Esekiele
19 “Ufwile ukwimbila intungulushi sha mu Israele ulwimbo lwa bulanda,* 2 kabili wimbe auti,
‘Bushe noko ali nga cinshi? Aali nga nankalamo pa nkalamo ishilume.
Alelaala pamo ne nkalamo ishana,* kabili alekusha abana bakwe.
3 “‘Alikushishepo akana kamo, kabili kaishileba inkalamo iyana iya maka.+
Yalisambilile ifya kusantaula ico yaikata,
Yalelya na bantu.
4 Abantu ba mu nko balyumfwile pali yena kabili baikatiile mu cilindi cabo,
Kabili baitwele ku Egupti ukubomfya ifya kukobelako.+
5 “‘Alilolelele asuka amona ukuti umwana tali no kubwela.
E ico abuulile akana kambi no kukatuma nge nkalamo iyana iya maka.
6 Nayo yale-endauka pamo ne nkalamo shimbi kabili yaishileba inkalamo iyana iya maka.
Yalisambilile ifya kusantaula ico yaikata kabili yalelya abantu.+
7 Yalelunga mu malinga yabo ayakosa kabili yalyonawile imisumba yabo,
Ica kuti mu calo cabo icashele icibolya mwaleumfwika fye ukubuluma kwa iko.+
8 Abantu aba mu nko abafumine mu fitungu ifyali mupepi balishile mu kuikata, kabili bali-ipooseele amasumbu yabo pa kuti baikate,
Kabili baikatiile mu cilindi cabo.
9 Babomfeshe ifya kukobelako no kuibika muli kasalanga kabili baitwele ku mfumu ya ku Babiloni.
Ilyo bafikile kulya, bali-isaliile pa kuti ukubuluma kwa iko kwitwalilila ukumfwika pa mpili sha mu Israele.
10 “‘Noko ali nge cimuti ca mwangashi+ mu mulopa obe,* uo balimba mupepi na menshi.
Waletwala ifisabo kabili walikwete imisambo iingi pa mulandu wa menshi ayengi.
11 Waishilekwata imisambo* iyakosa ica kuti yalilingile ukuba inkonto sha bakateka.
Walikulile ica kuti walicilile ifimuti fimbi,
Kabili walemoneka sana pa mulandu wa kuti wali uutali, na pa mulandu wa kuti imisambo ya uko yalikwete amabula ayengi.
12 Lelo mu bukali balimunukwile,+ bamupoosa na panshi,
Kabili umwela wa ku kabanga walyumike ifisabo fyakwe,
Imisambo yakwe iyakosa bali-iputawile, yalyumine+ kabili yalipile mu mulilo.+
14 Umulilo wafumine ku misambo* yakwe waoca utwapuukile kuli ena ne fisabo fyakwe,
Kabili takwali umusambo nangu umo uwakosa uushapile, takwali inkoto ya bakateka.+
“‘Ulu lwimbo lwa bulanda, kabili lukaba lwimbo lwa bulanda.’”