Esaya

1 Icimonwa+ ca kwa Esaya+ mwana Amose ico amwene pali Yuda na pali Yerusalemu mu nshiku sha kwa Usia,+ Yotamu,+ Ahasi+ na Hisekia,+ imfumu sha bena Yuda:+

2 Umfwa,+ we muulu, kabili kutika, we sonde, pantu Yehova umwine nasosa ati: “Nalelele abana abaume no kubakusha,+ lelo bena nabampondokela.+ 3 Ing’ombe iilume yalishiba umwine wa iko, ne mpunda yalishiba umulimba wa waiteka; nomba abena Israele bena tabaishiba,+ abantu bandi tabeluka ilyo balecita ifintu.”+

4 We bulanda ku luko lwa lubembu,+ abantu aba filubo ifine fine, ulubuto lwa bacita ifyabipa,+ abana ba bonaushi!+ Nabasha Yehova,+ nabasaalula Uwa Mushilo wa kwa Israele,+ nabamufutatila.+ 5 Ni pi pambi mukapumwa na kabili,+ apo mulelundapo pa kupondoka kwenu?+ Umutwe onse naulwala, no mutima onse naunaka.+ 6 Ukufuma pa nshi ya lukasa ukufika na ku mutwe tapali apashala apatuntulu.+ Ifilaso ne fikwebululwa ne filonda ifibishi—tafyatinwa nelyo ukukakwapo, nangu kunashiwa ku mafuta.+ 7 Icalo cenu naconaulwa,+ imisumba yenu naipya ku mulilo;+ abeni+ baleonaula+ umushili wenu ku cinso cenu, kabili ukonaulwa kuli ngo kucimfiwa ku beni.+ 8 Kabili umwana mwanakashi Sione+ ashele nge nsakwe mwi bala lya myangashi, nge nsakwe ya balinshi mwi bala lya fibimbi, kwati musumba uo bashingile.+ 9 Yehova wa mabumba nga tatushilileko abapusuka abanono,+ nga twaba fye nga Sodomu, kabili nga twaba fye kwati ni Gomora.+

10 Umfweni icebo ca kwa Yehova,+ mwe bakateka abankalwe+ aba ku Sodomu.+ Kutikeni ku mafunde ya kwa Lesa wesu, mwe bantu ba mu Gomora. 11 “Bushe amalambo ayengi ayo mupeela ya nshi kuli ine?” e fyo Yehova asosa. “Nintendwa ne mituulo yenu iya koca+ iya basukusuku+ na mafuta ya nama shaina;+ kabili nshatemwa+ umulopa+ wa bana ba ng’ombe abalume no wa mpaanga ishilume no wa basawe.+ 12 Ilyo mwisa ku kumona icinso candi,+ nani uwamweba ati mulecita ifi, pa kuti mulenyantaula mu mansa shandi?+ 13 Lekeni ukuleta imituulo ya ngano iya fye.+ Ifyanunkila fya bunani kuli ine.+ Umweshi upya+ ne sabata,+ ukulonganya abantu,+ nintendwa ne fya finjelengwe+ fyenu no kulongana kwacindamisha. 14 Nalipata+ imyeshi yenu iipya ne nshita yenu iya mitebeto. Fisangwike icisendo kuli ine;+ ninaka ukufisenda.+ 15 Kabili ilyo mufungulula amaboko yenu,+ ndafisa amenso yandi kuli imwe.+ Nangu ca kuti mulafusha amapepo yenu,+ ine nshumfwa;+ iminwe yenu yaisulamo fye ukusumya umulopa.+ 16 Sambeni;+ isangululeni;+ fumyeni imicitile yenu iibi pa ntanshi yandi;+ lekeni ukucita ifyabipa.+ 17 Sambilileni ukucita ifisuma;+ fwayeni umulinganya;+ lungikeni uucusha bambi;+ pingwileni umwana wa nshiwa;+ lubulwileni mukamfwilwa.”+

18 “Nomba iseni, lekeni tulanshanye kabili nalamwafwa ukuwamya bucibusa bwenu na ine,” e fyo Yehova asosa.+ “Imembu shenu nelyo shakashika ce, shikabuuta tuutu kwati butonge;+ nangu shikashike ce kwati ni nsalu yakashikisha, shikaba kwati masako ya mpaanga. 19 Nga mwaitemenwa no kukutika, mukalya ifisuma ifya mu calo.+ 20 Lelo nga mwakaana+ kabili mwatalama, ulupanga lukamulya; pantu akanwa ka kwa Yehova nakasosa.”+

21 Iye ifyo umusumba wa cishinka+ wasanguka cilende!+ Uyu musumba waiswilemo fye umulinganya;+ ubulungami e mo bwaleikala,+ lelo nomba mwaba abepaya abantu.+ 22 Silfere yobe isangwike munyela.+ Ubwalwa bobe ubwa ngano bwasundulwa ku menshi.+ 23 Bacilolo bobe balitalama kabili banabo ba bapupu.+ Bonse balitemwa amafisakanwa+ kabili bafwaisha ifya bupe.+ Tabapingula umulandu wa mwana wa nshiwa; no mulandu wa kwa mukamfwilwa tabaumfwa.+

24 E ico Shikulu wa cine, Yehova wa mabumba, Uwa Maka wa kwa Israele,+ atila: “Eya! Nkailubula ku fibambe fyandi, kabili nkailandula+ pa balwani bandi.+ 25 Kabili nkabwesesha ukuboko kwandi pali iwe, kabili nkasungulula munyela obe onse, kabili nkafumyapo ubusali bobe bonse.+ 26 Kabili nkabwesha na kabili abapingushi bobe nga pa kubala, ne mpanda mano shobe nga pa kutendeka.+ E lyo uketwa Umusumba wa Bulungami, Umusumba wa Cishinka.+ 27 Sione akalubwilwa ku mulinganya,+ na bantu bakwe abakabwela, bakalubwilwa ku bulungami.+ 28 Kabili ukuwa kwa bacipondoka no kwa babembu kukacitikila pamo,+ kabili abasha Yehova bakapwa.+ 29 Pantu bakekatwa insoni pa miti iikalamba iyo mwatemenwe,+ kabili mukalengwa insoni pa mulandu wa mabala mwasala.+ 30 Pantu mukaba ngo muti uukalamba uo amabula ya uko yalebonsa,+ kabili nge bala umwabula amenshi. 31 Kabili umwaume wa maka akaba ngo mwando uushakosa,+ kabili umulimo wakwe ukaba ngo lusase; kabili bonse babili bakapiila pamo, ukwabula uwa kushimya.”+

2 Ifi e fyo Esaya mwana Amose amwene pali Yuda na pali Yerusalemu:+ 2 Nomba mu nshiku sha ku mpela,+ e mo ulupili lwa ng’anda+ ya kwa Yehova lukapampamikwa ukucila pa muulu wa mpili,+ kabili lukasumbulwa ukucila utupili;+ kabili inko shonse shikakonkomokelako.+ 3 Kabili inko ishingi shikayako no kutila: “Iseni,+ natunine tuleya ku lupili lwa kwa Yehova, tuleya ku ng’anda ya kwa Lesa wa kwa Yakobo; kabili akatusambilisha imibele yakwe, kabili tukenda mu nshila shakwe.”+ Pantu mu Sione e mukafuma amafunde, ne cebo ca kwa Yehova cikafuma mu Yerusalemu.+ 4 Kabili akapingula inko+ no kulungika imilandu+ ya bantu na bantu.+ Kabili bakafula bapanga babo ukuti babe baplao na mafumo yabo ukuti yabe ifya kutungwilako imiti.+ Uluko talwakemishe uluko lunankwe ulupanga, nangu ukusambilila inkondo na kabili.+

5 Mwe ba mu ng’anda ya kwa Yakobo, iseni kabili natwende mu lubuuto lwa kwa Yehova.+

6 Pantu namulekelesha abantu benu, aba mu ng’anda ya kwa Yakobo.+ Pantu icalo nacisulamo ifya ku Kabanga,+ kabili bacita ifinjelengwe+ nga baPelishiti, kabili baisulamo abana ba bena fyalo.+ 7 Kabili icalo cabo caisulamo silfere na golde, ne fyuma fyabo te fya kupenda.+ Kabili icalo cabo caisulamo bakabalwe, na maceleta yabo te ya kupenda.+ 8 Kabili icalo cabo caisulamo tulesa twa fye.+ Balekontamina ifyo bapanga ku minwe yabo, ne fyo iminwe yabo yapanga.+ 9 Kabili umuntunse naseebana, no muntu nasaalulwa, kabili te kuti mubabelele uluse.+

10 Ingila mu cilibwe kabili belama mu lukungu pa mulandu wa kutiinya kwa kwa Yehova, na pa mulandu wa bucindami bwa kupulamo kwakwe.+ 11 Amenso ya matutumuko aya muntunse yakacefiwa, na bantu abaituntumba bakapwa;+ kabili Yehova eka e ukasansabikwa muli ubo bushiku.+ 12 Pantu bushiku bwa kwa Yehova wa mabumba.+ Buli pali onse uwaitutumuna kabili uwatumpuka na pali onse uwasansabikwa nelyo uwasuulwa;+ 13 na pa mikedari yonse iya mu Lebanone+ iitali kabili iyasansabikwa na pa miti iikalamba yonse iya mu Bashani;+ 14 na pa mpili shonse ishitali na pa tupili tonse utwasansabikwa;+ 15 na pa lupungu lonse ulwalepa na pe linga lyonse;+ 16 na pa fimato fyonse ifya ku Tarshishi+ na pa mato yonse ayasuma. 17 Kabili abantu abaituntumba bakapwa, na bantu aba cilumba bakapwa;+ kabili Yehova eka e ukasansabikwa muli ubo bushiku.+

18 Kabili tulesa twa fye tukaloba fye tonse.+ 19 Kabili abantu bakengila mu ncengo sha mu fimabwe na mu filindi fya mu mushili pa mulandu wa kutiinya kwa kwa Yehova na pa mulandu wa bucindami bwa kupulamo kwakwe,+ ilyo akema pa kuti isonde litutume.+ 20 Muli ubo bushiku umuntunse akapoosela batondo no tususu tulesa twakwe utwa fye utwa silfere no twa golde uto bamupangiile ukuti aletukontamina,+ 21 pa kuti akengile mu ncengo na mu ninga, pa mulandu wa kutiinya kwa kwa Yehova na pa mulandu wa bucindami bwa kupulamo kwakwe,+ ilyo akema pa kuti isonde litutume. 22 Pa mulandu wenu, talukeni ku muntunse, uo umupu wakwe waba mu myona+ yakwe, pantu mulandu nshi uwa kumubikilako amano?+

3 Pantu moneni! Shikulu wa cine,+ Yehova wa mabumba, alefumya mu Yerusalemu+ na mu Yuda ubwafwilisho bwa misango yonse, ubwafwilisho bonse ubwa fya kulya no bwafwilisho bonse ubwa menshi,+ 2 impalume no mushilika, umupingushi na kasesema,+ na kabuka no mukalamba,+ 3 cilolo wa pa bantu amakumi yasano (50)+ no mwaume wacindikwa nga nshi ne mpanda mano no wacenjela mu kucita ifinjelengwe, no waishiba ukwangasha insoka.+ 4 Kabili nkalenga abalumendo ukuba bacilolo babo, kabili bakateka abankalwe bakabateka.+ 5 Kabili abantu bakacushanya, umuntu ukucusha umunankwe.+ Umulumendo akemina umukote,+ no wasuulwa akemina uwacindikwa.+ 6 Pantu umo umo akekata munyina mu ng’anda ya kwa wishi, aleti: “Naukwata ica kufwala ca ku nse. Isa uletuteka,+ kabili uteke ne fi ifitantaala.” 7 Akasansula ishiwi muli ubo bushiku, akatila: “Nshabe uwa kukaka pa filonda; kabili mu ng’anda yandi tamuli umukate nangu ica kufwala. Mwimbika ukuba kateka pa bantu.”

8 Pantu Yerusalemu naipununa, na Yuda nawa,+ pantu ululimi lwabo ne micitile yabo ya kulwisha Yehova,+ pa kutalama mu menso yakwe aya bukata.+ 9 Imimonekele ya pa menso yabo ilabashinina,+ kabili balanda pa lubembu lwabo ulwaba ngo lwa ku Sodomu.+ Tabaalufisa. We bulanda ku myeo yabo! Pantu bailetela ubucushi.+

10 Soseni amuti umulungami cikamuwamina,+ pantu akalya ifisabo fya micitile yakwe.+ 11 We bulanda ku mubifi!—Ubucushi bwamwishila; pantu ifyo acitile e fyo bakamucita!+ 12 Abantu bandi bena, bakapitao babo ba buluku, kabili abanakashi e babateka.+ Mwe bantu bandi, abalemutungulula balemulubansha,+ kabili nabafulunganya inshila shenu.+

13 Yehova naiminina pa kuti alwe kabili naiminina pa kuti apingule abantu na bantu.+ 14 Yehova umwine akapingula abakalamba ba mu bantu bakwe na bacilolo babo.+

“Kabili imwe mwaoca ibala lya myangashi. Ico baibile umulanda cili mu mayanda yenu.+ 15 Ni mwi mulosha pa kufwanta abantu bandi, no kushonaula ifinso fya balanda?”+ e fyo Shikulu Mulopwe, Yehova wa mabumba alanda.

16 Kabili Yehova atila: “Pa mulandu wa kuti abana banakashi aba kwa Sione nabaituumika kabili benda nabatongomona imikoshi no kulolesha kubimbula kubimbula, balemeka pa kwenda, kabili balelisha ifinkwingili ku makasa yabo,+ 17 Yehova na o akalenga icilongwe ca ku mitwe ya bana banakashi aba kwa Sione ukuba ne mpele,+ kabili Yehova akafimbula pa mpumi shabo.+ 18 Muli ubo bushiku Yehova akafumyapo ukuyemba kwa finkwingili no kwa twa kukaka ku mutwe no kwa twa kufwala mu mukoshi utwapala umweshi,+ 19 ukuyemba kwa masikiyo no kwa makoosa ne fifimbo,+ 20 ukwa fitambala no kwa tuminyololo twa ku makasa no kwa fya kukaka pa cifuba+ ne misashi ya fyanunkila ne mpinga,+ 21 ukwa nindaminwe no kwa tumipeto twa ku myona,+ 22 ukwa fya kufwala fyacindama no kwa fya kufwala fya ku nse no kwa nsalu no kwa tufyola, 23 no kwa filola+ fya mu minwe no kwa fya kufwala no kwa fitambala+ no kwa fifimbo ifikalamba.+

24 “Nomba apafwile ukuba amafuta ya balsamu+ pakaba fye icena icanunka piipi; kabili apafwile ukuba umushipi pakaba intambo; na pafwile ukuba umushishi wasakulwa bwino pakaba ipala;+ kabili apafwile ukuba ica kufwala icisuma pakaba ulusamu;*+ apafwile ukuba ukuyemba pakaba ululembo lwashutikwa.+ 25 Abaume bobe bakafwa ku lupanga, na bantu bobe aba maka bakafwila mu bulwi.+ 26 Kabili iminshi yakwe ikaloosha+ no kuba no bulanda, kabili akashala icibolya. Akekala pa nshi pa mushili.”+

4 Awe muli ubo bushiku abanakashi cinelubali (7) bakekata umwaume umo,+ no kutila: “Twakulailiisha no kuifwika fwe bene; leka fye twinikweko ishina lyobe pa kuti ukuseebana kwesu kupwe.”+

2 Muli ubo bushiku ico Yehova akamesha+ cikaba ca kuyemfeshako kabili ica kuleta umucinshi,+ ne fisabo fya mu calo fikaba ifya kuitakishishapo+ kabili ifisuma ku ba mu Israele abakapusuka.+ 3 Kabili abakashalapo mu Sione na bakashalapo mu Yerusalemu baketwa aba mushilo kuli ena,+ onse uwalembwa ukuti akaba no mweo mu Yerusalemu.+

4 Ilyo Yehova akafumyapo ubusali bwa bana banakashi ba kwa Sione+ no kusamba+ umulopa+ wa Yerusalemu uuli muli wena ku maka ya bupingushi na ku maka ya mulilo,+ 5 Yehova kabili akapanga ikumbi inshita ya kasuba ne cushi, no lubingu lwa mulilo+ ukubalika ubushiku+ pa ncende yonse iyapampamikwa iya mu Lupili lwa Sione+ na pa ncende yakwe iya kulonganinapo; pantu pa bukata bonse pakaba umwa kuuba.+ 6 E lyo kukaba insakwe ya kuubamo icikabilila akasuba,+ kabili umwa kuuba no kubelama ku mfula iikalamba na ku mfula ya cimwela.+

5 Lekeni nyimbile umutemwikwa wandi ulwimbo lwa pa mutemwikwa wandi ulwa pe bala lyakwe ilya myangashi.+ Umutemwikwa wandi alikwete ibala pa mbali ya kapili ka mufundo. 2 Awe aliliminemo no kufumyamo amabwe no kulimbamo umwangashi wakashika uusuma, no kukuula ulupungu pa kati ka liko.+ Kabili aimbilemo ne ca kukaminamo imyangashi.+ Kabili alesubila ukuti likatwala imyangashi,+ lelo lyatwele imyangashi ya mpanga.+

3 “E ico nomba, mwe bekashi ba mu Yerusalemu na mwe baume ba kwa Yuda, pinguleni ine ne bala lyandi ilya myangashi.+ 4 Cinshi cishele ukucitwa kwi bala lyandi ico nshacita kale?+ Nga kanshi mulandu nshi lyatwalila imyangashi ya mpanga ilyo nacetekele ukuti likatwala imyangashi iisuma? 5 E ico nomba lekeni mwebe ico ndecita kwi bala lyandi: Kukaba ukufumyako ulubao lwa liko,+ e lyo no kulyoca.+ Kukaba ukuwisha icibumba ca liko ica mabwe, kabili likaba cifulo ca kunyantaulapo.+ 6 Kabili nkalyonaula.+ Tabakalitungwile, nangu kulimamo.+ Kabili mukamena ifimpusa fya myunga na mankumba;+ kabili nkeba amakumbi ukukanalokesha imfula pali lyena.+ 7 Pantu ibala lya myangashi+ ilya kwa Yehova wa mabumba ni ng’anda ya kwa Israele, na baume ba kwa Yuda e filimwa ifyo atemenwe.+ Kabili alesuubila umulinganya,+ nomba, moneni! muli ukutoba amafunde; alesuubila ubulungami, nomba moneni! muli ukulila.”+

8 We bulanda ku balundanya ing’anda ku ng’anda,+ kabili abalundanya ibala kwi bala mpaka kwabula incende+ kabili imwe mwalengwa ukwikala mweka mu calo! 9 Yehova wa mabumba nalapa mu matwi yandi ukuti amayanda ayengi, nangu ca kuti yakulu kabili yasuma, yakaba ica kupapusha, umwabula umwikashi.+ 10 Pantu nangu fye maeka ikumi (10)+ aye bala lya myangashi yakafumya fye imbeketi* imo iya mwangashi,+ na mwi dalamu limo ilya mbuto mukafuma fye itepe limo.+

11 We bulanda ku bashibuka ku macaca ukuti bafwaye ifya kunwa ifikola,+ abakokola ukufika icungulo bushiku ukuti umwangashi ubakole!+ 12 Kabili pa mitebeto yabo pali nsango ne cilimba ca nsale, akaoma ka nyenjele ne cimpeeta, no mwangashi;+ lelo tabalolesha pa mulimo wa kwa Yehova, kabili umulimo wa minwe yakwe tabaumona.+

13 E ico abantu bandi bakaya muli bunkole pa mulandu wa kubulwa ukwishiba;+ na bashimucindikwa babo bakekatwa insala,+ kabili ibumba lyabo likekatwa icilaka.+ 14 E ico Inshiishi* yaikusha kabili yaisula akanwa ka iko ukucila mu cipimo;+ kabili ubucindami bwakwe, ne bumba lyakwe ne cimfundawila cakwe no muntu uuli ne nsansa, fikaya muli yena.+ 15 Kabili umuntunse akakontama, no muntu akacefiwa, kabili nangu fye menso ya bashimucindikwa yakacefiwa.+ 16 Na Yehova wa mabumba akalumbukila ku mulinganya,+ kabili Lesa wa cine, Uwa Mushilo,+ akailenga ukuba uwa mushilo ku bulungami.+ 17 Kabili mulya utwana twa mpaanga tukalya, kwati ni mu milemfwe ya tuko; na balebeshi bakalya mu fibolya umwaleikala inama shaina.+

18 We bulanda ku batiinta ifilubo ku myando ya bufi, ne membu kwati ni ku myando ye celeta;+ 19 abatila: “Umulimo wakwe nawangufyanye; nawise bwangu, pa kuti tu-umone; kabili ukupanda amano ukwa Wa Mushilo wa kwa Israele nakupalame no kucitika, pa kuti tukwishibe!”+

20 We bulanda ku batila ubusuma bubi no bubi abati busuma,+ abatila imfifi lubuuto no lubuuto abati ni mfifi, abatila icalula calilowa ne calowa abati calilula!+

21 We bulanda ku ba mano mu menso yabo abene kabili abashilimuka ku finso fyabo abene!+

22 We bulanda ku banwensha umwangashi, na ku baume abakosa mu kusakanya ifya kunwa ifikola,+ 23 abatila umubifi mulungami pa mulandu wa mafisakanwa,+ kabili abapoka umulungami ubulungami bwakwe!+

24 E ico filya umulilo oca impimbili+ na filya icani icauma cipya ku mulilo, ishinte lyabo ilya mushila likanunka piipi,+ kabili iluba lyabo likaba ngo lukungu, pantu nabakaana amafunde ya kwa Yehova wa mabumba,+ na mashiwi ya Wa Mushilo wa kwa Israele nabayasuula.+ 25 E mulandu wine ubukali bwa kwa Yehova bwaishila pa bantu bakwe, kabili akatambulula ukuboko kwakwe pali bena no kubapuma.+ Kabili impili shikatenta,+ ne fitumbi fyabo fikaba ngo busali mu misebo.+

Kanshi e calenga ubukali bwakwe ukukanapwa, lelo ukuboko kwakwe kucili ukwatambalikwa. 26 Kabili aimya icishibilo ku luko lukalamba ulwa kutali,+ kabili alulishisha umunsoli ku mpela ye sonde;+ kabili, moneni! lukesa bwangu bwangu.+ 27 Tapali uunakile nangu uuleipununa pali bena. Tapali uuleshipula nangu uuleele. No mushipi uuli mu misana yabo tawakakakulwe, ne nshinga sha ku ndyato shabo tashakaputulwe pa kati;28 pantu imifwi yabo yalitwa na mata yabo nayapekanishiwa.+ Amabondo ya bakabalwe babo yakaba nge libwe ilyakosa,+ ne mipeto ya maceleta yabo nge cikuuku ca mwela.+ 29 Ukubuluma kwabo kwaba ngo kwa nkalamo, kabili babuluma nge misepela ya nkalamo.+ Kabili bakabuluma no kwikata ica kutaakanya no kucileta umutende, kabili takwakabe uwa kupususha.+ 30 Kabili bakacibulumina muli ubo bushiku ngo kubuluma kwa bemba.+ Kabili umuntu akalolesha pa calo, kabili, moneni! pali imfifi ya kulenga ubulanda;+ kabili no lubuuto lwa-aluka imfifi pa mulandu wa kupongoloka kwa mfula pa calo.

6 Mu mwaka Imfumu Usia yafwile+, ine namwene Yehova,+ naikala pa cipuna cakwe ica bufumu+ icasumbuka kabili icasansulwa, ne fya kufwala fyakwe fyaiswile mwi tempele.+ 2 Baserafi baiminine pa muulu wakwe.+ Umo umo ali na mapindo mutanda (6). Yabili alefimbilako pa menso,+ na yambi yabili alefimbilako ku makasa, e lyo yambi yabili alepupukilako. 3 Kabili baleankulana no kusosa abati: “Wa mushilo, wa mushilo, wa mushilo Yehova wa mabumba.+ Pe sonde ponse paisula ubukata bwakwe.” 4 Kabili amaingwe+ ya pa mwinshi yatendeke ukusunkana pa mulandu wa mashiwi ya balepunda, ne ng’anda yasukile yaisulamo icushi.+

5 Kabili natile: “We bulanda kuli ine! Pantu ndi fye ngo wafwa, pantu ndi muntu uwakowela imilomo,+ kabili njikala mu bantu abakowela imilomo;+ pantu amenso yandi nayamona Imfumu, Yehova wa mabumba, umwine!”+

6 E lyo serafi umo apupukile apo nali, kabili mu kuboko kwakwe mwali ilasha lya mulilo+ ilyo afumishe pa ciipailo ukubomfya ifya kumanikilako.+ 7 Kabili anjikete pa kanwa+ no kutila: “Mona! Ici cakumya imilomo yobe, kabili ifilubo fyobe fyapwa no lubembu lobe lwafuutwa.”+

8 Awe naumfwile ishiwi lya kwa Yehova lileti: “Nani ndetuma, kabili nani akaba inkombe yesu?”+ E lyo natile: “E po ndi! Ntumeni.”+ 9 E lyo atile: “Kabiye, no kusosa kuli aba bantu auti, ‘Umfweni imiku iingi, lelo mwi-iluka; kabili moneni imiku iingi, lelo mwi-ishiba.’+ 10 Lenga imitima ya aba bantu ukukunkuma,+ kabili lenga amatwi yabo ukukoma,+ kabili shibatika amenso yabo, pa kuti amenso yabo yemona kabili amatwi yabo yeumfwa, kabili pa kuti imitima yabo iumfwa no kuti bealuka no kupola.”+

11 E lyo natile: “Ukufika lilali, mwe Yehova?”+ Na o atile: “Mpaka imisumba ikabongoloke no kuba ifibolya, umwabula umwikashi, na mayanda yakabulemo abantunse, ne calo cikonaike cikasanguke icibolya;+ 12 kabili mpaka Yehova akaseseshe abantunse ukutali, kabili mpaka incende ya pa kati iya mu calo ikashale icibolya.+ 13 Kabili mu calo mukaba aba pe kumi,+ e lyo icalo cikapya ku mulilo na kabili, cikaba ngo muti uukalamba kabili ngo muti uwalulubala, uwa kuti nga waputulwa,+ kwashala icishiki;+ ne cishiki e cikaba umwana wa ciko uwa mushilo.”+

7 Nomba mu nshiku sha kwa Ahasi+ mwana Yotamu mwana Usia, imfumu ya Yuda, e mo Resini+ imfumu ya Siria na Peka+ mwana Remalia, imfumu ya Israele, baile ku musumba wa Yerusalemu mu kulwa na o, lelo bafililwe uku-ucimfya.+ 2 Kabili cashimikwe ku ba mu ng’anda ya kwa Davidi, ati: “Siria acetekele Efraimu.”+

Awe umutima wakwe ne mitima ya bantu bakwe yatendeke ukututuma, nga filya imiti ya mu mutengo itenkana ku mwela.+

3 Kabili Yehova atile kuli Esaya: “Fumina ku nse uyekumanya Ahasi, iwe na Sheari-yashubu+ umwana obe, ku mpela ya mufoolo+ wa cishiba ca pa muulu mu musebo walola ku mpanga ya kwa kacapa wa nsalu.+ 4 Kabili umwebe ati, ‘Uisunge kabili wisakamikwa.+ Witiina, kabili wileka umutima obe ututume+ pa mulandu wa fishiki fibili ifya iyi milando iilefuuka icushi, pa mulandu wa cipyu ca kwa Resini imfumu ya Siria no mwana wa kwa Remalia,+ 5 pantu Siria na Efraimu no mwana wa kwa Remalia nabakupangila amano ayabi, abati: 6 “Natuleya ku calo ca Yuda no kucibongolola kabili tucitule no kucibuula cibe cesu; kabili tubikemo imfumu imbi, umwana wa kwa Tabeele, abe imfumu, aleciteka.”+

7 “‘Yehova wa mabumba atila: “Te fyo cikaba kabili tacakacitike.+ 8 Pantu umukalamba mu Siria ni Damaseke, no mukalamba mu Damaseke ni Resini; mu myaka fye amakumi mutanda na isano (65) Efraimu akatobaulwa ica kuti takabe uluko lwa bantu.+ 9 Kabili umutwe wa kwa Efraimu ni Samaria,+ no mutwe wa kwa Samaria ni mwana Remalia.+ Nga tamuli ne citetekelo tamwakekale imyaka iingi.”’”+

10 E lyo Yehova akonkenyepo ukulanda na kabili kuli Ahasi, ati:11 “Lomba icishibilo kuli Yehova Lesa obe,+ ulenge cishike nge Nshiishi* nelyo ucilenge cilepe ukufika na ku muulu.” 12 Lelo Ahasi atile: “Nshalombe, kabili nshaeshe Yehova.”

13 Kabili atile: “Kutikeni, mwe ba mu ng’anda ya kwa Davidi. Bushe mulandu uunono kuli imwe ukutendusha abantu, pa kuti nomba muletendusha na Lesa wandi?+ 14 E ico Yehova umwine akamupeela icishibilo: Moneni! Umukashana+ akemita,+ no kufyala umwana mwaume,+ kabili akamwinika ishina lya kuti Imanuele. 15 Akalalya umukaka watikama no buci ilyo akeshiba ukukaana ububi no kusala ubusuma.+ 16 Pantu ilyo uyu mulumendo ashilaishiba ukukaana ububi no kusala ubusuma,+ icalo ca mfumu shibili isho uletiina nga nshi cikalekeleshiwa.+ 17 Yehova akaleta pali iwe+ na pa bantu bobe na pa ba mu ng’anda ya kwa wiso inshiku ishishabala ashibako ukutula pa bushiku Efraimu ashilile Yuda,+ e kuti, imfumu ya Asiria.+

18 “Nomba muli ubo bushiku, Yehova akalishisha umunsoli kuli balunshi ababa ku mpela ya tumifoolo utwafuma mu mumana wa Naelo utwa ku Egupti na ku nshimu+ shaba mu calo ca Asiria,+ 19 kabili fikesa no kwikala, fyonse, pa mikunkuluko ya mipokapoka na pa fimilale fya mabwe na pa mateshi ya myunga yonse na pa ncende sha menshi shonse.+

20 “Muli ubo bushiku, ukabomfya ica kubeyelako ca kwashima mu citungu ca Mumana,+ ukubomfya imfumu ya Asiria,+ Yehova akabeya umutwe no bupipi bwa ku makasa, kabili ici ica kubeyelako cikabeya no mwefu.+

21 “Nomba muli ubo bushiku umuntu akasunga umwana wa ng’ombe umukota uwa mu mukuni ne mpaanga shibili.+ 22 Nomba, pa mulandu wa kufulisha kwa mukaka, akalalya umukaka watikama; pantu umukaka watikama no buci+ e fyo onse uukashala mu calo akalalya.

23 “Nomba muli ubo bushiku icifulo conse umwali imiti ya myangashi ikana limo (1,000), iingashitwa mu ndalama sha silfere ikana limo,+ mukaba fye ifimpusa fya myunga ne fyani.+ 24 Umo akaya kulya ne mifwi no buta,+ pantu mu calo conse mukaba fye ifimpusa fya myunga ne fyani. 25 Kabili pa mpili shonse apo balesekwila ku lukasu pa kuti bafumyepo inseku, tamwakayepo pa mulandu wa kutiina ifimpusa fya myunga ne fyani; kabili cikasanguka icifulo umo ing’ombe shikalalya icani kabili umo impaanga shikalanyantaula.”+

8 Kabili Yehova anjebele ati: “Buula ilibwe ilyapaapaatala+ ilikalamba no kulembapo ukubomfya icilembelo ca muntunse ati, ‘Maheri-shalali-hashibashi.’ 2 Kabili leka nkwate inte sha cishinka+ isha kunjikalilako ubunte,+ e kuti Uria shimapepo+ na Sekaria mwana Yeberekia.”

