Kalata wa Ntanshi uwa kwa Petro

1 Ine ne Petro, umutumwa+ wa kwa Yesu Kristu, nalembela imwe mwe balebeshi+ abasalanganina+ mu fyalo fya Ponte, Galatia, Kapadokia,+ Asia,* na Bitunia, mwe basalwa+ 2 kuli Lesa shifwe+ ukulingana no mo umwine aishibile kabela kabili mwe bo umupashi+ wa kwa Lesa walenga ukuba aba mushilo pa kuti mube ne cumfwila kabili pa kuti bamusanse+ umulopa wa kwa Yesu Kristu:+

Icikuuku ca kwa Lesa no mutende fifule kuli imwe.+

3 Abe uwacindikwa Lesa kabili Wishi wa kwa Shikulwifwe Yesu Kristu,+ pantu pa kubuusha+ Yesu Kristu ku bafwa, Lesa atukwatile uluse ulukalamba no kutufyala+ cipya cipya. E lyo ici calenga ukuti tukwate isubilo+ ilyafikapo, 4 ilya kupyana icishingabola kabili icishakowela kabili icishingakota.+ Ubu bupyani bwaba mu muulu kabili bwasungilwa imwe.+ 5 Apo imwe mwalitetekela+ Lesa, na o ku maka yakwe akulamusunga pa kuti mukamone ipusukilo+ ilikasokoloka+ mu nshita ya kulekelesha.+ 6 Pali uyu mulandu mulesekelela nga nshi, nangu ca kuti ni pa kashita fye akanono, nacilinga ukuti mube no bulanda pa mulandu wa macushi+ ayalekanalekana. 7 Aya macushi e yesha icitetekelo+ cenu ukumona nga calikosa. Nga filya fine fye na golde iyonaika baishibila ukukosa mu mulilo,+ kanshi na imwe muli no kucula pa kuti icitetekelo cenu cikose, icacila na pali golde ukucindama. Ilyo Yesu Kristu akasokoloka,+ e lyo akamutasha no kumulumbanya no kumucindamika pa citetekelo cenu. 8 Nangu ca kuti tamwamumwene, mwalimutemwa.+ Nangu tamumumona pali nomba, mulamutetekela no kusansamuka sana no kusekelela nga nshi, 9 pantu mukapokelela icikafuma mu citetekelo cenu, e kutila ipusukilo lya myeo yenu.+

10 Pali ili line ipusukilo, e po bakasesema abaseseme+ pa cikuuku ca kwa Lesa ico mwapeelwa,+ balefwailisha no kusokota.+ 11 Bale-esha ukwishiba inshita+ atemwa ifyo iyo nshita yali no kuba ukulingana ne fyo umupashi+ uwali muli bena walebeba pali Kristu+ ilyo wabalangiile libela amacushi Kristu+ aali no kuculako e lyo no bukata bwalekanalekana+ ubo aali no kwisapeelwa. 12 Lesa alisokolwelele aba bakasesema ukuti ifyo balesesema tafyali fya kubawamina abene,+ lelo ni mwe balepekanisha aya mashiwi ayo balebila+ kuli imwe abantu abalemushimikila imbila nsuma ukubomfya umupashi+ wa mushilo uo babatumiine ukufuma ku muulu. Muli ifi fine fintu bamalaika balakumbwa ukulengelamo.+

13 Kanshi teyanyeni imitima yenu ku kubombesha,+ tekanyeni nga nshi;+ mulesubila fye icikuuku+ ca kwa Lesa icikamwishila ilyo Yesu Kristu akasokoloka.+ 14 Apo muli bana ba cumfwila, mwilakonkelela+ ulunkumbwa ulo mwakwete ilyo tamulaishiba Kristu. 15 Lelo, filya Lesa uwamwitile aba Uwa Mushilo, e fyo na imwe mube aba mushilo mu myendele yenu yonse,+ 16 pantu calembwa ati: “Muleba aba mushilo, pantu ine ndi wa mushilo.”+

