Ibuuku lya Kubalilapo Ilya kwa Samwele
28 Muli shilya nshiku, abaPelishiti balonganike abashilika babo pa kuti balwe na bena Israele.+ E ico Akishi aebele Davidi ati: “Nawishiba ukuti iwe na baume bobe mufwile ukuya na ine ku nkondo.”+ 2 E lyo Davidi aebele Akishi ati: “Namwishiba bwino ico ne mubomfi wenu nkacita.” Akishi aebele Davidi ati: “E co ndekupeelela umulimo wa kulaninda.”*+
3 Nomba pali iyi nshita ninshi Samwele alifwa, abena Israele bonse ninshi balimuloosha kabili balimushiika mu Rama, mu musumba wakwe.+ Kabili ninshi Shauli alifumya mu calo abaleumfwana ne mipashi na balesobela ifya ku ntanshi.+
4 AbaPelishiti balilongene kabili bailepanga inkambi mu Shunemu.+ E ico Shauli na o alongenye abashilika bonse abena Israele kabili bapangile inkambi mu Gilboa.+ 5 Ilyo Shauli amwene abashilika ba baPelishiti mu nkambi, alitiinine nga nshi ica kuti umutima waletunta sana.+ 6 Nangu ca kuti Shauli aleipusha Yehova+ ifyo alingile ukucita, Yehova talemwasuka. Talemwasuka nangu ni mu filoto nelyo muli Urimu+ nangu muli bakasesema. 7 Shauli asukile aeba ababomfi bakwe ati: “Mfwaileni umwanakashi uumfwana ne mipashi,+ pa kuti ndeyamwipusha ifya kucita.” Ababomfi bakwe bamwebele abati: “Mu En-dore+ mwaliba umwanakashi uumfwana ne mipashi.”
8 E ico Shauli ali-ifungushenye kabili afwele ifya kufwala fimbi, e lyo aya na baume babili kuli uyo mwanakashi ubushiku. Aebele umwanakashi ati: “Mbukilako ku mipashi+ kabili unjimishe umuntu uo nalakweba.” 9 Lelo umwanakashi amwebele ati: “Ufwile walishiba ifyo Shauli acitile, ifyo afumishe mu calo abaleumfwana ne mipashi na balesobela ifya ku ntanshi.+ Nomba cinshi ico ulembelelekela* pa kuti banjipaye?”+ 10 Lyena Shauli alapile ku mwanakashi mwi shina lya kwa Yehova ati: “Na pali Yehova, tapali uukakupeela umulandu nga wacita ifyo nkwebele!” 11 E ico umwanakashi amwipwishe ati: “Nani ulefwaya nkwimishe?” Na o amwaswike ati: “Njimisha Samwele.” 12 Ilyo umwanakashi amwene “Samwele,”*+ alipundile nga nshi kabili aebele Shauli ati: “Cinshi wacimbepela? Kanshi niwe Shauli!” 13 Imfumu yamwebele aiti: “Witiina, cinshi ulemona?” Umwanakashi aebele Shauli ati: “Ndemona uulemoneka kwati ni lesa alefuma mu mushili.” 14 Ilyo line amwipwishe ati: “Alemoneka shani?” na o amwaswike ati: “Mukote kabili afwele ica kufwala cabula amaboko.”+ Lyena Shauli alilwike ukuti uo umwanakashi alemona ni “Samwele,” kabili Shauli awile ubukupeme.
15 Lyena “Samwele” aebele Shauli ati: “Cinshi wanjimisha pantu wampumfyanya?” Shauli amwaswike ati: “Ni co ndi no bwafya ubukalamba. AbaPelishiti nabesa mu kulwa na ine, e lyo Lesa alinsha kabili alileka ukunjasuka. Tanjasukila na muli bakasesema nelyo mu filoto;+ e co namwitila pa kuti munjebe ifyo ningile ukucita.”+
16 Kabili “Samwele” amwebele ati: “Cinshi uleipushisha ine apo Yehova alikusha+ kabili nomba mulwani obe? 17 Yehova akacita ifyo alandiile muli ine: Yehova akakupoka ubufumu kabili akapeela umo pa baume banobe, e kutila Davidi.+ 18 Ico Yehova alecitila ifi kuli iwe lelo, ni co tawaumfwilile Yehova, kabili tawalofeshe abena Amaleke+ abamukalifye. 19 Yehova akapeela abena Israele na iwe mu minwe ya baPelishiti,+ kabili mailo iwe+ na bana bobe abaume+ mukaba kuno naba. Yehova akapeela na bashilika ba bena Israele mu minwe ya baPelishiti.”+
20 Ilyo line fye Shauli aliwile alambalala na panshi kabili alitiinine nga nshi pa fyo “Samwele” amwebele. Kabili amaka yalipwile, pantu taliilepo ifya kulya akasuba konse no bushiku bonse. 21 Ilyo umwanakashi aishile kuli Shauli kabili amona no kuti alisakamene sana, amwebele ati: “Ne mubomfi wenu nacimumfwila kabili naci-ibika mu kapoosa mweo*+ pa kuti ncite ifyo mwacinjeba. 22 Nomba shi umfweni ifyo umubomfi wenu alalanda. Lekeni imupeeleko akamokolwa ka mukate mulye, pa kuti mukwate amaka ya kubwelelamo.” 23 Lelo alikeene kabili atile: “Nshalye iyo.” Lelo ababomfi bakwe no mwanakashi batwalilile fye ukumupatikisha. Shauli asukile asumina, aima na panshi e lyo aikala pa busanshi. 24 Umwanakashi alikwete ing’ombe iyana iyaina pa ng’anda, e ico alyangufyenye ukuyipaya,* kabili abuulile ubuunga akasa apangamo no mukate uushatutumuka. 25 Lyena apeele Shauli na babomfi bakwe, kabili baliliile. Pa numa balimine baya ubushiku.+