Kalata wa Ntanshi ku Bena Tesalonika

1 Ine ne Paulo pamo na Silbani+ e lyo na Timote+ twalembela imwe mwe ba mu cilonganino ca bena Tesalonika aba-ampana+ na Lesa Shifwe e lyo na Shikulu Yesu Kristu:

Tuleti icikuuku ca kwa Lesa no mutende fibe na imwe.+

2 Lyonse tutootela Lesa ilyo tulemulumbula bonse mu mapepo yesu,+ 3 pantu lyonse twibukisha umulimo+ mubomba pa mulandu wa citetekelo cenu ne fyo mubombesha pa mulandu wa kutemwa kwenu e lyo ne fyo mushipikisha pa mulandu wa kusubila+ Shikulwifwe Yesu Kristu pa ntanshi ya kwa Lesa wesu kabili Shifwe. 4 Twalishiba, mwe bamunyinefwe abatemwikwa kuli Lesa, ukuti alimusala,+ 5 pantu ilyo twalebila imbila nsuma kuli imwe, tatwalelanda fye amashiwi yeka lelo twali na maka+ no mupashi wa mushilo kabili twalishininkishe icine cine,+ filya fine mwaishiba ifyo twalecita kuli imwe pa kuti tumwafwilishe;+ 6 kabili mwatendeke ukupashanya+ ifwe na Shikulu,+ pantu mwatetekele icebo ca kwa Lesa mu bucushi+ ubwingi pamo no kusekelela ukufuma ku mupashi wa mushilo,+ 7 ica kuti mwaishileba abo abasumina bonse aba mu Makedonia na mu Akaya bengapashanya.

8 Na kuba, te mu Makedonia na mu Akaya mweka umo mwabila icebo ca kwa Yehova,+ lelo mu ncende shonse icitetekelo+ cenu muli Lesa calisalanganina konse,+ ica kuti tapali ico twingalandapo pali ici. 9 Pantu abene balashimika pa fyo ifwe intanshi twaingile muli imwe na pa fyo mwa-alukile kuli Lesa ukufuma ku tulubi+ twenu pa kuti mube abasha ba kwa Lesa wa mweo+ kabili uwa cine,+ 10 na pa kuti mulelolela+ Umwana wakwe ukufuma ku muulu,+ uo aimishe ku bafwa,+ e kutila, Yesu, uutupokolola ku bukali ubuleisa.+

2 Pantu imwe bamunyinefwe, mwalishiba ukuti ukutandala+ twamutandalile takwali ukwa fye iyo,+ 2 lelo, (nga filya fine mwaishiba) ilyo twabalile twacula+ no kusaalulwa+ mu Filipi,+ twalishipile pantu Lesa wesu alitukoseshe pa kuti tulande+ kuli imwe imbila nsuma ya kwa Lesa no kucula nga nshi. 3 Pantu ifyo tumukonkomesha tafifuma ku kuluba nelyo ku kukowela+ nelyo ku bucenjeshi, 4 lelo, ifyo Lesa atumona ukuti natulinga ukuseekeshiwa+ imbila nsuma, e fyo tulanda, pantu tusekesha+ Lesa uumona ifyaba mu mitima yesu, tatusekesha abantu iyo.+

5 Na kuba, tatwatala atwisa na mashiwi ya kutasha muli bubumbimunda,+ (nge fyo mwaishiba) nelyo ukwisa nga ba kaele+ lelo mu mitima tuli no lunkumbwa,+ Lesa e nte! 6 Kabili tatwatala atufwaya ukutashiwa ku bantu,+ nampo nga ni kuli imwe nelyo kuli bambi, nangu ca kutila twali ne nsambu sha kulomba ukuti mutufwaile indalama sha kutusungilamo+ apo tuli batumwa ba kwa Kristu. 7 Lelo, twali abanakilila mu kati kenu, nga filya nyina uonsha asakamana+ bwino abana bakwe. 8 E ico, apo twalimutemwa sana,+ tatwalefwaisha fye ukumupeela imbila nsuma ya kwa Lesa epela, lelo twalefwaya ukumupeela ne myeo yesu,+ pantu mwaishileba abatemwikwa+ kuli ifwe.