17 Kabili, nga mulilila kuli Shifwe uupingula ukwabula akapaatulula+ ukulingana fye no mulimo wa muntu umo umo, kanshi muleba na katiina+ kuli ena inshita yonse ilyo mucili abalebeshi.+ 18 Pantu mwalishiba ukuti tabomfeshe ifintu ifyonaika,+ ifili nga silfere atemwa golde, pa kumulubula ku mibele yenu iya fye ifisabo iyo mwapyene+ ku fikolwe fyenu. 19 Lelo amulubwilile ku mulopa+ wa mutengo, nga ulya uwa mwana wa mpaanga uwabula akalema kabili uwabula akabi,+ e kuti ku mulopa wa kwa Kristu.+ 20 Cine cine, aishibikwe ilyo icalo tacilabako,+ lelo amoneke mu nshiku sha kulekelesha pa mulandu wenu+ 21 kabili muli ena e mo mwatetekela Lesa,+ uwabuushishe Kristu ku bafwa+ no kumupeela ubukata;+ pa kuti icitetekelo cenu ne subilo lyenu fibe fye muli Lesa.+

22 Apo nomba mwalisanguluka+ pa kumfwila icine pa mulandu wa kutemwa+ aba bwananyina ukwabula ubumbimunda, kanshi muletemwana nga nshi ne mitima yenu yonse.+ 23 Pantu ukufyalwa mwafyalwa cipya cipya,+ te kwa ku lubuto ulubola,+ lelo kwa ku lubuto+ ulushibola,+ ukupitila mu cebo+ ca kwa Lesa wa mweo, uwabako umuyayaya.+ 24 Pantu “abantu bonse baba nge cani, no bukata bwabo bonse bwaba ngo buluba bwa cani;+ icani cilabonsa, ne luba lilalukuta,+ 25 lelo icebo ca kwa Yehova caikalilila pe.”+ Awe, ici e “cebo,”+ icabililwe+ kuli imwe.

2 E ico, talukeni ku bubi+ bonse na ku bucenjeshi bonse na ku bumbimunda na ku mufimbila na ku misango yonse iya milandile yabipa.+ 2 Mube kwati tunya utwafyalwa nomba,+ ukulafuluka umukaka+ uwasanguluka uwaba mu mashiwi ya kwa Lesa, e kuti nga mwalanwa uyu mukaka mukule pa kuti mukapusuke,+ 3 kulila fye mwasonda ukuti Shikulu wa cikuuku.+

4 Ilyo muleisa kuli ena, e kutila ku libwe+ lya mweo, ilyo abantu+ bakeene,+ lelo ilyo Lesa asalile, ilya mutengo,+ 5 na imwe mwe mabwe ya mweo, ninshi mulekuulwa ukuba ing’anda+ ya kwa Lesa pa mulandu wa bushimapepo bwa mushilo, ku kutuulila Lesa amalambo+ ya ku mupashi ayapokelelwa muli Yesu Kristu.+ 6 Pantu calembwa mu Malembo ya Mushilo, ati: “Moneni! ndebika ilibwe mu Sione, ilyasalwa, ilibwe lya pa koona ilya kukuulapo, ilya mutengo; kabili onse uulitetekela takalengwe insoni.”+

7 E ico, ni kuli imwe aba uwa mutengo, pantu mwalitetekela; lelo ku bashatetekela, “ili line ilibwe ilyo bakakuula bakeene+ e lyaisaba ilibwe ilya pa muulu pa koona,”+ 8 kabili lyaisaba “ilibwe lya kuipununako kabili icilibwe ca kupunwisha.”+ Aba balaipununa pantu tabomfwila icebo ca kwa Lesa. Ici e co babateyanishishe.+ 9 Lelo imwe muli “mushobo uwasalwa, bashimapepo kabili ishamfumu, uluko lwa mushilo,+ abantu bakwe abaibela,+ pa kuti mubile konse konse ubucindami”+ bwa wamwitile ukuti mufume mu mfifi mwingile mu lubuuto lwakwe ulwapesha amano.+ 10 Pantu kale tamwali abantu ba kwa Lesa, lelo nomba muli bantu bakwe;+ tamwabelelwe uluse, lelo nomba mwalibelelwa uluse.+

11 Mwe batemwikwa, apo muli beni kabili abalebeshi+ ndemukoselesha ukuti muletaluka ku lunkumbwa lwa fifwaya imitima yenu,+ ifi fine e fingalenga ukuti mwiba no mweo.+ 12 Mube ne myendele iisuma mu bena fyalo,+ e pa kuti nelyo balemupontela kwati mulacita ifyabipa, bakesecindika Lesa pa bushiku bwa cipempu+ cakwe pa kumona imilimo+ yenu iisuma.

