Esekiele
29 Mu mwaka walenga 10, pa bushiku bwalenga 12, ubwa mweshi uwalenga 10, Yehova anjebele ati: 2 “We mwana wa muntu, losha icinso cobe kuli Farao imfumu ya ku Egupti, kabili useseme ifyabipa ifikamucitikila ne fikacitikila icalo ca Egupti conse.+ 3 Ulande amashiwi ya kuti: ‘Shikulu Mulopwe Yehova atila:
“Mona, nkakulwisha we Farao, imfumu ya ku Egupti,+
We cishimweshimwe cikalamba ica muli bemba, we ulambalala mu tumilonga twa menshi utwa mumana obe uwa Naelo,*+
We walanda auti, ‘Umumana wa Naelo wandi.
Ico naupangiile ni pa kuti ube uwandi.’+
4 Lelo nkabika ifya kulobelako mu mibango yobe, nkalenga ne sabi ilya mu mumana obe uwa Naelo likekate ku mamba yobe.
Nkakufumya mu mumana wa Naelo pamo ne sabi lyonse ilya mu mumana wa Naelo ilikekata ku mamba yobe.
5 Nkakusha mu ciswebebe, iwe pamo ne sabi lyonse ilya mu mumana obe uwa Naelo.
Ukaponena mu mpanga umushaba nangu cimo kabili takuli uukakusenda no kukushiika.+
Nkakupeela ku nama sha mu mpanga na ku fyuni fya mulwelele pa kuti fikakulye.+
6 Lyena abekala mu Egupti bonse bakeshiba ukuti nine Yehova,
Pantu ilyo aba mu ng’anda ya kwa Israele balefwaya ukuti babatungilile, abena Egupti bali fye nga itete.+
7 Ilyo bakwikete pa kuboko, walikontweke,
Kabili walengele pa kubeya kwabo paba icilonda.
8 “‘E ico Shikulu Mulopwe Yehova atila: “Mona, nkaleta ulupanga pali iwe,+ kabili nkepaya abantunse ababa muli iwe ne nama ishaba muli iwe. 9 Icalo ca Egupti cikashala icibolya kabili tamwakabe akantu nangu kamo;+ lyena bakeshiba ukuti nine Yehova, pantu utila, ‘Umumana wa Naelo wandi; nine naupangile.’+ 10 E ico ndekulwisha pamo no mumana obe uwa Naelo, kabili nkalenga icalo ca Egupti cikashale icibolya, kabili icauma, umushaba akantu nangu kamo+ ukufuma ku Migdole+ ukufika na ku Syene,+ ukuyafika fye na ku mupaka wa Etiopia. 11 Tamwakapite umuntunse nangu inama pa makasa,+ kabili tacakekalwemo pa myaka 40. 12 Pa myaka 40 nkalenga icalo ca Egupti cikabe sana icibolya ukucila ifyalo fyonse ifyaba ifibolya, ne misumba ya ciko ikaba sana ifibolya ukucila imisumba yonse iyaba ifibolya;+ kabili nkasalanganishisha abena Egupti mu nko no kubapashila mu fyalo.”+
13 “‘Pantu Shikulu Mulopwe Yehova atila: “Pa numa ya myaka 40 nkalonganya abena Egupti ukubafumya mu nko umo nabasalanganishishe;+ 14 nkabwesesha bankole abena Egupti ku calo ca Patrose,+ ku calo uko batuntwike, kabili kulya kwine e ko bakayaba ubufumu ubushacindama. 15 Egupti ikacepa pa mabufumu yambi kabili tayakatwalilile ukukwata amaka pa nko shimbi.+ Nkalenga abena Egupti bakacepe ica kuti tabakabe na maka ya kucimfya inko shimbi.+ 16 Aba mu ng’anda ya kwa Israele tabakabale abacetekela muli ena na kabili,+ lelo akalabebukisha fye ifyo balufyenye ilyo baile ku bena Egupti pa kuti babafwe. Kabili bakeshiba ukuti nine Shikulu Mulopwe Yehova.”’”
17 Nomba mu mwaka walenga 27, pa bushiku bwa kubalilapo ubwa mweshi wa kubalilapo, Yehova anjebele ati: 18 “We mwana wa muntu, Imfumu Nebukadnesari*+ iya ku Babiloni, yalengele abashilika ba iko babomba umulimo uukalamba uwa kulwisha Turi.+ Imitwe yabo yonse yasebeke amapala, na mabeya yabo yonse yalisukwilwe. Lelo yena na bashilika ba iko tabapokele amalipilo pa fyo babombeshe pa kuti balwishe Turi.
19 “E ico Shikulu Mulopwe Yehova atila, ‘Mona, nkapeela Imfumu Nebukadnesari* iya ku Babiloni+ icalo ca Egupti, nayo ikasenda ifyuma fya ciko kabili ikapoka ifyuma ifingi ifyabamo; kabili fikaba malipilo ya bashilika ba iko.’
20 “‘Pa kuilambula pa mulimo yabombele pali Turi, nkaipeela icalo ca Egupti, pa mulandu wa kuti nine yabombeele,’+ e fyo Shikulu Mulopwe Yehova alanda.
21 “Muli ubo bushiku nkalenga ulusengo lukamene mu ng’anda ya kwa Israele,*+ kabili nkakupeela insambu sha kulanda nabo; kabili bakeshiba ukuti nine Yehova.”