Impendwa

11 Nomba abantu batendeke ukuilishanya nga nshi kuli Yehova. Ilyo Yehova aumfwile, alikalipe nga nshi, kabili umulilo wafumine kuli Yehova waocapo na bamo abali ku mpela ya nkambi kabili balifwile. 2 Ilyo abantu batampile ukulilila kuli Mose, alibapaapaatileko kuli Yehova,+ kabili umulilo walishimine. 3 E ico cilya cifulo bacinike ati Tabera,* pantu umulilo uwafumine kuli Yehova walibocele.+

4 Abashali abena Israele+ abo bali nabo batendeke ukufuluka ifya kulya balelya mu Egupti,+ kabili abena Israele nabo batendeke ukulila na kabili, balelanda abati: “Nani walatupeela inama iya kuti tulye?+ 5 Twafuluka ne sabi twalelya mu Egupti apa fye, ifibimbi, ifitangamenshi, liiki, kanyense na galiki!+ 6 Nomba tuleondoloka fye.* Konse uko twalolesha tulemona fye mana yeka yeka.”+

7 Na kuba iyi mana+ yali nge nseke ishinono ishabuuta,*+ kabili yalemoneka nge finyamuti ifyabuuta ifyo beta ati bedola. 8 Abantu balesalanganina fye konse mu kutoola mana kabili baleipela pa mpelo nangu baleitwa mwi bende. Lyena baleyipika mu mpoto sha kwipikilamo nelyo balepangamo imikate yabulungana,+ kabili yaleumfwika kwati mikate yalowa iya mafuta. 9 Mu nkambi nga mwaba umume ubushiku, mana nayo yalebamo.+

10 Mose aumfwile abantu balelila mu ndupwa shabo, cila muntu pa mwinshi we tenti lyakwe. Kabili Yehova alikalipe nga nshi,+ Mose na o wine alifulilwe nga nshi. 11 Lyena Mose aebele Yehova ati: “Cinshi mwancushisha ifi ne mubomfi wenu? Cinshi mwandekelesesha, ica kuti mwabika icisendo ca bantu bonse aba pali ine?+ 12 Bushe nine naimite aba bantu bonse? Bushe nine nabafyele, pa kuti munjebe amuti, ‘Basendele pa cifuba cobe, nga filya fine umubomfi* asenda umwana uonka,’ ubatwale ku calo ico mwalapile ukuti mukapeela ifikolwe fyabo?+ 13 Ni kwi nalafumya inama ya kupeela aba bantu bonse? Pantu bekalile fye ukulilila ine abati, ‘Tupeele inama, uleke tulye!’ 14 Nafilwa ukusakamana aba bantu bonse neka; te kuti nkumemo.+ 15 Nga mwalaleka ndesakamana aba bantu neka, ninshi njipayeni fye ili line.+ Nga mwalintemwa, mwileka nkwate amafya na yambi.”

16 Yehova ayaswike Mose ati: “Pa bakalamba ba mu Israele, nonganikilapo abaume abakalamba 70, abo waishiba ukuti e bakalamba ba bantu kabili e bacilolo babo.+ Ubatwale kwi tenti lya kukumaninamo, kabili wiminine nabo kulya kwine. 17 Kulya kwine e ko nalaisalandila na iwe,+ kabili ndeisabuulapo umupashi+ pali iwe no ku-ubika pali bena, kabili bakulakwafwa ukusakamana aba bantu pa kuti wilabomba weka uyu umulimo.+ 18 Webe aba bantu auti, ‘Ipekanyeni pantu mailo+ mukalya inama, pa mulandu wa kuti Yehova naumfwa ifyo mulilile kuli ena+ amuti: “Nani alatupeela inama ya kuti tulye? Mu Egupti ifintu fyalituwamiine.”+ Yehova akamupeela inama, kabili mukalya.+ 19 Tamwakalye fye pa bushiku bumo, nelyo pa nshiku shibili, nangu pa nshiku 5, nelyo pa nshiku 10 nangu pa nshiku 20, 20 lelo mukailya pa mweshi uutuntulu, mpaka ikafuuke,* ikafume na ku mukoshi,+ pantu mwakeene Yehova uuli na imwe, kabili mwalelilila pa cinso cakwe amuti: “Cinshi ico twafumine mu Egupti?”’”+