13 Pa mulandu wa kwa Shikulu, mulenakila+ umuntu onse:+ nampo nga ni mfumu+ pantu e mukalamba pali bonse 14 atemwa abalashi pantu e bo imfumu yapeela amaka ya kukanda abacita ifyabipa no kutasha abacita icisuma.+ 15 Pantu e fyo Lesa afwaya ukuti pa kucita icisuma mutalalike imilandile ya kusabaila iya bawelewele.+ 16 Mube abantungwa,+ nomba mwilabomfya ubuntungwa bwenu nga kabepekesho ka kucitilamo ifyabipa,+ lelo mube nga basha ba kwa Lesa.+ 17 Mulecindika abantu aba misango yonse,+ muletemwa aba bwananyina bonse,+ muleba na katiina kuli Lesa,+ kabili mulecindika imfumu.+

18 Mwe babomfi ba mu ng’anda mulenakila+ abamwingisha incito no kubabela akatiina,+ mwilacita fye ifi ku basuma beka nangu abanakilila, lelo na ku ba-afya. 19 Pantu umuntu nga ashipikisha ifilenga ubulanda kabili afyengwa pa mulandu wa kutiina Lesa, ninshi Lesa akamupaalilapo.+ 20 Pantu nga mwashipikisha ilyo balemutoba amapi pa mulandu wa kubembuka, busuma nshi mwingamwenamo?+ Lelo nga mwashipikisha mu macushi+ pa mulandu wa kucita icisuma, ninshi Lesa akamupaalilapo.+

21 Na kuba, ni kuli ici cine Lesa amwitiile, pantu ni mwe Kristu aculiile,+ kabili amushilile ne cilangililo pa kuti mulekonka sana mu ntampulo shakwe.+ 22 Kristu ena tacitile ulubembu,+ kabili tatalile alanda ifya bucenjeshi.+ 23 Ilyo balemutuka,+ ena tabatukilemo.+ Ilyo alecula,+ talebapangila, lelo aleituula fye kuli Lesa+ uwaba no mulinganya mu bupingushi. 24 Ena e wasendele imembu+ shesu mu mubili wakwe pa cimuti ico afwililepo,+ pa kuti tulubuke ku membu+ no kuba abalungami. Kabili “ifilaso fyakwe e fyaundepe imwe.”+ 25 Pantu kale mwali kwati ni mpaanga ishaluba;+ lelo nomba mwalibwelela ku mucemi+ kabili kangalila wa myeo yenu.

3 E cimo cine+ na imwe mwe bakashi, mulenakila+ abalume benu, pa kutila na balya abakaana ukumfwila+ icebo ca kwa Lesa, banashiwe+ apabula ishiwi nangu limo ilyo balemona imibele isuma iya bakashi babo,+ 2 pantu abene bakulaimwena imyendele yenu iisuma+ e lyo ne fyo mwabakwatila akatiina. 3 Kabili mwilabika amano ku kuluka umushishi+ no kufwala ifya kuisaamika+ ifya golde atemwa ku kufwala ifya kufwala ifisuma, 4 lelo mulebika amano ku buntu+ bwa mu kati na ku fya kufwala+ fya buko ifishingonaika, e kutila umutima+ uwaikala tondolo kabili uwafuuka, uwauma umutengo mu menso ya kwa Lesa. 5 Pantu e fyo na ku kale abanakashi ba mushilo abalesubila muli Lesa baleisaamika, no kunakila abalume babo. 6 E fyo na Sara alenakila Abrahamu, no kumwita ati “shikulu.”+ Na imwe muli bana ba kwa Sara, kulila fye mulecita icisuma, kabili tamukwete no mwenso wa kutiina nelyo cimo.+

7 Na imwe mwe balume, muleikala ifi fine+ na bakashi benu ukulingana no kwishiba,+ mulebacindika+ nge cipe icanaka, pantu banakashi, na imwe muli mpyani+ pamo na bo isha mweo uwa bupe fye, e pa kuti amapepo yenu yepeleela.+

8 Ica kulekelesha ndeti, bonse muleba no mutima umo,+ mulelangulukilana, muletemwa aba bwananyina, muleba aba nkumbu,+ kabili muleicefya mu mitima.+ 9 Mwilabwesesha ububi pa bubi+ atemwa umusaalula pa musaalula,+ lelo mulepaala,+ pantu e co mwaitiilwe ukuti mulekonka iyi ine mibele, e pa kuti mukapyane ipaalo lya kwa Lesa.

