Inyimbo sha Bulanda
א [Aleph]*
1 Iye ifyo waikala weka we musumba umwafulile abantu!+
Ifyo waba nga mukamfwilwa, we musumba umwali abantu abengi ukucila inko shimbi!+
Ifyo uwali namfumu mu fitungu nomba alabomba umulimo wa kupatikishiwa!+
ב [Beth]
2 Alalila sana ubushiku+ kabili pa matobo yakwe paisula ifilamba.
Bonse abo atemwana nabo tabalemusansamusha.+
Abanankwe bonse bamwalukila.+ Basanguka abalwani bakwe.
ג [Gimel]
3 Yuda nayaba nkole ku calo cimbi,+ alecula nga nshi kabili ali umusha.+
Afwile ukwikala mu nko;+ tasangile icifulo ca kutuushishamo.
Bonse abalemucusha bamusanga ninshi alecula.
ד [Daleth]
4 Inshila shaya ku Sione shileloosha, pantu takuli nangu umo uuleisa ku mutebeto.+
Impongolo shakwe shonse nabashilekelesha;+ bashimapepo bakwe baleteta.
Banacisungu* bakwe baleloosha kabili alekalipwa nga nshi.
ה [He]
5 Abalwani bakwe nomba e bashikulu bakwe;* tabasakamikwe.+
Pantu Yehova nalenga aba no bulanda pa mulandu wa membu ishingi isho aacita.+
Umulwani wakwe nasenda abana bakwe pa kuti bayeba bankole.+
ו [Waw]
6 Ubukata bonse ubwa mwana mwanakashi Sione nabupwa.+
Intungulushi shakwe shili nge nsebula ishishisangile umulemfwe,
Kabili shile-enda pa ntanshi ya baleshipepeka ninshi tashikwete amaka.
ז [Zayin]
7 Mu nshiku Yerusalemu alecula kabili ilyo ashakwete umwa kwikala,
Alibukishe ifisuma fyonse ifyo akwete mu nshiku sha kale.+
Ilyo abantu bakwe bawiliile mu minwe ya balwani kabili ilyo ashakwete wa kumwafwa,+
Abalwani bakwe balisekelele ilyo bamwene awa.+
ח [Heth]
8 Yerusalemu alicita ulubembu ulukalamba.+
E co abela ica bunani.
Bonse abalemucindika nabamusuula, pantu nabamona insoni shakwe.+
Aleteta+ kabili nafutata ninshi naumfwa insoni.
ט [Teth]
9 Ukukowela kwakwe kuli mu fya kufwala fyakwe.
Tatontonkenyepo pa fyali no kumucitikila ku ntanshi.+
Nawa mu cipesha amano; takwete no wa kumusansamusha.
Mwe Yehova moneni ifyo ndecula, pantu umulwani wandi naituumika.+
י [Yod]
10 Umulwani natambalika ukuboko kwakwe pa fyuma fyakwe fyonse.+
Pantu namona inko shaingila mu cifulo cakwe ica mushilo,+
Inko isho mwaebele ukuti tashifwile ukuba pamo na bantu benu.
כ [Kaph]
11 Abantu bakwe bonse baleteta; balefwaya ifya kulya.+
Ifintu fyabo ifisuma nga nshi nabakaabushamo ifya kulya pa kuti batwalilile ukuba no mweo.*
Moneni mwe Yehova, ndi ngo mwanakashi uo basuula.*
ל [Lamed]
12 Bushe imwe bonse mwe bapita mu nshila, mulecimona ukuti ca fye?
Lolesheni kabili moneni.
Bushe kwalitala akubapo ubukali,
Ubwaba ngo bukali ubo Yehova alengele naumfwa pa bushiku ubukali bwakwe bwalebilima ngo mulilo?+
מ [Mem]
13 Natuma umulilo mu mafupa yandi ukufuma ukwasansama,+ kabili nacimfya ifupa limo na limo.
Nafungulula isumbu pa kuti amakasa yandi yekatwemo; nampatikisha ukubwelela ku numa.
Nalenga naba ngo mwanakashi uo balekelesha.
Nindwala akasuba konse.
נ [Nun]
14 Ifilubo fyandi fili nge koli, ukuboko kwakwe nakufikatanya.
Nabafibika pa mukoshi wandi, kabili amaka yandi nayapwa.
Yehova nampeela mu minwe ya bo nshingalwisha.+
ס [Samekh]
15 Yehova napoosa abaume bonse aba maka. Nabafumya apo ndi.+
Nanjitila ibumba lya bantu pa kuti bashonaule abalumendo bandi.+
Yehova nanyantaula nacisungu wa kwa Yuda mu ca kukaminamo imyangashi.+
ע [Ayin]
16 Ndeloosha pa mulandu ne fi fintu;+ amenso yandi yalelukusha ifilamba.
Pantu uwa kusansamusha no kutalalika umutima* wandi ali ukutali.
Abana bandi abaume nababalekelesha, pantu umulwani nacimfya.
פ [Pe]
17 Sione natambalika amaboko yakwe;+ takuli nangu umo uwa kumusansamusha.
Yehova naeba bonse abashinguluka Yakobo ukuti balecita nga balwani bakwe.+
Yerusalemu naba ica bunani kuli bena.+
צ [Tsade]
18 Yehova alilungama,+ pantu nshakonkele amafunde yakwe.*+
Umfweni imwe mwe bantu bonse kabili moneni ifyo ndekalipwa.
Banacisungu* bandi na balumendo bandi balibasenda mu kuyaba bankole.+
ק [Qoph]
19 Nalilila ku bo natemwana nabo, lelo nabampondokela.+
Bashimapepo bandi na bakalamba bandi bafwilile mu musumba,
Ilyo balefwayafwaya ifya kulya pa kuti batwalilile ukuba no mweo.*+
ר [Resh]
20 Moneni mwe Yehova, ndecula nga nshi.
Ifilundwa fya mu mubili wandi filekalipa.*
Umutima wandi uli no bulanda nga nshi, pa mulandu wa kuti nine cintomfwa.+
Kunse, ulupanga lwalenga nafwilwa;+ mu kati ka ng’anda muli nge mfwa.
ש [Shin]
21 Abantu nabomfwa ifyo ndeteta; takuli nangu umo uwa kunsansamusha.
Abalwani bandi bonse nabomfwa ukuti ndecula.
Balesekelela pa mulandu wa kuti namuleta ubu ubucushi pali ine.+
Lelo mukaleta ubushiku ubo mwabilishe,+ ilyo bakaba nga ine.+
ת [Taw]
22 Ifyabipa fyonse ifyo bacita nafise pa ntanshi yenu, kabili mubakande icine cine,+
Nga filya fine mwankanda pa mulandu wa filubo fyonse ifyo nacita.
Pantu ndateta nga nshi kabili umutima wandi walilwala.