Ibuuku lya Kubalilapo Ilya kwa Samwele

15 Lyena Samwele aebele Shauli ati: “Nine Yehova aebele ukuti njise nkusube pa kuti ube imfumu ya bantu bakwe abena Israele.+ Nomba umfwa ifyo Yehova alandile.+ 2 Yehova wa mabumba alandile ati: ‘Nkakanda abena Amaleke pa fyo bacitile abena Israele ilyo babalwishishe lintu balefuma ku Egupti.+ 3 Nomba, kabiyeni muyeipaya abena Amaleke+ kabili muyeonaula+ na fyonse ifyo bakwata. Tamufwile ukuyashako nangu umo;* mulingile ukuyaipaya+ abaume, abanakashi na bana kumo no tunya. Mufwile ukuyaipaya ne ng’ombe shonse, impaanga shonse, ingamila shonse e lyo ne mpunda shonse.’”+ 4 Shauli aitile abaume kabili alibapendele mu Telemu. Abo apendele bali abashilika 200,000 e lyo abaume aba mu Yuda+ bali 10,000.

5 Shauli na bashilika abo ali nabo bailefika fye na ku musumba wa bena Amaleke kabili babelamine abalwani babo mu mupokapoka. 6 Lyena Shauli aebele abena Keni+ ati: “Kabiyeni pa kuti muipaatuleko ku bena Amaleke, pantu kuti namulofesha kumo nabo.+ Pantu imwe mwalilangile abena Israele bonse+ ukutemwa ukushipwa ilyo balefuma ku Egupti.” E ico abena Keni bali-ipaatwileko ku bena Amaleke. 7 Pa numa, Shauli na bashilika abo ali nabo baipeye abena Amaleke+ ukufuma ku Habila+ ukuyafika fye na ku Shuri+ iyabela mupepi na Egupti. 8 Baikete Agagi+ imfumu ya bena Amaleke umutuntulu, lelo abantu bonse abashala babepeye ku lupanga.+ 9 Lelo Shauli na bashilika bakwe tabaipeye Agagi. Tabaipeye* ne mpaanga ishilume ne shikota ishawamisha, ing’ombe, ifitekwa ifyaina ne fintu fyonse ifyali ifisuma.+ Tabalefwaya ukufyonaula. Lelo ifintu fyonse ifyo basuulile ne fyo bashalefwaya fyena balifyonawile.

10 Nomba Yehova aebele Samwele ati: 11 “Ning’umfwa ubulanda pa mulandu na Shauli uo nasontele ukuba imfumu, pantu naleka ukunkonka, kabili tacita ifyo mweba.”+ Samwele ali no bulanda sana ica kuti alipepele kuli Yehova ubushiku bonse+ ninshi alelila fye. 12 Ilyo Samwele acelele ukubuuka pa kuti amonane na Shauli, kwali abaebele Samwele abati: “Shauli aile ku Karmele,+ kabili e ko aileikuulila ica kumwibukishishako.+ Lyena Shauli alyalulwike aya ku Gilgali.” 13 Ilyo Samwele aile kuli Shauli, Shauli amwebele ati: “Yehova engamupaala. Nincita ifyo Yehova alandile.” 14 Lelo Samwele amwebele ati: “Inga isho impaanga ne ng’ombe ishilelila?”+ 15 E lyo Shauli atile: “Shafumine ku bena Amaleke pantu abantu tabalefwaya ukwipaya* impaanga ne ng’ombe ishawamisha, pa mulandu wa kuti balefwaya ukutuulila Yehova Lesa wenu ilambo; lelo ifyashele fyena twalifyonawile.” 16 E lyo Samwele aebele Shauli ati: “Ikala tondolo! Leka nkwebe ifyo Yehova acinjeba ubushiku.”+ E ico Shauli alandile ati: “Njebeni mukwai!”

