Kalata wa Ntanshi Kuli Timote
1 Ine ne Paulo, ne mutumwa+ wa kwa Kristu Yesu ukulingana ne funde lya kwa Lesa+ Umupusushi+ wesu ne lya kwa Kristu Yesu, isubilo lyesu,+ 2 nakulembela Timote,+ we mwana+ wine wine mu citetekelo:
Icikuuku, uluse, no mutende ukufuma kuli Lesa Shifwe na Kristu Yesu Shikulwifwe fibe na iwe.+
3 Filya fine nakukoseleshe ukwikala mu Efese ilyo naleya ku Makedonia,+ e fyo ndekukoselesha na nomba, ukuti ukonkomeshe+ bamo baleke ukusambilisha isambilisho limbi,+ 4 kabili belabika amano ku malyashi ya bufi+ na ku fyo ifikolwe fyakonkana, ifintu ifishafwa kantu,+ lelo ifileta fye amepusho ukucila ukusambilisha ifya kwa Lesa ifya kukosha icitetekelo. 5 Awe ico nakupeelela ici cipope ni pa kuti tube no kutemwa+ ukufuma mu mutima+ uwasanguluka na kampingu+ umusuma ne citetekelo icabula ubumbimunda.+ 6 Bamo pa kupaasuka kuli fi fintu balyalukila+ ku malyashi ya fye,+ 7 bafwaya ukuba bakasambilisha+ wa mafunde,+ lelo abashaishiba ifyo basosa nangu ifyo bakosapo fye ukulanda.
8 Lelo twalishiba ukuti Amafunde yaliwama+ kulila fye umuntu aleyakonka ukulingana no mo yalola+ 9 pa kwishiba ici cishinka, ukuti ifunde talipangilwa umulungami, lelo lipangilwa bampulamafunde+ na bashinakila,+ abashipepa na babembu, abashakwata icikuuku,+ abasuula ifya mushilo, abepaya bashibo na bepaya banyinabo, na bepaya abantu bambi, 10 aba bulalelale,+ ababembuka na baume banabo, abafyusha abantu, aba bufi, abalapa ubufi,+ na bacita conse cimbi icapusana+ ne sambilisho ilituntulu+ 11 ukulingana ne mbila nsuma iya bukata iya kwa Lesa wa nsansa,+ iyo naseekeshiwe.+
12 Ndetootela Kristu Yesu Shikulwifwe, uwankoseshe, pantu amwene ukuti nali uwa cishinka+ pa kumpeela uyu mulimo,+ 13 nangu ca kutila kale nali uwa miponto kabili uwalecusha+ abantu bakwe kabili uwa musaalula.+ Lelo, nabelelwe uluse,+ pantu nshaishibe+ ifyo nalecita kabili nacitiile mu kubula icitetekelo. 14 Lelo icikuuku ca kwa Lesa ica kwa Shikulwifwe califulishe+ pamo ne citetekelo no kutemwa ukwa muli Kristu Yesu.+ 15 Ya cishinka kabili yalilinga ukusumina nga nshi amashiwi+ ayatila, Kristu Yesu aishile muli ici calo ku kupususha ababembu.+ Pali aba ababembu, uwacilapo nine.+ 16 Awe, umulandu nabelelwe uluse+ ni co Kristu Yesu alangile ukushishimisha kwakwe konse ukupitila muli ine, ne mubembu uwacilapo, ukuti mbe ica kumwenako kuli bonse abakamutetekela+ pa kuti bakabe no mweo wa muyayaya.+
