena Kaldi bali no kucimfya umusumba.”

26 Lyena Yehova aebele Yeremia ati: 27 “Nine Yehova, Lesa wa bantu bonse.* Bushe kwaliba icintu icingampesha amano? 28 E ico Yehova alanda ati, ‘Mona ndepeela abena Kaldi uno musumba kabili ndeupeela mu minwe ya Mfumu Nebukadnesari* iya ku Babiloni, kabili ikaucimfya.+ 29 Abena Kaldi abalelwisha uno musumba bakengila muli uno musumba no kusonteka umulilo.+ Bakaoca kabili bakoca na mayanda ayo pa mitenge ya yako abantu baletuulila Baali amalambo no kwitulwila imituulo ya mwangashi kuli balesa bambi, pa kuti bankalifye.’+

30 “‘Pantu abena Israele na baYuda balacita ifyabipa mu menso yandi, ukutula fye ilyo uluko lwatendeke;+ abena Israele balankalifya ku fyo bacita,’ e fyo Yehova alanda. 31 ‘Pantu ukutula fye ilyo uno musumba baukuulile ukufika na buno bushiku, ulenga fye naba no bukali kabili nakalipa nga nshi,+ pa kuti ngufumye pa cinso candi,+ 32 pa mulandu wa fyabipa fyonse ifyo abena Israele na baYuda bacita pa kuti bankalifye—bonse fye, imfumu shabo,+ intungulushi shabo,+ bashimapepo babo, bakasesema babo,+ abaYuda na bekala mu Yerusalemu. 33 Batwalilile fye ukumfutatila, tabalendolesha iyo;+ nangu ca kuti nalebasambilisha pa miku iingi,* takwali nangu umo uwaleumfwa pa kuti imusalapule.+ 34 Kabili babikile ifilubi fya bunani mu ng’anda iyainikwa ishina lyandi pa kuti baikoweshe.+ 35 Kabili bakuuliile ififulo fya kupepelapo Baali mu Mupokapoka wa Mwana wa kwa Hinomu,*+ pa kuti baleoca abana babo abaume na bana babo abanakashi mu mulilo pa kubatuula amalambo kuli Moleke,+ icintu ico nshabebele,+ kabili tacaishile na mu mutima wandi* ukucita ici ica bunani, pa kuti nenge Yuda abembuke.’

36 “E ico Yehova Lesa wa kwa Israele alanda pali uno musumba uo imwe mulelanda ati bakaupeela mu minwe ya mfumu ya ku Babiloni, iikaucimfisha ku lupanga, ku cipowe na ku cikuko. Alanda ati, 37 ‘Moneni, nkabalonganika bonse ukufuma mu fyalo fyonse umo nabasalanganishishe pa mulandu wa kuti nalifulilwe kabili nalikalipe nga nshi,+ nkababwesesha kuli cino cifulo kabili nkaleka bakekale umutende.+ 38 Kabili bakaba abantu bandi, na ine nkaba Lesa wabo.+ 39 Kabili nkabapeela umutima umo,+ ne nshila imo pa kuti lyonse balentiina, kabili ifintu filebawamina, fikawamine na bakatuntuka muli bena.+ 40 Kabili nkapangana nabo icipangano ca muyayaya,+ ica kuti nshakaleke ukubacitila ifisuma;+ kabili nkalenga imitima yabo ikalentiina pa kuti bekafuma kuli ine.+ 41 Nkasekelela pa mulandu wabo kabili nkabacitila ifisuma,+ nkabalimba muli cino calo+ no mutima wandi onse no mweo* wandi onse.’”

42 “Pantu Yehova alanda ati, ‘Filya fine naleta ubu ubucushi bonse ubukalamba pali aba bantu, e fyo nkabaletela ne fisuma ifyo ndebalaya.+ 43 Abantu bakashita impanga na kabili muli ici calo, nangu ca kuti imwe mulelanda amuti: “Ici calo+ cibolya umushaba abantu ne nama, kabili balicipeela mu minwe ya bena Kaldi.”’

44 “‘Abantu bakashita impanga, bakalemba ifipepala fya kushitilapo impanga kabili bakafikambatika ne fya kukambatikilako, baketa na bakambone mu calo ca kwa Benjamini+ mu ncende shashinguluka Yerusalemu, mu misumba ya mu Yuda,+ mu misumba ya citungu ca mpili, mu misumba ya mu mpanga iyabatama+ na mu misumba ya ku kapinda ka ku kulyo, pantu nkabwesha bankole babo,’+ e fyo Yehova alanda.”