Yeremia
39 Mu mwaka walenga 9 ukutula apo Sidekia imfumu ya mu Yuda atendekeele ukuteka, mu mweshi walenga 10, Nebukadnesari* Imfumu ya ku Babiloni na bashilika bakwe bonse baishile ku musumba wa Yerusalemu, kabili baliushingile.+
2 Mu mwaka walenga 11 ukutula apo Sidekia atendekeele ukuteka, mu mweshi walenga 4, pa bushiku bwalenga 9 ubwa uyu mweshi, e po batulile ifibumba fya musumba.+ 3 Kabili intungulushi shonse isha mfumu ya ku Babiloni shalingiile mu musumba, shayaikala pa Mpongolo ya pa Kati,+ ishi intungulushi ni Neregali-sharesere uo baleita ukuti Samigari,* Nebo-Sarisekimu uo baleita ukuti Rabusarisi,* Neregali-sharesere uo baleita ukuti Rabumagi* e lyo ne ntungulushi shimbi ishashala isha mfumu ya ku Babiloni.
4 Ilyo Imfumu Sidekia iya mu Yuda na bashilika bonse babamwene, balifulumwike+ mu musumba ubushiku. Bapitile mu nshila ya kwi bala lya mfumu, bapita pa mpongolo iyaba pa fibumba fibili, kabili batwalilile ukuya mu nshila yalola ku Araba.+ 5 Lelo abashilika abena Kaldi balibapepeke, kabili basangile Sidekia mu ciswebebe ca mu Yeriko.+ Balimwikete no kumutwala ku Mfumu Nebukadnesari* iya ku Babiloni ku Ribla+ mu calo ca Hamati,+ uko yailemupingula. 6 Imfumu ya ku Babiloni yaebele abakwipaya abana abaume aba kwa Sidekia mu Ribla ninshi Sidekia alemonako, kabili imfumu ya ku Babiloni yaebele abakwipaya bashimucindikwa bonse aba mu Yuda.+ 7 Lyena yatonkwele Sidekia amenso, yamukaka na maceni ya mukuba pa kuti imutwale ku Babiloni.+
8 Lyena abena Kaldi baocele ing’anda ya mfumu* na mayanda yonse aya bantu,+ kabili babongolwele icibumba ca musumba wa Yerusalemu.+ 9 Nebusaradani+ umukalamba wa balelonda, asendele abantu bonse abashele mu musumba na bailundile kuli ena, e lyo na bantu bonse abashelepo, abatwele ku Babiloni uko baileba bankole.
10 Lelo Nebusaradani umukalamba wa balelonda, alishiile abapiina nga nshi bamo mu calo ca Yuda abashakwete nangu cimo. Pali bulya bushiku alibapeele na mabala ya myangashi e lyo na mabala ya kuti balebombamo.*+
11 Nomba ifi e fyo Imfumu Nebukadnesari* iya ku Babiloni yaebele Nebusaradani umukalamba wa balelonda, yamwebele pali Yeremia ati: 12 “Kamusende ulemusunga; taufwile ukumucita ifyabipa kabili ulemupeela conse ico akulomba.”+
13 E ico Nebusaradani umukalamba wa balelonda, Nebushashibani uo baleita ukuti Rabusarisi,* Neregali-saresere uo baleita ukuti Rabumagi* ne ntungulushi shimbi ishashala isha mfumu ya ku Babiloni shatumine abaume 14 abailefumya Yeremia mu Lubansa lwa Balelonda+ no kumutwala kuli Gedalia+ umwana wa kwa Ahikamu,+ umwana wa kwa Shafani,+ uwamutwele ku ng’anda yakwe. E ico Yeremia aikele na bantu.
15 Ilyo Yeremia bamwisalile mu Lubansa lwa Balelonda,+ Yehova amwebele ati: 16 “Kabiye kebe Ebede-meleke+ umwina Etiopia auti, ‘Yehova wa mabumba, Lesa wa kwa Israele alanda ati: “Mona, ndefikilisha ifyo nalandile pali uno musumba ukuti nkaleta ifyabipa pali wena, te fisuma iyo. Kabili muli bulya bushiku ukamonako ilyo ifi fikacitika.”’
17 “‘Lelo muli bulya bushiku nkakupususha,’ e fyo Yehova alanda, ‘kabili tawakapeelwe mu minwe ya bantu abo utiina.’
18 “‘Pantu nangu cibe shani nkalenga ukapusuke, kabili tabakakwipaye ku lupanga. Ubumi* bobe bukaba nge cipe ico bapokolola uo bacimfishe,*+ pantu walincetekela,’+ e fyo Yehova alanda.”