Impendwa
35 Yehova na kabili aebele Mose mu ciswebebe ca Moabu mupepi na Yordani+ mu Yeriko ati: 2 “Eba abena Israele ukuti balingile ukupeelako abena Lebi imisumba ya kwikalamo pa mpanga iyo bakabapeela,+ kabili bafwile ukupeela abena Lebi impanga ya mulemfwe iyashinguluka imisumba.+ 3 Bakekala muli iyi misumba, kabili impanga ya mulemfwe ikaba ya fitekwa fyabo, ifintu fyabo ne nama shabo shimbi. 4 Impanga ya mulemfwe iya misumba yonse iyo mukapeela abena Lebi, ikabe imikono* 1,000 ukutendekela pe linga ukuya kunse, ku mbali shonse isha musumba. 5 Mufwile ukupima imikono 2,000 ku kabanga, imikono 2,000 ku kapinda ka ku kulyo, imikono 2,000 ku masamba ne mikono 2,000 ku kapinda ka ku kuso, umusumba ukabe pa kati. Iyi e ikaba impanga yabo iya mulemfwe mu misumba yabo.
6 “Imisumba iyo mukapeela abena Lebi iyo uwaipaya umuntu akulabutukilako ikaba 6,+ mukalundepo ne misumba imbi 42. 7 Imisumba yonse pamo iyo mukapeela abena Lebi ikabe 48, kumo ne mpanga ya mulemfwe iyashinguluka iyi imisumba.+ 8 Imisumba iyo mukabapeela ikafuma pa mpanga iyo abena Israele bakabapeela.+ Ku mikowa iikakwata impanga iikulu mukapokeko imisumba iingi, ku mikowa iikakwata impanga iinono mukapokeko imisumba iinono.+ Umukowa umo na umo ukapeeleko abena Lebi imisumba imo ukulingana ne mpanga iyo bakaupeela.”
9 Kabili Yehova aebele Mose ati: 10 “Eba abena Israele auti, ‘Muleabuka Yordani pa kuti muye ku calo ca Kanaani.+ 11 Mulingile ukusala imisumba iingalinga ukuba imisumba ya kubutukilako, uko uwaipaya umuntu* mu kukanaishiba alingile ukubutukila.+ 12 Kuli iyi imisumba e ko mukalabutukila pa kuti mukalecingililwa ku wa kulandula pa mulopa,+ pa kuti uwaipaya umuntu bemwipaya ilyo ulukuta lushilamulubulwisha.+ 13 Imisumba 6 iyo mukapeela, e yo mukalabutukilako. 14 Mukapeele imisumba itatu kuno bushilya bwa Yordani,+ ne misumba imbi itatu mu calo ca Kanaani+ pa kuti ikabe imisumba ya kubutukilako. 15 Iyi misumba 6 e yo abena Israele na balebeshi+ bakulabutukilako. Onse uwaipaya umuntu* mu kukanaishiba e ko akalebutukila.+
16 “‘Nomba nga amuuma ne cela, afwa no kufwa, uwamuuma ninshi ni kepaya. Uwaipaya umuntu na o bafwile ukumwipaya.+ 17 Kabili nga amutoba ilibwe ilingamwipaya, afwa no kufwa, uwamutoba ilibwe ninshi ni kepaya. Uwaipaya umuntu na o bafwile ukumwipaya. 18 Kabili nga ca kuti amuuma ne cimuti icingamwipaya, afwa no kufwa, uwamuuma ninshi ni kepaya. Uwaipaya umuntu na o bafwile ukumwipaya.
19 “‘Uwa kulandula pa mulopa e ukepaya uwaipaya umuntu. Nga amusanga akamwipaya. 20 Nga ca kuti ku mufulo* fye amusunka nelyo amulasa cimo pa mulandu wa kuti alimupata kabili afwa no kufwa,+ 21 nangu nga ca kuti amuuma ikofi pa mulandu wa kuti alimupata ica kuti afwa no kufwa, uwamuuma na o bafwile ukumwipaya, pantu ninshi ni kepaya. Uwa kulandula pa mulopa akamwipaya nga amusanga.
22 “‘Lelo nga ca kuti te ku mufulo* amusunkila nelyo amulashila cimo kabili tamupata,+ 23 nelyo nga ca kuti apoosa ilibwe e lyo lyatoba umuntu uo ashimwene kabili afwa no kufwa, lelo taciminina pa kumucena kabili uo aipaya taali mulwani wakwe, 24 ulukuta lufwile ukukonka aya amafunde+ pa kupingula umulandu uukumine uwipeye umuntu no ulingile ukulandula pa mulopa. 25 Lyena ulukuta lufwile ukupokolola uwaipaya umuntu ku wa kulandula pa mulopa, kabili lufwile ukumubwesesha ku musumba wa kubutukilako uko abutukiile, kabili alingile ukwikala muli uyo musumba mpaka shimapepo mukalamba uo basuba amafuta ya mushilo akafwe.+
26 “‘Lelo nga ca kutila uwaipaya umuntu aciluka umupaka wa musumba uo abutukilako, 27 kabili uwa kulandula pa mulopa amusanga kunse ya mupaka wa musumba uo abutukilako, kabili amwipaya, ninshi uwa kulandula pa mulopa takwete umulandu wa mulopa. 28 Pantu afwile ukwikala mu musumba wa kubutukilako mpaka shimapepo mukalamba akafwe. Kabili shimapepo mukalamba nga afwa, uwaipeye umuntu kuti abwelela ku mwakwe.+ 29 Aya e mafunde ayo mukalekonka pa kupingula mu nkulo shenu shonse konse uko mukalaikala.
30 “‘Onse uwaipaya umuntu* mufwile ukumwipaya+ nga ca kuti kambone amushinina,+ lelo tamufwile ukwipaya umuntu* nga ca kuti kambone umo fye ewamushinina. 31 Tamulingile ukupoka icilubula ca kulubwilako umweo wa waipaya umuntu uulingile ukufwa, pantu mufwile fye ukumwipaya.+ 32 Kabili tamulingile ukupoka icilubula ca kulubwilako umuntu uwabutukila ku musumba wa kubutukilako, pa kuti abwelele ku mwakwe ilyo shimapepo mukalamba ashilafwa.
33 “‘Tamufwile ukukowesha icalo ico mukekalamo, pantu umulopa ulakowesha icalo,+ kabili te kuti musangulule* icalo pa mulopa uwasuuminamo kano fye ku mulopa wa muntu uwausuumishe.+ 34 Tamufwile ukukowesha icalo umo mwikala, kabili umo njikala; pantu ine ne Yehova njikala na bena Israele.’”+