Impendwa

32 Nomba abatuntwike muli Rubene+ na batuntwike muli Gadi+ bali ne fitekwa ifingi nga nshi, kabili bamwene ukuti icitungu ca Yasere+ ne ca Gileadi, fyali ifisuma ukutekelamo ifitekwa. 2 E ico baile-eba Mose, Eleasari shimapepo ne ntungulushi sha lukuta abati: 3 “Atarote, Dibone, Yasere, Nimra, Heshebone,+ Eleale, Sebamu, Nebo+ na Beone,+ 4 icalo ico Yehova acimfishe pa menso ya lukuta lwa kwa Israele,+ cisuma ukutekelamo ifitekwa, kabili ababomfi benu balikwata ifitekwa ifingi.”+ 5 Bakonkenyepo ukulanda abati: “Nga mwamona ukuti cili fye bwino, tupeeleni ici calo pa kuti cibe cesu. Mwileka twabuke Yordani.”

6 Lyena Mose aebele abatuntwike muli Gadi na batuntwike muli Rubene ati: “Bushe bamunyinenwe bakaye ku nkondo e lyo imwe mukashale namwikala kuno? 7 Bushe mulefwaya ukutompola abena Israele pa kuti beyabukila ku calo ico Yehova akabapeela? 8 E fyo na bashinwe bacitile ilyo twali ku Kadeshe-barnea lintu nabatumine ukuyalengula ico calo.+ 9 Baile ku Mupokapoka wa Eshekole+ kabili ilyo balengwile icalo, batompwele abena Israele, pa kuti beingila mu calo ico Yehova aali no kubapeela.+ 10 Yehova alikalipe nga nshi ubo bushiku ica kuti alapile ati:+ 11 ‘Abaume abafumine mu Egupti ukutendekela pa wa myaka 20 no kucilapo tabakamone icalo+ ico nalapile ukuti nkapeela Abrahamu, Isaki na Yakobo,+ pantu tabankonka no mutima onse, 12 kano fye Kalebu+ umwana wa kwa Yefune umwina Kenisi na Yoshua+ umwana wa kwa Nuni, pantu bena balakonka Yehova no mutima onse.’+ 13 E ico Yehova alifuliilwe abena Israele kabili alengele balalulumba mu matololo pa myaka 40,+ mpaka inkulo yonse iya bantu abacitile ifyakalifye Yehova yaloba.+ 14 Nomba na imwe mulecita nge fyacitile bashinwe, mwe bana ba bantu ababembu, mwe balelenga Yehova acilemo ukufulilwa abena Israele. 15 Nga mwaleka ukumukonka, ukwabula no kutwishika akalenga na kabili aba bantu bakalelulumba mu matololo, kabili mukalenga aba bantu bonse bakafwe.”

16 Pa numa baile kuli ena no kumweba abati: “Lekeni tukuulile ifitekwa fyesu amacinka ya mabwe, tukuulile na bana besu imisumba kuno kwine. 17 Nomba ifwe tukatwalilila ukuba pa ntanshi ya bena Israele pa kulwa inkondo+ mpaka tukabafishe mu calo cabo, lelo abana besu bakashala mu misumba ya malinga pa kuti bakacingililwe ku bekala calo. 18 Tatwakabwelele ku mayanda yesu mpaka abena Israele bonse bakaikwatile impanga.+ 19 Pantu ifwe tatwakakwate impanga bushilya bwa Yordani nge fyo bena bakakwata, pantu natukwata kale impanga kuno ku kabanga ka Yordani.”+

20 Mose abebele ati: “Nga mukacita ifi mwalanda, ninshi muipangashe pa cinso ca kwa Yehova pa kuti mukaye ku nkondo;+ 21 kabili nga ca kuti onse pali imwe aipangasha kabili ayabuka na Yordani pa cinso ca kwa Yehova, lyena ilyo akatamfya abalwani bakwe pa cinso cakwe,+ 22 kabili ilyo Yehova akacimfya icalo,+ kuti mwabwela,+ kabili ninshi tamwakabe no mulandu kuli Yehova na ku bena Israele. Lyena ici calo cikaba cenu pa cinso ca kwa Yehova.+ 23 Lelo nga tamwakacite ifi, ninshi mwabembukila Yehova. Kabili ishibeni ukuti mukakandilwa pa lubembu lwenu. 24 Kanshi kuti mwakuulila abana benu imisumba kabili kuti mwakuulila ne fitekwa fyenu amacinka,+ lelo mufwile ukufikilisha ifyo mwalaya.”