17 Awe ku Mfumu ya muyayaya,+ iishifwa,+ iishimoneka,+ Lesa eka fye,+ kube umucinshi no bukata pe na pe.+ Ameni.
18 Ici cipope+ ndepeela iwe, we mwana wandi Timote, ukulingana ne fyasobelwe+ pali iwe, ukuti muli ifi e mo ulelwila ubulwi ubusuma;+ 19 ukuba ne citetekelo na kampingu umusuma,+ uo bamo bakaana+ kabili balibunsha icitetekelo cabo.+ 20 Humenai+ na Alekisanda+ baba pali aba, kabili nalibapeela kuli Satana+ pa kuti bafundwe ukuleka ukuponta.+
2 E ico, ica kubalilapo, ndekoselesha bonse ukuti balepapaatilako, no kupepelako,+ no kulombelako e lyo no kutashishako abantu abalekanalekana,+ 2 ishamfumu+ na bashimucindikwa bonse;+ pa kuti tuleikala mu mutende kabili mu cibote pa kuti tufishepo bukapepa bwesu no kulabika amano ku fintu.+ 3 Ukucita ifi kusuma kabili kwaliwama+ mu menso ya kwa Lesa, Umupusushi wesu,+ 4 uufwaya ukuti abantu balekanalekana+ bakapusuke+ no kwishiba+ bwino bwino icine.+ 5 Pantu kwaba Lesa umo,+ kabili kawikishanya+ umo pa kati ka kwa Lesa+ na bantu,+ Kristu Yesu umuntu,+ 6 uwaipeele umwine ukuba icilubula icalinganako pa mulandu wa bonse+—ici e ca kulashimikwa pa nshita ya ciko. 7 Ni pali uyu wine mulandu+ nasonteelwe ukuba kabila kabili umutumwa+ uwa kusambilisha abena fyalo+ pa citetekelo+ ne cine, ndelanda icishinka,+ nshilebepa iyo.
8 E ico ndefwaya ukuti konse uko mwalongana abaume batwalilile ukulapepa, baleimya amaboko mu cishinka,+ ababula ubukali+ ne fikansa.+ 9 Ifyo fine ndefwaya abanakashi balefwala bwino, balefwala ifyalinga+ kabili ifya mucinshi, belaluka imishishi iyaibela, nangu ukufwala ifya golde nangu ifya bamargariti nelyo ifya kufwala fya mutengo sana,+ 10 lelo balefwala mu nshila iyalinga abanakashi abatila balatiina Lesa,+ e kutila ukupitila mu milimo isuma.+
11 Umwanakashi abe tondolo pa kusambilila mu kunakila konse.+ 12 Nshilesuminisha umwanakashi ukusambilisha,+ nelyo ukutungulula umwaume,+ lelo ukuba tondolo. 13 Pantu Adamu e wabalilepo ukubumbwa, e lyo pakonka Efa.+ 14 Kabili, Adamu tabamubepele iyo,+ lelo umwanakashi e o babepele+ ica kuti apula na mwi funde.+ 15 Lelo abanakashi bakapusuka pa mulandu wa kufyala abana,+ kulila fye batwalilila ne citetekelo no kutemwa ne mibele iisuma pamo na mano ayatuntulu.+
Umuntu nga alefwaya ukuba kangalila,+ ninshi alefwaya umulimo uusuma. 2 E ico kangalila afwile ukuba uushitungwa akabi,+ umulume wa mukashi umo, uwa misango iisuma,+ uwa mano ayatuntulu,+ tafwile ukuba uwa cimfulumfulu,+ afwile ukulapokelela abeni,+ uwafikapo ukusambilisha,+ 3 te cakolwa,+ te upuma,+ afwile ukuba uushipampamina fye pa cintu cimo,+ uushaba na lubuli,+ uushatemwa ndalama,+ 4 umuntu uutungulula bwino aba mu ng’anda yakwe,+ uwaba na bana abanakila kabili aba mucinshi nga nshi;+ 5 (pantu umuntu nga cine cine taishiba ukutungulula aba mu ng’anda yakwe, kuti asakamana shani icilonganino ca kwa Lesa?) 6 te muntu umupya iyo,+ epali aba ne cilumba+ no kupingulwa nga filya Satana Kaseebanya apingulwa.+ 7 Kabili, afwile ukuba umuntu uo bashimika bwino na ku baba ku nse ya cilonganino,+ epali aseebana kabili awila mu citeyo+ ca kwa Satana Kaseebanya.
8 Ababomfi batumikila+ na bo bene balebika amano ku fintu, tabafwile ukuba aba ndimi shibili, nelyo abatemwisha umwangashi uwingi, kabili tabafwile ukuba abatemwisha ubunonshi bwa bufumfuntungu,+ 9 babe abasunga inkama+ ya kwa Lesa iya citetekelo na kampingu uwasanguluka.+
10 Kabili, aba babale beshiwe pa kuti bamonwe nga nabalinga,+ e lyo bengabomba ubutumikila, pa kuba ababulwa umulandu.+
11 Abanakashi ifyo fine babe abaicindika, te ba lwambo,+ babe abatekanya,+ aba cishinka muli fyonse.+
12 Ababomfi batumikila babe abalume ba mukashi umo,+ abatungulula bwino abana babo na ba mu ng’anda yabo.+ 13 Pantu abaume ababomba bwino balashimikwa+ bwino kabili kuti balanda no kushipa+ ukwingi pa citetekelo muli Kristu Yesu.
