Ibuuku lya Bubili Ilya kwa Samwele
10 Pa numa imfumu ya bena Amone+ yalifwile, kabili Hanuni umwana wa iko ali-ipyene pa bufumu.+ 2 E lyo Davidi alandile ati: “Nalalanga Hanuni umwana wa kwa Nahashi ukutemwa ukushipwa nga filya fine wishi anangile ukutemwa ukushipwa.” E ico Davidi atumine ababomfi bakwe mu kumusansamusha pa mfwa ya kwa wishi. Lelo ilyo ababomfi ba kwa Davidi bafikile mu calo ca bena Amone, 3 bacilolo ba bena Amone baebele Hanuni shikulwibo abati: “Bushe imwe muleti ico Davidi atumiine ababomfi ni co alefwaya ukumusansamusha? Bushe ico abatumiine te ico alefwaya ukufwayafwaya mu musumba pa kuti awishibe bwino e lyo ausanse?” 4 E ico Hanuni asendele ababomfi ba kwa Davidi, ababeya umwefu lubali,+ aputula ifya kufwala fyabo ukufisha mu matako e lyo abaleka baya. 5 Ilyo bamo baebele Davidi, ilyo line atumine aba kuyabakumanya, pantu aba baume balibaseebenye nga nshi; kabili imfumu yabebele aiti: “Ikaleni mu Yeriko+ mpaka umwefu ukamene, e lyo mukabwele.”
6 Mu kupita kwa nshita abena Amone bamwene ukuti Davidi alibapatile sana, e ico batumine aba kuyaobola abena Siria aba ku Bete-rehobu+ na bena Siria aba ku Soba.+ Baileobola abashilika 20,000 kabili baobwele ne mfumu ya ku Maaka+ iyali na baume 1,000, e lyo ku Ishtobu baobweleko abaume* 12,000.+ 7 Ilyo Davidi aumfwile, atumine Yoabu na bashilika bonse, kumo na baume abakwatishe amaka.+ 8 Kabili abena Amone balifumine batantama pa mpongolo ya musumba pa kuti balwe inkondo, ninshi abena Siria ba ku Soba na ba ku Rehobu pamo na bashilika ba ku Ishtobu* na ba kwa Maaka nabo nabatantama beka mu mpanga.
9 Ilyo Yoabu amwene ukuti abalwani balamusanshila ku ntanshi na ku numa, ilyo line asalile abashilika abena Israele abaishibishe ukulwa kabili alibatantamike pa kuti balwe na bena Siria.+ 10 Lyena apeele Abishai+ munyina amaka ya kutungulula abaume abashele, pa kuti abatantamike balwe na bena Amone.+ 11 Lyena amwebele ati: “Nga ca kuti abena Siria bancila amaka, wise ungafwe; lelo nga ca kuti abena Amone bakucila amaka, na ine nalaisa mu kukwafwa. 12 Tufwile ukuba abakosa kabili abashipa+ pa kuti tucingilile abantu besu ne misumba ya kwa Lesa wesu, kabili Yehova alacita ico alamona ukuti e ciweme.”+
13 Lyena Yoabu na baume abo ali nabo baile balepalama ku bena Siria pa kuti balwe nabo, lelo abena Siria balifulumwike.+ 14 Ilyo abena Amone bamwene ukuti abena Siria bafulumuka, nabo bafulumwike Abishai kabili baingile mu musumba. Pa numa, Yoabu alibwelele mu kukonka abena Amone, e lyo abwelelamo ku Yerusalemu.
15 Ilyo abena Siria bamwene ukuti abena Israele babacimfya, balilongene na kabili.+ 16 E ico Hadadesere+ atumine aba kuyasenda abena Siria abali mu ncende ya Mumana wa Yufrate,+ lyena bafikile ku Helamu, kabili Shobaki umukalamba wa bashilika ba kwa Hadadesere e walebatungulula.
17 Ilyo bamo bashimikile Davidi ifi, ilyo line fye alongenye abashilika abena Israele bonse kabili ba-abwike Yordani bayafika na ku Helamu. Lyena abena Siria balitanteme kabili batampile ukulwa inkondo na Davidi.+ 18 Lelo abena Siria balifulumwike abena Israele; kabili Davidi aipeye abena Siria 700 abale-ensha amaceleta na bambi 40,000 abalelwila pali bakabalwe, kabili aipeye+ Shobaki umukalamba wa bashilika babo. 19 Ilyo imfumu shonse ishalebombela Hadadesere shamwene ukuti abena Israele bashicimfya, ilyo line shapangene na bena Israele icipangano ca mutende kabili shena kumo na bantu ba shiko shatampile ukubombela abena Israele.+ Ukutula ubu bushiku abena Siria baletiina ukwafwa abena Amone.