Ibuuku lya Bubili Ilya kwa Samwele
16 Ilyo Davidi acilileko panono apo abantu balefukamina Lesa,+ Siba+ umubomfi wa kwa Mefiboshete+ alikumene nankwe ninshi ali ne mpunda shibili ishasendele imikate 200, amakeke 100 aya myangashi iyauma, amakeke 100 ayo bapangila ne fisabo fya mu lusuba* no mutondo wa mwangashi uukalamba.+ 2 Lyena imfumu yaipwishe Siba aiti: “Cinshi waletela ifi fintu?” Siba ayaswike ati: “Impunda sha kuninapo aba mu ng’anda ya mfumu, imikate ne fisabo fya mu lusuba fya kulya abalumendo, kabili umwangashi wa kunwa abanaka mu matololo.”+ 3 Nomba imfumu yamwipwishe aiti: “Inga umwana* wa kwa sokulu+ ali kwi?” Siba ayaswike imfumu ati: “Ali mu Yerusalemu, pantu atile, ‘Buno bushiku aba mu ng’anda ya kwa Israele balambwesesha ubufumu bwa kwa tata.’”+ 4 Lyena imfumu yaebele Siba aiti: “Mona! Fyonse ifya kwa Mefiboshete nakupeela.”+ Siba alandile ati: “Ndi panshi ndekunkula. Shi mwingatwalilila ukuntemwa shikulu mwe mfumu.”+
5 Ilyo Imfumu Davidi yafikile ku Bahurimu, Shimei+ umwana wa kwa Gera uwa mu lupwa lwa kwa Shauli alishile alesaalula Davidi.+ 6 Alesukushila Imfumu Davidi na babomfi bakwe bonse amabwe, na bantu bonse na baume ba maka bonse abali ku kulyo kwa iko na ku kuso kwa iko. 7 Ifi e fyo Shimei alelanda ilyo alesaalula Davidi: “Fuma apa, fuma apa, we muntu wa mulopa! We cinangwa ca muntu we! 8 Yehova alekukanda pa fyo waipaya bonse aba mu ng’anda ya kwa Shauli uo wapoka ubufumu, nomba Yehova napeela umwana obe Abishalomu ubufumu. Kabili uli na mafya, pantu waliba no mulandu wa mulopa!”+
9 Lyena Abishai umwana wa kwa Seruya+ aebele imfumu ati: “Cinshi ico iyi imbwa yafwa+ ilesaalwila shikulu imfumu?+ Lekeni injemuputulako umutwe.”+ 10 Lelo imfumu yamwebele aiti: “Mwi-ibika muli ili lyashi bamwana Seruya.+ Mulekeni ansaalule,+ pantu Yehova eumwebele+ ati, ‘Saalula Davidi!’ E ico nani engatila, ‘Cinshi ulecitila ifi?’” 11 Lyena Davidi aebele Abishai na babomfi bakwe bonse ati: “Moneni umwana wandi uwa kuifyalila eulefwaya ukunjipaya,*+ pali bufi uyu umwina Benjamini!+ Mulekeni ansaalule pantu e fyo Yehova amwebele! 12 Nalimo Yehova akamona ifyo ndecula,+ kabili Yehova akampaala pali uyu umusaalula Shimei ansaalula buno bushiku.”+ 13 E ico Davidi na baume abo ali nabo batwalilile fye ukuya mu nshila, ninshi Shimei ale-endela mu mbali ya lupili nalungatana nankwe, alemusaalula fye,+ uku ninshi alesukusa amabwe kabili alekuba no lukungu ulwingi.
14 Pa numa ya kwenda intamfu iitali, imfumu na bantu bonse abo yali nabo balifikile uko baleya ninshi nabanaka icine cine, kabili balituushishe.
15 Pali iyi nshita Abishalomu na baume bonse abena Israele balifikile mu Yerusalemu, kabili Ahitofele+ na o ali nankwe. 16 Ilyo Hushai+ umwina Ariki,+ uwali cibusa wa kwa Davidi aingile umwali Abishalomu, amwebele ati: “Kalebalika mwe mfumu!+ Kalebalika mwe mfumu!” 17 E lyo Abishalomu aebele Hushai ati: “Bushe ifi wacita ninshi naulanga cibusa obe ukutemwa ukushipwa? Cinshi ushaila na cibusa obe?” 18 E ico Hushai aebele Abishalomu ati: “Awe, ndi ku lubali lwa muntu uo Yehova na ba bantu e lyo na baume abena Israele bonse basala. Nkatwalilila ukuba ku lubali lwakwe. 19 Na kabili ndeti, Nani mfwile ukubombela? Bushe te mwana wakwe? Ifyo nabombeele shinwe, e fyo nkabombela na imwe bene.”+
20 Lyena Abishalomu aebele Ahitofele ati: “Mpandako amano.+ Finshi tulingile ukucita?” 21 E lyo Ahitofele aebele Abishalomu ati: “Laaleni na bakanakashi+ ba kwa shinwe abo asha pa kuti balesunga ing’anda.*+ Lyena abena Israele bonse bakomfwa ukuti namulenga shinwe amupate sana, kabili bonse abamutungilila bakakosa.” 22 E ico batanikiile Abishalomu itenti pa mutenge,+ kabili Abishalomu aleele na bakanakashi ba kwa wishi+ pa menso ya bena Israele bonse.+
23 Pali ilya nshita abantu balemona amano ayo Ahitofele+ alepanda abantu ukuti yalefuma kuli Lesa wa cine. E fyo Davidi na Abishalomu nabo balemona amano yonse ayo Ahitofele alepanda abantu.