Impendwa
13 Yehova nomba aebele Mose ati: 2 “Tuma abaume ba kuyalengula icalo ca Kanaani, ico ndepeela abena Israele. Mu mukowa umo na umo ufwile ukusalamo umwaume umo. Umwaume onse uo ulesala afwile ukuba intungulushi+ ya mukowa wakwe.”+
3 E ico Mose alibatumine ukufuma mu mpanga ya Parani+ ukulingana ne fyo Yehova amwebele. Abaume bonse abo atumine bali ni ntungulushi sha bena Israele. 4 Aya e yali amashina yabo: mu mukowa wa kwa Rubene, atumine Shamua mwana Sakuri; 5 mu mukowa wa kwa Simeone, atumine Shafati mwana Hori; 6 mu mukowa wa kwa Yuda, atumine Kalebu+ mwana Yefune; 7 mu mukowa wa kwa Isakari, atumine Igali mwana Yosefe; 8 mu mukowa wa kwa Efraimu, atumine Hoshea+ mwana Nuni; 9 mu mukowa wa kwa Benjamini, atumine Palti mwana Rafu; 10 mu mukowa wa kwa Sebuluni, atumine Gadiele mwana Sodi; 11 mu mukowa wa kwa Yosefe,+ uwaleimininako umukowa wa kwa Manase+ atumine Gaddi mwana Susi; 12 mu mukowa wa kwa Dani, atumine Amiele mwana Gemali; 13 mu mukowa wa kwa Ashere, atumine Seturi mwana Mikaele; 14 mu mukowa wa kwa Naftali, atumine Nabi mwana Bofsi; 15 mu mukowa wa kwa Gadi, atumine Geuele mwana Maki. 16 Aya e yali amashina ya baume abo Mose atumine ukuyalengula icalo. Kabili Mose ainike Hoshea mwana Nuni ati Yoshua.*+
17 Pa kubatuma mu kulengula icalo ca Kanaani, Mose abebele ati: “Mupitile palya pa kuya ku Negebu, e lyo mukaye ku calo ca mpili.+ 18 Mufwile ukuyamona ifyo icalo caba+ kabili mukamone nga ca kuti abantu abekalamo balikosa nelyo tabakosa, kabili nga banono nangu bengi, 19 kabili mukamone icalo nga cisuma nelyo cibi, nampo nga imisumba bekalamo yalikwata amalinga nelyo tayakwata. 20 Kabili mukamone umushili nga walifunda nelyo iyo,+ kabili mukamone nga ca kuti mu calo mwaliba ifimuti nelyo iyo. Mulingile ukuba abashipa+ kabili mukaleteko ifisabo fya muli cilya calo.” Na kuba iyi yali e nshita iyo ifisabo fya myangashi ifya kubalilapo fyalepilapo.+
21 E ico balile mu kulengula icalo ukutendekela pa mpanga ya Sini+ ukuyafika ku Rehobu,+ mupepi na Lebohamati.*+ 22 Ilyo baile mu Negebu, bailefika ku Hebrone,+ uko Ahimani, Sheshai na Talmai,+ abena Anaki+ baleikala. Umusumba wa Soani uwa mu Egupti baukuulile ninshi palipita imyaka 7 ukutula apo bakuulile umusumba wa Hebrone. 23 Ilyo bafikile ku Mupokapoka wa Eshekole,+ baliputwile umusambo uwali ne cisansangu ca myangashi icafina ica kuti abaume babili e bacisendeele pa mutembo, basendeelepo ne mipomegranate na makunyu.+ 24 Bainike cilya cifulo ati Umupokapoka wa Eshekole*+ pantu epo abena Israele baputwile icisansangu.
25 Pa numa ya nshiku 40+ balibwelele mu kulengula icalo. 26 E ico babweleele kuli Mose na Aarone na ku lukuta lonse ulwa bena Israele mu mpanga ya Parani, ku Kadeshe.+ Baletele ilyashi ku lukuta lonse kabili balangile ulukuta ifisabo fya muli cilya calo. 27 Bashimikile Mose abati: “Twaileingila mu calo ico mwatutumineko, kabili cine cine, calo umwaba umukaka no buci,+ kabili ifi e fisabo fya ciko.+ 28 Lelo abekala muli cilya calo bantu abakosa, kabili imisumba ya malinga ikalamba icine cine. Twalimwene na bena Anaki.+ 29 Abena Amaleke+ bekala mu calo ca Negebu,+ e lyo abena Hiti, abena Yebusi+ na bena Amore+ bekala mu calo ca mpili, kabili abena Kanaani+ bekala mupepi na bemba,+ kabili mu mbali ya Yordani.”
30 Lyena Kalebu atalalike abantu abaiminine mupepi na Mose. Abebele ati: “Natuleya ili line, kabili nangu cibe shani tukapoka ici calo, pantu kuti twabacimfya.”+ 31 Lelo abo aile nabo batile: “Te kuti tuyelwisha balya bantu, pantu balikosa ukutucila.”+ 32 Kabili bakonkenyepo ukweba abena Israele ilyashi ilibi+ pa calo ico bailelengula abati: “Icalo ico twapitilemo ku kucilengula, calo icilya abekalamo, kabili abantu bonse abo twamwene muli cilya calo mapaka.+ 33 Kabili kulya e ko twamwene abaNefili, abena Anaki,+ abatuntwike ku baNefili, kabili nga kuilinganya kuli bena twaleimona kwati fipaso, kabili nabo bene e fyo baletumona.”