3 Awe napaleme kuli kasesema umwanakashi, na o alimite kabili umuya inshiku afyele umwana umwaume.+ Yehova nomba atile kuli ine: “Umwinike ati Maheri-shalali-hashibashi, 4 pantu ilyo uyu mwana umunono ashilatendeka ukulanda+ ati, ‘Tata!’ na ‘Mayo!’ abantu bakasenda ifyuma fya mu Damaseke ne fyapokololwa mu Samaria no kufitwala pa ntanshi ya mfumu ya ku Asiria.”+

5 Kabili Yehova akonkenyepo ukusosa kuli ine, ati: 6 “Apo aba bantu nabakaana+ amenshi ya ku Shiloa+ ayapita bwino, kabili kuli ukusekelela+ pali Resini no mwana wa kwa Remalia;+ 7 e ico, moneni! Yehova aleleta pali bena+ amenshi ya maka kabili ayengi aya mu Mumana,+ imfumu ya Asiria+ no bucindami bwa iko bonse.+ Kabili akanina pa milonga yakwe yonse no kupoosa mu lulamba lwakwe lonse 8 no kupita mu Yuda. Akaba nge lyeshi no kupita.+ Akafika mu mukoshi.+ Kabili akatambulula amapindo+ yakwe pa kuti esushe mu bwipi bwa calo cobe, we Imanuele!”+

9 Baceneni, na imwe mukatobaulwa; kabili kutikeni, bonse mwe ba mu fitungu fya pe sonde ifyaba ukutali!+ Ipekanyeni,*+ lelo mukatobaulwa!+ Ipekanyeni lelo mukatobaulwa! 10 Pangeni amapange, na yo yakafulunganishiwa!+ Soseni amashiwi yonse ayo mulefwaya, na yo tayakacitike, pantu Lesa ali na ifwe!+ 11 Ukuboko kwa kwa Yehova ukwa maka kwali pali ine, ukuti anenge ukwaluka no kuleka ukwenda mu nshila sha aba bantu, atile:12 “Mwilatila, ‘Kupangana!’ kuli fyonse ifyo aba bantu baletila, ‘Kupangana!’+ kabili ico batiina, imwe mwilacitiina, nangu ukucitutuma.+ 13 Yehova wa mabumba e o mulemona uwa mushilo,+ kabili e o muletiina,+ kabili e ufwile ukumututumya.”+

14 Kabili akaba incende ya mushilo;+ lelo ilibwe lya kuipununako kabili icilibwe ca kupunwisha+ ku mayanda yonse yabili aya kwa Israele, akaba ulukose kabili iciteyo ku bekashi ba mu Yerusalemu.+ 15 Kabili abengi pali bena bakaipununa no kuwa no kutobaulwa, no kwikatwa mu citeyo.+

16 Funga icalembwa ca bunte,+ kakatika ifunde pa basambi bandi!+ 17 Kabili nkalalolela Yehova,+ uulefisa icinso cakwe ku ba mu ng’anda ya kwa Yakobo,+ kabili e o nkasuubila.+

18 Moneni! Ine na bana abo Yehova ampeela+ tuli fishibilo+ kabili ifipesha amano mu Israele ukufuma kuli Yehova wa mabumba, uwikala mu Lupili lwa Sione.+

19 Kabili nga basosa kuli imwe abati: “Ipusheni ku bomfwana ne mipashi+ atemwa kuli balya abasobela, abalongofyanya+ no kutepelesha,” bushe te kuli Lesa wabo abantu bonse bafwile ukwipusha?+ Bushe umuntu epushisheko aba mweo ku bafwa?+ 20 Ipusheni ku mafunde na ku bunte!+

Cine cine bakalalanda ukulingana na ya mashiwi+ lelo ulubuuto lwa ku macaca tabakalumone.+ 21 Kabili onse akapita mu calo no bucushi kabili ne nsala;+ kabili pa mulandu wa kuti ali ne nsala na pa mulandu wa kukalipa, akalapisha imfumu yakwe na Lesa+ wakwe kabili akapunamina ku muulu. 22 Kabili akalolesha pa calo, awe, moneni! ukucululuka ne mfifi,+ ukufiita fititi, amacushi no kufiita ukwabula ulubuuto.+

9 Lelo, imfifi tayakabe filya cali ilyo mu calo mwali ubucushi, nga filya cali ilyo umuntu asaalwile icalo ca kwa Sebuluni ne calo ca kwa Naftali+ na lintu pa numa umo acilengele ukucindikwa+—inshila ya kuli bemba, mu citungu ca Yordani, Galili wa bena fyalo.+ 2 Abantu abaikele mu mfifi nabamona ulubuuto ulukalamba.+ E lyo abaikala mu calo ca mfifi iikalamba,+ ulubuuto nalubabalikila.+ 3 Naulenga uluko ukufulamo abantu;+ naululenga ukusekelela nga nshi.+ Nabasekelela kuli iwe ngo kusekelela kwa mu nshita ya kulobolola,+ bali nga baleanga pa kwakana ifyapokololwa.+

4 Pantu ikoli lya cipe+ cabo ne nkonto iili pa mabeya yabo, umutambu wa ulebapatikisha ukubomba,+ naufitobaula tupimfya tupimfya nga mu bushiku Midiani acimfiwe.+ 5 Pantu insapato sha bulwi shonse isha ulenyantaula+ ne nshindo pa nshi ne nsalu iyalamba ku mulopa fyapya, fyaba ifya kulya fya mulilo.+ 6 Pantu umwana natufyalilwa,+ umwana umwaume napeelwa kuli ifwe;+ kabili bukateka bukaba pa kubeya kwakwe.+ Kabili akenikwa ati Kabilo wa cipesha amano,+ Lesa wa maka,+ Wishi wa pe,+ Cilolo wa mutende.+ 7 Ukuteka+ kwakwe kukaba fye konse konse na ku mutende wakwe takwakabe impela,+ pa cipuna ca bufumu ica kwa Davidi+ na pa bufumu bwakwe pa kuti akabupampamike+ no kubukosesha ku mulinganya+ na ku bulungami,+ ukufuma nomba mpaka umuyayaya. Ukupimpa kwa kwa Yehova wa mabumba kukacita ici.+

8 Kwali amashiwi ayo Yehova atumine pali Yakobo, kabili yawilile pali Israele.+ 9 Kabili abantu bakayeshiba,+ bonse fye, Efraimu na bekashi ba mu Samaria,+ pa mulandu wa kuitutumuna na pa mulandu wa misuula ya mitima yabo pa kusosa abati:+ 10 “Amatafwali nayawa, lelo tukakuulila na mabwe yabaswa.+ Imikunyu+ naitemwa, lelo tukapyanikapo imikedari.” 11 Kabili Yehova akemisha Resini ifibambe fyakwe, kabili abalwani bakwe akabacincisha,+ 12 Siria ukufuma ku kabanga+ na baPelishiti ukufuma ku numa,+ kabili bakaasamuna akanwa no kulya Israele.+ Kanshi e calenga ubukali bwakwe ukukanapwa, lelo ukuboko kwakwe kucili ukwatambalikwa.+

13 Kabili abantu tababwelela ku ulebapuma,+ kabili tabafwaya Yehova wa mabumba.+ 14 Na Yehova akaputula muli Israele umutwe+ no mucila,+ icilepuuka ne tete, mu bushiku bumo.+ 15 Umukalamba kabili uwacindikwa nga nshi e mutwe,+ na kasesema uufunda ifya bufi e mucila.+ 16 Kabili abaletungulula aba bantu e balebalufya;+ kabili abaletungululwa, e balefulunganishiwa.+ 17 E co Yehova ashakasekelele pa balumendo babo,+ kabili abana ba nshiwa na bamukamfwilwa babo takababelele uluse; pantu bonse basangu+ kabili balacita ifyabipa na kanwa konse kasosa ifyabulamo amano. Kanshi e calenga ubukali bwakwe ukukanapwa, lelo ukuboko kwakwe kucili ukwatambalikwa.+

18 Pantu ukucita ifyabipa kulepya ngo mulilo;+ kukalya ifimpusa fya myunga ne fyani.+ Kukapya ku mulilo mu mateshi ya mu mutengo,+ kabili yakafutumuka ngo kufutumuka kwa cushi.+ 19 Ku bukali bwa kwa Yehova wa mabumba icalo cikapya, na bantu bakaba nge ca kulya ku mulilo.+ Takwakabe uukabelela nangu fye ni munyina uluse.+ 20 Kabili umuntu akaputula umunofu wa ku kulyo lelo akaba ne nsala; kabili umuntu akalya umunofu wa ku kuso, lelo tabakekute.+ Bonse bakalya umunofu wa ku maboko yabo,+ 21 Manase akalya Efraimu, na Efraimu akalya Manase. Bonse babili bakemina Yuda.+ Kanshi e calenga ubukali bwakwe ukukanapwa, lelo ukuboko kwakwe kucili ukwatambalikwa.+

10 We bulanda ku bapanga ifipope ifyabipa+ na ku balemba lyonse, abalemba amafya yeka yeka, 2 pa kuti belubulwila umulanda umulandu no kufyenga abacula mu bantu bandi,+ pa kuti basende bamukamfwilwa, no kusampa ifipe fya bana ba nshiwa!+ 3 Kabili cinshi mukacita pa bushiku mukapempulwa+ na pa bonaushi, ilyo bwaisa ukufuma ukutali?+ Ni kuli nani mukafulumukila pa kuti amwafwe,+ kabili ni kwi mukasha ubucindami bwenu?+ 4 Bushe tamwakakontame fye ku bafungwa na bantu ukufwila pamo na bo baipaya?+ Kanshi e calenga ubukali bwakwe ukukanapwa, lelo ukuboko kwakwe kucili ukwatambalikwa.+

5 “Eya, we Asiria,+ inkonto ya bukali bwandi,+ kabili umutambu uuli mu minwe yabo ku kunkandilako! 6 Nkamutuma ku luko lwa basangu,+ kabili nkamweba ukuya ku bantu nafulilwa,+ pa kuti musampe no kupokolola ifintu ifingi no kululenga ukuba apa kunyantaula nge loba lya mu musebo.+ 7 Nangu te fyo aba, akafwaya ukucita ifi; nangu ca kuti umutima wakwe te fyo ulefwaya, akapanga ukucita ifi, pantu mu mutima wakwe+ alefwaisha ukulofya no konaula inko ishingi.+ 8 Pantu akatila, ‘Bushe bacilolo bandi te shamfumu?+ 9 Bushe Kalno+ taba fye nga Karikemishi?+ Bushe Hamati+ taba fye nga Aripadi?+ Bushe Samaria+ taba fye nga Damaseke?+ 10 Lyonse ilyo ukuboko kwandi kwafika ku mabufumu ya kalesa ka fye ako ifimpashanya fya kako ifyabaswa fyafula ukucila filya ifyaba mu Yerusalemu na Samaria,+ 11 bushe ifyo nkacita kuli Samaria na kuli tulesa twakwe utwa fye,+ te fyo nkacita na kuli Yerusalemu na ku tulubi twakwe?’+

12 “Nomba ilyo Yehova apwisha umulimo wakwe onse mu lupili lwa Sione na mu Yerusalemu, nkalubulwisha imfumu ya Asiria pa mulandu wa misuula ya mu mutima wa iko e lyo no kuitakisha kwa menso ya iko.+ 13 Pantu atile, ‘Nkacita ici ku maka ya kuboko kwandi,+ kabili na mano yandi, pantu ndi wa mucetekanya; kabili nkafumyapo imipaka ya bantu na bantu,+ ne fyo batuulika nkasampa,+ kabili nkawisha abekashi ngo wa maka.+ 14 Kabili ukuboko kwandi+ kukafika ku fyuma+ fya bantu na bantu kwati ni pa cinsa; kabili nga filya umuntu alonganika amani ayalekeleshiwa, ine nkalonganya isonde lyonse, kabili takwakabe uukalapampaila amapindo yakwe nelyo ukwasama nangu ukulongofyanya.’”

15 Bushe isembe kuti lyaituntumba pa muntu uulelibomfya ukutemenako, nelyo bushe soo kuti yaikusha pa uleibomfya ukuputwilako, kwati umutambu kuti watungulula abawimishe, kwati inkonto kuti yatungulula uisendele?+ 16 E ico Shikulu wa cine, Yehova wa mabumba, akalatuma pa baina bakwe ubulwele bwa kondoloka,+ kabili mwi samba lya bukata bwakwe mukalapya ngo kupya kwa mulilo.+ 17 Kabili Ulubuuto+ lwa kwa Israele lukaba umulilo,+ no Wa Mushilo wakwe akaba ulubingu;+ kabili lukabilima no koca ifyani fyakwe ne fimpusa fyakwe ifya myunga+ mu bushiku bumo. 18 Kabili akapwisha ubucindami bwa mutengo wakwe no bwe bala lyakwe ilya fisabo,+ kabili bukaba ngo kondoloka kwa mulwele.+ 19 Kabili imiti imbi iya mu mutengo wakwe, ikaba iinono fye ica kuti no mwaice fye kuti aipenda.+

20 Nomba muli ubo bushiku abashalapo muli Israele+ na bafulumuka pa ba mu ng’anda ya kwa Yakobo tabakabwekeshepo ukushintilila pa ulebapuma,+ kabili bakashintilila pali Yehova, Uwa Mushilo wa kwa Israele,+ ne cishinka.+ 21 Abakashalapo bakabwela, abashalapo kuli Yakobo, bakabwelela kuli Lesa Wa Maka.+ 22 Pantu nangu ca kuti abantu bobe bakaba ngo mucanga wa muli bemba,+ we Israele, abakashalapo fye e bakabwela.+ Ubupingushi bwa kulofya+ ubwapingulwa bukalaishila mu bulungami,+ 23 pantu Shikulu Mulopwe, Yehova wa mabumba, akalofya+ kabili akapingula ubupingushi bwakosa mu calo conse.+

24 E ico Shikulu Mulopwe,+ Yehova wa mabumba, atila: “Mwitiina, mwe bantu bandi mwe baikala mu Sione,+ pa mulandu wa kwa Asiria, uwalemupuma+ ku nkonto kabili uwaleimya umutambu wakwe pali imwe filya Egupti acitile.+ 25 Pantu kwashala panono, ubukali+ bwandi ne cipyu candi fikapwila muli bena, ica kuti bakaloba.+ 26 Kabili Yehova wa mabumba akemya ubwembya+ pali ena nga filya cali ilyo Midiani acimfiwe pa cilibwe ca Orebu;+ kabili umutambu wakwe ukaba pali bemba,+ kabili akawimya filya acitile kuli Egupti.+

27 “Nomba muli ubo bushiku icisendo cakwe cikafuma pa kubeya kobe,+ ne koli lyakwe likafuma pa mukoshi obe,+ kabili ikoli likonaulwa+ pa mulandu wa mafuta.”

28 Naisa pali Ayati;+ napita muli Migrone; asha ifipe fyakwe pa Mikmashi.+ 29 Nabaabuka icabu, Geba+ cifulo cabo ica kutuushishamo ubushiku, Rama+ natutuma, Gibea+ wa kwa Shauli ena nafulumuka. 30 Pundisha, we mwana mwanakashi Galimu.+ Kutika, we Laisha. We wacushiwa, we Anatote!+ 31 Mademena nafulumuka. Abekashi ba mu Gebimu bena nabafwaya umwa kuuba. 32 Akeminina mu Nobu+ ilyo kucili akasuba. Alesunsha ukuboko kwakwe ne cipyu ku lupili lwa mwana mwanakashi Sione, akapili ka mu Yerusalemu.+

33 Moneni! Shikulu wa cine, Yehova wa mabumba, alesaila imisambo kabili ilepona ukupona kwabipisha;+ kabili iitali aleitema, ne yalepa aleipifya.+ 34 Kabili akatema imiti ya mu mutengo ku cela, kabili Lebanone akacimfiwa ku wa maka.+

11 Kabili kukapuuka akamusambo+ ku cishiki ca kwa Yese;+ kabili mu mishila yakwe mukapuuka+ ululembelya.+ 2 Kabili umupashi wa kwa Yehova ukekala pali ena,+ umupashi wa mano+ kabili uwa kwiluka,+ umupashi wa kupanda amano kabili uwa maka,+ umupashi wa kwishiba+ kabili uwa kutiina Yehova;+ 3 kabili akalasekelela mu kutiina Yehova.+

Ena takapingule ukulingana ne fyo amona fye, nangu ukukalipila ukulingana ne fyo aumfwa fye.+ 4 Lelo akapingula abalanda mu bulungami,+ no kufunda abafuuka ba pe sonde mu bololoke. Kabili akapuma isonde ku nkonto ya mu kanwa kakwe;+ kabili akepaila umubifi ku mupashi wa mu kanwa kakwe.+ 5 Kabili ubulungami bukaba e mushipi wa mu musana wakwe,+ ne cishinka cikaba umushipi wa mu musana wakwe.+

6 No mumbulu ukekala inshita inono na kana ka mpaanga,+ kabili imbwili ikalaala pamo na kana ka mbushi, na kana ka ng’ombe no mwana wa nkalamo+ na kanama akaina fikekala pamo;+ kabili umwaice e ukalaficema. 7 Kabili ing’ombe na bere fikaliila pamo; utwana twabo tukalaala pamo. Ne nkalamo ikalya icani nge ng’ombe.+ 8 Kabili umwana uonka akaangala pa bwendo bwa kwa ngoshe;+ no mwana wasumunwa akabika ukuboko kwakwe pa bwendo bwa nsoka ya busungu. 9 Tafyakacite ububi+ nangu ubonaushi monse mu lupili lwandi ulwa mushilo;+ pantu isonde likesulamo ukwishiba Yehova filya amenshi yaisula muli bemba.+

10 Nomba muli ubo bushiku,+ kukaba umushila wa kwa Yese+ uukeminina ukuba icishibilo ku bantu na bantu.+ Inko shikalukila kuli ena no kumwipusha,+ kabili icifulo cakwe apa kutuushisha cikaba icacindama.+

11 Kabili muli ubo bushiku, Yehova na kabili akatambika ukuboko kwakwe, umuku wa bubili,+ pa kuti abuule abashalapo pa bantu bakwe abakashalapo ukufuma ku Asiria+ na ku Egupti+ na ku Patrose+ na ku Kushi+ na ku Elamu+ na ku Shinari+ na ku Hamati na ku fishi fya pali bemba.+ 12 Kabili akemisha inko icishibilo no kulonganika abapaswa ba kwa Israele;+ na basalangana aba kwa Yuda akabalonganya ukufuma ku mpela shine ishe sonde.+

13 Kabili ubufuba bwa kwa Efraimu bukapwa,+ na balecusha Yuda bakaloba. Efraimu ena takomfwile Yuda ubufuba, nangu ni Yuda takacushe Efraimu.+ 14 Kabili bakapupukila pa mikunkuluko ya baPelishiti ku masamba;+ bakasampila pamo ifya bana ba ku Kabanga.+ Bakacimfya abena Edomu na bena Moabu,+ na bana ba kwa Amone bakaba abatekwa babo.+ 15 Kabili Yehova akalofya icinshoko ca bemba wa ku Egupti,+ no kusunsha ukuboko kwakwe pa Mumana+ ku mupu wakwe. Kabili akaupuma mu milonga ya uko cinelubali (7), kabili akalenga abantu ukwenda ne ndyato shabo.+ 16 Kabili kukaba umusebo+ ukufuma mu Asiria ku bashalapo+ mu bantu bakwe abakashalapo,+ nga filya kwali abashelepo kuli Israele mu bushiku afumine mu calo ca Egupti.

12 Kabili muli ubo bushiku,+ ukatila: “Ndemutasha, mwe Yehova, pantu nangu ca kuti mwalinkalipile, ubukali bwenu nomba nabupwa,+ kabili mwansansamusha.+ 2 Moneni! Lesa e pusukilo lyandi.+ Nkacetekela kabili nshakatiine;+ pantu Jah Yehova e bukose+ bwandi kabili e maka+ yandi, kabili e pusukilo lyandi.”+

3 Mukalasekelela ilyo muletapa amenshi mu tumfukumfuku twe pusukilo.+ 4 Kabili muli ubo bushiku mukatila: “Tasheni Yehova, mwe bantu!+ Lilileni kwi shina lyakwe.+ Shimikileni abantu imicitile yakwe.+ Shimikeni ukuti ishina lyakwe nalisansulwa.+ 5 Imbileni Yehova,+ pantu nacita ifya kupapa.+ Ici cileshimikwa mwi sonde lyonse.

6 “Welesha no kupunda ne nsansa, we mwikashi wa mu Sione, pantu Uwa Mushilo wa kwa Israele mukalamba muli iwe.”+

13 Ubukombe bwaluma pali Babiloni+ ubo Esaya mwana Amose+ amwene mu cimonwa: 2 “Imyeni icishibilo+ pa lupili apashaba akantu. Bapundileni, bacebushisheni ku kuboko,+ ukuti bengile mu mpongolo sha bashimucindikwa.+ 3 Ine ninjeba abantu bandi aba mushilo ifya kucita.+ Ninjita na ba maka bandi ku kulanga ubukali bwandi,+ abantu bandi abaanga icine cine. 4 Kutikeni! Ibumba mu mpili, kabili kuli icongo icileumfwika kwati congo ca bantu abengi!+ Kutikeni! Intulubundi sha mabufumu, isha nko ishilonganikwe pamo!+ Yehova wa mabumba alelonganika abashilika ba nkondo.+ 5 Balefuma ku calo ca kutali,+ ku mpela ya muulu, Yehova ne fyanso ifya kukandilako, ku konaula isonde lyonse.+

6 “Welesheni,+ pantu ubushiku bwa kwa Yehova nabupalama!+ Bukaba bushiku bwa bonaushi ubwa Wa Maka Yonse.+ 7 E co amaboko yonse yakatompokela, e co no mutima onse uwa muntunse ukasungulukila.+ 8 Na bantu nabapapa.+ Ukufutauka no bukali bwa kupaapa nafibeshila; bakalipwa ngo mwanakashi uulepaapa.+ Baloleshanya no kupapa. Ifinso fyabo nafiwa.+

9 “Moneni! Ubushiku bwa kwa Yehova buleisa, bunkalwe kabili buleisa no bukali ne cipyu icikalamba, ku kulenga icalo ukuba ica kupapa,+ no konaula ababembu ba mu calo e lyo no kubafumyamo.+ 10 Pantu intanda sha mu muulu na mabumba ya shiko aya Kesili+ tafyakabalike; akasuba kakafiita pa kutula kwa kako, no mweshi tawakasanike ulubuuto lwa uko. 11 Kabili nkaleta ukukanda pa calo pa mulandu wa bubi bwa ciko,+ na pa babifi pa mulandu wa filubo fyabo. Kabili nkalenga icilumba ca baituntumba ukupwa, no kucefya amatutumuko ya bankalwe.+ 12 Kabili nkalenga umuntu ukwafya ukusanga ukucila golde iyo balopolola,+ no muntunse ukwafya ukusanga ukucila golde ya ku Ofiri.+ 13 E co nkalengela umuulu ukukalipa,+ ne sonde likatenta no kufuma pa cifulo ca liko pa mulandu wa bukali bwa kwa Yehova wa mabumba+ na pa mulandu wa bushiku bwa bukali bwakwe ubulepya ngo mulilo.+ 14 Nomba, nge mpombo iilelungwa kabili nge mpaanga ishishakwata uwa kushilonganya, bakaalukila,+ umuntu onse ku bantu bakwe; kabili bakafulumukila, umuntu onse ku calo cakwe.+ 15 Onse uwasangwa bakamulasa ulupanga, kabili bonse abaikatilwa pamo bakafwa ku lupanga;+ 16 na bana babo bakafwantaulwa ninshi balemonako.+ Bakapokololwa ifipe mu mayanda yabo, na baume bambi bakalaala na bakashi babo ku maka.+

17 “Moneni, ndebemisha abena Madai,+ abashimona silfere nga kantu, kabili abashatemwa golde. 18 Kabili amata yabo yakonaula abalumendo bonse.+ Kabili tabakomfwile ubufyashi bwa mwi fumo uluse;+ amenso yabo tayakomfwile abana baume ubulanda. 19 Kabili Babiloni, ubusuma bwa mabufumu,+ ukuyemba kabili ica kuitakishishapo ica bena Kaldi,+ akaba nga filya cali ilyo Lesa awishishe Sodomu na Gomora.+ 20 Takekalwemo,+ nangu ukubako ku nkulo ne nkulo.+ Kabili mulya umwina Arabia takabikemo itenti, na bacemi tabakaleke impaanga shabo ukulaalamo. 21 Kabili mulya e mukalaala inama ishikala mu fitungu umwabula amenshi, na mayanda yabo yakesulamo ifipululu.+ Kabili mulya e mo bamwakatala bakekala, ne fibanda ifimoneka nge mbushi e mo fikala-angala.+ 22 Kabili bamumbwe bakalalila mu mayanda yakwe aya pa malinga,+ ne nsoka iikalamba ikaba mu masano ayasuma. Kabili inshita yakwe naipalama, ne nshiku shakwe tashakatantalile.”+

14 Pantu Yehova akabelela Yakobo+ uluse, kabili akasala Israele;+ kabili akabapeela ukutuusha mu calo cabo,+ no mulebeshi akailunda kuli bena, kabili bakekala pamo na ba mu ng’anda ya kwa Yakobo.+ 2 Kabili abantu bakababuula no kubaleta ku cifulo cabo, kabili aba mu ng’anda ya kwa Israele bakababuula ukuba ababo mu calo ca kwa Yehova, bakaba ababomfi babo abaume na babomfi babo abanakashi;+ kabili bakekata+ ababekete, e lyo abalepatikisha ukubomba bakalabanakila.+

3 Nomba mu bushiku Yehova akakulenga ukutuusha ku bucushi bobe na ku kukalipwa kobe na ku busha bwakosa ubo waliko umusha,+ 4 ukalande aya mashiwi ya kupumya imfumu ya Babiloni auti:

“Iye ifyo apwa uwalepatikisha bambi ukubomba, ifyo ukucululusha kwapwa!+ 5 Yehova nafuna inkonto ya babifi, umutambu wa bakateka,+ 6 uushileka ukuuma abantu mu bukali ku cikoti,+ uutekela inko mu cipyu no kubacusha ukwabula ukuleka.+ 7 Isonde lyonse nalituusha,+ lili tondolo. Abantu nabatemwa baleaula no tupundu.+ 8 Ne mikupri+ naisekelela pali iwe, imikedari ya mu Lebanone, aiti, ‘Ukutula apo walaalila, takwaba umutemi+ uwisa mu kututema.’

9 “Ne Nshiishi*+ pa nshi yatenta pa mulandu obe pa kuti ikukumanye pa kwisa kobe. Yabuusha abafwa+ pa mulandu obe, e kutila, intungulushi shonse isha mwi sonde ishapala imbushi.+ Yalenga imfumu shonse isha nko ukwima pa fipuna fya shiko ifya bufumu.+ 10 Shonse shatendeka ukulanda no kusosa kuli iwe ashiti: ‘Bushe na iwe nabakunasha nga ifwe?+ Bushe bakulenga ukulingana na ifwe?+ 11 Icilumba cobe nabacitentemushisha ku Nshiishi,* ukulila kwa filimba fyobe ifya nsale.+ Pa nshi yobe, nabanshikapo imititi ukuba ica kulaalapo cobe; ne myambo e ca kufimbana cobe.’+

12 “Iye ifyo wapona ukufuma mu muulu,+ we ubalika, umwana wa macaca! Ifyo waputulwa no kuponena pe sonde,+ iwe we walecimfya inko!+ 13 Lelo iwe, watile mu mutima obe, ‘Nkaya ku muulu.+ Nkasansula icipuna candi ica bufumu+ pa muulu wa ntanda+ sha kwa Lesa, kabili nkekala pa lupili lwa kukumaninapo,+ ku mpela ya kapinda ka ku kuso.+ 14 Nkaya pa muulu wa ncende shasansuka isha makumbi;+ nkailenga ukuba ngo Wapulamo.’+

15 “Lelo, bakakutentemushisha ku Nshiishi,*+ pa nshi ya cilindi.+ 16 Abalekumona bakakulolekesha; bakakuceeceeta, abati, ‘Bushe e uyu mwaume uwaletutumya isonde, uwaletensha inko,+ 17 uwacitile isonde nga matololo no kucimfya imisumba ya liko,+ uushaiswile inshila ukuti abafungwa bakwe baye ku mwabo?’+ 18 Imfumu shimbi shonse isha mu nko, shonse fye, shalaala mu bucindami, imfumu yonse mu ng’anda ya iko.+ 19 Lelo iwe, bakupoosele fye ukwabula no kukushiika,+ ngo musambo uo bapata, uwafimbilikishiwa ne fitumbi fya bantu abalaswa ku lupanga abaleya pa nshi ku mabwe ya mu cilindi,+ nge citumbi icanyantaulwapo.+ 20 Tawakabe na bo mu nshiishi, pantu waonawile icalo cobe, waipeye abantu bobe. Abana ba bacita ifyabipa tabakenikwe ishina umuyayaya.+

21 “Teyanyeni apa kwipaila abana bakwe pa mulandu wa filubo fya fikolwe fyabo,+ pa kuti beima no kwikala mwi sonde no kwisusha imisumba mu calo.”+

22 “Kabili nkabemina,”+ e fyo Yehova wa mabumba asosa.

“Kabili nkalofya muli Babiloni ishina+ na bashalapo no bufyashi na bana,”+ e fyo Yehova asosa.

23 “Kabili nkamulenga ukuba icifulo ca finungi ne fishiba fya menshi, kabili nkamupyanga ku cipyango ca bonaushi,”+ e fyo Yehova wa mabumba asosa.

24 Yehova wa mabumba nalapa,+ ati: “Kwena ifyo mfwaya, e fyo cikaba; kabili ifyo napingula, e fikacitika,+ 25 pa kuti ngonaule umwina Asiria mu calo candi+ no kumunyantaula mu mpili shandi;+ no kuti ikoli lyakwe lifume pali bena ne cipe cakwe cifume pa mabeya yabo.”+

26 Ifi e fyo isonde lyonse balipingwile, kabili uku e kuboko ukutambalikwe pa nko shonse. 27 Pantu Yehova Lesa wa mabumba napingula,+ nani wingafulunganya?+ Kabili ukuboko kwakwe nakutambalikwa, nani uwingakubwesha?+

28 Mu mwaka Imfumu Ahasi yafwile,+ aya mashiwi ayaluma yalisoselwe:29 “Wisekelela,+ we Pelishiti,+ na bonse aba muli iwe, pa mulandu fye wa kuti inkonto ya ulekuuma naikontolwa.+ Pantu mu mushila wa nsoka+ mukafuma insoka ya busungu,+ kabili icisabo ca iko cikaba ni nsoka ya mulilo iilepupuka.+ 30 Kabili amabeli ya babusu yakalya, kabili abapiina bakasendama umutende.+ Kabili nkepaya umushila obe ku cipowe, ne cikashala kuli iwe cikepaiwa.+ 31 Lila imisowa, we mpongolo! Loosha, we musumba! Bonse mukanenuka, mwe baPelishiti! Pantu ku kapinda ka ku kuso kulefuma icushi, kabili takuli uulefuma mwi bumba lyakwe ilya bashilika.”+

32 Kabili cinshi umuntu onse akasosa ku kwasuka inkombe+ sha ulu luko? Ukuti Yehova umwine nakuula umufula wa Sione,+ kabili abacushiwa pa bantu bakwe bakooba muli ena.

15 Ubukombe bwaluma pali Moabu:+ Pantu Ari+ uwa kwa Moabu naonaulwa ubushiku, kabili natalalikwa. Pantu Kiri+ uwa kwa Moabu naonaulwa ubushiku, kabili natalalikwa. 2 Naya ku Ng’anda na ku Dibone,+ ku fifulo fya kupepelapo, mu kuloosha. Moabu alelila imisowa pali Nebo+ na pali Medeba.+ Bonse abalimo bali na mapala;+ umwefu onse nabaubeya. 3 Mu misebo yakwe nabafwala insamu.*+ Pa mitenge+ yakwe na mu mansa shakwe umwikashi wakwe onse alelila umusowa, aleya alelila.+ 4 Kabili Heshebone na Eleale+ balila. Ishiwi lyabo lyaumfwika ukufika ku Yahasi.+ E mulandu wine abaume ba kwa Moabu abaipangasha ne fyanso balepundila. Umweo wakwe uletutuma muli ena.

5 Umutima wandi uleloosha Moabu.+ Imbutushi shakwe nashifika ku Soari+ na ku Egelati-shelisha.+ Pantu apa kuninina ukuya ku Luhiti,+ onse alenina alelila; pantu mu nshila yaya ku Horonaimu+ batendeka ukulila pa bucushi. 6 Pantu amenshi ya mu Nimrimu+ nayakama. Icani iciteku nacuuma, icani nacipwa; tapali iciteku.+ 7 E mulandu wine ifyashalako ne fipe basunga ifyo batuulika, balefisenda ukwabuka umulonga wa miti ya miarabimu. 8 Pantu ukulila nakumfwika mu calo ca Moabu conse.+ Ukuloosha kwa uko kuleumfwika ukufika ku Eglaimu; imisowa ya uko ileumfwika ukufika ku Beere-elimu, 9 pantu amenshi ya mu Dimone yeswilemo umulopa. Pantu pali Dimone nkabikapo ifintu na fimbi, ifintu pamo nge nkalamo ku bapusuka ba kwa Moabu abafulumuka na bashala mu calo.+

16 Tumeni sukusuku kuli kateka wa mu calo,+ ukufuma ku Sela lwa ku matololo, ukuya ku lupili lwa mwana umwanakashi Sione.+

2 Nomba filya ciba ku cuni icilefulumuka, ico batamfya pa cisansala ca ciko,+ e fikaba abana abanakashi aba kwa Moabu pa fyabu fya Arnone.+

3 “Pandeni amano, pinguleni.+

“Mu kasuba, lengeni icinshingwa cenu cimoneke kwati bushiku.+ Fiseni abapaswa;+ mwibepa nangu umo uulefulumuka.+ 4 Leka abantu bandi abapaswa babe abalebeshi muli iwe, we Moabu.+ Ube icifulo ca kuti bafisamemo pa mulandu wa ulepokolola ifipe.+ Pantu uwa mucuushisha nafika ku mpela; ukupokolola ifipe nakupwa; abanyantaula bambi nabapwa mwi sonde.+

5 “Kabili mu cikuuku icipuna ca bufumu cikapampamikwa;+ kabili umuntu akekalapo mu cishinka mwi tenti lya kwa Davidi,+ alepingula no kufwaya umulinganya kabili akangufyanya ukucita icalungama.”+

6 Natuumfwa ulwa cilumba ca kwa Moabu, ati wa cilumba nga nshi;+ amatutumuko yakwe ne cilumba cakwe no bukali bwakwe,+ ifya fye ifyo alanda tafyakacitike iyo.+ 7 E ico Moabu akalilila Moabu imisowa; bonse bakalila imisowa.+ Abapumwa bakaloosha imikate ya fimama iya mu Kiri-haresete,+ 8 pantu amabala ya kwa Heshebone+ nayabonsa. Abene ba nko nabaputula imisambo iyakashika iya mwangashi wa mu Sibma.+ Yalifikile ku Yasere;+ yalelulumba mu matololo. Utumisambo twa uko balitulekele ukuti tuleleme; twaile na ku mumana.

