Ku Bena Kolose

1 Ine ne Paulo, ne o Lesa asalile ukuba umutumwa wa kwa Kristu Yesu ukulingana no kufwaya kwakwe,+ ndi pamo na Timote+ munyinefwe, 2 kabili twalembela aba mushilo kabili bamunyinefwe ba cishinka muli+ Kristu aba mu Kolose:

Tuleti icikuuku no mutende ukufuma kuli Lesa Shifwe fibe na imwe.+

3 Lyonse ilyo tumupepelako,+ tulatootela+ Lesa, Wishi wa kwa Shikulwifwe Yesu Kristu, 4 pantu twalyumfwa pa citetekelo cenu muli Kristu Yesu na pa kutemwa uko mwatemwa aba mushilo bonse+ 5 pa mulandu wa kusubila+ ifyo bamusungila mu muulu.+ Ilyo amashiwi ya cine aya mbila nsuma yabalilepo ukufika kuli imwe, e lyo mwaumfwile na pe subilo line ili.+ 6 Imbila nsuma ilatwala ifisabo+ kabili ilasalangana+ pano calo+ ponse. E fyo yacita muli imwe ukutula pa bushiku mwabalilepo ukumfwa no kwishiba bwino bwino ifyaba icikuuku+ ca kwa Lesa.+ 7 E fyo mwasambilile kuli Epafra+ umusha munensu uwatemwikwa, umubomfi wa cishinka uwa kwa Kristu uubombela na ifwe, 8 kabili Epafra e watwebele pa kutemwa+ kwenu uko mwatemwa Lesa.

9 E ico pa mulandu wa ifi, lyonse fye tulamupepelako+ ukutula pa bushiku twaumfwile ifi pali imwe. Tulomba Lesa ukuti amwisushemo ukwishiba bwino bwino+ ukufwaya kwakwe no kukwata amano yonse+ aya kwiluka ifyo umupashi wakwe upeela,+ 10 pa kuti muleikala ukulingana+ ne fyo Yehova+ afwaya pa kuti mulecita lyonse ifya kumusekesha ilyo muleya muletwala ifisabo mu mulimo+ onse uusuma kabili ilyo muleya muleishibilako Lesa bwino bwino.+ 11 Tulamulombelako kuli Lesa ukuti amupeele amaka pa kuti mube na maka ukulingana na maka+ yakwe ayacindama pa kuti mushipikishe+ muli fyonse no kushishimisha pamo no kusekelela. 12 Kabili muletootela Shifwe uwamulengele ukuba abalinga ukupyana+ ifyo Lesa abikila aba mushilo+ ababa mu lubuuto.+

13 Alitupokololako ku maka+ ya mfifi no kutuleta+ mu bufumu+ bwa Mwana wakwe uo atemwa.+ 14 Muli uyu e mo twamwena ukulubuka, e kutila ukwelelwa imembu shesu.+ 15 Ena e cipasho+ ca kwa Lesa uushimoneka,+ e beli+ pa fibumbwa fyonse; 16 pantu muli ena+ e mo ifintu fyonse fyapangiilwe mu muulu na pano isonde, ifimoneka ne fishimoneka, ifipuna fya bufumu, bumulopwe, amabuteko nangu aba maka bonse.+ Fyonse fyapangiilwe muli ena+ kabili e o fyapangiilwe. 17 Ilyo ifintu+ fyonse fishilabako Kristu e ko aali, kabili muli ena e mo fyonse fyapangiilwe,+ 18 kabili e mutwe wa mubili, e kuti icilonganino.+ Ena e ntendekelo, libeli lya bafuma ku bafwa,+ pa kuti abe uwa ntanshi+ muli fyonse;19 pantu Lesa amwene ukuti cili bwino ukuti muli Kristu e mo mube ifintu fyonse fikale,+ 20 kabili Lesa afwaile ukuti ukupitila mu mwana wakwe, e mo ifintu+ fyonse ifya pano isonde atemwa ifya mu muulu fibwelele+ kuli ena no kuba no mutende+ na ena ukupitila mu mulopa+ Yesu asuumishe pa cimuti.+

21 Cine cine, mwe baali kale ukutali+ na Lesa kabili abalwani bakwe pa mulandu wa fyabipa ifyo mwaletontonkanya no kucita,+ 22 lelo nomba pa mulandu wa mfwa+ ya mwana wakwe, Lesa alimubwesesha+ kuli ena, pa kuti amulenge ukuba aba mushilo kabili ababula akalema+ kabili ababula umulandu+ kuli ena, 23 cikulu fye, mwatwalilila mu citetekelo,+ abakuulwa pa mufula+ uwakosa kabili abashangila+ kabili abashilengwa ukufutatukako kwi subilo lya mbila nsuma iyo mwaumfwile,+ kabili iyabililwe+ ku cibumbwa+ conse ica mwi samba lya muulu. Ine, ne Paulo, ndi mubomfi wa iyi ine imbila nsuma.+