21 Lyena Mose atile: “Abaume abo ndi nabo abengaya ku nkondo bali 600,000,+ nomba imwe muleti, ‘Nkabapeela inama, kabili bakalya pa mweshi uutuntulu’! 22 Bushe nga twabepaila impaanga shonse ne ng’ombe shonse kuti fyabakumana? Nangu nga twabepaila isabi lyonse ilya muli bemba, bushe kuti lyabakumana?”

23 Lyena Yehova aebele Mose ati: “Bushe ukuboko kwa kwa Yehova kwalipipa?+ Nomba walamona nga ca kuti ifyo nalanda fikacitika nelyo iyo.”

24 E ico Mose aile-eba abantu ifyo Yehova amwebele. Kabili alongenye abaume 70 pa bakalamba ba bantu, kabili abebele ukuti beminine ukushinguluka itenti lya kukumaninamo na Lesa.+ 25 Lyena Yehova aikile mwi kumbi+ no kulanda nankwe+ kabili abuulilepo umupashi+ uwali pali ena no ku-ubika pa muntu umo na umo pali balya abakalamba 70. Kabili ilyo fye umupashi waikele pali bena, batampile ukucita kwati ni bakasesema,*+ lelo tababwekeshepo ukucita ifi.

26 Nomba mu nkambi mwali abaume babili abashele pali balya abakalamba. Umo ali ni Eldadi, e lyo umbi ali ni Medadi. Kabili umupashi waishileikala pali bena, pantu nabo baali pa bakalamba abo balembele, lelo tabaile kwi tenti lya kukumaninamo na Lesa. E ico nabo batendeke ukucita kwati ni bakasesema mu nkambi. 27 Kabili umulumendo umo aile ulubilo kuli Mose no kumweba ati: “Eldadi na Medadi balecita kwati ni bakasesema mu nkambi!” 28 Lyena Yoshua+ mwana Nuni, uwalebombela Mose ukutula ku bwaice bwakwe atile: “Mwe shikulu Mose, balesheni!”+ 29 Lelo Mose amwebele ati: “Bushe wanjikatilwa akalumwa? Wiba na kalumwa, ine kuti natemwa abantu ba kwa Yehova bonse baba bakasesema, kabili kuti natemwa Yehova abika umupashi wakwe pali bena!” 30 Pa numa Mose abweleele mu nkambi, pamo na bakalamba ba mu Israele.

31 Lyena Yehova aimishe umwela uwaletele inkwale ukufuma kuli bemba no kushiponesha mu nkambi,+ ukushinguluka inkambi yonse, kuno lubali apa kwenda ubushiku bumo e lyo na kulya lubali apa kwenda ubushiku bumo, kabili shakupile umushili imikono* ibili ukufuma panshi. 32 E ico abantu batoolele inkwale akasuba konse no bushiku bonse e lyo no bushiku bwakonkelepo bonse. Abatoolele ishinono bantu batoolele ishingakumana amahoma* 10, kabili abantu ba-anike inkwale ukushinguluka inkambi yonse. 33 Lelo ilyo bashilapwisha ukulya inkwale, Yehova alibafuliilwe sana, kabili Yehova alipeye abantu abengi nga nshi.+

34 E ico bainike cilya cifulo ati Kibrote-hataaba,*+ pantu e po bashiikile abantu abafunukile inkwale.+ 35 Abantu bafumine pa Kibrote-hataaba baya ku Haserote,+ kabili e ko baikele.