Impendwa

27 Lyena abana banakashi ba kwa Selofehadi,+ umwana wa kwa Hefere, umwana wa kwa Gileadi, umwana wa kwa Makiri, umwana wa kwa Manase, uwa mu ndupwa sha kwa Manase mwana Yosefe, baile kuli Mose. Abana bakwe abanakashi bali ni: Maala, Noa, Hogla, Milika na Tesa. 2 Baileiminina pa ntanshi ya kwa Mose, Eleasari shimapepo, intungulushi+ no lukuta lonse pa mwinshi we tenti lya kukumaninamo na Lesa kabili balandile abati: 3 “Shifwe afwiliile mu matololo, kabili taali pa bali ku lubali lwa kwa Kora+ ulwaimiine Yehova, lelo afwiliile pa lubembu lwakwe kabili takwetepo umwana umwaume. 4 Cinshi ico ishina lya kwa shifwe lyalalobela mu lupwa lwakwe pa mulandu fye wa kuti takwetepo umwana umwaume? Mukwai na ifwe mukatupeele impanga ilyo mukalapeela bamunyina ba kwa shifwe.” 5 E ico Mose atuulile Yehova umulandu wabo.+

6 Lyena Yehova aebele Mose ati: 7 “Ifyo abana banakashi ba kwa Selofehadi balandile fya cine. Ufwile ukubapeela impanga nga fintu ukapeela bamunyina ba kwa shibo kabili ukabapeele impanga iyali no kuba iya kwa shibo.+ 8 Kabili webe abena Israele auti, ‘Umuntu nga afwa ukwabula ukukwatapo umwana umwaume, abana bakwe abanakashi e balingile ukupyana impanga yakwe. 9 Nomba nga takwata no mwana umwanakashi, ninshi mukapeele bamunyina impanga yakwe. 10 Kabili nga takwata bamunyina, mukapeele bamunyina ba kwa wishi impanga yakwe. 11 Kabili wishi nga takwata bamunyina, ninshi mukapeele lupwa wakwe umbi uwa mu mukowa wakwe, e ukaba umwine wa iyo mpanga. Ifi napingula fyalaba e funde ilyo abena Israele balingile ukulakonka, nga fintu Yehova ebele Mose.’”

12 Lyena Yehova aebele Mose ati: “Nina ulu ulupili lwa Abarimu,+ pa kuti umone icalo ico nkapeela abena Israele.+ 13 Nga wacimona, lyena walafwa nge fyafwa abantu bobe,+ nga filya fine Aarone munonko afwa,+ 14 pantu ilyo ulukuta lwaleilishanya pali ine mu matololo ya Sini, tamwakonkele ifyo namwebele pa kuti muncindike pa menso ya luko pali yalya menshi.+ Aya e menshi ya pa Meriba+ pa Kadeshe+ mu matololo ya Sini.”+

15 Lyena Mose aebele Yehova ati: 16 “Lekeni Yehova Lesa umwine wa mupashi uwaba mu bantu bonse,* asale umuntu uwa kutungulula ulukuta 17 uukalabatungulula muli fyonse, pa kuti ulukuta lwa kwa Yehova lwiba nge mpaanga ishabula kacema.” 18 E ico Yehova aebele Mose ati: “Senda Yoshua mwana Nuni, umwaume wafikapo, kabili ubike iminwe yobe pali ena.+ 19 Lyena umwebe eminine pa ntanshi ya kwa Eleasari shimapepo na pa ntanshi ya lukuta lonse, kabili pa menso yabo umusonte abe intungulushi.+ 20 Ufwile ukumupeelapo amaka* yobe yamo,+ pa kuti ulukuta lonse ulwa bena Israele lulemumfwila.+ 21 Akalaiminina pa ntanshi ya kwa Eleasari shimapepo uukalabomfya Urimu+ pa kumwipushishako kuli Yehova. Nga abeba ati fumeni bakalafuma, kabili nga abeba ati ingileni bakalaingila, ena na bena Israele bonse kumo no lukuta lonse.”

22 E ico Mose alicitile filya fine fye Yehova amwebele. Asendele Yoshua no kumutwala pa ntanshi ya kwa Eleasari shimapepo na pa ntanshi ya lukuta lonse, 23 kabili abikile iminwe yakwe pali ena e lyo amusonta ukuba intungulushi,+ nga filya fine fye Yehova alandiile muli Mose.+