10 Pantu calembwa ukuti, “uufwaya umweo no kwikala bwino,+ aleshe ululimi+ lwakwe ukuti lwilanda ifyabipa, aleshe ne milomo yakwe ukuti ilanda ubucenjeshi,+ 11 awe ataluke ku fyabipa+ no kucita ifisuma; afwaye umutende no ku-ukonkelela.+ 12 Pantu amenso+ ya kwa Yehova yaba pa balungama, na matwi yakwe yomfwa ukupapaata kwabo;+ lelo icinso ca kwa Yehova cili pa bacita ifyabipa.”+

13 Nomba nga mwalicincila mu kucita icisuma, nani engamucita icabipa?+ 14 Nga mwaculila ubulungami, ninshi mwalipaalwa.+ E ico mwilatiina ico batiina+ kabili mwilasakamana.+ 15 Mulecindika Kristu mu mitima yenu ukuti ni Shikulu,+ kabili lyonse muleba abaiteyanya ukwasuka+ umuntu onse uwingamwipusha pe subilo lyenu, lelo muleasuka no mutima uwafuuka+ na katiina.

16 Kwateni kampingu musuma,+ pa kuti ilyo bamupontela, bekatwe insoni+ abalesuusha imyendele yenu iisuma iya bwina Kristu.+ 17 Pantu cawamapo ukuculila pa kucita icisuma,+ nga e fyo Lesa alefwaya, ukucila ukuculila pa kucita icabipa.+ 18 Pantu, na Kristu afwile fye umuku umo pa mulandu wa membu shesu,+ uwalungama afwiliile abashalungama,+ pa kuti amutungulule kuli Lesa.+ Bamwipeye no mubili wa buntunse,+ lelo abuushiwe no mubili wa ku muulu.+ 19 Kabili muli uyu wine musango aile no kubila imbila ku mipashi iyaba mu cifungo,+ 20 iishakwete icumfwila+ mu nshiku sha kwa Noa, lilya Lesa atekele umutima+ ilyo icibwato calepangwa,+ umo abantu abanono fye abaali cinekonsekonse (8) bapusukiile ku menshi.+

21 Icalingana ne ci e cilemupususha nomba,+ e kutila, ulubatisho ukupitila mu kubuuka kwa kwa Yesu Kristu.+ (Ulu lubatisho te kusamba ifiko, lelo kulomba kampingu musuma kuli Lesa.)+ 22 Yesu aile ku muulu uko nomba aikala ku kwa ku kulyo+ kwa kwa Lesa; na bamalaika+ na bamulopwe na ba maka balengelwe ukunakila ena.+

4 E ico, apo Kristu aliculile ilyo aali no mubili wa buntunse,+ na imwe bene mufwile ukwenekela ukucula;+ pantu uwacula ilyo ali no mubili wa buntunse naleka ukubembuka,+ 2 pa kuti inshita iyashala eikalila ukulacita ifya lunkumbwa,+ lelo alecita fye ukufwaya kwa kwa Lesa.+ 3 Pantu inshita+ mwalecitamo ukufwaya kwa bantu ba ici calo+ ilyo mwale-enda mu mibele ya kuilekelesha,+ mu lunkumbwa, mu kunwensha umwangashi,+ mu kuwowota, mu kukolwakolwa na mu kupepa utulubi ukwabindwa, ikalamba sana.+ 4 Apo nomba tamulebakonka na kabili muli iyi mibele yabipa iya kuilekelesha,+ abashaishiba Lesa balapapa kabili balamusaalula.+ 5 Lelo aba bantu bakalubulula ku waiteyanya+ ukupingula aba mweo na bafwa.+ 6 Na kuba, e mulandu wine imbila nsuma yabiliilwe na ku baali nga bafwa,+ pa kutila basuulwe ku bantunse+ lelo kuli Lesa babe aba mweo pa kukonka amafunde+ yakwe.

7 Awe impela ya fyonse naipalama.+ E ico, beni aba mano,+ kabili beni abalola mu kupepa.+ 8 Lelo ukucila pali ifi fyonse, muletemwana nga nshi,+ pantu ukutemwa kufimba pa membu ishingi.+ 9 Mulesekelelana ukwabula ukuilishanya.+ 10 Imwe bonse Lesa alimupeela ubupe bwaibela umo umo. Apo muli babomfi abasuma abo Lesa alanga icikuuku mu nshila shalekanalekana, mulebomfya ubupe Lesa amupeela ku kubombela abanenu.+ 11 Uulelanda, alande amashiwi+ ya mushilo aya kwa Lesa; uulebombela bambi,+ abombe ku maka ayo Lesa amupeela;+ pa kuti muli fyonse Lesa acindikilwe+ muli Yesu Kristu. Ubukata+ na maka fyakwe pe na pe. Ameni.