17 Lyena Samwele alandile ati: “Bushe ilyo Yehova akusontele ukuba intungulushi ya mikowa ya bena Israele+ na lintu akusubile pa kuti ube imfumu ya bena Israele, tawaleimona ukuti wali uwacepesha?+ 18 Yehova alikutumine kabili akwebele ati, ‘Kabiye ulwishe+ abena Amaleke abacita ifyabipa, mpaka ubalofye.’+ 19 Nomba cinshi ushaumfwilile Yehova? Lelo wali no bufunushi pa kusenda ifintu ifyo wapokele+ kabili wacitile ifyabipa mu menso ya kwa Yehova!”

20 Lelo Shauli aebele Samwele ati: “Nomba bushe nshaumfwila Yehova? Pantu nalile uko Yehova antumine kabili naletele Agagi imfumu ya bena Amaleke, e lyo abena Amaleke bonse abashele nalibonawile.+ 21 Lelo abantu babuulilepo ifyo twapokolwele, impaanga ne ng’ombe ishawamisha isho twalingile ukwipaya, pa kuti batuulile Yehova Lesa wenu ilambo pa Gilgali.”+

22 Lyena Samwele amwebele ati: “Bushe Yehova alitemwa imituulo ya koca na malambo+ ukucila ukunakila Yehova? Umfwa! Ukuba ne cumfwila kwaliwama ukucila ukutuula ilambo,+ kabili ukukutika kwaliwama ukucila ukutuula amafuta+ ya mpaanga ishilume; 23 pantu bucipondoka+ cimo cine no lubembu lwa kubuka,+ kabili ukuitutumuna cimo cine no kucita ifinjelengwe no kupepa utulubi.* Apo naukaana ukumfwila Yehova,+ na o nakukaana ukuba imfumu.”+

24 Lyena Shauli aebele Samwele ati: “Nimembuka, pa mulandu wa kuti nimpula mu cipope ca kwa Yehova kabili nshicitile ifyo mwanjebele, pantu nalitiinine abantu kabili nacitile ifyo banjebele. 25 Nomba, shi njeleleni pa lubembu ncitile kabili mubwelelemo na ine pa kuti nje mpaapaate Yehova.”+ 26 Lelo Samwele aebele Shauli ati: “Nshabwelele pamo na iwe, pantu taucitile ifyo Yehova akwebele, kabili Yehova talefwaya ukuti utwalilile ukuba imfumu ya bena Israele.”+ 27 Ilyo Samwele alepilibuka pa kuti aleya, Shauli aikete ku mufukilo wa ku ca kufwala cakwe icabula amaboko, lelo calilepwike. 28 E lyo Samwele amwebele ati: “Buno bushiku Yehova nakupoka ubufumu pa bena Israele, kabili akapeela umunobe uwalinga ukuteka ukucila iwe.+ 29 Kabili Uwapulamo uwa bena Israele+ takabepe,+ kabili takaalule ifyo alefwaya ukucita, pantu taaba ngo muntunse uwalula ifyo alefwaya ukucita.”*+

30 Shauli alandile ati: “Nimembuka. Na lyo line ncindikeni mukwai pa menso ya bakalamba ba bantu bandi na pa menso ya bena Israele. Natubwelelemo pamo, kabili nalayapaapaata Yehova Lesa wenu.”+ 31 E ico Samwele alibwelelemo ninshi alekonka Shauli pa numa, kabili Shauli apaapeete Yehova. 32 Kabili Samwele alandile ati: “Palamikeni Agagi imfumu ya bena Amaleke kuno.” Lyena Agagi aile ale-enda kwati talefwaya* pa kuya kuli Samwele, pantu aletontonkanya ukuti: ‘Nacipwa tabanjipaye.’ 33 Lelo Samwele alandile ati: “Ifyo ulupanga lobe lwalenga abanakashi bafwilwa abana, e fyo na banoko bakafwilwa abana ukucila abanakashi bambi.” E fyo Samwele aputawile Agagi pa cinso ca kwa Yehova pa Gilgali.+

34 Nomba Samwele aile ku Rama, e lyo Shauli aile ku mwakwe ku Gibea uko aleikala. 35 Ukutula ubu bushiku Samwele afwile fye ukwabula ukumonapo Shauli na kabili. Samwele ali no bulanda sana pa fyo Shauli+ acitile. Kabili Yehova alyumfwile ububi pa mulandu na Shauli uo asontele ukuba imfumu ya bena Israele.+