9 Na cine, mwe bamunyinefwe, muleibukisha ifyo twalebombesha. Pa kushimikila imbila nsuma ya kwa Lesa kuli imwe, twaleibombela+ fwe bene ubushiku na kasuba, pa kuti twilamusakamika+ sana ukwa kufumya indalama sha kutusungilamo. 10 Imwe muli nte, pamo na Lesa, ku fyo twali aba cishinka kabili abalungama kabili ababula umulandu+ kuli imwe mwe basumina. 11 E ico mwalishiba bwino ukuti twalecita filya wishi+ acitila abana bakwe. Twalekoselesha+ umo umo muli imwe, no kumusansamusha no kumucincisha, 12 pa kuti mutwalilile ukwenda+ abalinga pa ntanshi ya kwa Lesa uwamwita+ ku bufumu+ bwakwe no bukata bwakwe.

13 Cine cine, e mulandu wine na ifwe tutashisha Lesa lyonse,+ pantu ilyo mwatetekele icebo ca kwa Lesa,+ ico mwaumfwile kuli ifwe, tamwacitetekele ukuti cebo ca bantu,+ lelo mwatetekele ukuti cebo ca kwa Lesa, kabili ca cine cebo ca kwa Lesa, icilebombela na muli imwe mwe basumina.+ 14 Pantu mwe bamunyinefwe, mwalepashanya aba mu filonganino fya kwa Lesa ifya ku Yudea ifya-ampana na Kristu Yesu, pantu na imwe abekala calo banenu batendeke ukumucusha+ filya fine na bo bene balebacusha ku baYuda, 15 abaipeye fye na Shikulu Yesu+ na bakasesema+ no kutucusha.+ Kabili, tabasekesha Lesa, lelo balapusana ne fifwaya abantu bonse, 16 pantu bafwaya ukutulesha+ ukulanda ku bena fyalo amashiwi ayengabapususha,+ ica kuti lyonse bacita imembu ishingi nga nshi.+ Lelo ubukali bwakwe nabusuka nabufika pali bena.+

17 Awe ifwe, mwe bamunyinefwe, apo balitupatikishe ukumusha pa nshita iinono, tatwalemumona, lelo tatwalekele ukumwibukisha, twalemufuluka nga nshi kabili twalefwaisha ukumumona na kabili.+ 18 Ni pali uyu mulandu twafwaile ukwisa kuli imwe, e kutila, ine wine ne Paulo, pa muku wa kubalilapo no wa bubili, lelo Satana alitucilikile. 19 Na kuba, bushe imwe te imwe bene mwe subilo lyesu kabili insansa shesu kabili icilambu*+ cesu ica kusansamukilapo ku cinso ca kwa Shikulwifwe Yesu pa kubapo kwakwe?+ 20 Cine cine imwe muli bukata bwesu kabili insansa shesu.

3 E ico, ilyo twafililwe ukushipikisha, twatile cawama tushale fweka ku Atena;+ 2 kabili twatumine Timote,+ munyinefwe kabili umubomfi wa kwa Lesa mu kubila imbila nsuma+ pali Kristu, ukuti ese amukoshe no kumusansamusha pa kuti icitetekelo cenu cikose, 3 pa kuti aya amacushi+ yelenga umuntu nangu umo ukutelententa. Pantu imwe bene mwalishiba ukuti aya macushi yafwile fye ukutuponena.+ 4 Na kuba, ilyo twali na imwe, twalemwebela libela+ ukuti twali no kucula+ nga filya fine cali, kabili ifyo na imwe mwaishiba.+ 5 E mulandu wine ilyo nafililwe ukushipikisha, nalimutumine ukuti ese uko pa kuti njishibe pa citetekelo cenu,+ epali Katunka+ amutunka, no kubombesha kwesu kwaba ukwa fye.+