9 E mulandu wine nkaloosesha umwangashi wa Sibma+ nga filya ndoosha pali Yasere. Nkamubomfya ku filamba fyandi, mwe Heshebone+ na Eleale,+ pantu ukupunda e kwaumfwika mu nshita ya lusuba na mu nshita ya kulobolola ifisabo.+ 10 Kabili mwi bala lya fisabo tamuli ukusekelela no kwanga; na mu mabala ya myangashi tamuli ukwaula akapundu, tamuli ukupunda.+ Uukama imyangashi taleikama umwa kukamina imyangashi.+ Ninenga ukuti ukupunda kupwe.+

11 E mulandu wine mu nda yandi mwalilila nge nsango pali Moabu,+ kabili mu mala mwailishanya pali Kiri-haresete.+

12 Nomba calimoneke ukuti Moabu nafunshika pa cifulo ca kupepelapo;+ kabili aishile ku ncende yakwe iya mushilo ku kupepa,+ kabili tapali ico acitile.+

13 Aya e mashiwi Yehova asosele pali Moabu kale. 14 Kabili Yehova nomba nasosa ati: “Mu myaka itatu, ukulingana ne myaka ya mubomfi,+ ubucindami+ bwa kwa Moabu bukasuulwa kabili mukaba icimfulumfulu icikalamba ica musango onse, kabili abakashalapo bakaba abanono nga nshi, kabili ababula amaka.”+

17 Ubukombe ubwaluma pali Damaseke:+ “Moneni! Damaseke tali umusumba na kabili, kabili nomba aba umwina, icifulo icaonaika icilebongoloka.+ 2 Imisumba ya Aroere+ iyalekeleshiwa yasanguka icifulo ca mpaanga, e mo ilaala, ukwabula no wa kuitiinya.+ 3 Kabili umushi wa malinga wapwa muli Efraimu,+ no bufumu muli Damaseke;+ kabili ubucindami bwa bashalapo mu Siria bukaba ngo bucindami bwa bana ba kwa Israele,” e fyo Yehova wa mabumba asosa.+

4 “Nomba muli ubo bushiku, ubucindami bwa kwa Yakobo bukacepa,+ kabili nangu ca kuti aliina akonda.+ 5 Nomba ilyo uwa kulobolola alelobolola ingano shaiminina no kuboko kwakwe kwalobolola imisonso ya ngano,+ akaba ngo uletolelesha imisonso ya ngano mwi lungu lya Refaimu.+ 6 Kabili mukashala utwa kutolelesha muli ena nga filya ciba ilyo kuli ukukunta umuolife: imiolife ibili nelyo itatu pa muulu wa musambo; imiolife ine (4) nelyo isano pa misambo ya uko iitwala ifisabo,” e fyo Yehova Lesa wa kwa Israele asosa.+

7 Muli ubo bushiku umuntunse akalolesha kuli Kalenga wakwe, kabili amenso yakwe yakalolesha pa Wa Mushilo wa kwa Israele.+ 8 Kabili takaloleshe ku fiipailo,+ ifyapangwa ku minwe yakwe;+ kabili takaloleshe pa fyo iminwe yakwe yapanga, pa fimuti fyaimikwa nelyo pa fya kufutumwinapo ifyanunkila.+ 9 Muli ubo bushiku imisumba yakwe iya kufisamamo ikaba nge ncende yalekeleshiwa mu mutengo, ikaba ngo musambo uo balekelesha pa mulandu wa bana ba kwa Israele; kabili ukaba icibolya.+ 10 Pantu naulaba+ Lesa we pusukilo lyobe;+ kabili tawibukishe Icilibwe+ cobe ica kufisamamo. E mulandu wine mulimina amabala ayasuma, kabili mwalimbamo imisambo ya umbi umbi. 11 Akasuba kuti mwashingulusha ulupango kwi bala lyenu, kabili ulucelo kuti mwalenga imbuto shenu ukumena, lelo takwakabe ukulobolola mu bushiku bwa bulwele no bukali ubushingondapwa.+

12 Iye, icimfulumfulu ca bantu na bantu abengi, abaleilishanya nge cilulumo ca bemba! We bulanda ku nko, abakafya icongo nge congo ca menshi ayengi!+ 13 Inko+ shikapanga icongo nge congo ca menshi ayengi. Kabili akabakalipila,+ kabili bakafulumukila ukutali no kutamfiwa nge misungu ya pa mpili ku mwela kabili nga kankungwe ku cikuuku ca mwela.+ 14 Inshita ya cungulo, moneni! kwaba umwenso wa kupumikisha. Ilyo bushilaca, tabalipo.+ Ici e cikacitikila abaletusansa, kabili icikacitikila abatupokolola ifipe.+

18 We bulanda ku calo ca fishishi fya mapindo ifya congo, icaba mu citungu ca mimana ya mu Etiopia!+ 2 E cituma inkombe+ pali bemba, kabili mu mato ya macinda pa menshi, aciti: “Kabiyeni, mwe nkombe sha lubilo, ku luko lwa bantu abatali kabili abatelela inkanda, abatiinya konse, uluko lwa maka icine cine kabili ulunyantaula, ulo icalo ca luko casendwa ku mimana.”+

3 Imwe bonse mwe bekashi ba pano calo+ na mwe bekashi ba mwi sonde, mukamona icintu cimo, filya ciba ilyo baimya icishibilo pa mpili,+ kabili mukomfwa icongo kwati kuli ukulisha ipenga.+ 4 Pantu ifi e fyo Yehova asosele kuli ine ati: “Nkekala tondolo no kulolesha pa cifulo candi icapampamikwa,+ nge cikabilila ilyo kuli ulubuuto,+ ngo mume ilyo kuli icikabilila ca mu nshita ya kulobolola.+ 5 Pantu ilyo kushilaba ukulobolola, ilyo icimenwa cafikapo no buluba bwaba imyangashi iyapya, umuntu akatema utumisambo ku fya kutungwilako imiti kabili umuntu akaputula ne mishila, akaifumyako.+ 6 Bonse bakapeelwa ku cuni iciswango ica mu mpili na ku finama ifiswango ifya pe sonde.+ Kabili ifyuni ifiswango fikabalya mu lusuba, ne finama ifiswango fyonse ifya pe sonde fikabalya mu nshita ya kulobolola.+

7 “Muli ilya nshita ica bupe cikaletwa kuli Yehova wa mabumba,+ ukufuma ku bantu abatali kabili abatelela inkanda,+ ku bantu abatiinya konse, uluko lwa maka icine cine kabili ulunyantaula, ulo icalo ca luko casendwa ku mimana, ku cifulo ukwaba ishina lya kwa Yehova wa mabumba, Ulupili lwa Sione.”+

19 Ubukombe ubwaluma pali Egupti:+ Moneni! Yehova ali pe kumbi+ ilile-endesha kabili aleisa mu Egupti. Kabili tulesa twa fye utwa mu Egupti tukatutuma pa mulandu wakwe,+ kabili imitima ya bena Egupti ikasunguluka mu kati kabo.+

2 “Kabili nkasongelekanya abena Egupti ukulwisha abena Egupti, kabili cila muntu akalwa na munyina, kabili cila muntu akalwa no munankwe, umusumba ukalwisha umusumba, no bufumu bukalwisha ubufumu.+ 3 Kabili umutima wa bena Egupti ukasunguluka mu kati kabo,+ kabili nkafulunganya amapange yabo.+ Kabili bakepusha kuli tulesa twa fye+ na ku waishiba ukwangasha insoka na ku bomfwana ne mipashi na ku baishiba ukusobela ifintu.+ 4 Kabili nkapeela Egupti mu kuboko kwa kwa shikulu uwa-afya, kabili imfumu iikabateka ikaba iyakosa,”+ e fyo Shikulu wa cine, Yehova wa mabumba asosa.

5 Kabili amenshi yakakama muli bemba, no mumana ukakama no kuuma.+ 6 Kabili imimana ikanunka; ne milonga ya muli Naelo ikacefiwa no kuuma.+ Itete ne cisonge fikabola.+ 7 Inika ishaba mu lulamba lwa Naelo, ku mpela ya Mumana wa Naelo, na fyonse ifyamena mu lulamba lwa Naelo fikooma.+ Fikafumishiwapo, kabili tafyakabepo na kabili. 8 Kabili abalondo bakaloosha, na bonse abapoosa indobo mu Mumana wa Naelo bakaba no bulanda, na bapoosa amasumbu pa muulu wa menshi bakaloba.+ 9 Kabili abapanga ifintu ukubomfya kolokondwe+ bakomfwa insoni; pamo na bapikula insalu ishabuuta. 10 Kabili abantu bakwe abapikula+ insalu bakashonaulwa, ababomfi bonse ababombela amalipilo bakaba no bulanda.

11 Bacilolo ba mu Soani+ balitumpa icine cine. E lyo aba mano pa mpanda mano sha kwa Farao bena, ukupanda amano kwabo kwa fye.+ Bushe kuti mwasosa shani kuli Farao amuti: “Ndi mwana wa ba mano, umwana wa shamfumu sha kale”?12 Nga kanshi bali kwi, aba mano benu,+ pa kuti bamwebe nomba na pa kuti beshibe ico Yehova wa mabumba alefwaya ukucita kuli Egupti?+ 13 Bacilolo ba mu Soani balitumpa,+ bacilolo ba mu Nofu+ nababepwa, abakalamba+ ba mu mikowa yakwe balenga Egupti ukulubanta. 14 Yehova umwine nabika muli ena icimfulumfulu;+ kabili balenga Egupti ukutalantanta mu mulimo wakwe onse, filya umuntu uukolelwe atalantanta mu malushi yakwe.+ 15 Kabili Egupti takabe no mulimo uo umutwe nangu umucila, umusambo nelyo icisonge, fingabomba.+

16 Muli ubo bushiku Egupti akaba nga abanakashi, kabili akatutuma+ no kuba no mwenso pa mulandu wa kuti Yehova wa mabumba alepukunya ukuboko kwakwe pali ena.+ 17 Kabili icalo ca kwa Yuda cikaba ica kutiinya kuli Egupti.+ Onse uo bashimikilako pa calo ca Yuda akaba no mwenso pa mulandu wa fyo Yehova wa mabumba alepanga ukucita Egupti.+

18 Muli ubo bushiku mukaba imisumba isano mu calo ca Egupti+ umo balanda ululimi ulwa ku Kanaani+ no kulapa+ kuli Yehova wa mabumba. Umusumba umo uketwa Umusumba Uuwisha.

19 Muli ubo bushiku mukaba iciipailo ca kuli Yehova mu calo ca Egupti,+ kabili kukaba uluceshi kuli Yehova mupepi no mupaka wa ciko. 20 Kabili cikaba icishibilo kabili inte kuli Yehova wa mabumba mu calo ca Egupti;+ pantu bakalilila kuli Yehova pa mulandu wa bakalabacusha,+ kabili akabatumina umulubushi, umukalamba, uukabalubula.+ 21 Kabili Yehova akeshibikwa ku bena Egupti;+ kabili abena Egupti bakeshiba Yehova muli ubo bushiku, kabili bakatuula amalambo no bupe+ no kulapa kuli Yehova no kufikilisha ifyo balapa.+ 22 Kabili Yehova akapuma Egupti.+ Kukaba ukupuma no kuundapa;+ kabili bakabwelela kuli Yehova,+ na o akasumina ukuti bamupapaate kabili akabondapa.+

23 Muli ubo bushiku kukaba umusebo+ ukufuma mu Egupti ukuya ku Asiria, kabili Asiria akaya mu Egupti, na Egupti na o akaya mu Asiria; kabili Egupti na Asiria bakabombela Lesa. 24 Muli ubo bushiku Israele akaba uwa butatu pamo na Egupti na Asiria,+ e kutila, ipaalo mu kati ka calo,+ 25 pantu Yehova wa mabumba akabapaala,+ akatila: “Bapaalwe abantu bandi, abena Egupti, no mulimo wa minwe yandi, abena Asiria,+ no bupyani bwandi, abena Israele.”+

20 Mu mwaka Tartani*+ aile ku Ashidode,+ ilyo Sarigone imfumu ya Asiria amutumine,+ kabili alwishishe umusumba wa Ashidode no ku-upoka;+ 2 pali ilya nshita Yehova asoseele muli Esaya mwana Amose,+ ukutila: “Kabiye,+ kabili ufuule ulusamu* mu musana obe;+ kabili ufule indyato ku makasa yobe.”+ Kabili ifi e fyo acitile, aendele ubwamba kabili ukwabula indyato.+

3 Kabili Yehova atile: “Ifi fine umubomfi wandi Esaya ale-enda ubwamba kabili ukwabula indyato imyaka itatu nge cishibilo+ kabili ica kusobela icikacitikila Egupti+ na Etiopia,+ 4 e fyo imfumu ya mu Asiria ikatungulula ibumba lya balumendo na bakote, abafungwa ba mu Egupti+ na bankole ba ku Etiopia, bakenda ubwamba kabili ukwabula indyato, ukwabula aka kufimba ku matako, Egupti akashala ubwamba.+ 5 Kabili bakatutuma no kulengwa insoni pali Etiopia uo bacetekele+ na pali Egupti ukuyemba kwabo.+ 6 Kabili umwikashi wa ku lulamba ulu akasosa muli ubo bushiku ati, ‘Moneni ifyo caba ku o twacetekela, uo twafulumukileko ukuti atwafwe, ukuti tulubuke pa mulandu wa mfumu ya Asiria!+ Nomba ifwe twalafyuka shani?’”

21 Ubukombe ubwaluma pa matololo ya kuli bemba:+ Nge fipita icikuuku ca mwela+ ku kapinda ka ku kulyo, cileisa ukufuma mu matololo, ukufuma ku calo ca kutiinya.+ 2 Kuli icimonwa+ ica-afya ico banangile: Incenjeshi icili ilecenjesha, no upokolola ifipe acili alepokolola.+ Kabiye, Elamu! Shinga umusumba, Madai!+ Nimpwisha ukuteta konse uko alengele.+ 3 E co intungu shandi shilekalipila nga nshi.+ Ndefutauka icine cine, kwati ni filya umwanakashi afutauka pa kupaapa.+ Nimfulungana ica kuti no kumfwa nshileumfwa; nimpelengana ica kuti nshilemona. 4 Umutima wandi watunta icibi; ndetutuma ku mwenso. Icungulo bushiku ico natemenwe cisangwike ica kuntutumya.+

5 Lekeni itebulo liteyanishiwe bwino, ifipuna fibikwe bwino, kube ukulya, no kunwa!+ Imeni, mwe bacilolo,+ subeni inkwela amafuta.+ 6 Pantu Yehova anjebele ati:

“Kabiye, kabike kalinda ukuti alelanda ico amona.”+

7 Kabili amwene amaceleta ya nkondo na bakabalwe babili babili, amaceleta ya nkondo aya mpunda, na maceleta ya nkondo aya ngamila. Kabili alelolekesha nga nshi, no kubikako sana amano. 8 Kabili abilikishe ngo kubuluma kwa nkalamo+ ati: “Pa lupungu lwa kwa kalinda, mwe Yehova, e po ndeiminina lyonse akasuba, kabili apa kulindila pandi e po njiminina ubushiku bonse.+ 9 Kabili moneni, kuleisa iceleta lya nkondo umuli abantu, na bakabalwe babili babili!”+

Kabili asosele kuli ine no kutila: “Nawa! Babiloni nawa,+ kabili ifimpashanya fya kubasa fyonse ifya tulesa twakwe nafitobaula pa nshi!”+

10 Iye mwe banyantaulwa bandi na we mwana wa pa kupumina ingano pandi,+ nimweba ico ng’umfwile kuli Yehova wa mabumba, Lesa wa kwa Israele.

11 Ubukombe ubwaluma pali Duma: Kuli uulenjita ukufuma ku Seiri+ aleti: “Kalinda, bushe ubushiku buli shani? Kalinda, bushe ubushiku buli shani?”+ 12 Kalinda atile: “Ulucelo lwalaisa, no bushiku na bo bwalaisa. Nga mulefwaya ukwipusha, ipusheni. Mubwele na kabili!”

13 Ubukombe ubwaluma pa ciswebebe: Mu mutengo, mu ciswebebe e mo mukalaala ubushiku, mwe mabumba ya balendo ba ku Dedani.+ 14 Mulesenda amenshi ilyo muleya mu kukumanya uwa cilaka. Mwe bekashi ba mu calo ca Tema,+ sengeleni uulefulumuka no kumupeela umukate. 15 Ico nabafulumuka pa mulandu wa bapanga, pa mulandu wa lupanga ulwasomonwa, kabili pa mulandu wa mata ayo bapekenye na pa mulandu wa kukosa kwa bulwi.

16 Pantu Yehova asosele kuli ine ati: “Mu mwaka umo, ukulingana ne myaka ya mubomfi,+ ubucindami bonse ubwa kwa Kedari+ bukapwa. 17 Kabili abakashalapo pa baume ba mata, abaume ba maka aba mu bana ba kwa Kedari, bakaba abanono,+ pantu Yehova umwine, Lesa wa kwa Israele, nasosa.”+

22 Ubukombe ubwaluma pa mupokapoka wa cimonwa:+ Kanshi cinshi cicitike, apo bonse mwanina pa mitenge?+ 2 Waiswilemo impokota, we musumba wa cimfulumfulu, umusumba wa nsansa.+ Abaipaiwa bobe tabafwila ku lupanga, nangu ukufwila mu bulwi.+ 3 Bakateka bobe bonse abankalwe+ bafulumukila pamo.+ Baikatwa ukwabula amata. Abantu bobe bonse abasangilwe basendelwe bunkole pamo.+ Babutukile ukutali.

4 E co nsoseele nati: “Lekeni ukundolesha. Mu kulila kwandi e mukamonekela ubulanda bwandi.+ Mwiesha ukunsansamusha pa konaulwa kwa mwana mwanakashi uwa bantu bandi.+ 5 Pantu bushiku bwa cimfulumfulu+ kabili ubwa kunyantaula+ kabili ubwa cimfulunganya+ ubo Shikulu Mulopwe, Yehova wa mabumba, ateyenye mu mupokapoka wa cimonwa. Kuli ulebongolola icibumba,+ kabili kuli ukulilila ku lupili.+ 6 Kabili Elamu+ nasenda icola ca kubikamo imifwi mwi celeta lya bulwi ilya bantunse ililetintwa na bakabalwe; e lyo Kiri+ nafimbula pa nkwela. 7 Kabili ilungu lyobe ilyawamisha likesulamo amaceleta ya bulwi, kabili bakabalwe bakeminina pa mpongolo, 8 kabili umo akafumyapo ica kucingilila Yuda. Kabili muli ubo bushiku, ukalolesha pa fyanso+ fya bulwi ifya mu ng’anda ya mu mutengo,+ 9 kabili mukamona ifipunda fya mu Musumba wa kwa Davidi, pantu fikafula.+ Kabili mukalonganya amenshi ya mu cishiba ca mwi samba.+ 10 Kabili mukapenda amayanda ya mu Yerusalemu. Kabili mukabongolola amayanda pa kuti mukoshe icibumba.+ 11 Kabili mukemba icilindi pa kati ka fibumba fibili ica kuyamo amenshi ya mu cishiba+ ca kale. Kabili tamwakaloleshe kuli Kapanga wa ciko, tamwakamone no wacipangile kale.

12 “Awe muli ubo bushiku, Shikulu Mulopwe,+ Yehova wa mabumba, akamwita ukuti mulile+ no kuloosha no kubeya amapala no kufwala insamu.*+ 13 Lelo, moneni! kuli ukusamwa no kusekelela, ukwipaya ing’ombe no kwipaya impaanga, ukulya inama no kunwa umwangashi,+ ‘Tulye no kunwa, pantu mailo tukafwa.’”+

14 Kabili Yehova naisokolola mu matwi yandi ati:+ “‘Takwakabe icifuta mulandu+ pa filubo fyenu ifi mpaka mukafwe,’+ e fyo Shikulu Mulopwe, Yehova wa mabumba asosa.”

15 Shikulu Mulopwe, Yehova wa mabumba atile: “Kabiye, kengile kuli uyu kangalila, kuli Shebna,+ uwangalila ing’anda no kutila,+ 16 ‘Bushe kuno kuli ifintu fyobe, kabili nani umuntu obe kuno, apo waimbila inshiishi kuno?’+ Aleimbila inshiishi pa muulu; mu cilibwe e mo alepangila ing’anda. 17 ‘Mona! Yehova alekupoosa icabipisha, we muntu we, no kukwikata na maka. 18 Akakupomba nga nshi, ngo mupila mu calo icikalamba. Kulya e ko ukafwila, kabili kulya amaceleta ya bucindami bobe yakaba ica kuseebanya ing’anda ya kwa sokulu. 19 Kabili nkakufumya pa cifulo cobe; kabili umo akakufumya pa cifulo cobe ica bulashi.+

20 “‘Kabili muli ubo bushiku, nketa umubomfi+ wandi, Eliakimu+ mwana Hilkia.+ 21 Kabili nkamufwika ica kufwala cobe, kabili umushipi obe nkaukakisha mu musana wakwe,+ kabili bukangalila bobe nkabupeela mu minwe yakwe; kabili akaba wishi ku bekashi ba mu Yerusalemu na ku ba mu ng’anda ya kwa Yuda.+ 22 Kabili nkabika amakii+ ya ng’anda ya kwa Davidi pa kubeya kwakwe, kabili akesula no wa kwisalako takwakabe, kabili akesalako no wa kwisulako takwakabe.+ 23 Kabili nkamupampamina ngo lupoopo+ mu ncende ya muyayaya, kabili akaba icipuna ca bucindami ku ba mu ng’anda ya kwa wishi.+ 24 Kabili bakabika pali ena ubucindami bonse ubwa ng’anda ya kwa wishi, intuntuko ne misambo, ifipe fyonse ifinono, ifipe fyonse ifyaba nge mbale shafonka ne mitondo yonse iikalamba.

25 “‘Muli ubo bushiku, ulupoopo+ lwapampamikwa mu ncende ya muyayaya bakalufumya,+ kabili lukanenuka no kupona, kabili icintu ico bakobekeko cikapona, pantu Yehova umwine nalanda,’” e fyo Yehova wa mabumba asosa.+

23 Ubukombe ubwaluma pali Turi:+ Lileni imisowa, mwe mato ya ku Tarshishi!+ pantu naonaulwa kabili tali icabu, tali apa kwingilila iyo.+ Nababasokolwela ukufuma ku calo ca Kitimu.+ 2 Talaleni, mwe bekashi ba mu lulamba lwa bemba. Bashimakwebo ba ku Sidone,+ abaleabuka bemba, baisula mu mwenu. 3 Kabili ukulobolola kwa mu Naelo, icibwesha cakwe, e kutila, imbuto sha ku Shihore,+ shasendeelwe pa menshi ayengi; kabili caishileba icibwesha ca nko.+

4 Ba ne nsoni, iwe Sidone.+ Pantu iwe, we wacingilila bemba, bemba nasosa ukutila: “Nshaculapo no kukalipwa kwa pa kupaapa, kabili nshafyalapo, nangu kukusha abana abaume, nangu banacisungu.”+ 5 Nga filya cali pa lyashi lya pali Egupti,+ abantu bakatutuma nga nshi ilyo baumfwa ilyashi pali Turi.+ 6 Abukileni ku Tarshishi; lileni imisowa, mwe bekashi ba mu lulamba lwa bemba. 7 Bushe e uyu musumba wenu uwaleanga ukutula ku nshiku sha kale na kale, ukutula ku nshiku sha uko isha kubalilapo? Amakasa yakwe yalemuleta ukufuma ukutali pa kuti ese ekale mu ncende shimbi.

8 Bushe nani apingwile+ ici pali Turi, uufwika ifilongwe, uo bashimakwebo bakwe bali ni bacilolo, uo abasulushi bakwe bali e bashimucindikwa ba pe sonde?+

9 Yehova wa mabumba umwine napingula,+ pa kuti akuseebanye pa kuyemba konse uko uituntumbilapo,+ ku kusaalula bashimucindikwa bonse aba pe sonde.+

10 Abuka icalo cobe ngo Mumana wa Naelo, we mwana mwanakashi uwa ku Tarshishi.+ Takuli apa kupangila no kulungishisha amato.+ 11 Natambulwila ukuboko kwakwe pali bemba; nalenga amabufumu ukusunkana.+ Yehova umwine nasosa amashiwi pali Foinike, ku konaula amalinga yakwe ayakosa.+ 12 Kabili atila: “Tawakasekelele na kabili,+ we wacushiwa, we mwana mwanakashi nacisungu wa mu Sidone.+ Ima, abukila ku Kitimu.+ Na ko kwine tawakatuushe.”

13 Moneni! Icalo ca bena Kaldi.+ Aba e balengele ukuti abe icifulo ca nama sha mu fiswebebe,+ te Asiria+ iyo. Nabakuula ifibumba no kushinga umusumba,+ nababongolola amayanda yakwe aya pa malinga;+ umo namonaula.+

14 Lileni imisowa, mwe mato ya ku Tarshishi, pantu ubucingo bwenu nabonaulwa.+

15 Kabili muli ubo bushiku Turi akalabwa imyaka amakumi cinelubali (70),+ ukulingana ne nshiku sha mfumu imo. Ilyo imyaka amakumi cinelubali ikalapwa, ifikacitikila Turi, ni filya ifyaba mu lwimbo lwa kwa cilende, ulutila:16 “Buula nsango, shinguluka umusumba, we cilende+ walabwa. Lisha bwino ifilimba; fusha inyimbo shobe, pa kuti wibukishiwe.”

17 Kabili ilyo imyaka amakumi cinelubali (70) ikapwa Yehova akapempula Turi, kabili Turi akatendeka ukupoka amalipilo+ yakwe no kucita bucilende na mabufumu yonse aya pe sonde.+ 18 Kabili icibwesha cakwe na malipilo+ yakwe fikaba ica mushilo kuli Yehova. Tafyakasungwe, nangu kutuulikwa, pantu amalipilo yakwe yakaba aya bekala ku cinso ca kwa Yehova,+ ukuti balye no kwikuta no kufwala ifisuma.+

24 Moneni! Yehova alesha icalo umwabula akantu no kucilenga ukuba icibolya,+ kabili na-alula ukumoneka kwa ciko+ no kusalanganya abekashi abekalamo.+ 2 Kabili ifyo cikaba ku bantu e fyo cikaba na kuli shimapepo; ifyo cikaba ku musha e fyo cikaba na kuli shikulu wakwe; ifyo cikaba ku musha mwanakashi e fyo cikaba na kuli nakulu; ifyo cikaba ku uleshita e fyo cikaba na ku uleshitisha; ifyo cikaba ku washimisha e fyo cikaba na ku uleashima; ifyo cikaba ku uulefwaya ica kulundapo e fyo cikaba na ku uulemubikilapo ica kulundapo.+ 3 Cine cine icalo cikaba umwabula akantu, kabili bakacipokolola ifipe,+ pantu Yehova umwine e usosele aya amashiwi.+ 4 Icalo cileloosha,+ naciloba. Icalo nacibonsa, naciloba. Abacindami pa bantu ba mu calo nabaloba.+ 5 Kabili abekashi bakowesha icalo,+ pantu bapula mu mafunde,+ ba-alula ifipope,+ batoba icipangano ca muyayaya.+ 6 E co icitiipu caliila icalo,+ kabili abaikalamo basangwa no mulandu. E co abekashi ba mu calo bacepeele, kabili abantunse abanono e bashelepo.+

7 Umwangashi upya uleloosha, umuti wa mwangashi wabonsa,+ bonse abalesekelela mu mitima baleteta.+ 8 Ukusekelela kwa tuoma nakupwa, icongo ca bantu ba nsansa nacileka, ukwanga kwa nsango nakupwa.+ 9 Balenwa umwangashi ukwabula ulwimbo; kabili ifya kunwa ifikola nafilula ku balefinwa. 10 Umusumba uwalekeleshiwa naubongololwa;+ ing’anda yonse naisalwa, takuli ukwingilamo. 11 Kuli ukulila mu musumba pa mulandu wa kubulwa umwangashi. Ukusekelela konse nakupwa; takuli ukwanga mu calo.+ 12 Mu musumba muli fye cimbi cimbi; impongolo naitobaulwa kabili ili umwina wa fisooso.+

13 Pantu mu kati ka calo, pa bantu abengi, pakaba ngo kukunta umuti wa muolife,+ ngo kutolelesha ukubako ilyo ukulonganika imyangashi kwapwa.+ 14 Bena bakasansula amashiwi yabo, bakaula utupundu. Bakawelesha ukufuma kuli bemba pa mulandu wa kupuulama kwa kwa Yehova.+ 15 E co aba mu citungu ca lubuuto+ bakacindikila Yehova,+ aba mu fishi fya pali bemba bakacindika ishina lya kwa Yehova,+ Lesa wa kwa Israele. 16 Ukufuma ku mpela ya calo natumfwa inyimbo+ shileti: “Umucinshi ku Mulungami!”+

Lelo ndeti: “Ine ning’onda,+ ning’onda ine! We bulanda kuli ine! Incenjeshi nashicita ubucenjeshi.+ Cine cine incenjeshi nashicita ubucenjeshi.”+

17 Umwenso ne cilindi ne citeyo fili pali iwe, we mwikashi wa mu calo.+ 18 Nomba onse uwafulumuka pa kumfwa icongo ca kutiinya akaponena mu cilindi, kabili onse uulefuma mu cilindi akekatwa mu citeyo.+ Pantu ifipunda fya mu muulu fikesulwa,+ kabili amashintililo ya calo yakatenta.+ 19 Icalo nacilepuka icine cine, icalo nacitenshiwa nga nshi, icalo nacisunkana.+ 20 Icalo ciletalantanta ngo muntu ukolelwe, kabili cilesunkana uku no ku nge nsakwe ya kulindilamo.+ Kabili imembu sha ciko nashicifinina,+ kabili cikapona, ica kuti tacakeme na kabili.+

21 Nomba muli ubo bushiku Yehova akapingula ibumba lya mu muulu ku muulu, ne shamfumu sha pano isonde.+ 22 Kabili bakalonganikwa ngo kulonganikwa kwa bafungwa mu cilindi,+ kabili bakesalilwa mu cifungo;+ kabili ilyo pakapita inshiku ishingi akabapempula.+ 23 Kabili umweshi naufiita, na kasuba akabalike kaikatwa insoni,+ pantu Yehova wa mabumba naba imfumu+ no bukata+ mu Lupili lwa Sione+ na mu Yerusalemu na mu menso ya bakalamba pa bantu bakwe.

25 Mwe Yehova, ni mwe Lesa wandi.+ Ndemutasha,+ ndelumbanya ishina lyenu,+ pantu mwacita ifipesha amano,+ mwalicita ifyo mwapangile+ ukufuma ku nshiku sha kubangilila, kabili mucita ifintu ne cishinka+ kabili ne cine.+ 2 Pantu mwalenga umusumba ukuba umwina wa mabwe, umusumba we linga ukuba icabongololwa, mwalenga ulupungu lwa kwikalamo abeni ukukanaba umusumba, kabili tawakakuulwe na kabili umuyayaya.+ 3 E mulandu wine abantu abakosa bakamucindikila; aba mu musumba wa nko sha lucu, bakamutiina.+ 4 Pantu ni mwe umwa kubelama, umwa kufisama umupiina ilyo alecula,+ umwa kuuba imfula iikalamba, icintelelwe+ ku cikabilila, ilyo umwela wa ba buluku uli nge mfula iikalamba iilelokela ku cibumba. 5 Mulapwisha icongo ca beni, ifyo mupwisha icikabilila ku cintelelwe ce kumbi+ mu calo umwabula amenshi. Ulwimbo lwa ba buluku lulatalalikwa.+

6 Kabili Yehova wa mabumba akapekanishisha abantu bonse,+ muli ulu lupili,+ umutebeto wa fyanona,+ umutebeto wa mwangashi uwa pa fiseekwa, uwa fyanona ifyaisulamo ubufyompo,+ umutebeto wa mwangashi+ uwa pa fiseekwa, uwasuuswa.+ 7 Kabili muli ulu lupili akamina ica kukupa icikupa abantu bonse,+ ne nsalu yapikulwa iyakupa inko shonse. 8 Kabili akamina imfwa umuyayaya,+ kabili Shikulu Mulopwe Yehova akafuuta ifilamba ku menso yonse.+ Kabili akafumya ukuseebana kwa bantu bakwe pano isonde ponse,+ pantu Yehova umwine nasosa.

9 Kabili muli ubo bushiku umuntu akatila: “Moneni! Uyu e Lesa wesu.+ E o twacetekela,+ kabili akatupususha.+ Uyu ni Yehova.+ E o twacetekela. Natusekelele no kwanga mu kupususha kwakwe.”+

10 Pantu ukuboko kwa kwa Yehova kukekala pali ulu lupili,+ kabili icalo ca Moabu cikanyantaulwa+ mu ncende ya ciko nga filya umwina wa mpimbili unyantaulwa mu mafi ya ng’ombe.+ 11 Kabili akafungulula amaboko yakwe mu kati ka ciko filya uuleowa afungulula amaboko pa kuti owe, kabili akaceefya amatutumuko+ ya ciko no kuboko kwakwe ukwangufyanya. 12 Kabili umusumba uwacingililwa, na malinga yobe aya kucingilila ayatali, akawisha; akauwisha pe sonde, pa lukungu.+

26 Muli ubo bushiku,+ ulu lwimbo lukembwa+ mu calo ca Yuda ulwa kuti:+ “Twalikwata umusumba uwakosa.+ Alabika ipusukilo ukuba ifibumba kabili ubucingo.+ 2 Isuleni impongolo+ pa kuti uluko lwa bulungami ulwaba ne cishinka lwingile.+ 3 Abantu abo imitima yabo yaba iyashangila, mukabacingilila no mutende wa pe,+ pantu ni mwe batetekela.+ 4 Tetekeleni Yehova+ inshita yonse, pantu Jah Yehova e Cilibwe+ ca muyayaya.

5 “Pantu naceefya abekashi ba pa muulu,+ umusumba wasansabikwa.+ Auwisha, auwishisha pa nshi; aupoosa mu lukungu.+ 6 Ulukasa lukaunyanta, ulukasa lwa mulanda, ulukasa lwa mupiina.”+

7 Inshila ya mulungami yalitambalala.+ Apo mwalitambalala, mukatambalika ne nshila ya mulungami.+ 8 Cine cine, pa mulandu wa nshila ya mulinganya wenu, mwe Yehova, twalimucetekela.+ Umutima wesu ufwaya+ ishina lyenu e lyo no kumwibukisha.+ 9 Namufwaya ubushiku no mweo wandi;+ cine cine no mutima wandi mu nda ndamufwaya;+ pantu ilyo mukapingula isonde,+ abekashi ba pa calo bakasambilila+ ubulungami.+ 10 Umubifi nangu apaalwa, takasambilile ubulungami.+ Mu calo icatambalala akalacita ifyabipa+ kabili takamone ukupuulama kwa kwa Yehova.+

11 Mwe Yehova, ukuboko kwenu kuli mu muulu,+ lelo tabalekumona.+ Bakamona no kwikatwa insoni+ pa fyo mwacincilila abantu benu. Cine cine umulilo+ wa balwani benu ukabalya. 12 Mwe Yehova, mukatupeela umutende,+ pantu namutubombela fyonse.+ 13 Mwe Yehova Lesa wesu, bashikulu wesu bambi balecita kwati e batuteka.+ Mu kwafwa kwenu fye e mo tukalumbwila ishina lyenu.+ 14 Balifwa; tabakabe no mweo.+ Apo balifwa,+ tabakeme.+ E ico mwabapempula pa kuti mubakande no kubalofya pa kuti belalumbulwa no kulumbulwa.+

15 Mwalundako ku luko; mwe Yehova, mwalundako ku luko;+ mwaicindamika.+ Mwakusha imipaka yonse iya calo ukufika ukutali.+ 16 Mwe Yehova, ilyo balecula baisa kuli imwe;+ bapepa ipepo lya mu kantepentepe ilyo mwabasalapula.+ 17 Nga filya fine umwanakashi uuli mupepi no kupaapa akalipwa, no kulila ilyo alecula, e fyo na ifwe tuli pa mulandu wenu, mwe Yehova.+ 18 Twaimita, twacula pa kupaapa;+ awe cili kwati twapaapa umwela. Takuli ukupususha kwine kwine kuli ici calo,+ kabili takuli abekashi ba mu calo abalefyalwa.+

19 “Abantu bobe abafwa bakaba no mweo.+ Ifitumbi fyesu, fikabuuka.+ Shibukeni no kusekelela, mwe bekashi ba mu lukungu!+ Pantu umume+ wenu waba ngo mume wa ku musalu,+ kabili isonde likaleka abafwa ukufyalwa.+

20 “Kabiyeni, mwe bantu bandi, ingileni mu miputule yenu iya mu kati, kabili isaleniko ifiibi.+ Fisameni inshita inono mpaka ubukali bupite.+ 21 Pantu moneni! Yehova aleisa ukufuma ku cifulo cakwe ku kulubulwisha abekashi ba mu calo pa membu shabo isho bacita kuli ena,+ kabili icalo cikasokolola umulopa wasuumiwa+ pali cena kabili tacakafise abaipaiwa ba ciko.”+

27 Muli ubo bushiku, Yehova,+ no lupanga lwakwe ulwakosa kabili ulukalamba kabili ulwa maka,+ akalukila ku Cing’wena*+ ca muli bemba, icisoka icikulika,+ kabili ku Cing’wena ca muli bemba, icisoka icapondama, kabili akepaya uyu shimweshimwe+ wa muli bemba.