14 Nangu ca kutila ndesubila ukwisa bwangu kuli iwe, ndekulembela ifi fintu,+ 15 pa kuti nga nakokola wishibe ifyo ufwile ukuisunga mu ng’anda ya kwa Lesa,+ iyaba cilonganino ca kwa Lesa wa mweo, uluceshi+ apashintilila icine. 16 Cine cine, inkama+ ya kwa Lesa iya ubu bukapepa ikalamba nga nshi: ‘Alengelwe ukumoneka mu mubili,+ alungamikilwe ku mupashi,+ amonekele kuli bamalaika,+ abililwe mu bena fyalo,+ atetekelwe mu calo,+ apokelelwe mu muulu no bukata.’+
4 Lelo, amashiwi ayafuma ku mupashi wa mushilo yasosa apabuuta ukuti ku ntanshi kukaba inshita+ ilyo bamo bakalufya+ icitetekelo, no kubika amano ku mashiwi ya kulufya ayafuma ku mipashi+ na ku fisambilisho fya fibanda,+ 2 pa mulandu wa bufi+ bwa bantu aba bumbimunda abo kampingu+ wabo afwa, uwaba kwati untu baoca ku cela icakaba; 3 abakaanya ukuupa,+ abalesha ukulya ifya kulya+ ifyo Lesa alengele+ ukuti ababa ne citetekelo+ kabili abaishiba icine bwino balelya no kutootela. 4 Umulandu wa kuti conse ico Lesa abumba cisuma,+ kabili takuli ico umuntu afwile ukukaana+ nakalya nga capokelelwa pamo no kutootela,+ 5 pantu icebo ca kwa Lesa ne pepo e filenga ukuti cibe ica mushilo.
6 Nga ulepanda aba bwananyina aya mano ukaba umubomfi umusuma uwa kwa Kristu Yesu, uuliisha umutima wakwe ku mashiwi ya citetekelo na ye sambilisho+ ilisuma ilyo wakonka nga nshi.+ 7 Awe kaana amalyashi+ ya bufi ayashumfwana ne fya mushilo ayo abanakashi abakote bashimika. Lelo, ulebombesha pa kuti uleipeelesha kuli bukapepa.+ 8 Pantu ukutukusha umubili kwafwa fye panono; lelo bukapepa+ bwafwa mu fintu fyonse,+ pantu muli bukapepa mwaliba isubilo lya kuba no bumi pali nomba e lyo na ku ntanshi.+ 9 Aya mashiwi ya cishinka kabili yalinga ukuyasumina no mutima onse.+ 10 E mulandu wine tulebombesesha nga nshi no kulwisha sana,+ pantu twasubila+ muli Lesa wa mweo, uuli Mupusushi+ wa bantu ba misango yonse,+ maka maka aba cishinka.+
11 Ulekonkomesha+ ifi fintu no kufisambilisha.+ 12 Wileka umuntu nangu umo asuule ubulumendo bobe.+ Lelo, ube ica kumwenako+ ku batetekela+ mu milandile, mu myendele, mu kutemwa, mu citetekelo, na mu kusanguluka.+ 13 Ilyo nshilaisa, twalilila ukubika amano ku kubelenga+ pa cintubwingi,+ ukukonkomesha, no kusambilisha. 14 Wilekelesha ica bupe+ icaba muli iwe icapeelwe kuli iwe ilyo bakasesema baseseme+ pali iwe kabili ilyo ibumba lya bakalamba lyabikile iminwe+ pali iwe. 15 Uletontonkanya pali ifi fintu;+ ulebikako sana amano, pa kuti bonse balemona ukulunduluka+ kobe. 16 Lyonse uleisakamana we mwine,+ ulesakamana ne fyo ulesambilisha.+ Ikalilila muli ifi fintu, pantu nga wacita ifyo ukaipususha we mwine na balekumfwa.+
5 Wilakalipila umwaume umukalamba+ bukali bukali. Lelo, ulemupapaata nga wiso. Abalumendo ulebamona nga bamunonko, 2 abanakashi+ abakalamba nga banoko, abakashana nga bankashi+ yobe mu kusanguluka konse.
