Abapingushi

12 Lyena abaume abena Efraimu balongene pamo kabili ba-abukile ku Safone* e lyo baeba Yefta abati: “Cinshi watushiliile ilyo wa-abwike pa kuya mu kulwa na bena Amone?+ Twalakocela mu ng’anda yobe.” 2 Lelo Yefta abaswike ati: “Ine na bashilika bandi twalikansene nga nshi na bena Amone. Kabili nalimwitile pa kuti mwise mungafwe, lelo tamwaishilempususha mu minwe yabo. 3 Ilyo namwene ukuti tamwali no kwisa mu kumpususha, natile kanjibike fye mu kapoosa mweo ndeyalwisha abena Amone,+ kabili Yehova abapeele mu minwe yandi. Nomba cinshi lelo mwaishila mu kulwa na ine?”

4 Lyena Yefta alonganike abaume bonse aba mu Gileadi+ kabili balwile na bena Efraimu. Abaume ba mu Gileadi balicimfishe abena Efraimu, ababebele abati: “Imwe mwe bena Gileadi mwe bekala mu bena Efraimu na mu bena Manase mwafyukile fye ku bena Efraimu.” 5 Abena Gileadi bailecilikila abena Efraimu pa fyabu fya Yordani;+ kabili abena Efraimu abalefwaya ukufyuka nga baeba abena Gileadi abati, “Ndefwaya ukwabuka”; balebepusha umo umo abati: “Bushe uli mwina Efraimu?” Nga ayasuka ati: “Awe!” 6 balemweba abati “Kanshi landa auti Shibolete.” Lelo uo bale-eba aleti: “Sibolete,” pantu balefilwa ukushimbula bwino ishiwi. Lyena balemwikata bamwipaila pa fyabu fya Yordani. E ico abena Efraimu abo baipeye pali ilya nshita bali 42,000.

7 Yefta ali kapingula mu Israele pa myaka 6. Pa numa Yefta umwina Gileadi alifwile, kabili bamushiikile mu musumba wakwe mu Gileadi.

8 Ilyo afwile, Ibsani uwa ku Betelehemu e waishileba kapingula wa bena Israele.+ 9 Akwete abana abaume 30 na bana abanakashi 30. Aufishe abana bakwe abanakashi ku baume aba mu mukowa umbi, kabili aletele abanakashi 30 aba kuupwa ku bana bakwe abaume. Ibsani ali kapingula wa bena Israele pa myaka 7. 10 Lyena Ibsani alifwile kabili bamushiikile mu Betelehemu.

11 Ilyo afwile, Elone umwina Sebuluni e waishileba kapingula wa bena Israele; ali kapingula wabo pa myaka 10. 12 Lyena Elone umwina Sebuluni alifwile kabili bamushiikile mu Ayalone mu mpanga ya bena Sebuluni.

13 Ilyo afwile, Abdone umwana wa kwa Hilele umwina Piratone e waishileba kapingula wa bena Israele. 14 Akwete abana abaume 40 na beshikulu abaume 30 abale-endela pa mpunda 70. Ali kapingula wa bena Israele pa myaka 8. 15 Lyena Abdone umwana wa kwa Hilele umwina Piratone alifwile kabili bamushiikile mu Piratone mu mpanga ya bena Efraimu mu lupili lwa bena Amaleke.+