6 Lelo Timote e lyo fye eshile kuli ifwe nomba line ukufuma kuli imwe+ no kutushimikila ilyashi ilisuma sana pa citetekelo cenu no kutemwa kwenu,+ no kuti lyonse mulatwibukisha ne nsansa, kabili mulafuluka ukutumona nge fyo na ifwe tufuluka ukumumona.+ 7 E mulandu wine, pa mulandu wa citetekelo cenu mwe bamunyinefwe, natusansamuka+ pali imwe mu mafya yesu yonse na macushi ayatuponena,+ 8 pantu nomba ifwe tulaba ne nsansa imwe nga mwaiminina ndi muli Shikulu.+ 9 Pantu kuti twakumamo shani ukutasha Lesa pali imwe na pa kusekelela konse uko tusekelela+ pa ntanshi ya kwa Lesa wesu pa mulandu wa imwe, 10 ilyo ubushiku na kasuba tulemulombela+ nga nshi ukuti tumone ifinso fyenu no kuti tulundeko ifyabulila ku citetekelo cenu pa kuti cikose?+

11 Awe Lesa wesu kabili Shifwe umwine na Shikulwifwe Yesu+ nabatutungulule bwino bwino kuli imwe. 12 Kabili, Shikulu amulenge ukulundako,+ kabili amulenge ukufushako ukutemwa+ mwatemwana no ko mwatemwa abantu bonse, filya fine na ifwe tucita kuli imwe; 13 pa kuti akoshe imitima yenu, ibe iya mushilo, iya kaele+ ku cinso ca kwa Lesa wesu kabili Shifwe pa kubapo+ kwa kwa Shikulwifwe Yesu na ba mushilo bakwe bonse.+

4 Ica kulekelesha, mwe bamunyinefwe, tulemupapaata no kumukonkomesha muli Shikulu Yesu, ukuti filya fine twamufundile pa fyo mufwile ukwenda+ no kusekesha Lesa, nge fyo mule-enda na pali nomba, ukuti mulecita ifyo fine sana.+ 2 Pantu mwalishiba amafunde+ twamupeele muli Shikulu Yesu.

3 Pantu ici e co Lesa afwaya, ukuti mube aba mushilo,+ ukuti muletaluka ku bulalelale;+ 4 ukuti onse uwa muli imwe eshibe ifya kusunga umubili+ wakwe mu mushilo+ kabili mu mucinshi, 5 te mu nsuuna+ yalubana nga filya abantu+ abashaishiba Lesa baba;+ 6 ukuti umuntu nangu umo efika ku kwikala pa nsambu sha kwa munyina no kumufyenga muli uyu mulandu,+ pantu Yehova e ukanda pali ifi fintu fyonse,+ filya twamwebele kale no kumulondolwela bwino bwino.+ 7 Pantu Lesa tatwitile pa kuti tube abakowela, lelo pa kuti tube aba mushilo.+ 8 E ico, kanshi, umuntu uusuula+ ici tasuula umuntu, lelo asuula Lesa,+ uubika umupashi+ wakwe uwa mushilo muli imwe.

9 Lelo pa kutemwa aba bwananyina,+ tamukabila ukuti tumulembele, pantu Lesa+ alamusambilisha ukutemwana;+ 10 kabili, na kuba, e fyo mucita ku ba bwananyina bonse aba mu Makedonia monse. Lelo tulemukoselesha, mwe bamunyinefwe, ukuti mutwalilile ukucishapo ukutemwana, 11 kabili mulefwaisha ukwikala tondolo+ no kubika fye amano ku fyenu+ no kuibombela ku minwe yenu,+ filya twamwebele; 12 pa kuti mule-enda bwino bwino+ mu ba ku nse+ no kukabila akantu nangu kamo iyo.+

13 Kabili, mwe bamunyinefwe, tatulefwaya imwe ukukanaishiba pa balaala+ mu mfwa; ukuti mwiba no bulanda filya bambi baba abashaba ne subilo.+ 14 Pantu nga twalitetekela ukuti Yesu alifwile no kwima kabili ku bafwa,+ ifyo fine, na balaala mu mfwa muli Yesu, Lesa akababuusha no kubaleta pamo nankwe.+ 15 Pantu ici e co tulemweba ukulingana ne cebo+ ca kwa Yehova, ukuti ifwe fwe bali aba mweo fwe bashalapo ukufika pa nshita ya kubapo kwa kwa Shikulu+ tatwakatangilile abalaala mu mfwa nakalya; 16 pantu Shikulu umwine akeka ukufuma ku muulu+ ne shiwi lyakwe ilya maka likomfwika, e kutila ishiwi lya kwa malaika mukalamba+ kabili ipenga+ lya kwa Lesa likomfwika, na bafwila muli Kristu bakabalilapo ukwima ku bafwa.+ 17 E lyo ifwe fwe ba mweo fwe bashalapo, tukolwilwa+ pamo na bo+ mu makumbi+ ku kukumanya+ Shikulu mu lwelele; kabili e fyo tukaba lyonse pamo na Shikulu.+ 18 E ico mulesansamushanya kuli aya mashiwi.