2 Muli ubo bushiku mukamwimbile+ amuti: “Ibala lya myangashi+ ilya mwangashi we fulo! 3 Ine, ne Yehova, ndemucingilila.+ Nkalamutapilila cila nshita.+ Pa kuti umuntu nangu umo emwalukila, nkalamucingilila ubushiku na kasuba.+ 4 Nshikalipe iyo.+ Nani akampeela ifimpusa fya myunga+ ne fyani mu bulwi? Nkafinyantaula. Kabili nkafyoca.+ 5 Lelo lekeni ese mu cifulo candi ica kufisamamo, lekeni apange umutende na ine; lekeni apange umutende na ine.”+

6 Mu nshiku ishileisa, Yakobo akalimba imishila, Israele+ akabalula no kupuuka; kabili bakesusha ifisabo pano calo.+

7 Cinshi balemuumina ifi? Kabili bushe afwile ukwipaiwa nga filya abantu bakwe babepeye?+ 8 Ukaya ulemutamfya no kupunda kwa kutiinya pa kulwa nankwe. Akamutamfisha ku mwela wakwe, umwela uwakosa mu bushiku bwa mwela wa ku kabanga.+ 9 Kanshi muli iyi nshila e mo ifilubo fya kwa Yakobo fikafuutilwa,+ kabili ifi e fisabo fyonse ifikabako ilyo afumyapo ulubembu,+ ilyo alenga amabwe yonse aya pa ciipailo ukuba nga mabwe yabuuta ayafungaulwa, ica kuti ifyaimikwa fya fimuti+ ne fya kufutumwinapo icushi canunkila tafyakeme.+ 10 Pantu umusumba uwacingililwa ukaba weka, impanga ya mulemfwe ikashala yeka no kulekeleshiwa kwati matololo.+ Kulya e ko umwana wa ng’ombe akaliila, kabili e ko akalaala; kabili akalya imisambo yakwe.+ 11 Ilyo imisambo yakwe yauma, abanakashi abaleisa bakaikontaula, no kuyoca.+ Pantu te bantu abeluka.+ E co Kalenga wabo ashakababelele uluse, kabili Kabumba wabo takabapaale.+

12 Kabili muli ubo bushiku Yehova akakunta ifisabo,+ ukufuma ku Mumana*+ ukufika ku mumana wa mu Egupti,+ na imwe mukasendwa umo umo,+ mwe bana ba kwa Israele. 13 Kabili muli ubo bushiku kukaba ukulisha ipenga ilikalamba,+ kabili abaleloba mu Asiria+ na balesalanganina mu Egupti+ bakesa no kukontamina+ Yehova mu lupili lwa mushilo mu Yerusalemu.+

28 We bulanda ku cilongwe icacindama ica bacakolwa ba kwa Efraimu,+ na maluba yalebonsa aya bucindami bwa ciko ayaba pa mupokapoka wafunda uwa banaka ku mwangashi! 2 Moneni! Yehova nakwata umuntu uwakosa kabili uwa maka.+ Akapoosa icilongwe pa nshi na maka, kwati ni nkuuka yabipisha iya mfula ya mabwe,+ inkuuka iyonaula, nge nkuuka yabipisha iya menshi aya maka kabili ayabunsha.+ 3 Ifilongwe fyacindama ifya bacakolwa ba kwa Efraimu fikanyantaulwa.+ 4 Ne luba+ ililebonsa ilya bucindami bwa ciko ubuli pa muulu wa mupokapoka uwafunda likaba nge kunyu+ lya kubangilila pa ntanshi ya lusuba, ilyo, umuntu nga alimona, ilyo lili mu minwe yakwe, alilya.

5 Muli ubo bushiku Yehova wa mabumba akaba icilongwe icayemba+ kabili akaba kwati maluba ayasuma+ ku bashalapo+ pa bantu bakwe, 6 kabili akaba kwati mupashi wa mulinganya ku ulepingula,+ kabili amaka ku baletamfya abashilika pa mpongolo.+

7 Kabili aba na bo, pa mulandu wa mwangashi balubanta kabili pa mulandu wa ca kunwa icikola batalantanta. Shimapepo na kasesema,+ balubanta pa mulandu wa ca kunwa icikola, bafulungana pa mulandu wa mwangashi, balubanta+ pa mulandu wa ca kunwa icikola; tabalemona bwino, nabafilwa ukupingula bwino. 8 Pantu amatebulo yonse yeswilepo amalushi+ ayabi, tapali apashili amalushi.

9 Nani uo alesambilisha ukwishiba,+ kabili nani uo alelenga ukumfwikisha icisoselwe?+ Bushe ni balya abasumwinwe, abo bafumishe ku mabele?+ 10 Pantu kuli “ifunde pe funde, ifunde pe funde, icipimo pa cipimo, icipimo pa cipimo, pano akanono, palya akanono.”+ 11 Pantu akalandila ku bantu bakwe+ muli balya ababulubusa pa kulanda+ kabili muli balya abalanda ululimi lumbi,+ 12 kuli balya abo aebele ukutila: “Pano e pa kutuushisha. Lekeni uwanaka atuushe. Kabili pano e pa kupemwina,” lelo abashalefwaya ukumfwa.+ 13 Kabili kuli bena icebo ca kwa Yehova cikaba “ifunde pe funde, ifunde pe funde, icipimo pa cipimo, icipimo pa cipimo,+ pano akanono, palya akanono,” pa kutila baye no kutalantanta cimfutyanuma no kutobaulwa no kubikwa mu citeyo no kwikatwa.+

14 E ico umfweni icebo ca kwa Yehova, mwe ba mataki, mwe bakateka+ ba aba bantu abali mu Yerusalemu:15 Apo mutile: “Natupangana icipangano ne Mfwa;+ kabili natumona icimonwa ne Nshiishi;*+ ilyeshi lya maka, nga lyaisa, ifwe talyakatwishile, pantu natulenga ubufi ukuba icubo+ cesu kabili mu kubepa e mo twafisama”;+ 16 e co kanshi Shikulu Mulopwe Yehova atila: “Moneni ndebika ilibwe+ mu Sione+ ukuba umufula wa kukuulapo, ilibwe ilyakosa,+ ilibwe lya pa koona+ ilyauma umutengo ilya pa mufula wa kukuulapo+ uwakosa. Uulelitetekela takatiine.+ 17 Kabili nkalenga umulinganya ukuba intambo ya kupiminako+ no bulungami+ ukuba ica kulinganishishako; kabili imfula ya mabwe+ ikasenda icubo ca bufi,+ na menshi yakafumyapo icifulo ca kufisamamo.+ 18 Kabili icipangano cenu ne Mfwa cikapwa,+ na cilya icimonwa mwamwene ne Nshiishi* tacakeminine.+ Ilyo ilyeshi lya maka likapita,+ ni mwe likanyantaulapo.+ 19 Lyonse ilyo lyapita, likalamusenda,+ pantu cila lucelo likalapita, akasuba no bushiku; kabili likaba ica kututumya+ ku kulenga bambi ukumfwikisha icisoselwe.”

20 Pantu ubusanshi bwaipipa ubwa kuti umuntu ayololepo, kabili ica kufimbana icapikulwa tacikumene ilyo aifimba. 21 Pantu Yehova akema filya acitile pa Lupili lwa Perasimu,+ akakalipa filya akalipe mu mpanga iyabatama mupepi na Gibeone,+ pa kuti abombe umulimo wakwe, umulimo wakwe uwa cipesha amano, kabili pa kuti acite incito yakwe, incito yakwe ya kupapusha.+ 22 E ico nomba mwilapumya,+ pa kuti iminyololo yenu ikosa, pantu ning’umfwa kuli Shikulu Mulopwe,+ Yehova wa mabumba, ukuti icalo conse nacipingulwa ukuti cikonaulwa.+

23 Umfweni kabili kutikeni kwi shiwi lyandi; bikeni amano no kukutika ku mashiwi yandi. 24 Bushe umulimi alima akasuba konse+ pa kuti fye atande imbuto, ukuti ashime no kukubila umushili?+ 25 Bushe, ilyo alinganya umushili, te lyo asalanganya kumini wafiita no kukuba kumini,+ kabili bushe tafwile ukubika ingano, amasaka,+ na barle mu cifulo calinga,+ ne ngano ishapapa+ ukuba umupaka wakwe?+ 26 Kabili Lesa alamulungika+ ukulingana ne calungama. Lesa wakwe alamusambilisha.+ 27 Pantu kumini uwafiita tapuminwa ku ca kupuminako;+ kabili pa muulu wa kumini tapapita umupeto we celeta. Pantu kumini uwafiita apuminwa ku nkonto,+ na kumini na o wine ku nkonto. 28 Bushe ingano shilashonaulwa? Pantu umuntu tashipuma fye ukwabula ukuleka+ pe.+ Kabili ensha umupeto wa ca kusokwelako, na bakabalwe bakwe, lelo tashishonaula.+ 29 Ici na co cafuma kuli Yehova wa mabumba umwine,+ uupapusha mu fyo acita ukufwaya kwakwe, uwabomba bwino umulimo wakwe.+

29 “We bulanda kuli Ariele,+ kuli Ariele, umusumba umo Davidi apangile inkambi!+ Lundenipo umwaka pa mwaka; sefyeni imitebeto.+ 2 Kabili nkalenga ifintu ukwafya+ kuli Ariele, kabili kukaba ukuloosha no kulila,+ kabili akaba kuli ine ishiko lya ciipailo ca kwa Lesa.+ 3 Kabili nkapanga inkambi konse konse ukukushinguluka, kabili nkakushinga ku luncingi no kwimya pali iwe ifya kukushinga.+ 4 Kabili ukawa ica kuti ukalanda ukufuma pa nshi, kabili ishiwi lyobe likomfwika ilinono kwati ulesosa ukufuma mu mushili.+ Kabili ishiwi lyobe ilikafuma mu mushili likomfwika kwati lya muntu uumfwana ne mipashi, kabili mu lukungu e mo ishiwi lyobe likalongofyanya.+ 5 Kabili ibumba lya bantu ushaishiba likaba ngo lukungu,+ ne bumba lya ba buluku+ nge misungu iileululuka.+ Kabili cikacitika mu kwangufyanya, mu kupumikisha.+ 6 Yehova Lesa wa mabumba akakupokolwela ku cibulukutu ne cinkukuma ne congo icikalamba, icikuuku ca mwela ne nkuuka, no lubingu lwa mulilo uonaula.”+

7 Kabili cikaba filya fine ciba mu ciloto, mu cimonwa ca bushiku, kwi bumba lya nko shonse ishilelwishanya na Ariele,+ na kuli bonse abalelwa nankwe, na ku mpungu ishamushinguluka na ku balelenga ifintu fimwafye kuli ena.+ 8 Ca cine, cikaba nga filya fine ciba nga ca kuti umuntu uuli ne nsala aloota alelya, kabili ilyo ashibuka asanga ali ne nsala;+ kabili filya ciba ilyo uuli ne cilaka aloota alenwa, kabili ilyo ashibuka nanaka kabili natembuka; e fyo cikaba na kwi bumba lya nko shonse ishilelwisha Ulupili lwa Sione.+

9 Muleshingashinga, kabili papeni;+ ipofwisheni, kabili pofuleni.+ Nabakolwa,+ lelo te ku mwangashi; batalantanta lelo te pa mulandu wa kunwa ifikola.+

10 Pantu Yehova napongolwela utulo utukalamba pali imwe;+ kabili naisala amenso yenu, mwe bakasesema,+ kabili nafimba ne mitwe yenu,+ mwe bamumwena ifimonwa.+ 11 Kabili kuli imwe conse ico mwamona mu cimonwa cili nga mashiwi ya mu citabo ico bakakatikapo,+ ico bapeela ku waishiba ukubelenga, abati: “Belenga aya mashiwi tumfwe,” kabili atila: “Nafilwa, pantu nacikakatikwa”;+ 12 kabili icitabo cikapeelwa ku ushaishiba ukubelenga, no muntu akatila: “Belenga aya mashiwi tumfwe,” kabili atila: “Nshaishiba ukubelenga nakalya.”

13 Kabili Yehova atila: “Apo aba bantu bampalama no tunwa twabo, kabili bancindika fye pa kanwa,+ kabili balitalusha imitima yabo kuli ine,+ kabili bamona ukusambilila amafunde ya bantu ukuti e kuba na katiina kuli ine,+ 14 e ico moneni, nkacita icipapwa na kabili kuli aba bantu,+ mu nshila ya kupapusha kabili ne cipesha amano; kabili amano ya baume babo aba mano yakaloba, e lyo no mucetekanya wa baume babo aba mucetekanya ukafisama.”+

15 We bulanda ku besha nga nshi ukufisa kuli Yehova ifyo balefwaya ukucita,+ kabili abo imicitile yabo icitwa mu mfifi,+ e lyo baletila: “Nani aletumona, kabili nani uwatwishiba?”+ 16 Yangu ifyo ubupulumushi bwenu bwakula! Bushe nakabumba kuti bamulinganya kwi loba?+ Bushe icabumbwa kuti casosa ku wacipangile aciti: “Te wampangile”?+ Kabili bushe icabumbwa kuti casosa kuli kalenga wa ciko aciti: “Taba na mucetekanya”?+

17 Bushe takushele fye inshita inono pa kuti Lebanone akasanguke ibala lya fisabo+ kabili ibala lya fisabo likamonwa ngo mutengo?+ 18 Kabili muli ubo bushiku bankomamatwi bakomfwa amashiwi ya mu citabo,+ kabili mu kati ke kumbi ilyafiita na mu mfifi amenso ya mpofu yakamona.+ 19 Kabili abafuuka+ bakafusha ukusekelela kwabo muli Yehova, kabili na bapiina mu bantunse bakasekelela mu Wa Mushilo uwa kwa Israele,+ 20 pantu uwa buluku takabepo,+ no wa mataki takabepo,+ kabili bonse abafwaya ukucita ububi+ bakaloba, 21 abalenga umuntu ukubembuka mu mashiwi yakwe,+ na bateya uufunda mu mpongolo,+ na bakaanya umulungami pa kulanda amashiwi ya fye.+

22 E ico Yehova, uwalubwile Abrahamu,+ asosa ku ba mu ng’anda ya kwa Yakobo ati: “Yakobo nomba takalengwe insoni, kabili ne cinso cakwe nomba tacakabe no bulanda;+ 23 pantu ilyo amona abana bakwe, imilimo ya minwe yakwe, mu kati kakwe,+ bakacindika ishina lyandi,+ kabili bakacindika Uwa Mushilo uwa kwa Yakobo,+ kabili Lesa wa kwa Israele bakamutiina.+ 24 Kabili abalelufyanya mu kutontonkanya kwabo bakaba no mucetekanya, e lyo na baleilishanya bakasambilila.”+

30 “We bulanda ku bana abomankonso,”+ e fyo Yehova asosa, “abafwaya ukucita ifyo bapanga, lelo ifishafuma kuli ine;+ no kupangana ifipangano pa kutuula umutuulo wa mwangashi, lelo ukwabula umupashi wandi, pa kuti balunde ulubembu pa lubembu;+ 2 abaleiteyanya ukuya ku Egupti+ kabili abashaipusha kuli ine,+ pa kuti Farao abacingilile no kufisama mu cinshingwa ca Egupti!+ 3 Kabili ukufisama muli Farao kukaba kuli imwe ica kumulenga insoni,+ no kufisama mu cinshingwa ca Egupti kukamulenga ukuseebana.+ 4 Pantu bacilolo bakwe bali mu Soani,+ kabili inkombe shakwe shifikile na ku Hanese. 5 Onse akalengwa insoni pa bantu abashileta ubusuma ku muntu nangu umo, abashafwa nangu ukuleta ubusuma iyo, lelo baleta insoni no museebanya.”+

6 Ubukombe ubwaluma ku finama fya ku kapinda ka ku kulyo:+ Mu calo ca bulanda+ no bucushi, umwaba inkalamo ne mbwili iilebuluma, umwaba amafwafwa ne nsoka sha mulilo ishipupukila,+ pa mpunda shikalamba e po basendela ifyuma fyabo, na pa ntengele sha ngamila+ e po basendela ifipe fyabo. Tafyakaafwe abantu nakalya. 7 Kabili abena Egupti ba fye, kabili tabakaafwe nakalya.+ E ico ninjinika uyu ati: “Rahabu+—batemwa fye ukwikala.”

8 “E ico isa, lemba ici pa libwe lyapapaatala ninshi balemonako, no kucilemba mu citabo,+ pa kuti cikabomfiwe ku ntanshi, ukuti cikabe inte umuyayaya.+ 9 Pantu aba bantu ni bacintomfwa,+ bana abashaba na cishinka,+ abana abashifwaya ukumfwa amafunde ya kwa Yehova;+ 10 abasosa ku balemona abati, ‘Mwilamona,’ na ku balemona ifimonwa abati, ‘Mwilatumwena ifya cine.+ Twebeni ifya bufi; moneni ifya bucenjeshi.+ 11 Pasukeni mu nshila; fumeni mu nshila.+ Lengeni Uwa Mushilo uwa kwa Israele ukupwa pa mulandu fye wesu.’”+

12 E ico Uwa Mushilo uwa kwa Israele atila: “Apo namukaana ici cebo,+ kabili apo imwe mulecetekela ubufi no bucenjeshi kabili e fyo mwashintililapo,+ 13 e ico ici cilubo cikaba kuli imwe nge cibumba icitali icikwete imilale icili mupepi no kuwa kabili icatundama,+ icingawa bwangu, mu kupumikisha.+ 14 Kabili umuntu akacitoba ngo kutobwa kwa mutondo uukalamba uwa banakabumba,+ uwatobaulwa ukwabula no kushako, ica kuti takwingasangwa pa fipandwa fya uko ici-inga ca kulapwilapo umulilo pe shiko nelyo ukutapwilako amenshi mu cishima.”+

15 Pantu Shikulu Mulopwe Yehova, Uwa Mushilo uwa kwa Israele,+ asosa ati: “Nga mwabwela no kutuusha mukapusuka. Amaka yenu yakaba mu mutende na mu kutetekela.”+ Lelo tamwalefwaya.+ 16 Kabili mwatile: “Iyo, ifwe tukafulumukila pali bakabalwe!”+ E co mukafulumukila. “Kabili tukanina pali bakabalwe ba lubilo!”+ E co abalemukonka bakabela aba lubilo icine cine.+ 17 Abantu ikana limo (1,000) bakatutuma pa mulandu wa kupunda kwa kutiinya ukwa muntu umo;+ pa mulandu wa kupunda kwa kutiinya ukwa bantu basano mukafulumuka mpaka mukashale ngo mulongoti pa muulu wa lupili kabili nge cishibilo pa kapili.+

18 E ico Yehova akatwalilila ukulolela ukumupaala,+ kabili akema pa kuti amubelele uluse.+ Pantu Yehova ni Lesa wa mulinganya.+ Ba nsansa+ bonse abamulolela.+ 19 Ilyo abantu bali mu Sione+ bakekala mu Yerusalemu,+ tawakalooshe.+ Akakumfwila uluse ilyo walila; ilyo aumfwa fye ukulila kobe akakwasuka.+ 20 Kabili Yehova akamupeela ubucushi kwati fya kulya no mutitikisha kwati menshi;+ lelo Kasambilisha wenu Uwapulamo, takafisame kabili iyo, kabili amenso yenu yakamona Kasambilisha wenu Uwapulamo.+ 21 Kabili nga mwaya ku kulyo nelyo nga mwaya ku kuso,+ amatwi yenu yakomfwa ishiwi ku numa yenu ilileti: “Iyi e nshila.+ E mo mwende.”

22 Kabili mukakowesha ifimpashanya fyenu ifyabaswa ifyo mwabikako silfere+ ne fimpashanya fyaengwa+ ifyo mwabikako golde.+ Mukafipasa.+ Ngo mwanakashi uuli ku mweshi, mukatila: “Fiko!”+ 23 Kabili akapeela imfula ya mbuto shenu isho mwabyala mu mushili,+ kabili umukate ukaba ukulobolola kwa mu mushili wenu, kabili ukaba uwa mulyo kabili uwa mafuta.+ Muli ubo bushiku, ifitekwa fyenu fikalya mu mulemfwe mu ncende iikalamba.+ 24 Kabili ing’ombe ne mpunda ishikalamba ishilelima umushili fikalya icani casakana ne cani cawamisha, icaelwilwe ku fya kwelelako+ ne fya kutunkwilako. 25 Kabili pa lupili ulutali lonse na pa kapili kasansama konse pakaba imilonga,+ ifishiba, mu bushiku bwa kwipaya kukalamba ilyo impungu shawa.+ 26 Kabili ulubuuto lwa mweshi lukaba ngo lubuuto lwa kasuba akabalike; kabili ulubuuto lwa kasuba akabalike lukabalikilako imiku cinelubali (7),+ ngo lubuuto lwa nshiku cinelubali, mu bushiku Yehova akakaka ukubongoloka+ kwa bantu bakwe no kuundapa+ ifilonda fikalamba ifyafuma ku kulopolwa kuli ena.

27 Moneni! Ishina lya kwa Yehova lileisa ukufuma ukutali, lilebilima ngo mulilo ku bukali+ kabili lileisa na makumbi ayafiita. Kumfwa imilomo yakwe, iswilepo ukukalipila, kabili ululimi lwakwe luli ngo mulilo uonaula.+ 28 Kabili umupashi wakwe uli ngo mumana uwapoosa wafika na mu mukoshi,+ pa kuti aseshe inko uku no ku ku lunyungo+ lwa fye; kabili umukobelo+ uulenga umuntu ukulubanta ukaba mu mibango ya bantu.+ 29 Kabili mukakwata ulwimbo+ ngo lwa pa bushiku umuntu aleipekanishisha umutebeto,+ no kusekelela kwa mutima nga kulya ukwa ule-enda no mutolilo+ ilyo aleingila mu lupili lwa kwa Yehova,+ ku Cilibwe ca kwa Israele.+

30 Kabili Yehova akalenga ubucindami bwe shiwi+ lyakwe ukumfwika no kulenga ukupona kwa kuboko kwakwe ukumoneka,+ mu bukali ubukalamba+ no lubingu lwa mulilo+ uonaula no kubulukuta ne mfula iikalamba+ ne mfula ya mabwe.+ 31 Pantu Asiria akatiina icibi pa mulandu we shiwi lya kwa Yehova;+ kabili akamuuma ne nkonto.+ 32 Kabili lyonse ilyo Yehova asunsha inkonto yakwe iya kufundilako pali Asiria, kukaba na kaoma na nsango;+ kabili akalwa na bo mu nkondo ya kusunsha ifyanso fya bulwi.+ 33 Pantu Tofete+ wakwe balimupekanya ukufuma ku kale; kabili napekanishiwilwa imfumu.+ Nalenga umukanda uwashika ukwisulamo umwina wa nkuni. Kuli umulilo ukalamba ne nkuni ishingi. Umupu wa kwa Yehova, uleoca Tofete ngo mumana wa mingu.+

31 Kalanda ku baleya ku Egupti pa kuti babafwe,+ abashintilila pali bakabalwe,+ kabili abacetekela mu maceleta ya bulwi,+ pantu yengi, kabili na muli bakabalwe, pantu balikosa, lelo abashilolesha ku Wa Mushilo uwa kwa Israele kabili abashifwaya Yehova.+ 2 Lelo na o wa mano+ kabili akaleta ububi,+ kabili tabwesha amashiwi yakwe iyo;+ kabili akemina ing’anda ya ncitatubi+ no kwimina ubwafwilisho ubo abacita ifyabipa bafwaya.+

3 Lelo, abena Egupti bantunse fye,+ kabili te Lesa; na bakabalwe babo ni nama fye,+ te mupashi iyo. Kabili Yehova akatambalika ukuboko kwakwe, kabili uuleafwilisha akaipununa, na untu baleafwa akawa,+ kabili pa nshita imo ine bonse bakapwa.

4 Pantu Yehova anjebele ati: “Filya fine inkalamo ibuluma, umwana wa nkalamo,+ pa nama ikete, ilyo abacemi abengi baitwa pali yena, kabili nangu bapunde shani tayakatiine kabili nangu bapange shani icongo tayakename; e fyo na Yehova wa mabumba akesalwa pa Lupili lwa Sione na pa kapili ka luko.+ 5 Nga filya ifyuni ifipupuka ficingilila utwana, Yehova wa mabumba na o akacingilila Yerusalemu.+ Akamucingilila no kumupususha.+ Akamusunga no kumupususha.”

6 “Bweleleni+ kuli uyo abana ba kwa Israele bapondokela nga nshi.+ 7 Pantu muli ubo bushiku umuntu onse akakaana balesa bakwe aba fye aba silfere na balesa bakwe aba fye aba golde,+ abo iminwe yenu yamupangila, kabili ulo lubembu.+ 8 Kabili umwina Asiria akafwa ku lupanga, lelo te ku lupanga lwa muntu iyo; kabili ulupanga, ulushili lwa muntunse lukamulya.+ Kabili akafulumuka pa mulandu wa lupanga, kabili abalumendo bakwe bakabomba umulimo wa kupatikishiwa. 9 Kabili icilibwe cakwe cikaloba pa mulandu wa mwenso, kabili pa mulandu wa cishibilo+ bacilolo bakwe bakatiina,” e fyo Yehova asosa, uo ulubuuto lwakwe lwaba mu Sione kabili uo ilungu+ lyakwe ilya mulilo lyaba mu Yerusalemu.

32 Moneni! Imfumu+ ikatekela ku bulungami;+ e lyo bacilolo+ na bo bakatekela ku mulinganya. 2 Kabili umo umo akaba ngo mwa kufisama ku mwela kabili nge cifulo ca kubelamamo ku mfula iikalamba,+ nge milonga ya menshi mu calo icabula amenshi,+ nge cintelelwe ca cilibwe cafina mu calo icauma.+

3 Kabili amenso ya balemona tayakashibate iyo, na matwi ya baleumfwa yakakutika.+ 4 Kabili umutima wa bashatekanya ukabika amano ku kwishiba,+ no lulimi lwa babulubusa lukangufyanya ukulanda ifyaumfwika.+ 5 Umuwelewele tabakamwite na kabili ati ni kapekape; kumfwa umubifi tabakamwite ati mulungami;+ 6 pantu umuwelewele akalanda fye ifya buwelewele,+ no mutima wakwe ukelenganya ifibi,+ pa kuti acite ubusangu+ no kulanda ifibi pali Yehova, pa kuti alenge umweo wa uli ne nsala ukubulwa akantu,+ kabili alenga no wa cilaka ukubulwa ifya kunwa. 7 Umubifi ena, inshila shakwe shibi;+ ena apanda amano aya kucita ifya nsoni,+ pa kuti onawile abacula ku mashiwi ya bufi,+ nangu fye ni lintu umupiina alanda ifya cine.

8 Nomba kapekape ena, apanda amano pali bukapekape; kabili akatwalilila ukuba kapekape.+

9 “Imeni mwe banakashi abaikala ku matwi tondolo, kutikeni kwi shiwi lyandi!+ Imwe mwe bana banakashi abailekelesha, kutikeni ku mashiwi yandi! 10 Mu mwaka umo ne nshiku ishinono imwe mwe bailekelesha mukatelentenshiwa,+ pantu ukulobolola imyangashi kukapwa lelo tabakalonganike ifisabo.+ 11 Tutumeni, mwe banakashi abaikala ku matwi tondolo! Tiineni, mwe bailekelesha! Fuuleni no kushala ubwamba, no kufwala insamu* mu misana yenu.+ 12 Yumeni pa fifuba no kuloosha+ pa mulandu wa mabala ayasuma,+ pa mulandu wa myangashi itwala ifisabo. 13 Pa mushili wa bantu bandi pali fye imyunga, ifimpusa fya ficilasa e fimenenepo,+ pantu fili pa mayanda yonse umwali ukusekelela, pa musumba uwa nsansa.+ 14 Pantu ulupungu lwa kwikalamo nalulekeleshiwa,+ icongo ca mu musumba na co nacipwa; Ofele+ no lupungu lwa kwa kalinda fisangwike impanga yabulapo akantu, icifulo umo bacolwa bakasekelela umuyayaya, umuli umulemfwe wa mpaanga;15 mpaka umupashi wapongololwa pali ifwe ukufuma ku muulu,+ kabili amatololo yasanguka ibala lya fisabo, ne bala lya fisabo likamonwa ngo mutengo wine wine.+

16 “Kabili umulinganya ukekala mu matololo, na mu mutengo e mukekala ubulungami.+ 17 Kabili umulimo wa bulungami bwa cine ukaba umutende;+ no mulimo wa bulungami bwa cine ukaba tondolo no mutelelwe umuyayaya.+ 18 Kabili abantu bandi bakekala mu cifulo ca mutende na mu ncende ishacingililwa ne ncende sha kutuushishamo ishaba tondolo.+ 19 Kabili ikaloka iya mabwe ilyo bakatema umutengo+ na lintu umusumba ukaseebana.+

20 “Mwalishuka mwe balebyala imbuto mu mbali ya menshi monse,+ mwe bakakula ing’ombe ne mpunda.”+

33 We bulanda kuli iwe we upokolola ifipe, ukwabula ukuti na iwe bakupokolole, na iwe we ubepa, ukwabula ukuti bambi bakubepe!+ Ilyo fye ukapwa ukupokolola ifipe, na iwe bakupokolola ifipe.+ Ilyo fye ukapwa ukubepa, na iwe bakakubepa.+

2 Mwe Yehova, tupaaleni.+ Twacetekela imwe.+ Beni ukuboko+ kwesu cila lucelo,+ beni ipusukilo lyesu mu nshita ya bucushi.+ 3 Abantu bafulumuka pa kumfwa icimfulunganya.+ Inko shasalangana pa kwima kwenu.+ 4 Kabili ifyo mwapokolola+ fikalonganikwa filya ciba ilyo impemfu shalongana, nge fyo bamakanta abengi bakonka umuntu ulubilo.+ 5 Yehova akasansabikwa,+ pantu ekala mu muulu.+ Akesusha umulinganya no bulungami mu Sione.+ 6 Kabili icishinka ca mu nshita yobe cikaba ifyuma fya kupususha,+ e kutila, amano no kwishiba,+ ukutiina Yehova,+ ifyo acindamika.

7 Moneni! impalume shapunda mu musebo; inkombe sha mutende+ shikalila akalanda. 8 Imisebo yaonaulwa;+ uwa kupita mu nshila naloba.+ Natoba icipangano;+ nasuula imisumba;+ tacindika umuntunse.+ 9 Icalo cileloosha, nacuuma.+ Lebanone naonaulwa;+ nabola. Sharone+ ali nge ciswebebe; kabili Bashani na Karmele balelukusha amabula yabo.+

10 “Nomba nkema,”+ e fyasosa Yehova, “nomba nkaisansabika;+ nomba nkaitumpula.+ 11 Imwe mwaimita icani icauma;+ mukafyala impimbili. Umutima wenu ukamulya+ ngo mulilo.+ 12 Kabili abantu na bantu bakaba nge mito ya mpemba. Bakaboca no mulilo nge myunga iyaputulwa.+ 13 Umfweni ico ndecita mwe bali ukutali!+ Kabili ishibeni amaka yandi mwe bali mupepi.+ 14 Mu Sione ababembu bali no mwenso;+ abasangu+ batutuma, baleti: ‘Nani pali ifwe uwingekala no mulilo uonaula?+ Nani pali ifwe uwingekala mupepi no lubingu ulukalamba ulwa muyayaya?’+

15 “Pali uule-enda mu bulungami+ lyonse no kulanda ifyatambalala,+ uukaana ifyuma ifyabipa ukufuma ku ncenjeshi,+ uukaanya amaboko yakwe ukupoka amafisakanwa,+ uushikutika ku fya kusumya umulopa, kabili uushibata pa kuti emona icabipa.+ 16 Ena akekala pa muulu;+ icubo cakwe cikaba ni ncende ya fimabwe fyasansuka iya-afya ukuyako.+ Akapeelwa ifya kulya fyakwe;+ amenshi yakwe tayakapwe.”+

17 Amenso yobe yakamona imfumu mu kuyemba kwa iko;+ yakamona icalo ca kutali.+ 18 Umutima obe ukalanda mu kantepentepe+ pa cintu ca kutiinya, auti: “Kalemba ali kwi? Uupeela indalama ali kwi?+ Ali kwi uupenda impungu?”+ 19 Tawakamone abantu aba musaalula, abantu aba lulimi lwa-afya ukumfwa, ababulubusa pa kulanda ukwabula ukuti umfwe.+ 20 Moneni Sione,+ umusumba wa nshita yesu iya mitebeto!+ Amenso yobe yakamona Yerusalemu incende ya kwikalamo iyaba tondolo, itenti ilyo umuntu ashakalonge.+ Impoopo sha kwi tenti tashakanukulwe, kabili tapali umwando wa uko uukaputulwa pa kati.+ 21 Lelo kulya e ko Katebebe,+ Yehova akaba kuli ifwe kwati mimana+ ne milonga. Tapali ingalaba sha nkondo ishikayako, kabili takuli amato ayasuma ayakapitapo. 22 Pantu Yehova e Mupingushi+ wesu, Yehova e wa kutupeela amafunde,+ Yehova e Mfumu+ yesu; akatupususha.+

23 Imyando yabo ikakakuka; tabakashe umulongoti wabo nawiminina; tabafungulwile insalu ya ku bwato.

Pali iyo nshita ifipe ifingi ifyapokololwa bakafyakanya; abalemana bakasenda ifyapokololwa ifingi.+ 24 Kabili takuli umwikashi uukatila: “Nindwala.”+ Abantu abakekala mu calo bantu abaelelwa imembu shabo.+

34 Iseni mupepi, mwe nko, pa kuti mumfwe;+ na imwe mwe bantu na bantu,+ kutikeni. Lekeni isonde ne fyabamo fikutike,+ icalo+ na fyonse ifyabapo.+ 2 Pantu Yehova ali no bukali pa nko shonse,+ kabili ali ne cipyu pe bumba lya shiko ilya bashilika.+ Akabonaula; kabili akabepaya.+ 3 Kabili abafwa babo bakapooswa ku nse; e lyo ifitumbi fyabo, ukununka kwa fiko kukema;+ ne mpili shikasunguluka pa mulandu wa mulopa wabo.+ 4 Kabili ifya mu muulu fyonse fikabola panono panono.+ Ne myulu ikafungwa,+ nge buuku ilyapombwa; kabili ifya mu muulu fyonse fikabonsa, filya amabula yabonsa ku muti wa mwangashi kabili filya ikunyu libonsa ku mukunyu.+

5 “Pantu mu muulu ulupanga+ lwandi lukabomba ku mulopa. Moneni! Pali Edomu e po lukaya,+ pa bantu abo napanga ukonaula+ mu mulinganya. 6 Yehova nakwata ulupanga; lukesulamo umulopa;+ lukanona ku mafuta, na ku mulopa wa bana ba mpaanga na basawe, na ku mafuta+ ya ku mfyo sha basukusuku. Pantu Yehova nakwata ilambo mu Bosera, kabili akepaulula nga nshi mu Edomu.+ 7 Kabili imboo+ shikaya pamo na bo, na bana ba ng’ombe pamo ne ng’ombe sha maka;+ kabili icalo cabo cikabomba ku mulopa, no lukungu lwabo lukanona ku mafuta.”+

8 Pantu Yehova alikwata ubushiku akalandula,+ umwaka akalandula pali Sione.+

9 Kabili imimana yakwe ikalulwa ukuba sefeti, no lukungu lwakwe lukaba ilibwe lya mingu; kabili icalo cakwe cikaba sefeti iilepya.+ 10 Tacakashime akasuba nelyo ubushiku; icushi ca ciko cikalaima umuyayaya.+ Cikaba icauma ku nkulo ne nkulo;+ takwakabe uukalapita pali cena umuyayaya.+ 11 Kabili mukanga ne cinungi fikekala muli ena, ifipululu ifya matwi ayatali na ba mwankole fikekala muli ena;+ kabili akatambulwila pali ena intambo ya kupiminako+ iya kubulwamo akantu na mabwe ya bonaushi. 12 Tapali pa bakankaala bakwe uo baketa ku bufumu, na bacilolo bakwe bakaba aba fye.+ 13 Imyunga ikamena pa mayanda yakwe aya pa malinga, kaenya na ficilasa fikamena mu misumba yakwe iya malinga;+ kabili akaba umwa kwikala bamumbwe,+ ulubansa lwa ba mwakatala.+ 14 Kabili abekashi ba mu calo icabula amenshi bakakumanya inama ishileng’onta, ne fibanda ifimoneka nge mbushi+ fiketa ifibiye. Ca cine, kulya e ko akambasa kakekala umutelelwe no kusanga apa kutushisha.+ 15 Kulya e ko insoka iikali yapanga icinsa no kubikila amani, kabili ikatota no kulonganika abana mu cinshingwa ca iko. Cine cine, kulya e kukalongana bapungwa,+ cila pungwa na pungwa munankwe.