24 Nomba ndi ne nsansa pa mulandu wa kuculila pali imwe,+ pantu ku macushi+ ya mubili wandi wine, ndepwishishisha amacushi ayashalako ku macushi Kristu aculila umubili wakwe, e kutila icilonganino.+ 25 Naishileba umubomfi+ wa ici cilonganino ukulingana no mulimo+ Lesa ampeele pa mulandu wenu pa kuti nshimike sana icebo ca kwa Lesa. 26 Iyi mbila nsuma e nkama+ ya kwa Lesa iyo afishile ukutula fye ku bwikashi+ bwa ku kale na ku nkulo sha ku kale. Lelo nomba alisokolola+ iyi nkama ku ba mushilo bakwe, 27 abena fyalo, abo Lesa umwine afwaya ukuti beshibe ubucindami+ bwa bukata ubwa iyi nkama.+ Kristu+ aba muli imwe, kabili musuubila ukucindamikilwa pamo nankwe.+ 28 E o tulebila,+ pa kukonkomesha umuntu onse no kusambilisha umuntu onse mu mano yonse,+ pa kuti tulenge umuntu onse abe Umwina Kristu uwafikapo.+ 29 E co ndebombesesha no kupilikita+ ukulingana na maka+ yakwe ayo ampeela.+

2 Pantu ndefwaya mwishibe ifyo mombesha+ pa mulandu wenu na pa mulandu wa ba mu Laodikea,+ ukubikapo fye na bonse abashamonapo icinso candi. 2 Ncita ifi pa kuti imitima yabo isansamuke,+ kabili pa kuti bonse batemwane+ bwino bwino no kumfwikisha icine.+ E lyo bakeshiba bwino bwino inkama ya kwa Lesa, ne yo nkama ni Kristu.+ 3 Muli ena e mwafiswa ifyuma fyonse ifya mano no kwishiba.+ 4 Ndesosa ifi pa kuti umuntu emubepaika ku mashiwi ya kunashanasha.+ 5 Pantu nangu nshili na imwe, na lyo line ndatontonkanya pali imwe,+ kabili ndasekelela pa kumona ifyo mucita ifintu bwino bwino+ ne fyo mwakosa mu citetekelo+ cenu muli Kristu.

6 E ico, apo mwalisumina muli Kristu Yesu Shikulu, mulekonka+ ifyo afwaya, 7 mube abalimbwa+ muli ena kabili abakuulwa+ muli ena no kuba ne citetekelo+ icakosa, nge fyo mwasambilishiwe, kabili ilyo muletasha Lesa, icitetekelo cenu cikule.+

8 Cenjeleni: epali umuntu amuteka+ ubusha ku mano ya buntunse+ no bucenjeshi+ ukulingana ne ntambi sha bantu, ukulingana ne fintu fya fye+ ifya muli ici calo kabili te kulingana na Kristu; 9 pa kuti muli Kristu e mumonekela imibele+ ya kwa Lesa+ yonse.+ 10 E ico pa mulandu wa kwa Kristu uwaba e mutwe wa buteko bonse na bukateka fye bonse, tamwabulwa nangu cimo.+ 11 Mu kwampana+ pamo na Kristu mwalisembululwa.+ Te kusembululwa kwa ku bantu ukwa kufumyako umubili wa lubembu,+ lelo kusembululwa kwa Mwina Kristu, 12 pantu mwashiikilwe pamo nankwe mu lubatisho+ lwakwe, kabili mwabuushiwe+ pamo nankwe pa mulandu wa kutetekela+ imilimo+ ya kwa Lesa, uwabuushishe Kristu ku bafwa.+

13 Kale mwali abafwa pa mulandu wa membu shenu na pa mulandu wa kuti mwali abashasembululwa, lelo nomba Lesa alimulenga ukuba aba mweo pamo na Kristu.+ Mu cikuuku Lesa alitwelela imembu shesu shonse+ 14 no kufuuta+ amafunde+ ayalembelwe ku minwe ayaletupeela imilandu,+ umwali ifipope+ ifyaletulwisha. Awe Lesa aliyafumyapo pa kuyapoopela+ pa cimuti.+ 15 Pa cimuti e po acimfishe+ bakateka+ na bamulopwe, no kubafuula pa lwalaala pa kuti bonse babamone, ilyo abasendele muli bunkole.+