5 Nomba pa nshita no mwaka+ ilyo ifi fili no kucitika, tamulekabila ukumulembelapo icintu mwe bamunyinefwe. 2 Pantu mwe bene mwalishiba bwino ukuti ubushiku+ bwa kwa Yehova bukesa ngo mupuupu ubushiku.+ 3 Ilyo balesosa+ abati: “Umutende+ no mutelelwe!” e lyo ubonaushi+ bwa kupumikisha bukabemina filya ukucula kwa pa kupaapa kwisa pa mwanakashi+ uuli ne fumo; kabili tabakapusuke nakalya.+ 4 Lelo imwe, mwe bamunyinefwe, tamuli mu mfifi,+ pa kuti ubushiku bulya bukamupumikishe nge fyo amacaca yapumikisha abapuupu,+ 5 pantu bonse muli bana ba lubuuto+ kabili abana ba mu kasuba.+ Tatuli bantu ba mu bushiku nangu aba mu mfifi.+

6 E ico kanshi, twilaala+ nga bantu bambi,+ lelo tulole+ kabili tutekanye.+ 7 Pantu abalaala+ balaala ubushiku,+ kabili abakolwa ilingi line bakolwa ubushiku. 8 Lelo ifwe fwe ba mu kasuba, natube abalola no kufwala ica kucinga icifuba+ ica citetekelo+ kabili ica kutemwa ne subilo lya kupusuka+ nge ca kucinga umutwe;+ 9 pantu Lesa tatusalile pa kuti tukesekandwa ku bukali bwakwe,+ lelo pa kuti tukapusuke+ ukupitila muli Shikulwifwe Yesu Kristu,+ 10 uwatufwilile,+ pa kuti nelyo tulole nelyo tulaale, tukabe abomi pamo nankwe.+ 11 E ico mulesansamushanya no kukuulana,+ nga filya fine mucita.+

12 Awe, mwe bamunyinefwe, tulemulomba ukwishiba abalebombesha muli imwe kabili abamutungulula+ muli Shikulu no kumukonkomesha; 13 kabili bacindikisheni mu kutemwa pa mulandu wa mulimo wabo.+ Muleikala umutende na banenu.+ 14 Lelo, tulemukoselesha, mwe bamunyinefwe, kalipileni abashumfwa,+ sansamusheni abali no bulanda,+ koselesheni abanaka, beni abashishimisha+ kuli bonse. 15 Cenjeleni ukuti umuntu nangu umo ebwesesha ububi pa bubi ku munankwe,+ lelo lyonse mulecita icisuma ku banenu na kuli bonse.+

16 Mulesekelela lyonse.+ 17 Mulepepa ukwabula ukuleka.+ 18 Muli fyonse muletootela.+ Pantu uku e kufwaya kwa kwa Lesa kuli imwe muli Kristu Yesu. 19 Mwilashimya umupashi.+ 20 Mwilasuula amashiwi ya kusesema.+ 21 Muleshininkisha ifintu fyonse;+ ikatisheni icawama.+ 22 Talukeni ku musango onse uwabipa.+

23 Shi Lesa wa mutende+ umwine amulenge ukuba aba mushilo icine cine.+ Kabili umupashi wenu no mweo no mubili nafisungililwe ifituntulu monse monse, fibe ifya kaele pa kubapo kwa kwa Shikulwifwe Yesu Kristu.+ 24 Uwamwita wa cishinka, kabili akacita ifi fine.

25 Mwe bamunyinefwe, muletupepelako.+

26 Posheni aba bwananyina bonse no kutomona kwa mushilo.+

27 Ndemukonkomesha nga nshi muli Shikulu ukuti uyu kalata akabelengwe ku ba bwananyina bonse.+

28 Icikuuku+ ca kwa Lesa ico Shikulwifwe Yesu Kristu akwata cibe na imwe.