3 Cindika bamukamfwilwa abashikwete aba kubasunga.+ 4 Lelo nga mukamfwilwa alikwata abana nelyo abeshikulu, aba basambilile intanshi ukusunga aba mu ng’anda+ yabo ukulingana na bukapepa no kulabweseshapo ico bafwile ukupeela abafyashi+ babo na bashikulwibo na banakulwibo, pantu ici e cisuma mu menso ya kwa Lesa.+ 5 Nomba mukamfwilwa uushikwete uwa kumusunga lelo uwashala fye eka,+ atetekela muli Lesa+ no kutwalilila mu fya kupapaata na mu mapepo ubushiku na kasuba.+ 6 Lelo uuipoosa mu fya lunkumbwa+ lwa mubili alifwa+ nangu ca kutila acili uwa mweo. 7 E ico ulebakonkomesha+ ifi fintu, pa kuti babe abashitungwa akabi.+ 8 Na cine umuntu nga tasakamana abantu bakwe,+ maka maka aba mu ng’anda+ yakwe, ninshi nakaana+ icitetekelo+ kabili abipa ukucisha no ushatetekela.
9 Mukamfwilwa mumulembe pa mashina ya bamukamfwilwa abalekabila ubwafwilisho nga alicila pa myaka amakumi mutanda (60), nga ali fye no mulume umo,+ 10 nga balamushimika ukuti alebomba imilimo iisuma,+ nga akushishe abana bwino,+ nga alepokelela abeni,+ nga alesamba amakasa ya ba mushilo,+ nga aleafwilisha abalecula,+ nga ali-ipeeleshe mu kubomba imilimo yonse iisuma.+
11 Lelo bamukamfwilwa abakashana wibalemba, pantu ilyo insuuna yabo yabafumya ku kucita ukufwaya kwa kwa Kristu,+ bafwaya ukuupwa, 12 balapingulwa pantu nabasuula icitetekelo cabo ica ntanshi.+ 13 Kabili tababa ne fya kucita, baseuluka fye mu mayanda; kabili te ici ceka, lelo balaba aba mulomo kabili balaibika mu milandu ya bantu bambi,+ balanda ifyo bashifwile ukulanda. 14 E ico ndefwaya bamukamfwilwa abakashana bopwe+ no kufyala abana,+ balesakamana amayanda yabo, belalenga abalwani bakwate apa kupontela.+ 15 Na kuba, kale kale bamo balipaasuka no kukonka Satana. 16 Umwanakashi onse uwasumina nga alikwata bamukamfwilwa, abaafwe,+ pa kuti icilonganino ciiba ne cisendo. E lyo cingaafwa abali bamukamfwilwa abashikwete aba kubasunga.+
17 Abakalamba abatungulula+ bwino balingile ukupeelwa umucinshi ubili,+ maka maka ababombesha mu kulanda na mu kusambilisha amashiwi ya kwa Lesa.+ 18 Pantu ilembo litila: “Wilakaka ing’ombe ku kanwa ilyo ilenyantaula ingano pa kushisokola”;+ na limbi litila: “Umubomfi alinga ukupeelwa amalipilo yakwe.”+ 19 Wisumina umulandu balepeela umukalamba, kano fye pa bushininkisho bwa nte shibili nelyo shitatu.+ 20 Abacita ulubembu+ ulebebawila+ pa menso ya bonse, pa kuti na bashala baletiina.+ 21 Ndekukonkomesha pa menso ya kwa Lesa na ya kwa Kristu Yesu+ na ya bamalaika abasalwa ukuti usunge ifi fintu ukwabula umuncishanya, wiba na kapaatulula muli fyonse ifyo ulecita.+
22 Wila-angufyanya ukubika iminwe+ pa muntu;+ kabili wikumako ku membu sha bambi;+ uleisunga uwasanguluka.+
23 Wilanwa amenshi na kabili, lelo ulenwa umwangashi+ uunono pa mulandu wa kuti ulalwala mu mala kabili ulalwalilila.
24 Imembu sha bantu bamo shilamoneka apabuuta,+ no kutwala ku bupingushi ilyo line, lelo imembu sha bambi shena shimoneka pa numa.+ 25 Ne milimo iisuma na yo ilamoneka+ apabuuta e lyo iyabipa na yo te kuti ifisame.+
6 Bonse abali abasha bamone ukuti bashikulwibo balilinga ukubacindika sana,+ pa kuti ishina lya kwa Lesa ne sambilisho fiipontelwa.+ 2 Kabili, abali na bashikulwibo+ abasumina belabasuula,+ pantu fye ni bamunyinabo.+ Lelo, bababombele bwino ukucilapo, pantu abalenonkelamo mu milimo yabo iisuma bantu abasumina kabili abo batemwa.