12 Mwe batemwikwa, mwipapa pa macushi ayalemuponena ayali ngo mulilo uulepya muli imwe.+ Mwilamona aya macushi kwati cintu icishifwile ukumucitikila. Yabelako ku kumwesha. 13 Lelo, mulesekelela+ pantu amacushi muleculako e yo na Kristu aculileko,+ e pa kuti na lintu ubukata bwakwe bukasokoloka+ mukasekelele no kwanga. 14 Abantu nga balemupontela pa mulandu we shina lya kwa Kristu,+ ninshi mwalipaalwa,+ pantu ninshi umupashi uumulenga ukucindama, e kutila umupashi wa kwa Lesa, uli na imwe.+

15 Lelo, umuntu nangu umo pali imwe eculila+ pa mulandu wa kwipaya nelyo pa bupuupu nelyo pali buncitatubi nelyo pa kuba uwa mulomo.+ 16 Lelo nga aculila+ pa kuba Umwina Kristu, eba ne nsoni,+ lelo mwi shina ili e mo alecindikila Lesa. 17 Pantu ino ni nshita ya kuti ubupingushi butendekele mu ng’anda ya kwa Lesa.+ Nomba nga bwatendekela pali ifwe,+ cikaba shani ku bashumfwila imbila nsuma ya kwa Lesa?+ 18 “Kabili umulungami nga apusuka kwempe,+ cikaba shani ku uushipepa na ku mubembu?”+ 19 E ico kanshi, na balecula pa kucita ukufwaya kwa kwa Lesa baleituula abene kuli Kabumba wa cishinka ilyo balecita icisuma.+

5 E ico, ndekonkomesha abakalamba abali muli imwe, apo na ine wine ndi mukalamba+ munabo kabili uwamweneko+ ukucula kwa kwa Kristu, kabili uukapokelelako ubukata ubukasokoloka,+ ndeti: 2 Mulecema+ umukuni wa kwa Lesa+ uo amupeela ukwangalila, mwilapatikishiwa fye uku-ucema, lelo muleitemenwa;+ mwilaucema pa kuti fye mumwenemo ubunonshi bwa nsoni,+ lelo mulebomba pa mulandu wa kuti mulefwaisha ukubomba. 3 Mwilatitikisha+ abantu ba kwa Lesa,+ lelo muleba abantu abo umukuni wingapashanya.+ 4 Kabili ilyo umucemi mukalamba+ akamoneka, mukapokelela icilambu+ ca bukata icishingonaika.+

5 Na imwe mwe balumendo, mulenakila+ abakalamba. Lelo imwe bonse, mube abaicefya* ku banenu+ pantu Lesa acincintila aba matutumuko, lelo apeela icikuuku cakwe ku baicefya.+

6 E ico, muleicefya mwi samba lya kuboko kwa maka ukwa kwa Lesa, pa kuti akamusansabike ilyo inshita ikafika iya kuti amusansabike.+ 7 Mulepoosa amasakamika+ yenu yonse pali ena, pantu asakamana imwe.+ 8 Beni abalola, cenjeleni.+ Umulwani wenu, Satana Kaseebanya, endauka nge nkalamo iilebuluma, iilefwaya untu ingalya.+ 9 Lelo mukaanyeni,+ beni abakosa ndi mu citetekelo, pa kwishiba ukuti bamunyinenwe bonse pano calo na bo balecula fye nge fi fine na imwe mulecula.+ 10 Lelo, ilyo mwacula inshita iinono,+ Lesa wa cikuuku conse, uwamwitile ku bukata+ bwakwe ubwa muyayaya muli+ Kristu, umwine akapwisha ukumusambilisha, akamwikasha,+ kabili akamukosha.+ 11 E mwine wa maka+ pe na pe. Ameni.

12 Silbani,*+ uo ine mona ukuti ni munyinefwe uwa cishinka, e o nabomfya ukumulembela aya mashiwi ayanono,+ ku kumukoselesha no kumushimikila ukuti ici e cikuuku ca kwa Lesa ica cine; e mo mwiminine ndi.+ 13 Uuli mu Babiloni,+ uwasalwa nga filya fine na imwe mwasalwa, amuposha, e lyo no mwana wandi Marko,+ na o amuposha. 14 Poshanyeni ukuposhanya kwa kutomonana.+

Umutende ube na imwe bonse mwe ba kwa Kristu.+