16 Fwayeni mwi buuku+ lya kwa Yehova no kubelenga mu kupongomoka: tapali icibulilepo;+ tapali icifililwe ukusanga icibiye, pantu akanwa ka kwa Yehova e kasosele,+ kabili mupashi wakwe e ufilongenye.+ 17 Kabili e ufipendwilile, kabili ukuboko kwakwe e kwakenye icifulo kuli fyena ku intambo ya kupiminako.+ Fikekalamo umuyayaya, fikekala mulya ku nkulo ne nkulo.

35 Amatololo ne mpanga yauma fikasekelela,+ kabili iciswebebe cikasansamuka no kubalula nga maluba ya ntongola.+ 2 Cine cine cikabalula,+ kabili cikesulamo ukusekelela no kwaula utupundu.+ Ubucindami bwa kwa Lebanone bukapeelwa kuli cena,+ pamo no bucindami bwa Karmele+ no bwa Sharone.+ Kukaba abakamona ubukata bwa kwa Yehova,+ no bucindami bwa kwa Lesa wesu.+

3 Kosheni amaboko ayanaka, kabili kosheni amakufi ayaletutuma.+ 4 Soseni ku basakamikwe mu mitima+ amuti: “Koseni.+ Mwitiina.+ Moneni! Lesa wenu akesa ne cilandushi,+ Lesa akesa no kulandula.+ Akesa no kumupususha.”+

5 Pali iyo nshita amenso ya mpofu yakamona,+ na matwi ya bankomamatwi yakakomonwa.+ 6 Pali iyo nshita uwalemana amolu akacilauka nge nsebula,+ kabili ululimi lwa kwa cibulu lukaula akapundu.+ Pantu mu matololo mukafukauka amenshi, ne mimana ikalapita mu fiswebebe. 7 Kabili impanga iyaumisha ikaba nge cishiba, ne mpanga iyauma ikaba ngo tumfukumfuku twa menshi.+ Umwikala bamumbwe,+ e kutila, umo batuushisha, mukaba icani iciteku na matete na macinda.+

8 Kabili kulya kukaba umusebo,+ kukaba inshila; iketwa Inshila ya Mushilo.+ Uwakowela takapitemo.+ Kabili ikaba ya wasuminishiwa ukwendamo, na bawelewele tabakendaukemo. 9 Tamwakabe inkalamo nakalya, ne fiswango tafyakapitemo.+ Tashakasangwemo,+ kabili abalubulwa bakendamo.+ 10 Kabili abalubulwa na Yehova bakabwela+ no kwisa ku Sione no tupundu;+ kabili ukusekelela kukaba pa mitwe yabo umuyayaya.+ Bakala-anga no kusekelela, kabili ubulanda no kuteta fikafulumukamo.+

36 Nomba mu mwaka walenga ikumi na ine (14) uwa kuteka kwa Mfumu Hisekia, Sankeribu+ imfumu ya Asiria+ aile ku kulwisha imisumba ya malinga yonse iya mu Yuda kabili ali-ipokele.+ 2 Kabili imfumu ya Asiria yatumine Rabsake*+ ukufuma ku Lakishi+ ukuya ku Yerusalemu,+ ku Mfumu Hisekia, ne bumba lya bashilika ilikalamba, kabili aiminine mupepi no mufoolo+ waile ku cishiba+ ca pa muulu mu musebo wa mu mpanga ya kwa kacapa wa nsalu.+ 3 Kabili Eliakimu+ mwana Hilkia, uwaleangalila aba mu ng’anda ya mfumu, na Shebna+ kalemba na Yoa+ kebukisha,+ umwana wa kwa Asafi,+ balifumine no kuya kuli ena.

4 Awe Rabsake abebele ati: “Ebeni Hisekia amuti, ‘Imfumu nkalamba,+ imfumu ya Asiria,+ yatila: “Nga kanshi cinshi ucetekelemo?+ 5 Iwe usosele amashiwi ya pa kanwa fye auti, ‘Ninjishiba ifya kulwa kabili ninkwata amaka ya kulwa.’+ Nomba nani ucetekele, pa kuti upondokele ine?+ 6 Mona! ucetekele mu kwafwa kwa ili tete ilyafunika,+ Egupti,+ itete ilya kuti umuntu nga ashintililapo, kuti lyaingila mu lupi lwakwe no kulutula. E fyo Farao+ imfumu ya Egupti aba kuli bonse abamucetekela.+ 7 Kabili nga watila kuli ine, ‘Ni Yehova Lesa wesu e o tucetekele,’ bushe te o Hisekia afumishapo+ ififulo fya kupepelapo+ ne fiipailo, no kweba abaYuda na ba mu Yerusalemu ati, ‘Mulekontamina pali ici ciipailo’?”’+ 8 E ico nomba, upangane+ na shikulu imfumu ya Asiria,+ kabili leka nkupeele bakabalwe amakana yabili (2,000) tumone nga kuti wabikapo abantu.+ 9 Nga kanshi kuti wacimfya shani umulashi umo uwa mu babomfi bacepesha aba kwa shikulu,+ apo iwe ucetekele Egupti ukukupeela amaceleta na ba pali bakabalwe?+ 10 Nomba bushe njishile mu konaula uno musumba ukwabula ukusuminishiwa na Yehova? Yehova umwine anjebele ati,+ ‘Kabiye mu kulwisha ici calo, kabili uconaule.’”+

11 E lyo Eliakimu+ na Shebna+ na Yoa+ batile kuli Rabsake:+ “Landeni na babomfi benu mu lulimi lwa bena Siria,+ pantu tulomfwa; mwilanda na ifwe mu ciYuda,+ pantu abantu abali pe linga kuti baumfwako.”+ 12 Lelo Rabsake atile: “Bushe shikulu antumine ukulanda aya mashiwi kuli shikulwinwe na kuli imwe? Bushe te kuli aba bantu abekele pe linga e ko antumine, ukuti balye amafi yabo no kunwa imisu yabo pamo na imwe?”+

13 Kabili Rabsake aiminine fye + no kubilikisha mu ciYuda,+ no kutila: “Umfweni amashiwi ya mfumu nkalamba, imfumu ya Asiria.+ 14 Imfumu yatila, ‘Mwileka Hisekia amubepe,+ pantu te kuti amupokolole.+ 15 Kabili mwileka Hisekia amulenge ukucetekela Yehova,+ ati: “Nangu cibe shani Yehova aletupokolola.+ Uno musumba tawakapeelwe mu minwe ya mfumu ya Asiria.”+ 16 Mwiumfwa kuli Hisekia, pantu imfumu ya Asiria yatila: “Cimbeni kuli ine+ no kwisa kuli ine no kulya cila muntu ku muti wakwe uwa mwangashi no muntu onse ku mukunyu+ wakwe no kunwa amenshi cila muntu mu cishima cakwe,+ 17 nkasuke nkese no kumutwala ku calo icaba nge calo cenu,+ icalo ca ngano no mwangashi uupya, icalo ca mukate na mabala ya myangashi;18 pa kuti Hisekia emusembeleka,+ ukutila, ‘Yehova aletupokolola.’ Bushe balesa ba nko balipokolwele ifyalo fyabo ku mfumu ya Asiria?+ 19 Bushe balesa ba ku Hamati+ na ba ku Aripadi+ bali kwi? Bali kwi balesa ba ku Sefaribaimu?+ Kabili bushe balipokolola Samaria kuli ine?+ 20 Nani pali balesa bonse aba mu fyalo uwapokolola icalo cakwe kuli ine+ pa kuti Yehova apokolole Yerusalemu kuli ine?”’”+

21 Awe baikele fye tondolo kabili tabamwaswike nangu cimo,+ pantu imfumu yabebele ati: “Mwimwasuka.”+ 22 Lelo Eliakimu+ mwana Hilkia, uwaleangalila aba mu ng’anda,+ na Shebna+ kalemba na Yoa+ mwana Asafi, kebukisha, baile kuli Hisekia nabalepula ifya kufwala fyabo,+ kabili bamwebele amashiwi ya kwa Rabsake.+

37 Nomba ilyo fye Imfumu Hisekia yaumfwile, ilyo line yalepwile ifya kufwala fya iko no kufwala insamu*+ yaingile na mu ng’anda ya kwa Yehova.+ 2 Kabili yatumine Eliakimu,+ uwaleangalila aba mu ng’anda, na Shebna kalemba+ na bakalamba pali bashimapepo+ kuli kasesema Esaya+ mwana Amose,+ ninshi nabafwala insamu. 3 Kabili bamwebele ati: “Hisekia atila, ‘Buno bushiku, bushiku bwa bulanda+ no kwebaulwa no kusaalulwa,+ pantu tuli ngo mwanakashi uuli mupepi no kupaapa, nomba takuli amaka ya kupaapa.+ 4 Nalimo Yehova Lesa obe akomfwa amashiwi ya kwa Rabsake,*+ uo shikulu wakwe imfumu ya Asiria atumine ku kusaalula+ Lesa wa mweo, kabili akamukanda pa mashiwi ayo Yehova Lesa obe omfwile.+ Kabili upepeleko+ abashalapo abalipo.’”+

5 Awe ababomfi ba Mfumu Hisekia baile kuli Esaya.+ 6 E lyo Esaya abebele ati: “Mwebe shikulwinwe amuti, ‘Yehova atila:+ “Witiina+ pa mulandu wa mashiwi ayo umfwile ayo ababomfi+ ba mfumu ya Asiria balandile pa kunsaalula. 7 Mona, ndebika umupashi+ muli yena, kabili ikomfwa ilyashi+ no kubwelela ku calo ca iko; kabili nkailenga ukufwa ku lupanga mu calo ca iko.”’”+

8 Awe Rabsake+ alibwelelemo no kuyasanga imfumu ya Asiria ilelwa na Libna,+ pantu alyumfwile ukuti yalifumine ku Lakishi.+ 9 Nomba yaumfwile pali Tirhaka+ imfumu ya Etiopia ukutila: “Naisa mu kulwa na iwe.” Ilyo yaumfwile, ilyo line fye yatumine inkombe+ kuli Hisekia, no kutila: 10 “Mwebe Hisekia imfumu ya kwa Yuda, amuti, ‘Wileka Lesa obe uo ucetekele akubepe,+ ati: “Yerusalemu takacimfiwe ku mfumu ya Asiria.”+ 11 Mona! Walyumfwa ifyo ishamfumu sha Asiria shacitile ku fyalo fyonse pa kufyonaula,+ nomba bushe iwe ukapokololwa?+ 12 Bushe balesa+ ba nko isho ifikolwe fyandi fyaonawile balipokolwele shilya nko,+ e kutila Gosani+ na Harani+ na Resefe na bena Edene+ abali mu Telasari?13 Bushe ili kwi imfumu ya Hamati+ ne mfumu ya Aripadi+ ne mfumu ya musumba wa Sefaribaimu,+ ne mfumu ya Hena ne ya Iba?’”+

14 Awe Hisekia apokele bakalata ku nkombe no kubabelenga,+ na pa numa Hisekia aile ku ng’anda ya kwa Yehova no kufungulula bakalata pa ntanshi ya kwa Yehova.+ 15 Kabili Hisekia apepele kuli Yehova,+ ati:16 “Mwe Yehova wa mabumba, Lesa wa kwa Israele,+ mwe baikala pali bakerubi, ni mwe mweka mwe Lesa wa cine mu mabufumu yonse aya pe sonde.+ Ni mwe mwalengele umuulu ne calo.+ 17 Kutikeni mwe Yehova no kumfwa.+ Isuleni amenso yenu,+ mwe Yehova, no kumona, kabili umfweni amashiwi yonse aya kwa Sankeribu+ ayo atumine ku kuseebanya Lesa wa mweo.+ 18 Mwe Yehova, ca cine, ukuti ishamfumu sha Asiria shalyonaula ifyalo fyonse, pamo pene ne calo cabo.+ 19 Kabili kwali ukoca balesa babo mu mulilo,+ pantu tabali balesa iyo,+ lelo bapangilwe fye ne fimuti na mabwe ku minwe ya bantu,+ e co babonawilile.+ 20 E ico nomba, mwe Yehova Lesa wesu,+ tupususheni mu minwe yakwe,+ pa kuti amabufumu yonse aya pe sonde yeshibe ukutila imwe, mwe Yehova, ni mwe Lesa mweka.”+

30 “‘Kabili ici e cikaba icishibilo kuli iwe: Uno mwaka mukalya ifikamena ku fyashele ilyo mwalelobolola,+ na mu mwaka wa cibili mukalya ifya kuimenena fye; e lyo mu mwaka wa citatu, mukabyala imbuto, no kulobolola, no kulima amabala ya myangashi no kulya ifisabo fya yako.+ 31 Kabili abakapusuka mu ng’anda ya kwa Yuda, abakashalapo,+ bakalimba imishila no kutwala ifisabo.+ 32 Pantu abashalapo+ bakafuma mu Yerusalemu na bakapusuka bakafuma mu Lupili lwa Sione.+ Ukupimpa kwa kwa Yehova kukacita ici.+

33 “‘E ico Yehova alanda pa mfumu ya Asiria ati:+ “Tayakengile muli uno musumba+ nangu kulasamo umufwi nangu kwisa ne nkwela nangu ukutuulikila uyu musumba amaloba nge cibumba.”’+

34 “‘Mu nshila yaishilemo e mo ikabwelela, kabili muli uno musumba tayakesemo,’ e fyo Yehova asosa.+ 35 ‘Kabili nkacingilila+ uno musumba pa kuti mpusushe uno musumba pa mulandu wandi+ na pa mulandu wa kwa Davidi umubomfi wandi.’”+

36 Kabili malaika+ wa kwa Yehova aliile no kuyaipaya abantu amakana umwanda umo na makana amakumi cinekonsekonse na yasano (185,000) abali mu nkambi ya bena Asiria.+ Ilyo abantu baimine ulucelo, moneni, bonse bali fitumbi.+ 37 E ico Sankeribu+ imfumu ya Asiria alifumineko no kuya, alibwelelemo+ no kuyaikala mu Ninebe.+ 38 Nomba ilyo afukeme alepepa mu ng’anda ya kwa Nisroke+ lesa wakwe,+ Adrameleke na Sharesere, abana bakwe, balimwipeye ku lupanga,+ kabili bafulumukile ku calo ca Ararati.+ Kabili Esari-hadone+ umwana wakwe alimupyene no kutendeka ukuteka.

38 Awe mu nshiku shilya Hisekia alilwele ubwa kufwa.+ E ico Esaya+ mwana Amose kasesema aile kuli ena no kumweba ati: “Yehova atila, ‘Eba aba mu ng’anda yobe ifya kucita,+ pantu iwe ukufwa kwena ulefwa kabili tawabe no mweo.’”+ 2 Awe Hisekia apilibukile ku cibumba,+ alapepa kuli Yehova+ 3 no kutila: “Napapaata, mwe Yehova, ibukisheni+ ifyo naenda+ mu cishinka+ no mutima onse+ ku cinso cenu kabili nalicita icisuma mu menso yenu.” Awe Hisekia alililile nga nshi.+

4 Kabili amashiwi+ ya kwa Yehova yaishile kuli Esaya, ayati: 5 “Kabiye, kabili usose kuli Hisekia, auti: ‘Yehova Lesa wa kwa Davidi icikolwe+ cobe atila: “Ning’umfwa ipepo lyobe.+ Nimona ifilamba fyobe.+ Mona ndelundako imyaka ikumi na isano (15) ku nshiku shobe;+ 6 kabili nkapokolola iwe na uno musumba ku mfumu ya Asiria, kabili nkacingilila uno umusumba.+ 7 Kabili ici e cishibilo icafuma kuli Yehova ica kukulanga ukuti Yehova akacita ifyo asosele:+ 8 Mona, icinshingwa icili pa matabo, ico akasuba+ kalengele ukuba pa matabo ya kwa Ahasi, ndecilenga ukubwelela ku numa amatabo ikumi (10).”’”+ Awe akasuba kabwelele ku numa amatabo ikumi ukufuma pa matabo apo kali.+

9 Aya e mashiwi Hisekia imfumu ya Yuda alembele ilyo alwele+ no kupola ku bulwele bwakwe.+

21 Kabili Esaya atile: “Lekeni babuule icimamantwa ca makunyu ayauma no kusuba pa cipute,+ pa kuti apole.”+ 22 Nomba Hisekia aipwishe ati: “Bushe cishibilo nshi ica kulanga ukuti nkaya ku ng’anda ya kwa Yehova?”+

39 Pali ilya nshita Merodakibaladani+ mwana Baladani imfumu ya Babiloni+ atumine bakalata no bupe+ kuli Hisekia, ilyo aumfwile ukuti alilwele lelo nomba alipolele.+ 2 E ico Hisekia alisekelele pa bupe+ no kulanga inkombe ing’anda yakwe iya cuma,+ silfere na golde na mafuta ya balsamu+ na mafuta ayasuma no mwalesungilwa ifyanso+ fyakwe ne fyuma fyakwe fyonse. Tapali nangu cimo ico Hisekia ashabalangile mu ng’anda+ yakwe na mu bufumu bwakwe bonse.+

3 Pa numa ya ifi Esaya kasesema aile ku Mfumu Hisekia no kuipusha ati:+ “Finshi aba baume balandile, kabili bafumine kwi pa kwisa kuli iwe?” Na o Hisekia ayaswike ati: “Bafumine ku calo ca kutali, ku Babiloni.”+ 4 Na kabili aipwishe ukuti: “Finshi bacimona mu ng’anda yobe?”+ E lyo Hisekia ayaswike ati: “Bacimona fyonse ifyaba mu ng’anda yandi. Tapali nangu cimo pa fyuma fyandi ico nshacibalanga.” 5 Esaya nomba e pa kweba Hisekia ati:+ “Umfweni ifyo Yehova wa mabumba asosa, 6 ‘Mona! Inshiku shileisa, kabili fyonse ifyaba mu ng’anda yobe na fyonse ifyo ifikolwe fyobe fyalonganike ukufika na pali buno bushiku fikasendwa ku Babiloni.’+ ‘Tapakashale nangu cimo,’+ e fyo Yehova asosa. 7 ‘Kabili abana bobe bamo abakafuma muli iwe, abana abo ukafyala, bakasendwa+ no kuyaba bacilolo+ mwi sano lya mfumu ya Babiloni.’”+

8 E lyo Hisekia atile kuli Esaya: “Amashiwi ya kwa Yehova ayo wasosa yawama.”+ Kabili atile: “Pantu umutende ne cine+ fikatwalilila mu nshiku shandi.”+

40 “Sansamusheni, sansamusheni abantu bandi,” e fyasosa Lesa wenu.+ 2 “Koselesheni Yerusalemu+ kabili mwebeni ukuti inshita yakwe iya kubomba mwi bumba lya bashilika naipwa,+ ukuti ulubembu lwakwe nalwelelwa.+ Pantu napokelela ku kuboko kwa kwa Yehova icilingene ne membu shakwe shonse.”+

3 Umfweni! Umuntu alebilikisha mu matololo,+ aleti: “Wamyeni inshila ya kwa Yehova!+ Lungamikileni Lesa wesu umusebo mu ciswebebe.+ 4 Lekeni imipokapoka yonse ilundumikwe,+ no lupili lonse na kapili fibatamikwe.+ Kabili impanga ya tupili ikaba iyatambalala, ne mpanga yalundumana ikabatama.+ 5 Kabili ubukata bwa kwa Yehova bukasokololwa,+ na bantu bonse bakabumwena pamo,+ pantu akanwa ka kwa Yehova nakasosa.”+

6 Kutikeni! Kuli uuleti: “Bilikisha!”+ Kabili umo atile: “Cinshi ndebilikisha?”

Bilikisha ati, “Abantu bonse cani iciteku, kabili icikuuku cabo conse caba nge luba lya mu mpanga.+ 7 Icani iciteku cauma, iluba lyabonsa,+ pantu umupashi wa kwa Yehova wapuutapo.+ Cine cine abantu cani iciteku.+ 8 Icani iciteku cauma, iluba lyabonsa;+ lelo icebo ca kwa Lesa wesu cena, cikabako umuyayaya.”+

9 Nina uye pa lupili ulutali,+ we mwanakashi uuleletela Sione imbila nsuma.+ Sansula ishiwi lyobe na maka, we mwanakashi uuleletela Yerusalemu imbila nsuma.+ Lisansule. Witiina.+ Sosa ku misumba ya kwa Yuda auti: “Moneni Lesa wenu uyu.”+ 10 Moneni! Shikulu Mulopwe Yehova akesa na maka, kabili ukuboko kwakwe kukalamutekelako.+ Moneni! Ali ne cilambu cakwe,+ kabili amalipilo apeela yali pa ntanshi yakwe.+ 11 Akacema impaanga shakwe nga filya kacema acita.+ Ku kuboko kwakwe akalonganika abana ba mpaanga;+ kabili akabasendela pa cifuba cakwe.+ Ishileonsha akashisakamana bwino.+

12 Nani uwapima amenshi mu lupi lwakwe,+ no kupimina umuulu ku cisansa cakwe+ no kupima ulukungu lwaba pe sonde,+ nelyo ukupima impili pa ca kupiminako, no tupili pali sekelo?13 Nani uwapima umupashi wa kwa Yehova, kabili nani uwingamupanda amano no kumusambilisha?+ 14 Nani apandene nankwe amano pa kuti amulenge ukwishiba, nelyo nani amusambilisha mu nshila ya mulinganya, nangu ukumusambilisha ukwishiba,+ nelyo ukumulenga ukwishiba inshila ya mucetekanya wine wine?+

15 Moneni! Inko shaba nge toni lya menshi ukufuma mu ca kutapilamo amenshi; kabili ngo lukungu pali sekelo e fyo shimonwa.+ Moneni! Emya ifishi+ ngo lukungu. 16 Nangu fye ni Lebanone te kuti alenge umulilo ukutwalilila ukwaka, ne nama shakwe isha mpanga+ te kuti shikumane ilambo lya koca.+ 17 Inko shonse shaba nge shishabako kuli ena;+ shimonwa nge shishabapo kabili isha fye kuli ena.+

18 Kabili ni kuli nani mwingapashanya Lesa,+ kabili kuti mwatila apalana na cinshi?+ 19 Uwaishiba ifya kupangapanga aenga icimpashanya,+ kabili uufula ifyela abikako golde,+ kabili alefula iminyololo ya silfere.+ 20 Asala umuti, umuti uushabola, ukuba umusangulo.+ Aifwaila uwaishiba ukubasa, pa kuti apange icimpashanya icabaswa+ icishingatelentenshiwa.+

21 Bushe tamwaishiba? Bushe tamwaumfwa? Bushe tabamweba ukufuma pa kutendeka? Bushe tamwailuka ukutula pa kutendeka kwe sonde?+ 22 Kwaba uwaikala pa muulu wa calo icabulungana,+ ico abaikalamo baba nge fipaso, uufungulula imyulu kwati ni nsalu iya-anguka, uifungulula nge tenti lya kwikalamo,+ 23 uulenga abacindami ukuba aba fye, uwalenga abapingushi ba pe sonde ukuba nga bashabako.+

24 Tabalimbwa nakalya; tababyalwa iyo; icishiki cabo tacalimba imishila mwi sonde.+ Kabili umuntu apuuta fye pali bena na bo bauma;+ kabili umwela ukabasenda kwati ni mpimbili.+

25 “Lelo ni kuli ani mwingampashanya pa kuti ningane nankwe?” e fyasosa Uwa Mushilo.+ 26 “Lolesheni mu muulu no kumona. Nani uwalengele intanda ishi?+ Ni uyo uutungulula ibumba lya shiko mu mpendwa, shonse alashita amashina.+ Pa mulandu wa kufula kwa bukose bwakwe,+ kabili aba na maka ayengi, tapabulila nangu lumo.

27 “Nga cinshi usosela, we Yakobo, kabili cinshi ulandila, we Israele, auti, ‘Inshila yandi yalifisama kuli Yehova,+ kabili Lesa tamona ifyo bamfyenga’?+ 28 Bushe tawaishiba nelyo bushe tawaumfwa?+ Yehova, Kabumba we sonde lyonse, ni Lesa umuyayaya.+ Tanaka e lyo kabili tatompoka.+ Takwaba ukwishiba umucetekanya wakwe.+ 29 Apeela amaka ku wanaka;+ kabili akosha uushikwete amaka.+ 30 Abaice bakanaka no kutompoka, na balumendo bakaipununa, 31 lelo abalecetekela+ Yehova bakaba na maka na kabili.+ Bakapupuka na mapindo kwati ni bakapumpe.+ Bakabutuka no kukanatompoka; bakenda no kukananaka.”+

41 “Kutikeni kuli ine mu mutalalila, mwe fishi;+ kabili lekeni inko+ shibe na maka na kabili. Lekeni bapalame.+ Pali iyo nshita lekeni balande. Natupalame capamo ku bupingushi.+

2 “Nani acincisha umuntu ukufuma ku kabanga?+ Nani mu bulungami amwitile ukwisa uko ali,* ukumupeela inko, no kumulenga ukucimfya ishamfumu?+ Nani walebapeela ku lupanga lwakwe ngo lukungu, ica kuti balebasalanganya nge mpimbili ku buta bwakwe?+ 3 Nani walebakonka, uwalepita umutende, ale-enda na makasa mu nshila iyo ashaishilemo? 4 Nani uwacincila+ no kucita ici, ukwita inkulo ukufuma ku kutendeka?+

“Nine, ne Yehova, ne Wa ntanshi;+ kabili naba cimo cine na ku ba kulekelesha.”+

5 Ifishi+ fyalimwene no kutiina. Impela she sonde shalitutwime.+ Balipaleme kabili baleisa fye. 6 Baleafwana, umuntu onse ukwafwa umunankwe, kabili umo alesosa kuli munyina ati: “Kosa.”+ 7 E ico uwaishiba ukubasa alekosha kafula wa fyela;+ kabili uutelesha ifyela kuli sando alecincisha uupama apa kufulila, alelanda pa kocelela ati: “Kusuma.” Awe umo asukile acikosha ku misomali ukuti citelentenshiwa.+

8 “Lelo iwe, we Israele, uli mubomfi wandi,+ iwe Yakobo, we o nasala,+ umwana wa kwa Abrahamu+ cibusa wandi;+ 9 iwe, we o nabuula ukufuma ku mpela sha pano isonde,+ kabili iwe, we o naita ukufuma ku ncende sha pe sonde ishaba ukutali sana.+ E ico natile kuli iwe, ‘Uli mubomfi wandi;+ nalikusala,+ kabili nshakukaana iyo.+ 10 Witiina, pantu ndi na iwe.+ Wilasakamana, pantu nine Lesa obe.+ Nkakukosha.+ Nkakwafwa.+ Nkakutungilila no kuboko kwandi ukwa ku kulyo+ ukwa bulungami.’+

11 “Mona! Bonse abafulilwa iwe bakalengwa insoni kabili bakaseebana.+ Abaleumana na iwe bakaba nga bashabapo no kuloba.+ 12 Ukafwaya abalelwa na iwe, lelo tawakabasange.+ Bakaba nga bashabapo kabili aba fye,+ abalelwa na iwe. 13 Pantu ine, ne Yehova Lesa obe, ndeikata ukuboko kobe ukwa ku kulyo,+ ndekweba ati, ‘Witiina.+ Ine nkakwafwa.’+

14 “Witiina, we mwambo+ Yakobo, mwe baume ba kwa Israele.+ Ine nkakwafwa,” e fyo Yehova, Kalubula obe,+ Uwa Mushilo uwa kwa Israele asosa. 15 “Mona! Nakulenga ukuba ica kusokwelako ingano,+ ica kusokwelako icipya icatwa. Ukanyantaula impili no kushishonaula; kabili ukalenga utupili ukuba nge misungu.+ 16 Ukashela,+ kabili umwela ukashisenda,+ kabili umwela uukalamba ukashisenda ukwalekanalekana.+ Kabili ukasekelela muli Yehova.+ Ukaitakishisha mu Wa Mushilo uwa kwa Israele.”+

17 “Abalanda na bapiina balefwaya amenshi,+ lelo takuli. Ico bali ne cilaka+ indimi shabo shauma.+ Ine, ne Yehova, nkabaasuka.+ Ine, ne Lesa wa kwa Israele, nshakabashe.+ 18 Nkesula imimana pa tupili apashaba akantu, na mu mpanga iyabatama, utumfukumfuku.+ Nkalenga amatololo ukuba icishiba ca menshi, ne mpanga yabula amenshi ukuba utumfukumfuku twa menshi.+ 19 Mu matololo e mo nkalimba umukedari, umuti wa mushita no muhadasi no muti wa mafuta.+ Mu ciswebebe e mo nkalimba umukupri, umutidari no mutashuri pa nshita imo ine;+ 20 pa kuti abantu bamone no kwishiba no kubikako amano no kwiluka pa nshita imo ine, ukuti ukuboko kwa kwa Yehova e kucitile ifi, no kuti Uwa Mushilo uwa kwa Israele e wafipanga.”+

21 “Leteni umulandu wenu uwayafya,”+ e fyasosa Yehova. “Leteni imilandu yenu,”+ e fyasosa Imfumu ya kwa Yakobo.+ 22 “Leteni no kutweba ifikacitika. Twebeni ifya ntanshi ifyo fyali, ukuti tubikeko amano no kwishiba ifyo cikaba ku ntanshi. Nelyo tulengeni ukumfwa ifintu ifikacitika.+ 23 Landeni ifikesa pa numa, pa kuti twishibe ukuti ni mwe balesa.+ Kabili mufwile ukucita icisuma nelyo icibi, ukuti twelenganye no kumona pa nshita imo ine.+ 24 Moneni! Tamwabako, kabili tapaba ico mwacita.+ Onse uwamusala wa bunani.+

25 “Nincincisha umo ukufuma ku kapinda ka ku kuso, kabili akesa.+ Ukufuma ku kabanga+ aketa pe shina lyandi. Kabili akesa pa nkonkani sha bakateka kwati liloba+ kabili nga nakabumba uunyanta iloba lyabomba.

26 “Nani uwalanda icintu ukutula pa kutendeka, ukuti twishibe, nelyo ukufuma ku kale, ukuti tusose atuti, ‘Nalungika’?+ Kwena takuli uulelanda. Takuli uulenga umuntu ukumfwa. Kabili takuli uuleumfwa amashiwi nangu yamo.”+

27 Kuli uwa ntanshi, uulesosa kuli Sione ati: “Mona! E aba!”+ kabili nkapeela kuli Yerusalemu uwa kuleta imbila nsuma.+

28 Awe nalelolesha, kabili takwali umuntu; kabili pali aba tapali uwalepanda amano.+ Kabili nalebepusha, ukuti baasuke. 29 Moneni! Bonse tabali kantu. Imilimo yabo ya fye. Ifimpashanya fyabo ifyaengwa, mwela kabili fya fye.+

42 Moneni! Umubomfi wandi,+ uo ngafwilisha!+ Uwasalwa wandi,+ uo natemwa!+ Nimbika umupashi wandi muli ena.+ Akaleta umulinganya ku nko.+ 2 Takapunde nangu ukusansula ishiwi lyakwe, kabili takaleke ishiwi lyakwe ukumfwika mu musebo.+ 3 Itete ilyafunika takalikontole;+ kabili iciku icashibantukila takacishimye. Akaba uwa cishinka pa kuleta umulinganya.+ 4 Takashibantukile nelyo ukufunwa mpaka aleta umulinganya mwi sonde;+ kabili ifishi fikalalolela amafunde yakwe.+

5 Lesa wa cine, Yehova, Kalenga wa muulu+ kabili Uwapulamo uufungulula umuulu;+ uwabumba isonde+ ne fyabapo,+ uupeela umupu+ ku bantu ababamo,+ no mupashi ku bendamo atila:+ 6 “Ine, ne Yehova nakwitila mu bulungami,+ kabili nakwikete ku kuboko kobe.+ Kabili nkakucingilila no kukupeela ukuba icipangano ca bantu,+ ukuba ulubuuto ku nko,+ 7 pa kuti ulenge amenso ya mpofu ukumona,+ no kufumya umufungwa mu cifungo,+ no kulubula abaikala mu mfifi ukubafumya mu cifungo.+

8 “Nine Yehova. Ilyo e shina lyandi;+ nshakapeele ubukata bwandi kuli umbi,+ nangu amalumbo+ yandi ku fimpashanya ifyabaswa.+

9 “Ifya kubalilapo fyaliisa, lelo ifipya e fyo ndelondolola.+ Ilyo fishilatendeka ukumoneka, namulenga ukufyumfwa.”+

10 Imbileni Yehova ulwimbo ulupya,+ amalumbo yakwe ukufuma ku mpela she sonde,+ imwe mwe baleya kuli bemba+ ne fyabamo, mwe fishi na mwe baikalamo.+ 11 Lekeni amatololo+ ne misumba ya yako fisansule amashiwi, imishi umwaikala Kedari.+ Lekeni abekashi ba mu ncende ya mabwe+ bapunde ne nsansa. Lekeni abantu bapunde ukufuma pa muulu wa mpili. 12 Lekeni bapeele Yehova umucinshi,+ kabili mu fishi lekeni bamulumbanye.+

13 Yehova umwine akafuma nge mpalume.+ Akabukulula ukupimpa ngo mwaume wa bulwi.+ Akapunda, akawelesha ukuwelesha kwa bulwi;+ akalanga ukuti wa maka ukucila abalwani bakwe.+

14 “Natalala pa nshita ntali.+ Nali tondolo.+ Naleilama.+ Nkateta no kupemashika, no kutusaila pa nshita imo ine, ngo mwanakashi uulepaapa.+ 15 Nkonaula+ impili no tupili, kabili nkomika umulemfwe wa shiko onse. Kabili nkalula imimana ukuba ifishi, ne fishiba fya menshi nkakamya.+ 16 Nkalenga impofu ukwenda mu nshila iyo shishaishiba;+ nkashilenga ukwenda mu musebo uo shishaishiba.+ Nkalenga incende yafiita iili pa ntanshi yabo ukuba ulubuuto,+ ne calo icalundumana ukuba icatambalala.+ Ifi e fyo nkabacitila, kabili nshakabashe.”+

17 Bakabweshiwa, bakekatwa insoni nga nshi, abaletetekela ifimpashanya ifyabaswa,+ abalesosa ku fimpashanya ifyaengwa abati: “Ni mwe balesa besu.”+

18 Umfweni, mwe bankomamatwi; kabili lolesheni ukuti mumone, mwe mpofu.+ 19 Nani uwapofula? Bushe te mubomfi wandi? Kabili nani uwaba nkomamatwi nge nkombe yandi iyo ntuma? Nani uwapofula ngo walambulwa, nelyo uwapofula ngo mubomfi wa kwa Yehova?+ 20 Walemona ifintu ifingi, lelo tawatwalilile ukulolesha.+ Amatwi yobe yalikomonwa lelo tawaleumfwa.+ 21 Yehova pa mulandu wa bulungami+ bwakwe afwaya ukukusha+ amafunde no kuyacindamika. 22 Lelo bantu abo bapokolola ifipe kabili abo baibila,+ bonse balikatwa mu filindi, kabili balifiswa mu fifungo.+ Babapokolola ifipe ukwabula uwa kubapokololako,+ babebila ukwabula no wa kutila: “Bwesheni!”