25 Abatuntwike muli Gadi na batuntwike muli Rubene baebele Mose abati: “Mwe shikulu, fwe babomfi benu tukacita ifyo fine fye mwatweba. 26 Abana besu, abakashi besu, ifitekwa fyesu ne nama shesu shonse fikashala mu misumba ya mu Gileadi,+ 27 lelo fwe babomfi benu tukaabuka, kabili bonse tukaba abaipangasha ukulwa inkondo pa cinso ca kwa Yehova,+ nga fintu fye mwalanda mwe shikulu.”

28 E ico Mose apeele Eleasari shimapepo, Yoshua mwana Nuni ne ntungulushi sha mikowa ya bena Israele ifunde ilyakumine abatuntwike muli Gadi na batuntwike muli Rubene. 29 Mose abebele ati: “Nga ca kuti abatuntuka muli Gadi na batuntuka muli Rubene bakaabuka Yordani pamo na imwe, kabili nga ca kuti onse akaba uwaipangasha ukulwa inkondo pa cinso ca kwa Yehova, kabili akamwafwe mukacimfye ici calo, ninshi mukabapeele icalo ca Gileadi pa kuti cikabe icalo cabo.+ 30 Lelo nga tabakaipangashe kabili nga tabakaabuke pamo na imwe, ninshi mukekale nabo mu calo ca Kanaani.”

31 E lyo abatuntwike muli Gadi na batuntwike muli Rubene ba-aswike abati: “Ifyo Yehova ebele fwe babomfi benu e fyo tukacita. 32 Tukaipangasha kabili tukaabukila ku calo ca Kanaani+ pa cinso ca kwa Yehova, lelo impanga iyabela kuno lubali lwa Yordani e ikaba impanga yesu.” 33 E ico Mose apeele abatuntwike muli Gadi na batuntwike muli Rubene+ na hafu ya mukowa wa kwa Manase+ mwana Yosefe, ubufumu bwa kwa Sihone,+ imfumu ya bena Amore no bufumu bwa kwa Oge+ imfumu ya ku Bashani, e kutila abapeele imisumba ne mpanga iyashingulwike iyi misumba.

34 Kabili abatuntwike muli Gadi bakuulile* Dibone,+ Atarote,+ Aroere,+ 35 Aterote-shofani, Yasere,+ Yogebea,+ 36 Bete-nimra+ na Bete-harani,+ imisumba iyali na malinga, kabili bakuulile na macinka ya mikuni aya mabwe. 37 Kabili abatuntwike muli Rubene bakuulile Heshebone,+ Eleale,+ Kiriataimu,+ 38 Nebo+ na Baali-meone+ na Sibma, (aya te yali amashina ya iyi misumba kale) kabili imisumba iyo bakuulile cipya cipya bayinike amashina yambi.

39 Abena Makiri+ abatuntwike muli Manase bailesansa Gileadi no kutamfyamo abena Amore abaleikalamo. 40 E ico Mose apeele abena Makiri abatuntwike muli Manase icitungu ca Gileadi, kabili e mo batampile ukwikala.+ 41 Kabili Yairi uwatuntwike muli Manase ailesansa abaleikala mu mishi ya matenti, kabili ainike iyi mishi ukuti Habote-yairi.*+ 42 Noba na o ailesansa umusumba wa Kenati ne mishi ya uko, kabili awinike ishina lyakwe ilya kuti Noba.