Ulesambilisha ifi fintu+ no kukonkomesha ifi fintu. 3 Ngo muntu asambilisha icisambilisho+ cimbi kabili tasuminishe amashiwi ayatuntulu,+ aya kwa Shikulwifwe Yesu Kristu, nelyo isambilisho ilyalingana na bukapepa,+ 4 ninshi natuumikwa,+ taleumfwikisha nangu cimo,+ lelo alipena+ ku fya kwipushaipusha no kukansanina pa mashiwi.+ Muli ifi fintu e mufuma umufimbila,+ ifikansa, umusaalula,+ umutunganya uwabipa, 5 ukukansana kukalamba pa twa buwelewele fye. Abacita ifi, bantu abaonaika amatontonkanyo+ kabili ababulwa icine,+ abatila bukapepa ca kunonkelamo.+ 6 Kwena, bukapepa+ pamo no kuteka+ umutima bunonshi ubukalamba.+ 7 Pantu tatwaletamo akantu muli ici calo, kabili teti tufumyemo akantu.+ 8 E ico, pa kuba ne fya kulya ne fya kufwala no mwa kwikala, tuteke imitima kuli ifi fine.+
9 Lelo abafwaisha ukuba ne fyuma bawila mu matunko+ kabili mu citeyo kabili mu lunkumbwa+ ulwingi ulwa kutumpa kabili ulwa kubaletelela, ifitwala abantu mu kuloba kabili mu bonaushi.+ 10 Pantu ukutemwa+ indalama e ntulo+ ya bubi bwa misango yonse,+ kabili bamo pa kushitemwisha balilufya icitetekelo no kuilasaula abene amacushi ayengi.+
11 Lelo iwe, we muntu wa kwa Lesa, fulumuka ifi fintu.+ Awe konkelela ubulungami, bukapepa, icitetekelo, ukutemwa, ukushipikisha no kufuuka.+ 12 Ulelwa ubulwi ubusuma ubwa citetekelo,+ ikatisha ku mweo wa muyayaya uo waitilweko kabili uo wailandile+ bwino bwino pa menso ya nte ishingi.
13 Ndekukonkomesha+ pa menso ya kwa Lesa, uusunga ifya mweo fyonse, na pa menso ya kwa Kristu Yesu, uyo pamo nge nte+ uwabilile+ bwino bwino kuli Ponti Pilato pa ntanshi ya bantu abengi,+ 14 ukuti ukonke ifunde ukwabula ukulufyanya kabili ukwabula umulandu ukufika fye na pa kumoneka+ kwa kwa Shikulwifwe Yesu Kristu. 15 Ilyo iyo nshita ikafika,+ Uwa Maka+ eka kabili uwa nsansa ali no kuilanga, apo ena ni Mfumu+ ya shamfumu kabili ni Shikulu+ wa bashikulu, 16 uyo eka fye uushifwa,+ uwaikala mu lubuuto ulo takuli uwingapalamako,+ uo umuntunse nangu umo tabala amona na kabili te kuti amumone.+ Kuli ena kube umucinshi+ na maka umuyayaya. Ameni.
17 Konkomesha aba fyuma+ muli cino calo ukuti belaitakisha,+ nangu ukucetekela ifyuma ifishibelelela,+ lelo balecetekela Lesa, uutupeela ifintu fyonse ifyo tuipakisha;+ 18 ubebe ukulacita ifisuma,+ ukulabomba sana imilimo iisuma,+ ukuba bakapekape, abaiteyanya ukupako bambi,+ 19 pa kucita ifi bakaisungila+ abene umufula+ uusuma uwa kukuulapo ku ntanshi, no yu mufula ukaba e cuma cabo, pa kuti bekatishe ku mweo wine wine.+
20 We Timote, ulesunga bwino ico baseekesha kuli iwe,+ taluka ku milandile ya fye iikowesha ica mushilo na ku fya kupilika ifya cintu ca bufi iciitwa “ukwishiba.”+ 21 Pantu pa kufwaya ukulangisha ukwishiba kwa musango yo bamo balilufya icitetekelo.+
Icikuuku ca kwa Lesa cibe na imwe.