23 Nani pali imwe uukakutika kuli ifi? Nani akabikako amano no kumfwa ku nshiku shikesa ku ntanshi?+ 24 Nani apeela Yakobo ukuti bamwibile ifipe, no kupeela Israele ku bapokolola ifipe? Bushe te Yehova, uo babembukila, kabili uo bashaendele mu nshila shakwe kabili uo bashakutike ku mafunde yakwe?+ 25 E ico alepongolwela pali ena icipyu cakwe, ubukali bwakwe, na maka ya bulwi.+ Kabili umulilo wa nkondo walemoca konse konse,+ lelo tabikileko amano;+ kabili walemubilimina lelo talebikako umutima.+

43 Nomba Yehova, Kalenga obe,+ we Yakobo, kabili Kabumba obe,+ we Israele, atila: “Witiina, pantu nalikulubula.+ Nalikwita mwi shina lyobe.+ Uli wandi.+ 2 Nga wapita mu menshi,+ nkaba na iwe;+ kabili nga wapita mu mimana, tawakebile.+ Nga wapita mu mulilo, tawakapye, nangu ulubingu talwakakubabule.+ 3 Pantu nine Yehova Lesa obe, Uwa Mushilo uwa kwa Israele Umupusushi obe.+ Nimpeela Egupti ukuba icilubula cobe,+ Etiopia+ na Seba ukucila ukupeela iwe. 4 Apo walicindama mu menso yandi,+ umoneka uwacindikwa, kabili ine nalikutemwa.+ Kabili nkapeela abantu bambi ukucila ukupeela iwe, ne nko ukucila umweo obe.+

5 “Witiina, pantu ndi na iwe.+ Ukufuma ku kabanga, nkaleta ulubuto lobe, kabili ukufuma ku masamba nkakulonganika.+ 6 Nkasosa ku kapinda ka ku kuso,+ nkatila, ‘Leta!’ na ku kapinda ka ku kulyo, nkatila, ‘Witana. Leta abana bandi abaume ukufuma ukutali, na bana bandi abanakashi ukufuma ku mpela she sonde,+ 7 onse uwitwa ishina lyandi+ kabili uo nabumbile ukuti ncindikwe,+ uo nalengele, cine cine, uo napangile.’+

8 “Leteni abantu abapofula nangu ca kuti balikwata amenso, kabili bankomamatwi nangu ca kuti balikwata amatwi.+ 9 Lekeni inko shonse shilonganikwe pamo pa ncende imo, ne nko ishingi shikolonganikwe pamo.+ Nani pali bena uwingalondolola ici?+ Nelyo bushe kuti batulenga ukumfwa ifya ntanshi?+ Lekeni balete inte shabo,+ isha kushinina ukuti balungami, nangu lekeni bomfwe no kutila, ‘Ca cine!’”+

10 “Imwe muli nte shandi,”+ e fyo Yehova asosa, “ababomfi bandi abo nasala,+ pa kuti munjishibe+ no kuntetekela,+ no kuti mumfwikishe ukuti naba fye cimo cine.+ Pa ntanshi yandi takwali Lesa uwabumbilwe,+ kabili pa numa yandi takwali umbi.+ 11 Ine, nine Yehova,+ kabili takwaba umupusushi umbi.”+

12 “Ine nalilondolwele no kupususha no kulenga cumfwike,+ ilyo takwali lesa umbi pali imwe.+ Kanshi muli nte shandi,”+ e fyo Yehova asosa, “na ine ndi Lesa.+ 13 Kabili, inshita yonse naba fye cimo cine;+ kabili takuli uwingapususha ukufuma mu kuboko kwandi.+ Nkacitapo fimo,+ kabili nani uwingabwesha ukuboko kwandi?”+

14 Yehova, Umulubushi wenu,+ Uwa Mushilo uwa kwa Israele,+ atila: “Pa mulandu wenu nkabatuma ku Babiloni no kulenga imipindo ya fifungo ukwisa pa nshi,+ kabili nkawisha abena Kaldi mu mato na bo bakalila imisowa.+ 15 Nine Yehova Uwa Mushilo+ wenu, Kalenga wa kwa Israele,+ Imfumu yenu.”+

16 Yehova, uupanga inshila pali bemba no musebo mu menshi ayengi,+ 17 uuleta iceleta lya nkondo na kabalwe, ibumba lya bashilika na ba maka pa nshita imo ine, atila:+ “Bakasendama.+ Tabakeme.+ Bakaloba.+ Bakashima nge ciku.”+

18 “Mwi-ibukisha ifya pa kubala, kabili mwitontokanya pa fya kale. 19 Moneni! Ndecita icintu icipya.+ Kabili cili no kumoneka. Bushe imwe tamwakacishibe?+ Cine cine, nkapanga inshila mu matololo,+ na mu fiswebebe nkapishamo imimana.+ 20 Ifiswango fya mu mpanga fikancindika,+ bamumbwe na bamwakatala;+ pantu nkapeela amenshi mu matololo, imimana mu fiswebebe,+ pa kuti abantu bandi, abasalwa bandi,+ bakanwe, 21 abantu abo naibumbiile, ukuti balenumbanya.+

22 “Lelo tawalilila kuli ine, we Yakobo,+ pantu wantendwa, we Israele.+ 23 Tawandetela impaanga sha malambo yobe aya koca, kabili tawancindikila ku malambo yobe.+ Nshakupatikisha ukundetela ifya bupe, nangu kukutendusha ku fyanunkila.+ 24 Tawabomfya indalama shobe ukunshitila ifyanunkila;+ kabili tawansekesha ku mafuta ya malambo yobe.+ Wampatikisha ukubomba pa mulandu wa membu shobe; walintendusha ku filubo fyobe.+

25 “Ine, nine ndefuuta+ ifilubo+ fyobe pa mulandu wandi,+ ne membu shobe nshakashiibukishe.+ 26 Njibukishako; natupingushanye;+ ulondolole pa kuti cishibikwe ukuti ni we ulungike.+ 27 Wiso, uwa ntanshi, nabembuka,+ na ba ku kulandilako nabalufyanya kuli ine.+ 28 E ico nkakowesha bacilolo ba pa ncende ya mushilo, kabili nkaleka Yakobo bakamwipaye na Israele nkaleka bakamutuke.+

44 “Nomba kutika, we Yakobo umubomfi wandi,+ na iwe, Israele, we o nasala.+ 2 Yehova, Kalenga obe+ kabili Kabumba obe,+ uwalekwafwa ukutula mwi fumo,+ atila, ‘Witiina,+ we mubomfi wandi Yakobo, na iwe, Yeshuruni,+ we o nasala. 3 Pantu nkapongolwela amenshi pa wa cilaka,+ ne milonga ikakonkoloka pa ncende yauma.+ Nkapongolwela umupashi wandi pa bana bobe,+ ne paalo lyandi pa ntuntuko shobe. 4 Kabili bakamena nge cani iciteku,+ nge miarabimu+ iyaba mu mbali ya fishiba. 5 Uyu akatila: “Ndi wa kwa Yehova.”+ Na ulya akainika ishina lya kwa Yakobo,+ na umbi akalemba pa kuboko kwakwe ati: “Wa kwa Yehova.” Kabili umo akainika ishina lya kwa Israele.’+

6 “Yehova, Imfumu ya kwa Israele+ kabili Umulubushi wakwe,+ Yehova wa mabumba, atila, ‘Nine wa ntanshi kabili uwa kulekelesha,+ kabili takuli Lesa umbi kano ine.+ 7 Kabili nani uwaba nga ine?+ Lekeni abilikishe, ukuti asose no kuleta ubushininkisho kuli ine.+ Nga fintu nacita ukutula apo nasaliile abantu ba ku kale,+ lekeni na bo basobele ifya ku ntanshi ne fikesa. 8 Mwitiina kabili mwipapa.+ Bushe ukutula lilya nshamulenga bonse ukumfwa no kumulondolwela?+ Kabili muli nte shandi.+ Bushe kwaba Lesa umbi ukucila pali ine?+ Awe, takwaba Icilibwe cimbi.+ Nshaishibapo nangu cimo.’”

9 Ababasa ifimpashanya bonse ba fye,+ kabili ifyo batemwa tafyakabafwe nakalya;+ kabili ishi inte shabo tashimona nangu cimo nangu ukwishiba akantu,+ pa kuti bomfwe insoni.+ 10 Nani uwapanga lesa nelyo ukwenga icimpashanya?+ Taca-afwa nangu panono.+ 11 Moneni! Abanankwe bonse bakalengwa insoni,+ kabili abacenjela mu fya kupangapanga bantunse fye. Bonse bakalongana pamo.+ Bakeminina kabili bakatiina. Bakomfwa insoni pa nshita imo ine.+

12 Nomba uufula icela ku ca kufulilako, alefula pa malasha; kabili alebomfya sando pa kupanga, kabili alefula ku kuboko kwakwe ukwa maka.+ Awe aumfwa insala, kanshi na maka takwete. Tanwene amenshi; e ico anaka.

13 E lyo uubasa ifimuti, natambulula intambo yakwe iya kupiminako; ashililako ne fishilwa ifyakashika; aciwamya ne cibashilo; kabili ashilapo ku cilembelo, kabili asuka apangamo icaba ngo muntu,+ icayemba ngo muntunse, ukuti cileikala mu ng’anda.+

14 Kuli uubomba umulimo wa kutema imikedari; kabili asala umusango umo uwa muti, umuti uukalamba, kabili auleka wakula no kukosa pa miti ya mu mutengo.+ Abyele umuoreni, kabili imfula ileukusha. 15 Kabili waisaba inkuni sha kuti umuntu kuti akoshako no mulilo. E ico atemako inkuni isha kuti onte. Awe akosha umulilo no kupanga umukate. Kabili apanga na lesa uo engakontamina.+ Aupanga ukuba icimpashanya icabaswa,+ kabili acifukamina. 16 Hafu aoca mu mulilo. Hafu umbi aocapo inama, alya kabili aikuta. Kabili aonta no kutila: “Eya! Nakangabuka. Namona ulubingu lwa mulilo.” 17 Lelo icashalako apangamo lesa, apangamo icimpashanya icabaswa. Acifukamina no kucikontamina no kucipepa no kutila: “Mpususha, pantu ni we lesa wandi.”+

18 Tabaishiba,+ kabili tabeluka,+ pantu amenso yabo yalishingulwapo pa kuti bemona,+ ne mitima yabo pa kuti iiluka.+ 19 Kabili takuli uubikako umutima+ nelyo uwaba no kwishiba nelyo umucetekanya,+ uwingatila: “Hafu wa muti ningoca mu mulilo, kabili pa malasha ya ciko ningocelapo umukate; naocapo inama no kulya. Lelo icashalako bushe e co ndepangamo ica bunani?+ Bushe ku cimuti icauma e ko ndefukama?” 20 Alelya imito.+ Umutima wakwe uo babepa naumulufya.+ Kabili talubula umweo wakwe, nelyo ukutila: “Bushe ici icili mu kuboko kwandi ukwa ku kulyo te bufi?”+

21 “Ibukisha ifi fintu, we Yakobo,+ na iwe, we Israele, pantu uli mubomfi wandi.+ Nalikubumba.+ Uli mubomfi wandi. We Israele, nshakakulabe iyo.+ 22 Nkafuuta ifilubo fyobe kwati ni kwi kumbi,+ ne membu shobe kwati ni ku cilikumbi. Bwelela kuli ine,+ pantu nkakulubula.+

23 “Auleni akapundu, mwe myulu,+ pantu Yehova nacitapo fimo!+ Welesheni ukuwelesha kwa kucimfya,+ mwe ncende sha pa nshi ye sonde!+ Sekeleleni, mwe mpili,+ no kwaula utupundu, mwe mitengo na mwe miti yonse mwe babamo! Pantu Yehova nalubula Yakobo, kabili alalanga ubusuma bwakwe kuli Israele.”+

24 Yehova, Umulubushi+ obe kabili uwakubumbile mu nda atila: “Ine, ne Yehova, ndacita fyonse, ukufungulula umuulu+ neka, no kulenga isonde.+ Nani uwali na ine?25 Ndafulunganya ifishibilo fya balanda ifya fye, kabili nine nenga ababuka ukucita nga bapena;+ ne ubwesesha aba mano ku numa, kabili uulenga amano yabo ukuba ubuwelewele;+ 26 uulenga amashiwi ya mubomfi wakwe ukuba aya cine, kabili uufikilisha ifilanda inkombe+ shakwe konse; usosa pali Yerusalemu ati, ‘Akekalwamo,’+ na pa misumba ya Yuda ati, ‘Ikakuulwa cipya cipya,+ kabili nkemya incende shakwe ishalekeleshiwa’;+ 27 uusosa ku menshi ayengi ati, ‘Kama; ne mimana yobe yonse nkakamya’;+ 28 uusosa pali Sailasi+ ati, ‘Mucemi wandi, na fyonse ifyo mfwaya akaficita’;+ no kusosa pali Yerusalemu ati, ‘Akakuulwa cipya cipya,’ na pe tempele, ati, ‘Ica kukuulapo cobe cikapangwa.’”+

45 Ifi e fyo Yehova asosa ku wasubwa wakwe,+ kuli Sailasi, uo naikata ku kuboko kwakwe ukwa ku kulyo,+ ku kucimfya inko ku ntanshi yakwe,+ pa kuti ningakakula mu misana ya shamfumu; ku kwisula ku ntanshi yakwe ifiibi fibili, ica kuti nangu fye ni mpongolo tashakesalwe: 2 “Ine nkakutangilila,+ kabili nkapasa apalundumana.+ Nkatobaula ifiibi fya mukuba, ne milando ya cela nkaiputaula.+ 3 Kabili nkakupeela ifyuma+ ifyaba mu mfifi ne fyuma ifyafiswa ukwafisama, pa kuti ukeshibe ukuti nine Yehova Lesa wa kwa Israele, ne wakwitile mwi shina lyobe.+ 4 Pa mulandu wa mubomfi wandi Yakobo na pa mulandu wa kwa Israele uwasalwa wandi,+ nakwitile mwi shina lyobe; kabili nakupeele ishina lya mucinshi, nangu ca kuti tawanjishibe.+ 5 Nine Yehova, kabili takwaba umbi.+ Takwaba Lesa umbi kano ine.+ Nkakukosha, nangu ca kuti tawanjishiba, 6 pa kuti abantu beshibe ukufuma ku kabanga no kufuma ku masamba ukuti takwaba umbi kano ine.+ Nine Yehova, kabili takwaba umbi.+ 7 Nine mpanga ulubuuto+ no kupanga imfifi,+ nine mpanga umutende+ no kuleta amacushi,+ ine, ne Yehova, ndacita ifi fyonse.+

8 “Mwe myulu, tonyeni ubulungami ukufuma ku muulu kwati ni mfula;+ kabili lekeni umuulu wa makumbi utonye ubulungami.+ Lekeni isonde liisuke, kabili lekeni lisulemo ipusukilo, kabili lekeni lilenge ubulungami ukupuuka+ pa nshita imo ine. Ine, ne Yehova, nine nalibumba.”+

9 We bulanda ku umana na Kalenga wakwe,+ filya ici-inga cumana ne fi-inga fimbi! Bushe iloba+ kuti lyaeba nakabumba ati: “Finshi ulebumba?” Ne co wapanga bushe kuti cakweba ati: “Tawakwata amaboko”? 10 We bulanda ku usosa kuli wishi ati: “Cinshi wafyala?” na kuli nyina ati: “Cinshi ulepaapa?”+

11 Yehova, Uwa Mushilo uwa kwa Israele+ kabili Kalenga+ wakwe, atila: “Njipusha pa fintu ifileisa+ pa bana bandi;+ kabili njebeni ico mfwile ukucita pa mulimo+ wa minwe yandi. 12 Nine napangile isonde+ no kubumba umuntunse uwabapo.+ Ine amaboko yandi yalifungulula umuulu,+ kabili nalipeela fyonse ifyabamo ifunde.”+

13 “Ine nalimya umuntu umo mu bulungami,+ kabili inshila shakwe shonse nkashitambalika.+ E ukakuula umusumba wandi,+ kabili akalubula abantu bandi abali muli bunkole,+ takabalubule pa mulandu wa kuti bamulipila+ nangu pa mulandu wa kuti bamupeela amafisakanwa,” e fyo Yehova wa mabumba asosa.

14 Yehova atila: “Ababomfi ba ku Egupti+ abashilipilwa na bashimakwebo ba ku Etiopia na bena Seba,+ abaume abatali,+ bakesa kuli iwe, kabili bakaba abantu bobe.+ Bakenda ku numa yobe; bakesa nabakakwa mu minyololo,+ kabili bakakukontamina.+ Bakapepa kuli iwe, abati, ‘Cine cine Lesa aba na iwe,+ kabili takwaba umbi; takwaba Lesa umbi.’”+

15 Cine cine ni mwe Lesa uwaifisa,+ Lesa wa kwa Israele, Umupusushi.+ 16 Bakekatwa insoni no kuseebana, bonse. Abapanga ifimpashanya bakendela pamo mu museebanya.+ 17 Israele ena bakamupususha kuli Yehova+ ukupususha kwa muyayaya.+ Imwe tamwakekatwe insoni,+ nelyo ukuseebana+ umuyayaya umuyayaya.

18 Pantu Yehova, Kalenga wa muulu,+ Lesa wa cine,+ Kapanga we sonde kabili Kalenga wa liko,+ uwalipampamike,+ ushalipangiile apa fye, lelo uwalipangiile ukuti lileikalwamo, atila:+ “Nine Yehova, kabili takwaba umbi.+ 19 Nshasoseele umwafisama,+ mu ncende yafiita iye sonde; nangu kusosa ku lubuto lwa kwa Yakobo, ati, ‘Mfwayeni apa fye.’+ Nine Yehova, nsosa icalungama, kabili nanda ifyatambalala.+

20 “Longaneni no kwisa.+ Iseni mupepi pamo, mwe bafyuka mu nko.+ Abasenda ifimpashanya fyabo ifyabaswa tabaishiba kantu, nangu ni balya abapepa kuli lesa uushingapususha.+ 21 Shimikeni no kulondolola imilandu yenu.+ Cine cine, lekeni bapandane amano pamo. Nani walengele ici ukumfwika ukufuma ku kale?+ Nani uwashimika ici ukutula lilya?+ Bushe te ine, ne Yehova? Nine kabili tapali Lesa umbi kano ine;+ nine Lesa umulungami kabili Umupusushi,+ kabili takwaba na umbi kano ine.+

22 “Iseni kuli ine no kupusuka,+ bonse mwe baba ku mpela ye sonde; pantu nine Lesa, kabili takwaba umbi.+ 23 Nali-ilapa ne mwine+—amashiwi yalifuma mu kanwa kandi mu bulungami,+ kabili tayakabwele+—ukuti kuli ine ikufi lyonse likafukama,+ no lulimi lonse lukalapa,+ 24 ukutila, ‘Cine cine muli Yehova mwaba ubulungami ubwingi na maka.+ Bonse abamufulilwa bakesa kuli ena no kwikatwa insoni.+ 25 Muli Yehova e mo abana+ bonse aba kwa Israele bakabela abalungama+ kabili e mo bakaitakishisha.’”+

46 Bele*+ nakontama,+ Nebo nakongomana; ifilubi+ fyabo fisangwike ifisendo fya fiswango ifya mu mpanga ne fya fitekwa, ifisendo fyabo, ifipe fyabo, fisendo ku nama ishinakile. 2 Bakenama; bonse bakakontama; nabafilwa ukupususha+ ifilubi fyabo ifyo basenda nge fisendo, lelo imyeo yabo ikaya muli bunkole.+

3 “Umfweni kuli ine, mwe ba mu ng’anda ya kwa Yakobo, na imwe mwe bashalapo bonse aba mu ng’anda ya kwa Israele,+ imwe mwe bo nasenda ukufuma mwi fumo, mwe basendwa ukutula apo mwafyalilwa.+ 4 Ukufika na ku bukote naba fye cimo cine;+ kabili ukufika ku mfwi ine nkatwalilila ukumutungilila.+ Ine nkacitapo fimo,+ pa kuti nsende no kuti ntungilile no kupususha.+

5 “Ni kuli nani mwingampashanya+ nelyo ukuninganyako nangu uo mwingampalanyako pa kuti tupalane nankwe?+ 6 Kuli abalefukumuna golde iingi ukufuma muli tumba, kabili bapima ukufina kwa silfere pali sekelo. Balipila kafula wa cela, na o apanga lesa.+ Bamupepa, kabili bamukontamina.+ 7 Basendela uyu lesa pa mabeya,+ bamusenda no kumubika apo afwile ukuba ukuti eminine shilili. Tafuma pa ncende yakwe apo aiminina.+ Umo alilila kuli ena, lelo tasuka; tapususha umuntu mu kucula kwakwe.+

8 “Ibukisheni ici, pa kuti mushipe. Bikeniko imitima,+ mwe bampulamafunde.+ 9 Ibukisheni ifya ntanshi ifya kale na kale,+ ukuti nine Lesa+ kabili takwaba Lesa umbi,+ kabili takwaba umbi uwaba nga ine;+ 10 ne usobela pa kutendeka ifikacitika ku mpela,+ no kufuma kale ifintu ifishilacitwa;+ ne utila, ‘Ukufwaya kwandi kukacitika,+ kabili conse ico natemwa nkacita’;+ 11 ne wita icuni iciswango ukufuma ku kabanga,+ ne wita ukufuma ku calo ca kutali umuntu uwa kucita ukufwaya kwandi.+ Nalisosa; kabili nkafikilisha.+ Nalipanga, kabili nkacicita.+

12 “Kutikeni kuli ine, mwe bomankonso mu mutima,+ mwe bataluka ku bulungami.+ 13 Nimpalamika ubulungami bwandi,+ tabuli ukutali,+ kabili ukupususha kwandi takwakacelwe.+ Kabili nkapususha aba mu Sione, na kuli Israele e ko nkapeela ukuyemba kwandi.”+

47 Tentemuka no kwikala pa nshi mu lukungu,+ we mwana mwanakashi nacisungu Babiloni.+ Ikala pa nshi apashili icipuna ca bufumu,+ we mwana umwanakashi uwa bena Kaldi.+ Pantu abantu tabakakwite na kabili ati uwanakilila kabili umusuma.+ 2 Buula impelo+ no kupela ubuunga. Fimbula icifimbo cobe.+ Pimpula insalu yobe.+ Fimbula ukuulu.+ Abuka imimana. 3 Ufuule, ushale fye ubwamba.+ Kabili, ukuseebana kobe kufwile ukumoneka.+ Nkalandula,+ kabili nshakakumanye umuntu cikuuku cikuuku.

4 “Kuli uwa kutulubula.+ Yehova wa mabumba e shina lyakwe,+ Uwa Mushilo uwa kwa Israele.”+

5 Ikala tondolo+ no kwisa mu mfifi,+ we mwana mwanakashi wa bena Kaldi;+ pantu abantu tabakakwite na kabili abati Namfumu+ wa Mabufumu.+ 6 Nafuliilwe abantu bandi.+ Nakoweshe ubupyani bwandi,+ kabili nabapeele mu kuboko kobe.+ Tawabomfwilile uluse.+ Walengele ikoli lyobe ukufina nga nshi pa bakote.+ 7 Kabili waleti: “Nkaba Namfumu+ umuyayaya, pe na pe.” Tawabikileko amano kuli ifi fintu; tawaibukishe impela ya uyu mulandu.+

8 Kabili nomba umfwa ici, we mwanakashi watemwa ukwangala, we waikala umutelelwe,+ we ulanda mu mutima obe auti: “Nine neka, takwaba umbi.+ Nshakabe mukamfwilwa, kabili nshakeshibe ifyo cumfwika ukufwilwa abana.”+ 9 Lelo ifi fintu fibili fikesa pali iwe mu kupumikisha, mu bushiku bumo:+ ukufwilwa abana na bumukamfwilwa. Fikesa pali iwe fyonse,+ pa mulandu wa fya kupandapanda fyobe ifingi, pa mulandu wa kufulisha kwa buloshi bobe ubwingi nga nshi.+ 10 Kabili walecetekela mu bubi bobe.+ Watile: “Tapali uulemona.”+ Amano yobe no kwishiba kobe+—e fyakulufya; kabili waletila mu mutima obe: “Nine neka, kabili takwaba umbi.” 11 Kabili ubucushi bukesa pali iwe; kabili tawakeshibe ifya kubucimfisha ku buloshi bobe. No bwafya bukakuponena;+ tawakabufulumuke. Kabili pali iwe pakesa ubonaushi bwa kupumikisha+ ubo ushaishiba.

12 Nomba, twalilila no buloshi bobe ne fya kupandapanda fyobe ifingi,+ ifyo wapanda ukutula ku bwaice; nalimo kuti wamwenamo, nalimo kuti wapapusha abantu. 13 Naufunshika ku bwingi bwa mpanda mano shobe. Leka beminine, nomba, no kukupususha, abapepa umuulu, abalolesha pa ntanda,+ abasobela ifintu ifikesa pali iwe pa kulolesha pa nshita ya myeshi iipya. 14 Mona! Bali nge mpimbili.+ Umulilo ukaboca.+ Tabakapokolole imyeo+ yabo ku maka ya mulilo.+ Takwakabe icikabilila ca malasha ica kuti abantu bakangabukeko, nangu umulilo uwa kuti baleonta. 15 E fyo bakaba kuli iwe, abo wabomba na bo mu fya kupandapanda+ ukutula ku bwaice. Bakalubanta, umuntu onse ku citungu cakwe. Takwakabe uwa kukupususha.+

48 Umfweni ici, mwe ba mu ng’anda ya kwa Yakobo, mwe bainika mwe bene ishina lya kuti Israele+ kabili mwe bafuma mu menshi ya kwa Yuda,+ mwe balapila mwi shina lya kwa Yehova+ kabili mwe balumbula Lesa wa kwa Israele,+ lelo te mu cishinka nangu mu bulungami.+ 2 Pantu baita abene ati bafuma mu musumba wa mushilo,+ kabili bashintilila pali Lesa wa kwa Israele,+ Yehova wa mabumba e shina lyakwe.+

3 “Ifya ntanshi nalilondolola ukufuma ku kale, kabili fyafumine mu kanwa kandi, kabili nalefilenga ukumfwika.+ Awe nalicitilepo fimo mu kupumikisha, kabili ifintu fyalicitike.+ 4 Pantu nalishiba ukuti walikosa+ no mukoshi obe waba ngo mushipa wa cela+ ne mpumi yobe ngo mukuba, + 5 kabili nalekweba ukufuma ku kale. Ilyo cishilacitika, nakulengele ukucumfwa,+ pa kuti witila, ‘Akalubi kandi e kaficita, kabili icimpashanya candi icabaswa ne cimpashanya candi icaengwa e filengele ukuti ficitike.’+ 6 Walyumfwa.+ Umone fyonse ifi.+ Lelo imwe, bushe tamwakebeko bambi?+ Ukufuma nomba, ndemulenga ukumfwa ifintu ifipya, ne fintu ifyafiswa, ifyo mushaishiba.+ 7 Ni pali ino nshita fikalengwa, kabili te pa nshita ilya iyo, ifi fintu ifyo mushaumfwapo ukushinta na lelo, pa kuti mwitila, ‘Moneni! Nalifishiba kale.’+

8 “Kabili, tawaumfwa,+ nangu ukwishiba, no kutwi kobe takwaisulwa ukufuma ku kale. Pantu nalishiba ukuti walecita ubucenjeshi,+ kabili witwa ‘umubembu ukufuma mwi fumo.’+ 9 Pa mulandu we shina lyandi, nkalama ubukali bwandi,+ kabili pa kuti bancindike, nkaikaanya pa kuti nikakulofya.+ 10 Mona! Nalikulopolola, lelo te filya silfere ilopololwa.+ Nalikusala mwi lungu lya mulilo ilya bucushi.+ 11 Pa mulandu wandi, pa mulandu wandi nkacitapo cimo,+ pantu kuti nasumina shani ukusaalulwa?+ Kabili ubukata bwandi nshakabupeele kuli bambi.+

12 “Kutika kuli ine, we Yakobo, na iwe Israele we waitwa wandi. Naba cimo cine.+ Nine uwa ntanshi.+ Kabili, nine uwa kulekelesha.+ 13 Kabili ukuboko kwandi e kwabikile umufula we sonde,+ kabili ukuboko kwandi ukwa ku kulyo e kwafungulwile umuulu.+ Ndafiita, ukuti fitwalilile ukwiminina pamo.+

14 “Longaneni pamo, mwe bantu bonse, kabili kutikeni.+ Nani pali bena uwalanda ifi fintu? Yehova umwine alimutemwa.+ Akacita ico alefwaya kuli Babiloni,+ kabili ukuboko kwakwe kukaba pa bena Kaldi.+ 15 Ine ninsosa. Kabili nimwita.+ Nimuleta, kabili nkalenga inshila yakwe ukutunguluka.+

16 “Palameni kuli ine, mwe bantu. Umfweni ici. Ukutula pa kubala nshalandila umwafisama nakalya.+ Ukutula apo cacitikile e po naba.”

E ico nomba Shikulu Mulopwe Yehova nantuma, no mupashi wakwe.+ 17 Yehova, Kalubula wenu,+ Uwa Mushilo uwa kwa Israele, atila:+ “Ine, ne Yehova, nine Lesa obe, uukusambilisha ifingakuwamina,+ uukwensha mu nshila iyo ufwile ukwendamo.+ 18 Nga wabika fye amano ku mafunde yandi,+ umutende obe kuti waba ngo mumana,+ no bulungami bobe nga mabimbi ya pali bemba.+ 19 Kabili abana bobe kuti bafula ngo mucanga, na bafuma mu nda yobe nge nseke sha uko.+ Awe ishina lyobe te kuti lilobe nelyo ukonaulwa ukufuma pa ntanshi yandi.”+

20 Fumeni muli Babiloni!+ Fulumukeni abena Kaldi.+ Shimikeni kabili welesheni ukuwelesha kwa kusekelela, bileni ici ku bantu.+ Lengeni ciye ukufika na ku mpela she sonde.+ Soseni amuti: “Yehova nalubula umubomfi wakwe Yakobo.+ 21 Kabili tabaiketwe icilaka+ ilyo abenseshe mu fibolya.+ Alengele amenshi ukufuma mu libwe pa kuti banwe, kabili alepwile icilibwe ukuti amenshi yapongoloke ukufuma muli cena.”+

22 “Takuli umutende ku babifi,”+ e fyasosa Yehova.

49 Umfweni kuli ine, mwe fishi,+ kabili bikeniko amano, mwe nko ishaba ukutali.+ Yehova umwine alinjitile+ ilyo nali mwi fumo.+ Ukufuma mu nda ya kwa mayo alumbwile ishina lyandi.+ 2 Kabili alengele akanwa kandi ukuba ngo lupanga ulwatwa.+ Amfishile+ mu cintelelwe+ ca kuboko kwakwe. Kabili panono panono anengele ukuba umufwi uwatwa. Amfishile mu cola cakwe ica kubikamo imifwi. 3 Kabili atile kuli ine: “Uli mubomfi wandi, we Israele,+ iwe we o nkalanga ukuyemba kwandi.”+

4 Lelo ine, natile: “Naculila apa fye.+ Nabomfya amaka yandi pa fya kwelenganya fye kabili ifya fye.+ Cine cine uumpingula ni Yehova,+ na malipilo yandi yafuma kuli Lesa wandi.”+ 5 E ico nomba Yehova, uwampangile mwi fumo pa kuti mbe umubomfi wakwe,+ asosele pali ine ukuti mfwile ukubwesesha Yakobo kuli ena,+ pa kuti Israele alonganikwe kuli ena.+ Kabili nkacindamikwa mu menso ya kwa Yehova, na Lesa wandi akaba e maka yandi. 6 Kabili atile kuli ine: “Te mulandu uunono iwe ukuba umubomfi wandi uwa kwimya imishobo ya kwa Yakobo no kubwesha abena Israele abacingililwa;+ ine nakulenga ukuba ulubuuto lwa nko,+ ukuti ukupususha kwandi kufike ku mpela ye sonde.”+

7 Yehova, Umulubushi wa kwa Israele,+ Uwa Mushilo wakwe, atile kuli uyo uwasuulwa icibi,+ ku o bakankamba ku luko,+ ku mubomfi wa bakateka:+ “Ishamfumu shikamona no kwima,+ pamo na bacilolo, kabili bakakontama, pa mulandu wa kwa Yehova, uwa cishinka,+ Uwa Mushilo uwa kwa Israele, uwakusala.”+

8 Yehova atila: “Mu nshita ya mapaalo nalikwasuka,+ na mu bushiku bwe pusukilo nalikwafwa;+ kabili nalekucingilila pa kuti nkulenge ukuba icipangano ca bantu,+ ku kuwamya icalo,+ pa kuti kube ukupoka impanga ya bupyani iyashala icibolya,+ 9 ku kusosa ku bafungwa,+ ati, ‘Fumeni!’+ na ku baba mu mfifi+ ati, ‘Isokololeni!’+ Bakalya mu mbali ya misebo, no kulya umulemfwe pa nshila shasebeka shonse isha mulemfwe.+ 10 Tabakomfwe insala,+ nangu kumfwa icilaka,+ ne cikabilila nangu akasuba tafyakaboce.+ Pantu uwababelela uluse akabatungulula,+ kabili akabatwala ku tumfukumfuku twa menshi.+ 11 Kabili nkasangula impili shandi shonse ukuba inshila, ne misebo yandi ikaba pa muulu.+ 12 Moneni! Aba bakesa ukufuma ukutali,+ kabili, moneni! aba ukufuma ku kapinda ka ku kuso+ no kufuma ku masamba,+ na aba ukufuma ku calo ca Sinimu.”