16 E ico mwileka umuntu nangu umo amupingule+ pa fya kulya na pa fya kunwa+ nelyo pa mutebeto+ nangu pa kusunga ubushiku bwa mweshi+ upya nangu isabata;+ 17 pantu ifyo fintu fyaba fye cinshingwa+ ca fikesa, lelo ifya cine cine+ fya kwa Kristu.+ 18 Mwileka nangu umo amupusule+ icilambu+ uwatemwa ukuicefya kwa bufi no kupepa bamalaika. Uwaba ifi “akonka fye,” ifyo umwine atila e fyo amwene, kabili aitutumuna apabula nangu cimo pa mulandu no kutontonkanya kwakwe ukwa buntunse, 19 lelo alifumako kuli Kristu uwaba e mutwe.+ Muli ena e mo umubili onse usangila amaka, e mo imfyufyu ne mishipa fyalundana+ no kukula e mo ukulila ukulingana ne fyo Lesa alefwaya.+

20 Nga mwafwilile+ pamo na Kristu ku fya muli ici calo+ ifya fye,+ cinshi ico mwikalila kwati tamwafwa ku fya muli ici calo no kulanakila ifipope ifitila:+ 21 “Wilaikata kuli ici, wilasonda+ kuli cilya, nelyo wilakumya kuli ici”?+ 22 Ala ifi fintu fyonse filonaika ilyo bafibomfya. Aya mafunde ne fisambilisho, fya buntunse fye.+ 23 Ifyo fintu, cine cine, fyaba fye kuipatikisha ukupepa, ukuicefya bufi bufi, no kusunga umubili buluku buluku,+ kabili fimoneka kwati fya mano; lelo tafyaba na maka ya kulesha ulunkumbwa lwa mubili.+

3 E ico nga mwabuushiwe+ pamo na Kristu, akufwayeni ifya ku muulu,+ uko Kristu aikala ku kwa kulyo kwa kwa Lesa.+ 2 Bikeni imitima yenu pa fya ku muulu,+ te pa fya pano isonde.+ 3 Pantu mwalifwile,+ ne myeo+ yenu yafiseme pamo na Kristu muli+ Lesa. 4 Ilyo Kristu, uwaba e mweo+ wesu, akamoneka, e lyo na imwe mukamonekela+ pamo nankwe mu bukata.+

5 E ico, ipayeni+ ifilundwa+ fya mubili wenu umumonekela imibele yabipa, e kutila ubulalelale, ukukowela, insuuna,+ ulunkumbwa, no mufimbila,+ pantu ukuba ne yi mibele e kupepa utulubi. 6 Ni pa mulandu wa ifi fintu ubukali bwa kwa Lesa buleishila.+ 7 Na imwe bene kale mwalecita ifi fine.+ 8 Lelo nomba pooseni iyi mibele yonse,+ ubukali, icipyu, ububifi, imiponto,+ kabili mwilalanda ne lyashi lya nsoni.+ 9 Mwilabepana.+ Fuuleni ubuntu+ bwa kale pamo ne micitile ya buko, 10 kabili fwaleni ubuntu bupya,+ ubulelengwa cipya cipya ukulingana ne cipasho+ ca kwa Kalenga wa buko ukupitila mu kwishiba bwino bwino icine. 11 Mu buntu bupya tamwaba akapaatulula ka kuti uyu muGriki e lyo uyu muYuda, uyu alisembululwa, uyu ena tasembululwa, uyu muntu umbi umbi, e lyo uyu muSukuti,* uyu musha, uyu ena muntungwa.+ Lelo kuli ifwe bonse Kristu e wacindamisha kabili aba muli bonse.+

12 E ico, apo mwalisalwa kuli Lesa,+ mwe ba mushilo kabili abatemwikwa, fwaleni umutima wa nkumbu,+ icikuuku, ubupete,+ ukufuuka,+ no kushishimisha.+ 13 Muleshipikishanya no kubelelana uluse+ nga umo ali ne ca kuilishanya+ ku munankwe. Ifyo Yehova amubelela uluse,+ e fyo na imwe mulebelelana uluse. 14 Lelo, pali ifi fyonse, fwalilenipo no kutemwa,+ pantu e cikakilo+ cafikapo ica kwikatana.

15 Kabili, lekeni umutende+ wa kwa Kristu uteke mu mitima+ yenu, pantu, na kuba, e ko bamwitila ukuti mube umubili umo.+ Kabili muletootela. 16 Lekeni amashiwi ya kwa Kristu umwaisula amano+ yonse yekale muli imwe. Mulesambilishanya+ no kukonkomeshanya mu nyimbo sha malumbo,+ mulelumbanya Lesa, ku nyimbo shakwe+ no kumucindika, kabili muleimbila Yehova mu mitima yenu.+ 17 Kabili fyonse ifyo mulecita no kusosa,+ muleficita pa mulandu we shina lya kwa Shikulu Yesu,+ kabili muli ena e mo muletootela+ Lesa Shifwe.