13 Auleni utupundu, mwe myulu,+ kabili sekelela we calo.+ Lekeni impili shisamwe na kapundu.+ Pantu Yehova nasansamusha abantu bakwe,+ kabili aleumfwila uluse abantu bakwe abacula.+

14 Lelo Sione aleti: “Yehova nandekelesha,+ kabili Yehova nandaba.”+ 15 Bushe umwanakashi kuti alaba umwana wakwe uonka ica kuti afilwa ukumfwila uluse umwana uwafuma mwi fumo lyakwe?+ Kwena aba banakashi kuti balaba,+ lelo ine nshakakulabe.+ 16 Mona! Nalikulemba pa ndupi shandi.+ Ifibumba fyobe fyaba pa ntanshi yandi pe.+ 17 Abana bobe nabendesha. Abalekulepaula no kukonaula bakafuma kuli iwe. 18 Inwina amenso yobe konse no kumona. Bonse nabalonganikwa pamo.+ Nabesa kuli iwe. “Na pali ne mwine,” e fyo Yehova asosa,+ “ukabafwala bonse kwati fibekobeko, kabili ukabakaka pa mubili obe kwati ni nabwinga.+ 19 Nangu ca kuti kulya e kwaba ififulo fyobe ifyaonaulwa ne fifulo fyobe ifyashala umwabula akantu e lyo ne calo cobe icashala icibolya,+ kabili nangu ca kuti nomba naucepa nga nshi uwa kuti abantu baleikala muli iwe, kabili abalekonaula bali ukutali,+ 20 lelo mu matwi yobe abana abafyelwe mu kufwilwa+ kobe bakatila kuli iwe, ‘Iyi ncende yancepela.+ Nkushishako, pa kuti njikalemo.’+ 21 Kabili ukasosa mu mutima obe auti, ‘Mwaume nshi uwamfyalila aba, apo ndi mwanakashi uwafwilwa abana kabili ing’umba, uwasendwa muli bunkole kabili uwasendwa no kuba umufungwa?+ Kabili aba, nani uwabakusha?+ Mona! Ine nashala neka.+ Nga aba—ni kwi baali?’”+

22 Shikulu Mulopwe Yehova atila: “Mona! Ine nkemya ukuboko kwandi ku nko,+ no kwimya icishibilo ku bantu na bantu.+ Kabili bakaleta abana bobe abaume pa cifuba, kabili pa kubeya e po bakasendela abana bobe abanakashi.+ 23 Kabili ishamfumu e shikalakusunga,+ na bacilolo babo e bakaba nga banakashi aba kukusakamana. Bakakontama kuli iwe ne finso pa nshi,+ kabili bakamyanga ulukungu lwa ku makasa yobe;+ kabili ukeshiba ukuti nine Yehova, kabili aboba muli ine tabakalengwe insoni.”+

24 Bushe abasendwa kale kuti basendwa ukufuma ku mpalume,+ nelyo bushe abantu abaikatwa ku wa buluku kuti bafyuka?+ 25 Lelo e fyo Yehova asosa: “Abafungwa abasendwa ku mpalume bakasendwa,+ na baikatwa ku wa buluku bakafyuka.+ Kabili nkalwisha onse uulekulwisha,+ kabili nkapususha abana bobe.+ 26 Kabili nkalenga abalekucusha ukulya imibili yabo; kabili bakakolwa umulopa wabo kwati mwangashi banwene. Kabili abantu bonse bakeshiba ukuti ine, ne Yehova,+ nine ne Mupusushi+ obe kabili Umulubushi obe,+ Uwa Maka uwa kwa Yakobo.”+

50 Yehova atila: “Bushe ali kwi kalata wa kulekana+ na nyinenwe, uo natamfishe?+ Kabili nani pa bo nayashimako indalama uo namushitisheko?+ Moneni! Namushitishiwa pa mulandu wa filubo+ fyenu, kabili pa mulandu wa membu shenu nyinenwe natamfiwa.+ 2 Nga cinshi kushabelele nangu umo ilyo naingile?+ Ilyo naitile, cinshi kushabelele uwa kwasuka?+ Bushe ukuboko kwandi nakwipipa ica kutila te kuti kulubule,+ nelyo bushe tamuli amaka muli ine aya kupususha? Moneni! Ndakamya+ bemba ilyo namukalipila;+ nenga imimana ukusanguka iciswebebe.+ Isabi lyabo lyanunka pa mulandu wa kukanakwata amenshi, kabili lyafwa pa mulandu wa cilaka.+ 3 Nafwika umuulu imfifi,+ kabili naleka insamu ukuba e ca kufimbana ca uko.”+

4 Shikulu Mulopwe Yehova umwine alimpeela ululimi lwa basambilila,+ ukuti njishibe ifya kwasuka uwanaka ku cebo.+ Alanshibusha cila lucelo; ashibushisha ukutwi kwandi ku kumfwa nga bantu abasambilila.+ 5 Shikulu Mulopwe Yehova umwine aliisula ukutwi kwandi, na ine, nshapondweke.+ Nshafutatwike iyo.+ 6 Napeele inuma yandi ku bapuma, na masaya+ yandi ku basusula umwefu. Nshafishile icinso candi ku fya museebanya na ku mate.+

7 Lelo Shikulu Mulopwe Yehova umwine akangafwa.+ E co nshakaseebanine. E co nalengele icinso candi ukuba nge libwe ilyakosa, kabili nalishiba ukuti nshakalengwe insoni.+ 8 Uuleti ndi mulungami ali mupepi.+ Nani engalwa na ine? Natwiminine nankwe.+ Nani uulenshinina?+ Lekeni ampalame.+ 9 Moneni! Shikulu Mulopwe Yehova akangafwa. Nani uwingatila ndi mubifi?+ Moneni! Bonse bakapwa kwati ca kufwala.+ Icipelebesha ca bushiku cikabalya.+

10 Nani pali imwe uutiina+ Yehova, uukutika kwi shiwi lya mubomfi wakwe,+ uwaenda mu mfifi+ ya pe kabili uushaba na lubuuto? Lekeni acetekele mwi shina lya kwa Yehova+ no kushintilila pali Lesa wakwe.+

11 “Moneni! Imwe bonse mwe balekoleka umulilo, ukucita insase, endeni mu lubuuto lwa mulilo wenu, mu nsase isho mwacita. Ukufuma ku kuboko kwandi mukapokelela ici: Mukasendama mu bukali ubwabipisha.+

51 “Kutikeni kuli ine, mwe balekonkelela ubulungami,+ mwe balefwaya ukusanga Yehova.+ Lolesheni ku cilibwe icasansuka+ uko mwabuulilwe na mu cilindi umo mwaimbilwe. 2 Lolesheni kuli Abrahamu+ shinwe+ na kuli Sara+ uwamufyele. Pantu ali eka ilyo namwitile,+ kabili nalimupaalile no kumufusha.+ 3 Pantu Yehova akasansamusha Sione.+ Akasansamusha ififulo fyakwe fyonse ifyaonaulwa,+ kabili akalenga amatololo yakwe ukuba nga Edene+ ne ciswebebe cakwe nge bala lya kwa Yehova.+ Ukusekelela no kwanga fikasangwa muli ena, ukutasha ne shiwi lya kwimba.+

4 “Kutikeni kuli ine, mwe bantu bandi; na imwe mwe nko shandi,+ umfweni kuli ine. Pantu kuli ine kukafuma ifunde,+ nkapampamika no kupingula kwandi ukuba ulubuuto ku bantu na bantu.+ 5 Ubulungami bwandi nabupalama.+ Ukupususha kwandi+ kukesa, kabili amaboko yandi yakapingula abantu na bantu.+ Ifishi fikacetekela muli ine,+ kabili fikalolela ukuboko kwandi.+

6 “Inwineni amenso yenu mu muulu,+ kabili lolesheni pe sonde pa nshi. Pantu umuulu ukasalangana kwati cushi,+ kabili isonde na lyo likapwa kwati ca kufwala,+ na bekashi ba liko bakafwa nga kashishi. Lelo ukupususha kwandi kwena, kukabako umuyayaya,+ no bulungami bwandi tabwakapwe.+

7 “Kutikeni kuli ine, mwe baishiba ubulungami, mwe baba na mafunde yandi mu mitima yenu.+ Mwitiina umuseebanya wa bantunse, kabili mwitutuma pa mulandu fye wa mashiwi yabo aya miponto.+ 8 Pantu icipelebesha ca bushiku cikabalya nge ca kufwala, kabili icipelebesha ca bushiku cikalya ifya kufwala kwati masako.+ Lelo ubulungami bwandi bwena bukabako umuyayaya, no kupususha kwandi ku nkulo ishishingapendwa.”+

9 Shibuka, shibuka, fwala amaka,+ we kuboko kwa kwa Yehova!+ Shibuka nga mu nshiku sha ku kale, nga mu nkulo sha ku nshita sha ku kale.+ Bushe te iwe watobawile Rahabu,+ we walashile shimweshimwe wa pali bemba?+ 10 Bushe te iwe wakamishe bemba, uwashika nga nshi?+ Bushe te iwe walengele apashika muli bemba pabe inshila ya kuti abalubulwa bapitemo?+ 11 Kabili abalubulwa ba kwa Yehova bakabwela no kwisa ku Sione na kapundu,+ no kusekelela kwa muyayaya kukaba pa mitwe yabo.+ Bakalasekelela no kusansamuka.+ Ubulanda no kuteta fikafulumuka.+

12 “Ine, nine ndesansamusha imwe mwe bantu.+

“Bushe ni mwe bani pa kuti mutiine umuntunse uukafwa,+ no mwana wa muntu uukaba nge cani?+ 13 Bushe ni mwe bani pa kuti mulabe Yehova Kalenga wenu,+ uwafungulwile umuulu+ no kubika amashintililo ye sonde,+ ica kuti mwaletiina lyonse pa mulandu wa bukali bwa walemucilikila,+ kwati alefwaya fye ukumonaula?+ Kabili ubukali bwa walemucilikila buli kwi?+

14 “Uwineme mu minyololo akakakulwa bwangu bwangu,+ pa kuti efwa no kuya mu nindi+ no kuti ebulwa umukate wakwe.+

15 “Lelo ine, ne Yehova, nine Lesa obe, uusunkanya bemba pa kuti amabimbi yeme.+ Yehova wa mabumba e shina lyandi.+ 16 Kabili nkabika amashiwi yandi mu kanwa kobe,+ kabili nkakufimba ku cintelelwe ca kuboko kwandi,+ pa kuti nshimpe umuulu+ no kubika umufula we sonde+ no kusosa kuli Sione ati, ‘Muli bantu bandi.’+

17 “Buuka, buuka, ima, we Yerusalemu,+ iwe we wanwa muli kapu ya bukali iili mu kuboko kwa kwa Yehova.+ Muli kapu iilenga ukupungaila, wanwamo, wapwishishisha.+ 18 Tapali pa bana+ bonse abo afyele abalemutungulula, kabili tapali pa bana bakwe bonse abo akushishe abamwikata ku kuboko.+ 19 Ifi fintu fibili fyalekuponena.+ Nani akakumfwila uluse?+ Ukonaula no kubongolola, ne nsala no lupanga!+ Nani akakusansamusha?+ 20 Abana bobe bafwa icipupu.+ Balaala ku ntanshi ya misebo yonse nge mpaanga iya mu mpanga iiketwe mwi sumbu,+ nga baisulamo icipyu ca kwa Yehova,+ ubukali bwa kwa Lesa obe.”+

21 E ico kutika, we mwanakashi+ uwacula kabili uwakolwa, lelo te ku mwangashi.+ 22 Sokulu, Yehova, Lesa obe, uulwila+ abantu bakwe, atila: “Mona! Nkapoka mu minwe yobe kapu iilenga ukupungaila.+ Muli kapu yandi iya cipyu—tawakanwemo na kabili.+ 23 Kabili nkabika iyi kapu mu minwe ya balekucusha,+ abasosa kuli iwe abati, ‘Kontama uleke tuciluke,’ ica kuti walengele inuma yobe ukuba kwati mushili, kabili ngo musebo wa kupitapo.”+

52 Shibuka, shibuka, fwala amaka yobe,+ we Sione! Fwala ifya kufwala fyobe ifyayemba,+ we Yerusalemu, we musumba wa mushilo!+ Pantu abashasembululwa na bakowela tabakengile muli iwe na kabili.+ 2 Yerusalemu, ikunte ulukungu,+ ima pa nshi, ikala pa cipuna. Ikakule iminyololo* ya mu mukoshi obe, we nkole umwana mwanakashi wa kwa Sione.+

3 Pantu Yehova atila: “Imwe mwashitishiwe ukwabula indalama,+ kabili mukalubulwa ukwabula indalama.”+

4 Pantu Shikulu Mulopwe Yehova atila: “Pa kubala abantu bandi baile ku Egupti pa kuti bayeikala kulya;+ kabili Asiria na o alebacusha apabula umulandu.”

5 “E ico nomba, cinshi nalacita kuno kuntu?” e fyo Yehova asosa. “Pantu abantu bandi basendelwe apa fye.+ Abalebateka baleilumbanya,”+ e fyo Yehova asosa, “kabili, akasuba konse, ishina lyandi lyalesaalulwa lyonse.+ 6 E co abantu bandi bakeshibila ishina lyandi,+ kabili e cikalenga muli bulya bushiku, pantu nine ndelanda.+ Moneni! Nine.”

7 Ifyo yayemba pa mpili amakasa+ ya uleta imbila nsuma,+ uubila umutende,+ uuleta imbila nsuma iya fintu ifisuma,+ uubila ukupususha,+ usosa kuli Sione ati: “Lesa obe naba imfumu!”+

8 Kutika! Abalinshi+ bobe nabasansula amashiwi yabo.+ Baleawila pamo utupundu; pantu bakamonako+ ilyo Yehova akabwesha aba mu Sione.+

9 Sekeleleni, awileni pamo utupundu, mwe ncende shaonaulwa isha kwa Yerusalemu,+ pantu Yehova nasansamusha abantu bakwe;+ nalubula Yerusalemu.+ 10 Yehova nalenga inko shonse ukumona ukuboko kwakwe ukwa mushilo;+ kabili impela shonse ishe sonde shikamona ukupususha kwa kwa Lesa wesu.+

11 Alukeni, alukeni, fumenimo,+ mwi-ikatako ku cishasanguluka;+ fumeni muli ena,+ isungeni aba busaka, mwe basenda ifipe fya kwa Yehova.+ 12 Pantu imwe tamwakafume mu kwangufyanya, kabili tamwakalefulumuka pa kuya.+ Pantu Yehova akalaba pa ntanshi yenu,+ kabili Lesa wa kwa Israele e ukalamulinda ku numa.+

13 Moneni! Umubomfi wandi+ akaba uwa mano.+ Akaba pa muulu kabili akasansulwa no kusansabikwa nga nshi.+ 14 Filya fine abengi bamuloleshe no kupapa+—pa mulandu wa kuti imimonekele+ yakwe yalyonaike nga nshi ukucila umuntu onse ne cata+ cakwe ukucila abana ba bantunse— 15 e fyo akalenga ne nko ishingi ukupapa.+ Ishamfumu shikatalala tondolo kuli ena,+ pantu shikamona ifyo bashashishimikila, kabili shikabika amano ku fyo shishabalile ashumfwa.+

53 Nani uwacetekela ico twaumfwa?+ Kabili ni kuli nani Yehova+ asokolwela amaka yakwe?+ 2 Kabili akesa nga kamusambo+ pa ntanshi ya muntu, ngo mushila mu calo umwabula amenshi. Takamoneke umucindami nangu umukankaala;+ kabili ilyo tukamumona, tatwakamone apa kumutemenwa.+

3 Abantu balimusuulile kabili balemutaluka,+ umwaume uwali no kwishiba ukukalipwa na malwele.+ Ali muntu uo tushalefwaya ukumona icinso cakwe.+ Alisuulilwe, kabili twalemumona uushacindama.+ 4 Kwena asendele amalwele yesu;+ kabili ukukalipwa kwesu na ko alikusendele.+ Lelo ifwe twalemumona ngo wapumwa,+ uwakandwa kuli Lesa+ kabili uwacula.+ 5 Lelo alashiilwe+ pa mulandu wa filubo fyesu;+ aculiile pa membu shesu.+ Ukukandwa uko akandilwe e kwali no kutuletela umutende,+ kabili ifilonda+ fyakwe e fyalenga ukuti tupole.+ 6 Twalulumba bonse nge mpaanga;+ bonse twaile cila muntu ku nshila yakwe; kabili Yehova alengele ulubembu lwesu bonse lube pali ena.+ 7 Aletitikishiwa,+ alecushiwa;+ lelo taleisula akanwa iyo. Aleletwa nge mpaanga ku kwipaiwa;+ kabili aikele tondolo filya impaanga iikota ikala tondolo ku baibeya amasako, taleasamuna akanwa iyo.+

8 Balimutitikishe no kumufyenga;+ kabili nani akabika amano ku ntuntuko* yakwe?+ Pantu aliputwilwe+ ku calo ca ba mweo.+ Balimupumine pa mulandu wa membu+ sha bantu bandi.+ 9 Kabili ilyo afwa akashiikilwa pamo na babifi+ na bakankaala,+ nangu ca kuti tacitile ububi+ kabili tatalile alanda ifya bucenjeshi.+

10 Lelo Yehova umwine alitemenwe ukumushonaula;+ kabili alimulwalike.+ Nga mwacita umweo wakwe ukuba umutuulo wa pa lubembu,+ akamona abana bakwe,+ akalefya inshiku shakwe,+ kabili ku kuboko kwakwe akalenga ico Yehova atemwa+ ukucitika.+ 11 Pa mulandu wa kucula uko umweo wakwe ukaculako,+ akatemwa.+ Ku kwishiba kwakwe umulungami wandi, umubomfi wandi,+ akalenga abantu abengi ukuba abalungama;+ akasenda ne membu shabo.+ 12 Pali uyu mulandu nkamupeela icakaniko pamo na bengi,+ kabili aba maka e bo akaakana na bo ifipe fya kupokolola,+ pa mulandu wa kuti aitulwile umweo wakwe ku mfwa,+ kabili apendelwe pamo na babembu;+ kabili asendele ulubembu lwa bantu abengi,+ kabili apapaatileko ababembu.+

54 “Aula akapundu, we ng’umba we ushafyala!+ Sekelela na kapundu no kuwelesha,+ iwe we ushabala aucula pa kupaapa,+ pantu abana aba walekeleshiwa bafula ukucila abana ba mwanakashi uwaupwa,”+ e fyo Yehova asosa. 2 “Kushako incende ye tenti lyobe.+ Kabili leka batambulule amatenti ya ng’anda yabo iya lulumbi. Wibika apa kupelela. Lefya intambo she tenti lyobe, kabili kosha impoopo sha matenti yobe.+ 3 Pantu ukapongola ku kulyo na ku kuso,+ na bana bobe bakapyaninina inko,+ kabili bakekala mu misumba iyaba ifibolya.+ 4 Witiina,+ pantu tawakalengwe insoni;+ kabili wiumfwa insoni, pantu tawakaseebane.+ Pantu ukalaba ukuseebana kwa ku bwaice bobe,+ kabili tawakebukishe na kabili ukuseebana kwa bumukamfwilwa bobe.”

5 “Pantu Kalenga+ obe e mulume obe,+ Yehova wa mabumba e shina lyakwe;+ kabili uwa mushilo uwa kwa Israele e Mulubushi obe.+ Aketwa Lesa wa pano isonde ponse.+ 6 Pantu Yehova akwitile kwati uli mukashi uwalekeleshiwa kabili uwa bulanda,+ kabili ngo waupilwe mu bukashana+ e lyo baisakukaana pa numa,”+ e fyo Lesa obe asosa.

7 “Nalikulekeleshe pa nshita iinono,+ lelo nkakulonganya pamo no luse ulukalamba.+ 8 Nakufishile icinso candi pa nshita iinono pantu nalikalipe nga nshi,+ lelo nkakubelela uluse pamo ne cikuuku ca muyayaya,”+ e fyo Umulubushi+ obe, Yehova, asosa.

9 “Ici kuli ine cili fye kwati ni mu nshiku sha kwa Noa.+ Filya fine nalapa ukuti amenshi ya kwa Noa tayakabunshe isonde na kabili,+ e fyo nalapa no kuti nshakakukalipile no kukwebaula.+ 10 Pantu impili kuti shafumishiwapo, no tupili kuti twatelententa,+ lelo icikuuku candi tacakafume pali iwe,+ ne cipangano candi ica mutende tacakatelentente,”+ e fyo Yehova, uulemubelela uluse,+ asosa.

11 “We mwanakashi uwacula,+ we waululwa ku cipuupu ca mwela,+ we o bashasansamusha,+ mona ndekuulila amabwe yobe ne ndaka yakosa,+ kabili nkacita umufula+ obe kuli safiri.+ 12 Kabili nkakuulila impungu shobe ku mabwe aya rubi, ne mpongolo shobe ku mabwe ayabengeshima ngo mulilo,+ ne mipaka yobe yonse ku mabwe ayasuma. 13 Kabili abana+ bobe bonse bakasambilishiwa kuli Yehova,+ no mutende wa bana bobe ukafula.+ 14 Ukalimbwa mu bulungami.+ Tawakatitikishiwe nangu panono+—pantu tawakatiine nangu umo—kabili tapali icikakutiinya nangu cimo, pantu ica kutiinya tacakakupaleme.+ 15 Umuntu nga akusansa, ninshi te ine mwebele.+ Onse uwakusansa akafwa pa mulandu obe.”+

16 “Mona! Nine napanga kafula, uupuuta+ pa mulilo wa malasha+ no kupanga icanso mu mulimo wakwe. Nine napanga no monaushi+ uonaula. 17 Icanso conse ico bakupangila tacakabombe,+ kabili ululimi lonse ulwakwimina mu bupingushi ukalwebaula.+ Ubu e bupyani bwa babomfi ba kwa Yehova,+ no bulungami bwabo bwafuma kuli ine,” e fyo Yehova alanda.+

55 Imwe bonse mwe bali ne cilaka!+ Iseni ku menshi.+ Na imwe mwe bashakwata indalama! Iseni, mushite no kulya.+ Iseni, shiteni umwangashi+ no mukaka+ ukwabula indalama kabili apabula umutengo.+ 2 Cinshi mulelipilila indalama pa fishili fya kulya, kabili cinshi mucucutikila ukucita ifishimuletela insansa?+ Kutikisheni kuli ine, no kulya ifisuma,+ kabili lekeni imyeo yenu iilemene ifya kulya ifyanona.+ 3 Kutikeni+ no kwisa kuli ine.+ Kutikeni, na imwe tamwakafwe,+ kabili nkapangana na imwe icipangano ca muyayaya+ ica cikuuku cine cine ico nalaile Davidi.+ 4 Moneni! Nimupeela+ ukuba inte+ ku nko,+ kabili ukuba intungulushi+ no kuba umukalamba wa bashilika+ ku nko.

5 Mona! Uketa uluko ulo ushaishiba,+ na ba mu luko ulo ushaishiba bakabutukila kuli iwe,+ pa mulandu wa kwa Yehova Lesa obe,+ kabili pa mulandu wa Wa Mushilo uwa kwa Israele,+ pantu ninshi nakuyemfya.+

6 Fwayeni Yehova, mwe bantu, ilyo engasangwa.+ Lilileni kuli ena ilyo acili mupepi.+ 7 Lekeni umubifi aleke inshila shakwe,+ no mubi aleke ukutontonkanya kwakwe;+ kabili lekeni abwelele kuli Yehova, uukamubelela uluse,+ kabili abwelele kuli Lesa wesu, pantu akamwelela nga nshi.+

8 “Pantu amatontonkanya yenu te matontonkanya yandi,+ ne nshila shandi te nshila shenu,”+ e fyo Yehova asosa. 9 “Pantu ifyo umuulu wasansuka ukucila isonde,+ e fyo ne nshila shandi shacila inshila shenu,+ kabili e fyo no kutontonkanya kwandi kwacila ukutontonkanya kwenu.+ 10 Pantu filya fine imfula iloka, ne mfula ya bungabunga, ukufuma mu muulu no kukanabwelelamo, kano yanasha umushili no ku-ulenga ukutwala no kumesha ifimenwa,+ wapeela ne mbuto kuli katanda ne fya kulya ku ulya,+ 11 e fikaba ne cebo icifuma mu kanwa kandi.+ Tacakabwelele kuli ine ukwabula ukucita nangu cimo,+ lelo cikacita ico mfwaya,+ kabili cikafikilisha ico nacitumina.+

12 “Pantu imwe mukafuma no kusekelela,+ kabili mukaletwa mu mutende.+ Impili no tupili fikasekelela no kwaula utupundu pa ntanshi yenu,+ ne miti ya mu mpanga yonse ikatoota mu minwe.+ 13 Imikupri ikamena pa ncende ya miti ya myunga.+ Kabili umuhadasi ukamena pa ncende ya kwa kaenya.+ Kabili ici cikalenga Yehova ukulumbuka+ no kuba icishibilo ca muyayaya+ icishakaputulwe.”

56 Yehova atila: “Muleba no mulinganya,+ kabili mulecita icalungama.+ Pantu ukupususha kwandi kuli mupepi no kwisa,+ no bulungami bwandi bukamoneka nomba line.+ 2 Wa nsansa umuntunse uucita ifi,+ no mwana wa muntunse uwikatishako,+ ukusunga isabata pa kuti elisaalula,+ no kukaanya ukuboko kwakwe pa kuti ecita ifyabipa fyonse.+ 3 Kabili umulebeshi uwailunda kuli Yehova etila,+ ‘Cine cine Yehova akampaatula ku bantu bakwe.’+ Kabili mwileka mutungwi+ asose ati, ‘Moneni! Ine, ndi muti uwauma.’”

4 Pantu Yehova asosa ati: “Kuli bamutungwi abasunga amasabata yandi na basala ico natemwa+ na ku baikatisha ku cipangano candi+ 5 nkapeela mu ng’anda yandi+ na mu fibumba fyandi ica kubebukishishako+ ne shina,+ ifyawama ukucila abana baume na bana banakashi.+ Nkabenika ishina lya muyayaya,+ ishina ilishakaputulwe.+

6 “Kabili aba ku fyalo fimbi abaisa kuli Yehova ku kumubombela+ no kutemwa ishina lya kwa Yehova,+ pa kuti babe ababomfi bakwe, bonse abasunga isabata pa kuti belisaalula no kwikatisha ku cipangano candi,+ 7 ine nkabaleta ku lupili lwandi ulwa mushilo+ no kubalenga ukusekelela mu ng’anda yandi iya mapepo.+ Imituulo yabo iya koca+ na malambo+ yabo yakapokelelwa pa ciipailo candi.+ Pantu ing’anda yandi iketwa ing’anda ya kupepelamo iya bantu bonse.”+

8 Amashiwi ya kwa Shikulu Mulopwe Yehova, uulelonganika abapaswa ba kwa Israele,+ yaleti: “Nkamulonganikilapo na bambi pa bantu bakwe abalonganikwa kale.”+

9 Mwe nama shonse isha mu mpanga, iseni mulye, mwe nama mpanga shonse isha mu mutengo.+ 10 Abalinshi bakwe balipofula.+ Tapali nangu umo pali bena uumona.+ Bonse ni mbwa shicibulu; tashibosa,+ shipemashika fye, no kulaala, kabili shatemwa fye ukushipula.+ 11 Ni mbwa ishabuuka;+ tabaishiba ukwikuta.+ Kabili ni bakacema abashashilimuka.+ Bonse ba-alukila ku nshila shabo, onse pa kuti amwenemo mu bufumfuntungu bwakwe mu ncende yakwe:+ 12 “Iseni! Lekeni ndete umwangashi; kabili natunwe ica kunwa icikola apo twingapesha.+ Kabili mailo kukaba fye kwati ni lelo, kabili kukacilapo ukuwama.”+

57 Umulungami naloba,+ lelo takuli nangu umo uulesakamana.+ Kabili abaume ba cikuuku balefwa,+ lelo tapali uuleiluka ukuti ni pa mulandu wa bubi umulungami alefwila.+ 2 Aingila mu mutende;+ batuusha+ pa masanshi yabo,+ bonse abenda ukwabula ukwaluka.+

3 “Lelo imwe, palameni kuno,+ mwe bana ba mwanakashi uusobela,+ mwe lubuto lwa mucende kabili ulwa mwanakashi uucita bucilende:+ 4 Ni pali nani mulesekelela?+ Ni pali nani muleasamwina akanwa, no kufumya ululimi?+ Bushe tamuli bana ba bubifi, ulubuto lwa bufi,+ 5 abacita ubupulumushi mu miti iikalamba,+ mwi samba lya muti onse uwalelema,+ ukwipaya abana mu mipokapoka mwi samba lya fimilale fya mu fimabwe?+

6 “Incende yobe yali mu mabwe ayatelela aya mu mumana.+ Yena e yo wapeelwe.+ Kabili kuli yena e ko waitulwilile umutuulo wa mwangashi,+ e ko wapeele ubupe. Bushe njisansamushishe kuli ifi fintu?+ 7 Wabikile ubusanshi bobe pa lupili ulutali kabili ulwasansama.+ Kabili waile palya mu kutuula ilambo.+ 8 Kabili ku numa ya ciibi na ku luceshi lwa pa mwinshi e ko wabikile icibukisho cobe.+ Pantu wafumine kuli ine kabili wali-ifuulile no kunina; wakushishe ubusanshi bobe.+ Kabili wapangene icipangano na bo. Watemenwe ubusanshi na bo.+ Walimwene ubwamba bwa mwaume. 9 Kabili watentemukile kuli Meleke na mafuta, kabili walefusha amafuta yobe.+ Kabili waletuma inkombe shobe ukutali, ica kuti watentemushishe no bucindami bobe pa nshi.+ 10 Wacula mu nshila shobe ishingi.+ Tawasosa auti, ‘Fya fye!’ Amaka yobe yalabwelelamo.+ E co ushalwalila.+

11 “Nani uo watutwime no kutiina,+ pa kuti utendeke no kubepa?+ Kwena te ine waibukishe.+ Tawabikile nangu cimo ku mutima.+ Bushe nshatalele no kufisa imilandu?+ Awe tawalentiina nakalya.+ 12 Ine nkashimika pa bulungami+ bobe ne milimo yobe,+ ukuti tafyakakwafwe.+ 13 Ilyo walomba ukwafwa, ifyo walonganika tafyakakwafwe,+ lelo umwela ukafisenda fyonse.+ Umupu ukafyulula, lelo uuba muli ine+ akapyana icalo no kwikala mu lupili lwandi ulwa mushilo.+ 14 Kabili umo akatila, ‘Pangeni inshila, pangeni umusebo! Wamyeni umusebo.+ Fumyeni ica kuipununako conse mu nshila ya bantu bandi.’”+

15 Pantu Uwapulamo kabili Uwasansabala,+ uwikala umuyayaya+ kabili uo ishina lyakwe lya mushilo,+ atila: “Mu muulu kabili mu ncende ya mushilo e mo njikala,+ pamo no wacula no mulanda,+ pa kuti mpuupuutule abalanda no kupuupuutula imitima ya bacula.+ 16 Pantu nshakalelwa fye umuyayaya, nelyo ukukalipa pe;+ pantu pa mulandu wandi amaka ya bumi yakanenuka,+ ifya mweo ifyo ine napangile.+

17 “Nalikalipe pa mulandu wa filubo fyakwe ifya kufwaya ukunonkela mu bufumfuntungu,+ kabili nalimupumine, nafishile ne cinso candi,+ ninshi ninkalipa. Lelo atwalilile ukupondoka+ mu nshila ya mutima wakwe. 18 Nalimona inshila shakwe; kabili natendeke ukumuposha+ no kumutungulula+ no kusansamusha+ ena na bantu bakwe abaleloosha.”+

19 “Ndepanga icisabo ca milomo.+ Kukaba umutende wa pe ku uli ukutali na ku uli mupepi+ kabili nkamuposha,”+ e fyo Yehova asosa.

20 “Lelo ababifi baba nga bemba uusunkaana, uwafilwa ukutekanya, amenshi ya uko yemya ifimenwa fya muli bemba na matipa. 21 Takuli umutende ku babifi,” e fyo Lesa wandi asosa.+

58 “Bilikisha apapela amaka yobe; wileka.+ Sansula ishiwi lyobe nge ntandala, kabili eba abantu bandi pa kupondoka kwabo,+ na ba mu ng’anda ya kwa Yakobo pa membu shabo. 2 Lelo, cila bushiku nine balefwaya, kabili mu kwishiba inshila shandi e mo balesansamukila,+ ngo luko ulwalecita ubulungami kabili ulushashile umulinganya wa kwa Lesa wabo,+ pantu balenjipusha pa kupingula kwandi ukwalungama, ukupalama kuli Lesa uo balesansamukilamo,+

3 “‘Bushe cinshi ico twalekeele ukulya, na imwe ukumona iyo,+ kabili cinshi twacushishe imyeo+ yesu na imwe ukwabula ukumona?’+

“Kwena ca cine imwe mwalitemenwe ubushiku bwenu ubwa kuleka ukulya, ilyo kwali abalemubombela bonse abo mwalepatikisha ukubomba.+ 4 Cine cine mwaleleka ukulya pa mulandu wa kufwaya ukuumana no kukansana,+ na pa mulandu wa kufwaya ukuuma icabipisha ne fifunshi.+ Bushe tamwalekele ukulya kwati ni filya mwacitile pa bushiku mwalengele ishiwi lyenu ukumfwika mu muulu? 5 Bushe ukuleka ukulya uko mfwaya kufwile ukuba ngo ku, ngo bushiku umuntunse acushishamo umweo wakwe?+ Bushe afwile ukwinamika umutwe wakwe nge cisonge, no kubika insamu ne mito ukuba ubusanshi bwakwe?+ Bushe e ici ico mwita ukuleka ukulya kabili ubushiku ubwapokelelwa kuli Yehova?+

6 “Bushe uku te kuleka ukulya uko mfwaya? Ukukakula iminyololo ya lufyengo,+ ukukakula ifikakilo fye koli,+ no kuleka abacula babe abantungwa,+ no kuti imwe mukontaule ikoli lyonse?+ 7 Bushe ukuleka ukulya uko mfwaya te kwakanya ifya kulya fyenu ku bali ne nsala,+ no kuti mulete abacula, abashakwata amayanda mu ng’anda yenu?+ Ukuti, ilyo mwamona uuli ubwamba, mumufwike,+ no kukanafisama ku bantu benu?+

8 “Kabili ulubuuto lwenu kuti lwabalika nga macaca;+ kabili kuti mwapola bwangu.+ Kabili ubulungami bwenu kuti bwamutangilila;+ ubukata bwa kwa Yehova kuti bwalamulinda ku numa.+ 9 Awe muketa, na Yehova akasuka; mukalila ukuti amwafwe,+ na o akatila, ‘E po ndi!’

“Nga mwafumya muli imwe ikoli,+ mwaleka ukusonta iminwe+ no kulanda ifyabipa;+ 10 kabili mwapeela ku uli ne nsala ico imwe mulefwaya,+ kabili mwaikusha umweo wa ulecula, ninshi ulubuuto lwenu lukabalika mu mfifi, ne mfifi yenu ikaba nga kasuba pa kati.+ 11 Kabili Yehova akalamutungulula+ lyonse+ no kwikusha umweo wenu mu calo icaumisha,+ kabili akapeela amafupa yenu amaka;+ kabili mukaba nge bala ilitapililwa bwino,+ kabili nga kamfukumfuku ka menshi, amenshi ayashikama. 12 Kabili pa mulandu wenu abantu bakakuula incende ishaonawilwe kale;+ mukakuula mu mifula ya kukuulapo iya ku nkulo ne nkulo.+ Kabili muketwa uucilika imilale,+ uubwesha imisebo ya kwikalamo.