18 Mwe bakashi, mulenakila+ abalume benu, pantu e cawama mu menso ya kwa Shikulu. 19 Mwe balume, muletemwa abakashi+ benu kabili mwilaba ne cipyu kuli bena.+ 20 Mwe bana, muleumfwila+ abafyashi benu muli fyonse, pantu ukucita ifi e cawama mu menso ya kwa Shikulu. 21 Mwe bashibo, mwilakalifya abana+ benu, epali baba no bulanda. 22 Mwe babomfi, mulenakila abamwingisha incito muli fyonse,+ te kubombela fye ukumonwa, pa kuti abantu bamutashe,+ lelo mulebomba no mutima wa cishinka, kabili muletiina Yehova.+ 23 Conse ico mulecita, mulebomba no mweo onse+ kwati mulebombela Yehova+ te bantu iyo, 24 pantu mwalishiba ukuti ni Yehova+ e ukamupeela icilambu ca bupyani.+ Bombeleni Shikulu, Kristu.+ 25 Na cine uulelufyanya akakandwa+ ukulingana no kulufyanya kwakwe, pantu Lesa taba na kapaatulula.+

4 Mwe bashikulwibo, mulesunga ababomfi+ benu mu nshila yalungama kabili iya mulinganya. Muleibukisha ukuti na imwe bene mwalikwata Shikulwinwe mu muulu.+

2 Mube no mute wa kupepa.+ Mulebika amano mu kupepa na mu kutootela,+ 3 kabili pa nshita imo ine muletupepelako na ifwe bene,+ pa kuti Lesa atwiswileko iciibi+ ica kubila amashiwi yakwe, pa kuti tulelanda pa nkama+ ya kwa Lesa pali Kristu. Ni pa mulandu wine uyu e po bampoosela mu cifungo.+ 4 Awe mulepepa pa kuti ndebila bwino bwino nge fyo mfwile ukulanda.+

5 Mule-enda mano mano ku ba ku nse,+ kabili mulebomfya bwino inshita yonse+ iyo mwashukila. 6 Imilandile yenu yonse ibe iisuma,+ iyalungwamo umucele,+ pa kuti mwishibe ifya kwasuka+ bwino umuntu onse.

7 Tukiki,+ munyinane uwatemwikwa kabili umubomfi wa cishinka kabili umusha munandi muli Shikulu, akamushimikila fyonse pali ine. 8 Ni pali ici cine ndemutumina kuli imwe pa kuti mwishibe ifiletucitikila kabili pa kuti asansamushe imitima yenu.+ 9 Akesa na Onesimu,+ munyinane uwa cishinka kabili uwatemwikwa, uwafuma muli imwe. Bakamulenga ukwishiba fyonse ifilecitika kuno.

10 Alistaaki+ umufungwa munandi amuposha, na Marko+ umufyala wa kwa Barnaba, (e ulya namwebele ukuti nga aisa kuli imwe mukamupokelele bwino,)+ 11 na Yesu uwitwa Yusti, ababa pa basembululwa. Aba beka e babomba na ine umulimo wa bufumu bwa kwa Lesa, kabili e bankoselesha. 12 Epafra,+ na o wine uwafuma muli imwe, umusha wa kwa Kristu Yesu, amuposha, lyonse alamupepelako sana, ukuti mwiminine abapwililila+ kabili abashininkisha bwino bwino muli conse ico Lesa afwaya. 13 Cine cine ine ndi kambone ukuti alamupepelako no kupepelako aba ku Laodikea+ na ba ku Hiyerapoli.

14 Luka+ kondapa uwatemwikwa amuposha, na Dema+ na o wine amuposha. 15 Mposesheniko aba bwananyina ku Laodikea na Numfa na ba mu cilonganino abalonganina mu ng’anda mu mwakwe.+ 16 Nga mwapwisha ukubelenga uno kalata, mukatwale ku bena Laodikea pa kuti na bo bakabelengemo,+ kabili na imwe mukabelenge kalata wabo. 17 Kabili mwebe Arkipi+ amuti: “Ulebika amano ku mulimo obe uo wapokelele muli Shikulu, pa kuti ukaupwishe bwino bwino.”

18 Ine ne Paulo, nalemba ku minwe+ yandi aya mashiwi ya kumuposha. Muleibukisha ukuti ncili mu cifungo.+ Icikuuku ca kwa Lesa cibe na imwe.