13 “Nga ca kuti pa mulandu we sabata mwalesha ulukasa lwenu ukulacita ukufwaya kwenu pa bushiku bwandi ubwa mushilo,+ kabili nga mukatila isabata ca kusekelelamo, bushiku bwa mushilo ubwa kwa Yehova, ubushiku ubwacindama,+ no kubucindika ukucila ukucita ifyo mulefwaya, ukucila ukufwaya ifimusekesha no kulanda amashiwi ya fye;14 e lyo mukasanga insansa muli Yehova,+ kabili nkamulenga ukwenda mu ncende sha pa muulu isha pe sonde;+ kabili nkamulenga ukulya ku bupyani bwa kwa Yakobo icikolwe cenu,+ pantu akanwa ka kwa Yehova nakasosa.”+

59 Moneni! Ukuboko kwa kwa Yehova takwaipipa ukwa kuti kufilwe ukupususha,+ kabili ukutwi kwakwe takwakoma ukwa kuti kufilwe ukumfwa.+ 2 Iyo, lelo ifilubo fyenu e fyalepaatulanya imwe na Lesa wenu,+ kabili imembu shenu e shalenga afise icinso cakwe kuli imwe pa kuti aleke ukumfwa.+ 3 Pantu indupi shenu shalikowela ku mulopa,+ ne minwe yenu yaisulamo imembu. Imilomo yenu isosa ubufi.+ Ululimi lwenu lwalelanda fye ifishalungama.+ 4 Tapali uulebilikisha mu bulungami,+ kabili tapali uuleya ku cilye mu cishinka. Kuli ukucetekela mu fya kwelenganya,+ no kulanda ifya fye.+ Kuli ukwimita amafya, no kupaapa ifyabipa.+

5 Batota amani ya nsoka sha busungu, kabili balepikula isumbu lya tandabube.+ Onse uwalyako amani yabo kufwa, kabili ilini nga lyatobwa ninshi mwalatotwa ifwafwa.+ 6 Tandabube wabo takabe ica kufwala, kabili tabakafimbane imilimo yabo.+ Imicitile yabo yalibipa, kabili iminwe yabo icita ifya bunkalwe.+ 7 Amakasa yabo yabutukila ku kucita ifyabipa,+ kabili balangufyanya ukusuumya umulopa wa kaele.+ Ifyo batontonkanya fibi;+ ukutobaula no konaula fyaba mu misebo yabo.+ 8 Balisuula inshila ya mutende,+ kabili mu nshila shabo tamwaba umulinganya.+ Bashosha inshila shabo.+ Tapali nangu umo uwendamo uukeshiba umutende.+

9 E co umulinganya watalukila kuli ifwe, no bulungami tabutusanga. Tulelolela ulubuuto, lelo, moneni! kuli imfifi; tulelolela ulubuuto, lelo tule-enda mu mfifi ya pe.+ 10 Tulepampanta ukufwaya icibumba nge mpofu, kabili tulepampanta nga bantu abashimona.+ Twaipununa akasuba pa kati kwati ni mu mfifi ya cungulo bushiku; pa bantu abakosa twaba fye nga bafwa.+ 11 Bonse tuleteta, kwati ni ba bere; kabili tulelila nge nkunda.+ Twalelolela umulinganya,+ lelo tapali; twalelolela ukupusuka, lelo kwalitaluka nga nshi kuli ifwe.+ 12 Pantu imiku twapondoka yalifula kuli imwe;+ kabili imembu shesu shena, shonse shiletushinina.+ Pantu twalishiba bwino ifyo twapondoka kabili ne filubo fyesu, twalifishiba bwino.+ 13 Kuli ukulufyanya no kukaana Yehova;+ kabili kwali ukufuma kuli Lesa wesu, ukulanda pa kucusha no kupondoka,+ twaletontonkanya amashiwi ya bufi mu mitima yesu no kuyalanda.+ 14 Kabili umulinganya baupatikishe ukubwelela ku numa,+ no bulungami bwaiminine ukutali.+ Pantu icine caipununa mu lubansa, kabili icatambalala cafilwa ukwingilamo.+ 15 Kabili icine tapali,+ na onse uuletaluka ku bubi aleonaulwa.+

Kabili Yehova alimwene, awe calibipile mu menso yakwe ukuti takwali umulinganya.+ 16 Kabili ilyo amwene ukuti takwali uwa kwafwa, alipapile ukuti tapali nangu umo uwa kupapaatilako abantu.+ Kabili ukuboko kwakwe e kwamupuswishe, no bulungami bwakwe e bwamutungilile.+ 17 Kabili afwele ubulungami nge ca kucinga icifuba,+ ne cisote ce pusukilo ku mutwe wakwe.+ Kabili, afwele ifya kufwala fya cilandushi+ no kuifimba ukucincila kwati ca kufwala icabula amaboko.+ 18 Akabalambula ukulingana ne micitile yabo,+ ubukali ku fibambe fyakwe, e lyo abalwani bakwe akabacita icibalingile.+ Na ba mu fishi akabacita ukulingana ne fyo bacitile.+ 19 Kabili aba ku masamba bakatendeka ukutiina ishina lya kwa Yehova,+ na ba ku kabanga bakatiina ubukata bakwe,+ pantu akesa kwati mumana uuleta ukucula, uo umupashi wa kwa Yehova wacincisha.+

20 “Kabili Umulubushi+ akesa ku Sione,+ na kuli abo abaletaluka ku filubo muli Yakobo,”+ e fyo Yehova asosa.

21 “Lelo ine, ici e cipangano napangana na bo,”+ e fyasosa Yehova.

“Umupashi wandi uwaba pali iwe+ na mashiwi yandi ayo nabika mu kanwa kobe+—tayakafume mu kanwa kobe na mu tunwa twa bana bobe e lyo na mu tunwa twa bana ba bana bobe, ukutula nomba mpaka umuyayaya,”+ e fyo Yehova asosa.

60 “Ima,+ we mwanakashi, balika,+ pantu ulubuuto lobe nalwisa+ kabili ubukata bwa kwa Yehova nabubalika pali iwe.+ 2 Pantu, mona! imfifi+ ikafimba isonde, ne mfifi iyafiitisha ikafimba inko; lelo Yehova akabalikila pali iwe, kabili ubukata bwakwe bukamoneka pali iwe.+ 3 Kabili inko shikesa ku lubuuto lobe,+ ne shamfumu+ shikesa ku lubuuto lwa kubalika kobe.+

4 “Inwina amenso yobe konse konse kabili mona! Bonse nabalongana pamo;+ nabesa kuli iwe.+ Abana bobe abaume baleisa ukufuma ukutali, na bana bobe abanakashi na bo bakesa nababapaapila pa mbali.+ 5 Pali iyo nshita ukamona no kubeeka,+ kabili umutima obe ukatutuma no kukula, pantu ubucindami bwa bemba bukaileta kuli iwe; ifyuma fya nko fikesa kuli iwe.+ 6 Ingamila ishingi shikesula mu calo cobe, abana ba ngamila sha ku Midiani ne sha ku Efa.+ Shonse isha ku Sheba+ shikesa. Shikasenda golde ne fyanunkila bwino. Kabili bakalumbanya Yehova pa cintubwingi.+ 7 Imikuni yonse iya mu Kedari+ ikalonganikwa pamo kuli iwe. Basukusuku ba ku Nebayote+ bakakubombela.+ Bakesa ku ciipailo+ candi no kupokelelwa bwino, kabili nkayemfya ing’anda yandi iisuma.+

8 “Ni bani aba abaleisa balepupuka kwati likumbi,+ kabili kwati ni nkunda ishilepupukila ku minshi ya fitele fya shiko? 9 Pantu ifishi fikalasubila muli ine,+ na mato ayakalamba aya ku Tarshishi,+ filya cali pa kubala, pa kuti balete abana bobe ukufuma ukutali+ kwi shina+ lya kwa Yehova Lesa obe na ku Wa Mushilo uwa kwa Israele,+ na silfere yabo na golde yabo ikaba na bo,+ pantu akakuyemfya.+ 10 Kabili aba ku fyalo fimbi bakakuula ifibumba fyobe,+ kabili ishamfumu shabo shikakubombela;+ pantu mu bukali bwandi nkakukanda,+ lelo mu cikuuku candi nkakubelela uluse.+

11 “Kabili impongolo shobe shikesulwa pe;+ tashakesalwe akasuba nelyo ubushiku, pa kuti bakuletele ifyuma ifya nko,+ kabili ishamfumu shabo shikalabatungulula.+ 12 Pantu uluko lonse no bufumu bonse ubushakakubombele bukaloba; kabili inko shikonaulwa.+

13 “Ubucindami bwa ku Lebanone bukesa kuli iwe, umuti wa mukupri, umutidari no mutashuri,+ ku kuyemfya incende yandi iya mushilo;+ kabili nkacindamika icifulo ca makasa yandi.+

14 “Kabili abana ba balekucusha bakesa kuli iwe, nabakontama;+ kabili bonse abashalekucindika bakafukama pa makasa yobe,+ kabili bakakwita umusumba wa kwa Yehova, Sione+ wa Wa Mushilo uwa kwa Israele.

15 “Ukucila ukuba uwalekeleshiwa kabili uwapatwa, ukwabula no wa kupita muli iwe,+ nkakulenga ukuba ica kuitakishishapo umuyayaya, ica kusekelelapo ku nkulo ne nkulo.+ 16 Kabili ukoonka umukaka wa nko,+ no koonka ibele lya shamfumu;+ kabili ukeshiba ukuti ine, ne Yehova,+ nine Mupusushi obe,+ kabili Uwa Maka+ uwa kwa Yakobo e Mulubushi obe.+ 17 Apali umukuba nkabikapo golde,+ na pali icela nkabikapo silfere, apali ifimuti nkabikapo umukuba, na pali amabwe nkabikapo icela; kabili umutende e o nkasonta ukuba bakangalila bobe+ no bulungami ukuba bakapitao bobe.+

18 “Ububifi tabwakomfwike na kabili mu calo cobe, nangu ukonaula no kutobaula mu ncende yobe.+ Kabili ukenika ifibumba fyobe ati Ipusukilo+ ne mpongolo shobe ati Amalumbo. 19 Kuli iwe akasuba takakabe e lubuuto lobe akasuba, no mweshi tawakalebalika pa kuti ukupeele ulubuuto. Lelo Yehova akaba ulubuuto lobe ulwa pe,+ kabili Lesa obe akaba ukuyemba kobe.+ 20 Akasuba kobe takakawe na kabili, no mweshi obe tawakacefye ulubuuto; pantu Yehova e ukaba ulubuuto ulwa pe,+ ne nshiku sha kuloosha kobe shikapwa.+ 21 E lyo abantu bobe bena, bonse bakaba abalungami,+ bakekala mu calo umuyayaya,+ umusonga uo nalimba,+ umulimo wa minwe yandi,+ pa kuti ncindame.+ 22 Umunono akaba ikana limo (1,000), kabili uwacepa akaba uluko lwa maka.+ Ine, ne Yehova, nkacilenga ukucitika bwangu bwangu mu nshita ya ciko.”+

61 Umupashi wa kwa Shikulu Mulopwe Yehova waba pali ine,+ pantu Yehova alinsuba+ ukuti mbile imbila nsuma ku bafuuka.+ Alintuma ku kukakilila abali no bulanda,+ ku kubila ukulubuka kuli bankole+ no kubila pa kuti amenso ya bafungwa yesuke;+ 2 ku kubila inshita iyo Yehova akapokelelamo abantu+ no bushiku bwa cilandushi ubwa kwa Lesa wesu;+ ku kusansamusha bonse abaloosha;+ 3 ku kupeela abaleloosha Sione, ukubapeela ica kufimbana ku mutwe apali imito,+ amafuta ya kusekelela+ apali ukuloosha, ica kufwala ca kutasha apali ubulanda;+ kabili baketwa imiti iikalamba iya bulungami,+ iyo Yehova alimba,+ pa kuti acindamikwe.+ 4 Kabili bakakuula cipya cipya incende ishaba ifibolya pa myaka iingi;+ bakemya ne ncende ishaonawilwe ku kale,+ kabili bakakuula cipya cipya imisumba iyaonaulwa,+ incende ishashala ifibolya pa myaka iingi.

5 “Kabili abeni bakeminina no kucema impaanga shenu,+ kabili aba ku fyalo fimbi+ bakalamulimina amabala kabili e bakalamulimina imyangashi.+ 6 Lelo imwe muketwa bashimapepo ba kwa Yehova;+ muketwa ababomfi+ ba kwa Lesa wesu.+ Mukalya ifyuma fya nko,+ kabili mu bucindami bwa shiko e mo mukaitakishisha.+ 7 Apali insoni pakaba ifipimo fibili,+ kabili tabakaseebane lelo bakaula utupundu pa ncende yabo.+ E ico mu calo cabo bakapyana incende iikalamba.+ Bakalasekelela umuyayaya.+ 8 Pantu ine, ne Yehova, nalitemwa umulinganya,+ napata ubupuupu pamo no bubifi.+ Kabili nkabapeela ifilambu fyabo mu cishinka,+ kabili nkapangana na bo icipangano ca muyayaya.+ 9 Kabili abana babo bakeshibikwa na mu nko,+ ne ntuntuko shabo mu bantu na bantu. Bonse ababamona bakabeshiba,+ ukuti bana abo Yehova apaala.”+

10 Cine cine nkasekelela muli Yehova.+ Umweo wandi ukaangila muli Lesa wandi.+ Pantu amfwika ifya kufwala fye pusukilo;+ amfimba ica kufwala icabula amaboko ica bulungami,+ nga shibwinga uufwala ica kufimbana ku mutwe kwati ni shimapepo,+ kabili nga nabwinga uufwala ifibekobeko.+ 11 Pantu filya fine isonde limesha ifimenwa fya liko, kabili nga filya fine ibala lilenga ifyo babyelemo ukumena,+ e fyo na Shikulu Mulopwe Yehova akalenga ubulungami+ no kulumbanya ukupuuka mu nko shonse.+

62 Pa mulandu wa kwa Sione nshakatalale tondolo,+ kabili pa mulandu wa kwa Yerusalemu+ nshakeminine shilili mpaka ubulungami bwakwe bukabalike kwati lubuuto,+ ne pusukilo lyakwe nge cengelo icileaka.+

2 “Kabili inko shikamona ubulungami bobe,+ we mwanakashi,+ ne shamfumu shonse shikamona ubucindami bobe.+ Kabili ukenikwa ishina ilipya,+ ilyo Yehova umwine akakwinika. 3 Kabili ukaba icisote ca bufumu icisuma mu kuboko kwa kwa Yehova,+ kabili ica kufwala ca ku mutwe ica bufumu mu minwe ya kwa Lesa obe. 4 Tawaketwe kabili ati umwanakashi uwalekeleshiwa;+ kabili icalo cobe tacaketwe icibolya;+ lelo iwe uketwa Uo Nsekelamo,+ kabili icalo cobe ciketwa Umwanakashi Uwaupwa. Pantu Yehova akasekelela muli iwe, kabili icalo cobe cikoopwa ngo mwanakashi.+ 5 Pantu filya umulumendo opa nacisungu ukuba umukashi wakwe, e fyo abana bobe bakakuupa ukuba umukashi wabo.+ Kabili Lesa obe akasekelela pali iwe+ nga filya shibwinga asekelela pali nabwinga wakwe.+ 6 Pa fibumba fyobe, we Yerusalemu, nimbikapo abalinshi.+ Akasuba konse no bushiku bonse, lyonse, betalala tondolo.+

“Imwe mwe balelumbula Yehova,+ mwitalala tondolo,+ 7 kabili mwitalala kuli ena mpaka akapampamike Yerusalemu kabili akamulenge ukuba ica kulumbanya mu calo.”+

8 Yehova nalapa ku kuboko kwakwe ukwa ku kulyo+ kabili ku kuboko kwakwe ukwa maka ati:+ “Nshakabwekeshepo ukupeela ingano shobe nge fya kulya fya balwani bobe,+ kabili aba ku fyalo fimbi tabakanwe umwangashi obe uupya,+ uo waculila. 9 Lelo abalelonganika ingano e bakashilya, kabili bakalumbanya Yehova; kabili abalelonganika umwangashi e bakaunwa mu mansa shandi isha mushilo.”+

10 Piteni, piteni pa mpongolo. Wamyeni inshila ya bantu.+ Pangeni umusebo, pangeni umusebo. Fumyenimo amabwe.+ Imisheni abantu icishibilo.+

11 Moneni! Yehova umwine nalenga amashiwi yomfwike ukufika ku mpela ye sonde,+ amashiwi ya kutila: “Soseni ku mwana mwanakashi Sione,+ amuti, ‘Mona! Ipusukilo lyobe lileisa.+ Mona! Ali ne cilambu apeela,+ na malipilo alipila yali pa ntanshi yakwe.’”+

12 Kabili abantu bakabeta abantu ba mushilo,+ abalubulwa kuli Yehova;+ kabili iwe uketwa Uwafwaikwa, Umusumba Uushalekeleshiwa.+

63 Nani uyu aleisa ukufuma ku Edomu,+ uuli ne fya kufwala ifilebeeka ukufuma ku Bosera,+ uyu uufwele ifya kufwala ifyacindama, uule-enda na maka ayengi?

“Nine, ne ulandila mu bulungami,+ ne wakwata amaka ayengi aya kupususha.”+

2 Nga kanshi cinshi ifya kufwala fyobe fikashikiile, ne fya kufyala fyobe fili kwati fya kufwala fya banyantaula umwa kukamina imyangashi?+

3 “Ninyantaula mu ca kukaminamo umwangashi neka,+ kabili takwali umuntu uwali pamo na ine ukufuma mu bantu na bantu. Kabili nalebanyantaula mu bukali bwandi,+ kabili nalebanyantaula mu cipyu candi.+ Kabili umulopa wabo walesabukila ku fya kufwala fyandi,+ kabili ninkowesha ifya kufwala fyandi fyonse. 4 Pantu ubushiku bwa cilandushi buli mu mutima wandi,+ kabili umwaka wa kulubula abantu bandi nawisa. 5 Kabili nalelolesha, lelo takwali uwa kungafwa; kabili nalipapile, lelo takwali uwalentungilila.+ E ico ukuboko kwandi e kwapuswishe,+ kabili icipyu+ candi e cantungilile. 6 Kabili nalenyantaula abantu mu bukali bwandi, kabili nabalengele ukukolwa icipyu+ candi no kupongolwela pa nshi umulopa wabo.”+

7 Nkalanda pa cikuuku ca kwa Yehova,+ no kulumbanya Yehova, ukulingana na fyonse ifyo Yehova atucitila,+ no busuma ubwingi ku ba mu ng’anda ya kwa Israele+ ubo abacitila ukulingana no luse+ lwakwe kabili ukulingana ne cikuuku cakwe icikalamba. 8 Kabili atile: “Cine cine aba bantu bandi,+ abana abashakabepe.”+ Kabili aishileba Umupusushi wabo.+ 9 Lyonse ilyo balecula, na o alecula.+ Kabili inkombe yakwe yalibapuswishe.+ Mu kutemwa kwakwe na mu cikuuku cakwe alibalubwile,+ kabili alibemishe no kubasenda inshiku shonse isha ku kale.+

10 Lelo bena balipondweke+ no kukalifya umupashi wakwe uwa mushilo.+ Nomba alyalwike, aishileba umulwani+ wabo; kabili alebalwisha.+ 11 Kabili baibukishe inshiku sha ku kale, baibukishe Mose umubomfi wakwe, abati: “Bushe ali kwi uwabafumishe muli bemba+ na bacemi ba mpaanga shakwe?+ Ali kwi Uwabikile muli ena umupashi wakwe uwa mushilo?+ 12 Uwalengele ukuboko+ kwakwe ukwayemba ukuya ku kwa kulyo kwa kwa Mose; uwapaatukenye amenshi pa ntanshi yabo+ pa kuti aipangile ishina lya muyayaya;+ 13 uwabalengele ukwenda mu menshi ayengi ica kuti tabaipunwine, kwati ni kabalwe mu matololo?+ 14 Nga filya ciba ilyo inama ya mu mpanga yaya mwi lungu, e fyo no mupashi wa kwa Yehova wabalengele ukutuusha.”+

Awe mwatungulwile abantu benu pa kuti muipangile ishina ilisuma.+

15 Moneni ukufuma mu muulu+ no kumona ukufuma mu bwikalo bwenu ubwatumpuka, ubwa mushilo kabili ubwayemba.+ Bushe ukucincila+ kwenu na maka yenu yonse, ukulila kwa mu nda yenu,+ no luse+ lwenu fili kwi? Nafintaluka.+ 16 Pantu ni mwe Shifwe;+ nangu ca kuti Abrahamu tatwishibe kabili Israele te kuti atwishibe, imwe, mwe Yehova, ni mwe Shifwe. Umulubushi wesu uwa muyayaya e shina lyenu.+ 17 Cinshi mwe Yehova mutulengela ukufuma mu nshila shenu? Cinshi mulengela umutima wesu ukukosa pa kuti twilamutiina?+ Bweleni pa mulandu wa babomfi benu, imikowa ya bantu benu.+ 18 Pantu abantu benu aba mushilo+ balikwete impanga pa nshita iinono. Abalwani besu banyantaula incende yenu iya mushilo.+ 19 Pa nshita ntali nomba twaba nga bantu abo mushaleteka, kwati ni balya abashaitwa ishina lyenu.+

64 Iye, kanshi nga mwalilepwile umuulu, no kwikila,+ no kulenga impili ukutenta pa mulandu wenu,+ 2 nga filya ciba ilyo umulilo waoca ulububa, kabili umulilo walenga amenshi ukubila, pa kuti ishina lyenu lishibikwe ku balwani benu,+ pa kuti inko shitutume pa mulandu wenu!+ 3 Ilyo mwacitile ifya kutiinya+ ifyo tushasubile, mwalikiile. Pa mulandu wenu impili shalitentele.+ 4 Kabili ukufuma ku kale tapali uwaumfwa,+ nangu uwakutika, nangu linso ilyamona Lesa uwafwilisha uumulolela,+ kano imwe fye mweka.+ 5 Mwayafwa umuntu wa nsansa kabili uucita ubulungami,+ na bamwibukisha no kukonka inshila shenu.+

Moneni! Imwe mwalikalipe,+ ilyo twalebembuka,+ ilyo twabembwike inshita iitali, kabili bushe mufwile ukutupususha?+ 6 Kabili twaba ngo wakowela, ifwe bonse, kabili imicitile yesu iya bulungami yaba nga kasalu abanakashi bafwala ilyo bali ku mweshi;+ kabili tukaloba kwati mabula,+ ifwe bonse, kabili imembu shesu shikatusenda kwati mwela.+ 7 Kabili tapali uulelilila kwi shina lyenu,+ kabili tapali uleibikilishako ukuti ashintilile pali imwe; pantu mwalifisa icinso cenu kuli ifwe,+ kabili mwatulenga ukusunguluka+ ku maka ya membu shesu.

8 Nomba mwe Yehova, ni mwe Shifwe.+ Ifwe tuli iloba,+ na imwe ni mwe Mwatubumba;+ kabili bonse tuli milimo ya minwe yenu.+ 9 Mwikalipa ukucilamo,+ mwe Yehova, kabili mwi-ibukisha ulubembu lwesu umuyayaya.+ Moneni: ifwe bonse tuli bantu benu.+ 10 Imisumba+ yenu iya mushilo yasanguka amatololo. Sione+ aba iciswebebe, Yerusalemu aba icibolya.+ 11 Ing’anda yesu iya mushilo kabili iyayemba,+ umo bashifwe balemulumbanishisha,+ yalipya ku mulilo;+ kabili ifisuma fyesu+ fyonse fyalyonaika. 12 Ilyo ifi filecitika bushe mukatwalilila fye ukushipikisha,+ mwe Yehova? Bushe mukekala fye no kutuleka ukucula icabipisha?+

65 “Nalileka bamfwaye+ abashalemfwaya.+ Nalileka bansange abashamfwaile.+ Natile: ‘Ndi pano, ndi pano!’+ ku luko ulushalelilila kwi shina lyandi.+

2 “Natambulwila amaboko yandi akasuba konse ku bantu abashumfwa,+ ku bale-enda mu nshila iyabipa,+ ukukonka amatontonkanyo yabo;+ 3 abantu abansaalula+ lyonse ukwabula umwenso, abapeela amalambo mu mabala+ no kufutumwina icushi+ ce lambo pa mabwe, 4 abekala mu manda,+ abasendama mu nsakwe sha balinshi, balelya umunofu wa nkumba,+ na mu fipe fyabo muli umuto wa fyakowela;+ 5 abaleti, ‘Ikala uko kwine. Wipalama kuli ine, pantu ndekulenga ukuba uwa mushilo.’+ Aba bantu baba kwati cushi mu myona yandi,+ umulilo uulepya akasuba konse.+

6 “Mona! Calilembwa pa ntanshi yandi.+ Nshakatalale tondolo,+ lelo nkapeela icilambu;+ nkapeela icilambu pa fifuba fyabo,+ 7 pa membu shabo na pa membu sha fikolwe fyabo pa nshita imo ine,”+ e fyo Yehova asosa. “Apo balifutumwina icushi ce lambo pa mpili, kabili banseebanishisha+ pa tupili,+ na ine nkalinga amalipilo yabo intanshi pa fifuba fyabo.”+

8 Yehova atila: “Filya fine umwangashi uupya+ usangwa mu cisansangu no muntu atila, ‘Mwiconaula,+ pantu muli ipaalo muli cena,’+ e fyo nkacita pa mulandu wa babomfi bandi pa kuti nibonaula bonse.+ 9 Kabili nkafumya muli Yakobo abana+ no kufumya muli Yuda uukapyana impili shandi;+ kabili abasalwa bandi bakapyana icalo,+ kabili ababomfi bandi bakekalamo.+ 10 Kabili Sharone+ akaba impanga ya mulemfwe iya mpaanga+ ne lungu lya Akore+ likaba icifulo ca kutuushishamo ing’ombe, ku bantu abamfwaya.+

11 “Lelo imwe mulesha Yehova,+ mulelaba ulupili lwandi ulwa mushilo,+ muleteyanishisha lesa we Shuko+ itebulo no kwisushisha lesa we Shamo+ umwangashi uukali. 12 Kabili nkaleka mukakomwe ku lupanga,+ kabili bonse mukakontama pa kuti bamwipaye;+ pantu nalimwitile,+ lelo tamwa-aswike; nalisosele, lelo tamwaumfwile;+ kabili mwalecita ifyabipa mu menso yandi,+ kabili mwasalile icintu ico nshatemenwe.”+

13 E ico Shikulu Mulopwe Yehova atila: “Moneni! Ababomfi bandi bakalya,+ lelo imwe mukaba ne nsala.+ Moneni! Ababomfi bandi bakanwa,+ lelo imwe mukaba ne cilaka.+ Moneni! Ababomfi bandi bakasekelela,+ lelo imwe mukekatwa insoni.+ 14 Moneni! Ababomfi bandi bakaula utupundu pa mulandu wa kusekelela mu mitima,+ lelo imwe mukalila pa mulandu wa bukali mu mitima kabili mukalila imisowa pa mulandu wa bulanda.+ 15 Kabili mukasha ishina lyenu ukuba umulapo ku basalwa bandi, kabili Shikulu Mulopwe Yehova akamulenga ukufwa umo umo,+ lelo akenika ababomfi bakwe ishina limbi;+ 16 ica kuti onse uulefwaya ukupaalwa mwi sonde akafwaya ukupaalilwa mwi shina lya kwa Lesa wa cishinka,+ kabili onse uulelapa mwi sonde akalapila mwi shina lya kwa Lesa wa cishinka;+ pantu ukucula kwa kale kukalabwa kabili kukafiswa ku menso yandi.+

17 “Pantu ndepanga imyulu ipya+ ne sonde lipya;+ ne fya kale fikalabwa,+ kabili tafyakese na mu mutima.+ 18 Nomba sekeleleni+ kabili muleanga umuyayaya pa co ndepanga.+ Pantu ndelenga Yerusalemu ukuba ica kwangilapo na bantu bakwe ica kusekelelapo.+ 19 Kabili nkasekelela muli Yerusalemu no kwangila abantu bandi;+ kabili tamwakomfwike muli ena ukuloosha nelyo ukulila ubulanda.”+

20 “Mulya tamwakabe akanya akoonka akakekala fye inshiku ishinono,+ nangu umukote uushafisha inshiku shakwe;+ pantu umo akafwa umwaice, nangu ca kuti ali ne myaka umwanda umo (100); kabili umubembu ena, nangu akabe ne myaka umwanda umo, akatiipwa.+ 21 Kabili bakakuula amayanda no kwikalamo;+ bakalima na mabala ya myangashi no kulya ifisabo fya yako.+ 22 Tabakakuule amayanda e lyo bambi bakekalemo; tabakalime amabala e lyo bambi bakalye ifisabo. Pantu ifyaba inshiku sha muti e fikaba inshiku sha bantu bandi;+ kabili umulimo wa minwe yabo abasalwa bandi bakasekelamo nga nshi.+ 23 Tabakaculile apa fye,+ nangu ukufyala abana abakaponenwa no bucushi;+ pantu bana ba bantu abo Yehova apaala,+ kabili abana babo bakaba na bo.+ 24 Kabili ilyo bashilaita ine nkasuka;+ ilyo bacili balelanda, ine nkomfwa.+

25 “Umumbulu+ no mwana wa mpaanga fikaliila pamo,+ kabili inkalamo ikalalya icani kwati ni ng’ombe;+ kabili insoka yena, ikalalya ulukungu.+ Tafyakacite ububi+ nangu ukonaula mu lupili lwandi ulwa mushilo,”+ e fyo Yehova asosa.

66 Yehova atila: “Umuulu e cipuna candi ica bufumu,+ ne calo e cipuna ca makasa yandi.+ Nga kanshi ni ng’anda ya musango nshi mwingankuulila,+ kabili icifulo candi ica kutuushishapo cili kwi?”+

2 “Ukuboko kwandi e kwapanga ifi fyonse, e fyo fyonse ifi fyaishilebako,”+ e fyasosa Yehova. “E ico nkalolesha kuli uyu, ku mulanda kabili uwalapila+ kabili uututuma pa mashiwi yandi.+

3 “Uuleipaya inama ali ngo uleipaya umuntu.+ Uulepeela impaanga ilambo ali ngo ulefuna umukoshi wa mbwa.+ Uuletuula ubupe ali ngo uletuula umulopa wa nkumba!+ Uulepeela ifyanunkila bwino+ pa kuti fibe icibukisho ali ngo ulelanda amashiwi ya finjelengwe+ ilyo alepaala. Kuli na basala ukukonka inshila shabo abene, kabili abatemwa ifya bunani fyabo.+ 4 Na ine nkafwaya inshila sha kubacushishamo;+ kabili nkaleta pali bena ifibatiinya;+ pa mulandu wa kuti naliitile, lelo tapali uwaleasuka; nalisosele, lelo tapali uwakutike;+ kabili balecita icabipa mu menso yandi, kabili basalile icintu ico nshatemenwe.”+

5 Umfweni amashiwi ya kwa Yehova, imwe mwe baletutuma pa kumfwa icebo cakwe:+ “Bamunyinenwe abamupata,+ abalemukankamba pa mulandu we shina lyandi,+ batile, ‘Yehova nacindikwe!’+ Akamoneka alesekelela pali imwe,+ kabili bena e bakaseebana.”+

6 Kuli icimfulunganya ku nse ya musumba, icongo mwi tempele!+ Congo ca kwa Yehova uulebwesesha abalwani bakwe icabalinga.+

7 Ilyo ashilatendeka ukucululuka kwa pa kupaapa, alipaapile.+ Ilyo ashilakomwa ifumo, afyele umwana umwaume.+ 8 Nani uwabala omfwa ica musango yu?+ Nani uwabala amona icaba nge ci?+ Bushe icalo+ kuti cafyalwa mu bushiku bumo?+ Nelyo bushe uluko+ kuti lwafyalwa pa nshita imo?+ Pantu Sione nacululuka pa kupaapa kabili nafyala abana bakwe abaume.

9 “Lelo bushe ine kuti nalenga ifumo ukwisuka e lyo nafilwa ukulenga umo ukupaapa?”+ e fyasosa Yehova. “Nelyo bushe ndalenga umo ukufyala nangu ukulenga ifumo ukwisalika?” e fyo Lesa wenu asosa.

10 Sekeleleni pamo na Yerusalemu kabili angeni pamo nankwe,+ imwe bonse mwe bamutemwa.+ Sekeleleni nga nshi pamo nankwe, imwe bonse mwe balemuloosha;+ 11 pa mulandu wa kuti mukoonka kwi bele lyakwe ilya kusansamusha no kwikuta; pa mulandu wa kuti mukoonka no kuilemena ku nsota sha bucindami bwakwe.+ 12 Pantu Yehova atila: “Moneni ndemupeela umutende uwingi kwati mumana+ no bucindami bwa nko ubwaba ngo mulonga uwaisula,+ kabili mukoonka kwi bele lyakwe.+ Bakamupaapila pa mbali, kabili pa makufi e po bakamulelela.+ 13 Ngo muntu uo nyina alesansamusha, e fyo na ine nkalamusansamusha;+ kabili mukasansamuka pa mulandu wa musumba wa Yerusalemu.+ 14 Awe mukamona ne mitima yenu ikasekelela,+ kabili amafupa+ yenu yakalelema kwati cani iciteku.+ Kabili ukuboko kwa kwa Yehova kukeshibikwa ku babomfi bakwe,+ lelo akakalipila abalwani bakwe.”+

15 “Pantu moneni, Yehova esa ngo mulilo,+ na maceleta yakwe yaba nge cikuuku ca mwela,+ pa kuti alete pali bena ubukali ne cifukushi cakwe no bupingushi bwakwe ubulepya ngo mulilo.+ 16 Pantu Yehova akapingula abantu bonse ku lupanga+ lwakwe, kwati mulilo uukalamba; kabili abaipaiwa ba kwa Yehova bakafula.+ 17 Abaleilenga ukuba aba mushilo no kuisangulula pa kuti baye mu mabala+ ku numa ya cimpashanya icaba pa kati, abalelya umunofu wa nkumba+ ne cakowela, pamo ne mpuku,+ bonse bakaloba,” e fyasosa Yehova. 18 “Apo nalishiba imilimo yabo+ na matontonkanyo yabo,+ ndeisa pa kuti nonganike inko shonse ne ndimi pamo;+ kabili bakesa no kumona ubukata bwandi.”+

19 “Kabili nkabika pali bena icishibilo,+ kabili nkatuma bamo pa bakashalapo pa kuti baye ku nko,+ ku Tarshishi,+ Puli, na Ludi,+ abaishiba ukubomfya ubuta, Tubali na Yabani,+ ifishi ifyaba ukutali,+ abashaumfwa ilyashi pali ine nelyo ukumona ubukata bwandi;+ kabili bakalanda pa bukata bwandi mu nko.+ 20 Kabili bakaleta bamunyinenwe bonse ukufuma mu nko shonse+ ukuba ubupe kuli Yehova,+ pali bakabalwe na mu maceleta na mu maceleta yafimbwa na pa mfalashi na pa mpunda ishikota isha lubilo,+ ku lupili lwandi ulwa mushilo,+ Yerusalemu, nge fyo ciba ilyo abana ba kwa Israele baleta ica bupe mu cipe icasanguluka mu ng’anda ya kwa Yehova,”+ e fyo asosa Yehova.

21 “Kabili nkabuula bamo pali bena ukuba bashimapepo, na bambi ukuba abena Lebi,” e fyo Yehova asosa.

22 “Pantu ifyo imyulu ipya+ ne sonde lipya+ ifyo ndelenga fili pa ntanshi yandi pe,+ e fikaba abana benu+ ne shina lyenu likabako pe,”+ e fyasosa Yehova.

23 “Kabili ukufuma ku mweshi uupya ukufika ku mweshi uupya kabili ukufuma kwi sabata ukufika kwi sabata abantu bonse bakesa no kunkontamina,”+ e fyo Yehova asosa. 24 “Kabili bakaya no kulolesha pa fitumbi fya bantu abalemembukila;+ pantu imititi iikaba pali bena tayakafwe e lyo no mulilo wabo tawakashime,+ kabili bakaba ica bunani ku bantu bonse.”+